« ថ្ងៃទី ៩ ខែ ឧសភា ។ តើព្រះវិញ្ញាណបរិសុទ្ធអាចផ្ដល់ពរជ័យដល់ខ្ញុំរាល់ថ្ងៃយ៉ាងដូចម្តេច ? គោលលទ្ធិ និង សេចក្តីសញ្ញា ៤៦–៤៨ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១ ( ឆ្នាំ ២០២០ )

« ថ្ងៃទី ៩ ខែ ឧសភា ។ តើព្រះវិញ្ញាណបរិសុទ្ធអាចផ្ដល់ពរជ័យដល់ខ្ញុំរាល់ថ្ងៃយ៉ាងដូចម្តេច ? »ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១

ថ្ងៃទី ៩ ខែ ឧសភា ។

តើព្រះវិញ្ញាណបរិសុទ្ធអាចផ្ដល់ពរជ័យដល់ខ្ញុំរាល់ថ្ងៃយ៉ាងដូចម្តេច ?

គោលលទ្ធិ និង សេចក្តីសញ្ញា ៤៦–៤៨

ប្រឹក្សាជាមួយគ្នា

ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬថ្នាក់ រយៈពេលប្រហែល ១០–២០ នាទី

នៅដើមការប្រជុំ សូមសូត្ររួមគ្នានូវបាវចនាកូរ៉ុមបព្វជិតភាពអើរ៉ុន ឬ បាវចនាក្រុមយុវនារី ។ រួចហើយ សូមដឹកនាំការពិភាក្សាអំពីចំណុចដូចខាងក្រោមនេះ ហើយដាក់ផែនការពីរបៀបដើម្បីអនុវត្តតាមអ្វីដែលបងប្អូនពិភាក្សា ( បងប្អូនអាចសម្រេចចិត្តនៅក្នុងការប្រជុំគណៈប្រធានថា ចំណុចមួយណាដែលត្រូវពិភាក្សា ) ៖

កូរ៉ុម ឬថ្នាក់របស់យើង ។ តើនរណាត្រូវការជំនួយ និងការអធិស្ឋានរបស់យើង ? តើយើងអាចធ្វើអ្វីខ្លះដើម្បីជួយដល់ពួកគេ ? តើយើងគួរអញ្ជើញនរណាឲ្យមកចូលរួមសកម្មភាពនាពេលខាងមុខនេះ ?
កាតព្វកិច្ច ឬទំនួលខុសត្រូវរបស់យើង ។ តើយើងបានបំពេញកិច្ចការអ្វីខ្លះ ? តើយើងត្រូវធ្វើកិច្ចការអ្វីខ្លះ ? តើយើងបានអញ្ជើញមនុស្សដទៃឲ្យមករកព្រះគ្រីស្ទដោយរបៀបណា ហើយតើយើងអាចអញ្ជើញមនុស្សដទៃនាពេលនេះដោយរបៀបណា ?
ជីវិតរបស់យើង ។ តើបទពិសោធន៍ថ្មីៗអ្វីខ្លះដែលបានពង្រឹងទីបន្ទាល់របស់យើង ? តើមានអ្វីកំពុងកើតឡើងនៅក្នុងជីវិតយើង ហើយតើយើងអាចគាំទ្រគ្នាទៅវិញទៅមកតាមរបៀបណា ?

នៅចុងបញ្ចប់នៃមេរៀននេះ សូមធ្វើដូចខាងក្រោមនេះតាមការគួរ ៖

ថ្លែងទីបន្ទាល់អំពីគោលការណ៍ដែលបានបង្រៀន ។
រំឭកសមាជិកកូរ៉ុម ឬថ្នាក់អំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។

បង្រៀនគោលលទ្ធិ

ដឹកនាំដោយអ្នកដឹកនាំយុវវ័យ ឬយុវវ័យម្នាក់ រយៈពេលប្រហែល ២៥–៣៥ នាទី

រៀបចំខ្លួនខាងវិញ្ញាណ

សមាជិកពីដើមជាច្រើននៃសាសនាចក្រដែលត្រូវបានស្ដារឡើងវិញ បានអានអំពីការបើកសម្ដែងខាងវិញ្ញាណនៃព្រះវិញ្ញាណបរិសុទ្ធនៅក្នុងព្រះគម្ពីរ ( សូមមើល កិច្ចការ ២:១–៤; ១៣:៥២; កូរិនថូសទី១ ១២:៤–១១; នីហ្វៃទី៣ ១៩ ) ។ នៅពេលសមាជិកកូរ៉ូម ឬថ្នាក់បានសិក្សា គោលលទ្ធិ និង សេចក្ដីសញ្ញា ៤៦–៤៨ នៅសប្ដាហ៍នេះ នោះពួកគេអាចបានរៀនថា ព្រះអម្ចាស់អន្ទះសាចង់បង្រៀនពួកបរិសុទ្ធទាំងនេះអំពីពរជ័យ ដែលព្រះវិញ្ញាណបរិសុទ្ធអាចនាំមកក្នុងជីវិតរបស់ពួកគេបាន ។ តើបទពិសោធន៍អ្វីខ្លះដែលបានបង្រៀនបងប្អូនពីរបៀបដែលព្រះវិញ្ញាណបរិសុទ្ធផ្ដល់ពរជ័យដល់បងប្អូន ? តើព្រះវិញ្ញាណបរិសុទ្ធអាចជួយអ្នកដែលបងប្អូនបង្រៀនក្នុងគ្រប់ផ្នែកទាំងអស់នៃជីវិតរបស់ពួកគេដោយរបៀបណា ?

ដើម្បីជួយបងប្អូនឲ្យរៀបចំខ្លួនដើម្បីបំផុសគំនិតដល់កូរ៉ុម ឬថ្នាក់របស់បងប្អូនឲ្យស្វែងរកឥទ្ធិពលនៃព្រះវិញ្ញាណបរិសុទ្ធ បងប្អូនអាចរំឭក « តួនាទីព្រះវិញ្ញាណបរិសុទ្ធ » នៅក្នុងសៀវភៅ ពិតចំពោះសេចក្ដីជំនឿ ( [ ឆ្នាំ ២០០៤ ] ទំព័រ ១៤១ ) និងសារលិខិតរបស់អែលឌើរ ហ្គែរី អ៊ី ស្ទីវិនសិន « How Does the Holy Ghost Help You? »( Liahona ខែ វិច្ឆិកា ឆ្នាំ ២០១៧ ទំព័រ ១១៧–១២០ ) ។

យុវនារីកំពុងអានព្រះគម្ពីរនៅក្នុងថ្នាក់ — ព្រះវិញ្ញាណបរិសុទ្ធអាចជួយយើងឲ្យយល់ និងបង្រៀនពីសេចក្តីពិតនៃដំណឹងល្អ ។

រៀនជាមួយគ្នា

ព្រះគម្ពីរផ្ដល់គំរូជាច្រើនអំពីអំណោយទានខាងវិញ្ញាណ ។ តើបងប្អូនអាចជួយស្ថាបនាសេចក្ដីជំនឿរបស់សមាជិកកូរ៉ុម ឬថ្នាក់ថា អំណោយទានទាំងនេះអាចបើកសម្ដែងនៅក្នុងជីវិតរបស់យើងសព្វថ្ងៃតាមរបៀបណា ? បងប្អូនអាចចាប់ផ្ដើមដោយការអញ្ជើញពួកគេឲ្យសរសេរនៅលើក្ដារខៀន នូវអំណោយទានខាងវិញ្ញាណមួយដែលបានពិពណ៌នានៅក្នុង គោលលទ្ធិ និង សេចក្ដីសញ្ញា ៤៦:៧–៣៣ ហើយពិភាក្សាពីរបៀបដែលពួកគេបានឃើញវាកើតឡើងនៅក្នុងជីវិតរបស់ពួកគេ ឬជីវិតរបស់នរណាម្នាក់ដែលពួកគេស្គាល់ ។

បន្ថែមលើអំណោយទាននៃព្រះវិញ្ញាណ នោះព្រះវិញ្ញាណបរិសុទ្ធប្រទានពរជ័យដល់យើងតាមរបៀបជាច្រើនផ្សេងទៀត ។ បងប្អូនអាចប្រើសកម្មភាពមួយ ឬច្រើនខាងក្រោមនេះដើម្បីជួយសមាជិកកូរ៉ុម ឬថ្នាក់ឲ្យយល់ដឹងកាន់តែច្បាស់អំពីការណ៍នេះ ។

ពេលខ្លះយើងគិតថា យើងត្រូវការព្រះវិញ្ញាណបរិសុទ្ធសម្រាប់តែការសម្រេចចិត្ត ឬព្រឹត្តិការណ៍សំខាន់ៗក្នុងជីវិតរបស់យើងតែប៉ុណ្ណោះ ។ តើបងប្អូនអាចជួយដល់អ្នកដែលបងប្អូនបង្រៀនឲ្យស្គាល់ពីអំណាចជាច្រើនទៀតដែលព្រះវិញ្ញាណបរិសុទ្ធអាចធ្វើសម្រាប់ពួកគេដោយរបៀបណា ? បងប្អូនអាចបំបែកកូរ៉ុម ឬថ្នាក់ទៅជាក្រុមតូចៗ ហើយចាត់ឲ្យក្រុមនីមួយៗអានបទគម្ពីរមួយ ឬច្រើនមកពី « ធនធានគាំទ្រ » ។ បុគ្គលម្នាក់មកពីក្រុមនីមួយៗអាចចែកចាយអ្វីដែលពួកគេបានរៀន ។ រួចហើយ សូមអញ្ជើញសមាជិកកូរ៉ុម ឬថ្នាក់ម្នាក់ៗឲ្យធ្វើបញ្ជីមួយអំពីរបៀបដែលព្រះវិញ្ញាណបរិសុទ្ធអាចប្រទានពរជ័យដល់ជីវិតប្រចាំថ្ងៃរបស់ពួកគេ ។ កាលពួកគេចែកចាយបញ្ជីរបស់ពួកគេ នោះពួកគេអាចជជែកអំពីអ្វីដែលពួកគេអាចធ្វើបានដើម្បីមានព្រះវិញ្ញាណបរិសុទ្ធគង់ជាមួយនឹងពួកគេពេញមួយថ្ងៃរាល់ថ្ងៃ ។
របៀបមួយទៀតដើម្បីជួយអស់អ្នកដែលបងប្អូនបង្រៀនឲ្យយល់ពីរបៀបដែលព្រះវិញ្ញាណបរិសុទ្ធអាចជួយពួកគេនោះ គឺការសរសេរសំណួរដូចតទៅនេះដាក់លើក្ដារខៀន ៖ តើយើងដឹងអ្វីខ្លះអំពីព្រះវិញ្ញាណបរិសុទ្ធ ? តើព្រះវិញ្ញាណបរិសុទ្ធអាចជួយយើងដូចម្តេច ? រួចហើយសមាជិកកូរ៉ុម ឬថ្នាក់អាចស្វែងរកចម្លើយនៅក្នុងសារលិខិតរបស់អែលឌើរ ហ្គែរី អ៊ី ស៊ីវិនសិន « How Does the Holy Ghost Help You? »( Liahona ខែ វិច្ឆិកា ឆ្នាំ ២០១៧ ទំព័រ ១១៧–១២០ ) ។ ពួកគេក៏អាចរកចម្លើយបានតាមរយៈការរំឭក « តួនាទីព្រះវិញ្ញាណបរិសុទ្ធ » នៅក្នុង ពិតចំពោះសេចក្ដីជំនឿ ( ទំព័រ ១៤១ ) ផងដែរ ។ បើសមរម្យ សូមចែកចាយបទពិសោធន៍ដែលបងប្អូនជាមួយនឹងព្រះវិញ្ញាណបរិសុទ្ធ ហើយអញ្ជើញយុវវ័យឲ្យចែកចាយបទពិសោធន៍របស់ពួកគេ ។
សមាជិកកូរ៉ុម ឬថ្នាក់អាចអាន « វិវរណៈផ្ទាល់ខ្លួន » ឬ « រៀនដើម្បីដឹងពីការបំផុសនៃព្រះវិញ្ញាណ » នៅក្នុងជំពូកទី ៤ នៃសៀវភៅប្រកាសដំណឹងល្អរបស់យើង ( [ ឆ្នាំ ២០១៩ ] ទំព័រ ៩១–៩២, ៩៨–៩៩ ) ។ រួចហើយ ពួកគេអាចសម្ដែងថា ពួកគេគឺជាអ្នកផ្សព្វផ្សាយសាសនាដែលកំពុងបង្រៀននរណាម្នាក់ ដែលមិនធ្លាប់បានឮពីរបៀបដែលព្រះវិញ្ញាណបរិសុទ្ធអាចផ្ដល់ពរជ័យដល់ជីវិតរបស់យើងបាន ។ តើពួកគេនឹងនិយាយអ្វីខ្លះទៅកាន់បុគ្គលនោះ ?

ធ្វើសកម្មភាពដោយសេចក្ដីជំនឿ

សូមលើកទឹកចិត្តសមាជិកកូរ៉ុម ឬថ្នាក់ឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីប្រព្រឹត្តតាមការបំផុសគំនិត ដែលពួកគេបានទទួលនៅថ្ងៃនេះ ។ តើមេរៀនថ្ងៃនេះទាក់ទងនឹងគោលដៅផ្ទាល់ខ្លួន ដែលពួកគេបានដាក់យ៉ាងដូចម្ដេច ? ប្រសិនបើពួកគេចង់ សមាជិកកូរ៉ុម ឬថ្នាក់អាចចែកចាយគំនិតរបស់ពួកគេបាន ។

ធនធានគាំទ្រ

យ៉ូហាន ១៤:១៦–២៧ ( អង្គលួងលោមអាចបង្រៀនយើង ហើយនាំការណ៍ទាំងអស់មកក្នុងការចងចាំរបស់យើង )
យ៉ូហាន ១៥:២៦; គោលលទ្ធិ និង សេចក្ដីសញ្ញា ៤២:១៧; ម៉ូសេ ១:២៤ ( ព្រះវិញ្ញាណបរិសុទ្ធថ្លែងជាកំណត់ត្រាអំពីព្រះវរបិតា និងព្រះរាជបុត្រា )
រ៉ូម ៨:១៦ ( ព្រះវិញ្ញាណថ្លែងជាសាក្សីថា យើងគឺជាបុត្ររបស់ព្រះ )
នីហ្វៃទី២ ៣២:៥; គោលលទ្ធិ និង សេចក្តីសញ្ញា ១៨:១៨ ( ព្រះវិញ្ញាណបរិសុទ្ធនឹងបង្ហាញយើងពីអ្វីដែលយើងគួរតែធ្វើ )
នីហ្វៃទី៣ ២៧:២០ ( ព្រះវិញ្ញាណបរិសុទ្ធបន្សុទ្ធយើង )
មរ៉ូណៃ ៨:២៦ ( ព្រះវិញ្ញាណបរិសុទ្ធបំពេញយើងដោយសេចក្ដីសង្ឃឹម និងសេចក្ដីស្រឡាញ់ )
មរ៉ូណៃ ១០:៥ ( ព្រះវិញ្ញាណបរិសុទ្ធបង្រៀនយើងពីសេចក្ដីពិត )

ការបង្រៀនតាមរបៀបរបស់ព្រះអង្គសង្គ្រោះ

ព្រះអង្គសង្គ្រោះបានចែកចាយដំណើររឿងសាមញ្ញៗ រឿងប្រៀបធៀប និងឧទាហរណ៍ពីជីវិតពិតដើម្បីបង្រៀនតាមរបៀបមួយ ដែលធ្វើឲ្យពួកសិស្សរបស់ទ្រង់យល់បាន ។ តើបងប្អូនអាចចែកចាយបទពិសោធន៍ផ្ទាល់ខ្លួនអ្វីខ្លះជាមួយយុវវ័យ ដើម្បីជួយពួកគេឲ្យយល់ពីតួនាទីនៃព្រះវិញ្ញាណបរិសុទ្ធ ហើយមានអារម្មណ៍ចង់ស្វែងរកបទពិសោធន៍បែបនោះដែរ ? ( សូមមើល ការបង្រៀនតាមរបៀបរបស់ព្រះអង្គសង្គ្រោះ [ ឆ្នាំ ២០១៦ ] ទំព័រ ២២ ) ៕