« ថ្ងៃទី ២៣ ខែ ឧសភា ។ តើខ្ញុំទទួលអំណោយទាននៃព្រះវិញ្ញាណបរិសុទ្ធដោយរបៀបណា ? គោលលទ្ធិ និងសេចក្តីសញ្ញា ៥១–៥៧ » ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១ ( ឆ្នាំ ២០២០ )

« ថ្ងៃទី ២៣ ខែ ឧសភា ។ តើខ្ញុំទទួលអំណោយទាននៃព្រះវិញ្ញាណបរិសុទ្ធដោយរបៀបណា ?ចូរមកតាមខ្ញុំ—សម្រាប់កូរ៉ុមបព្វជិតភាពអើរ៉ុន និងថ្នាក់យុវនារី ៖ ប្រធានបទខាងគោលលទ្ធិ ឆ្នាំ ២០២១

ថ្ងៃទី ២៣ ខែ ឧសភា

តើខ្ញុំទទួលអំណោយទាននៃព្រះវិញ្ញាណបរិសុទ្ធដោយរបៀបណា ?

គោលលទ្ធិ និងសេចក្តីសញ្ញា ៥១–៥៧

ប្រឹក្សាជាមួយគ្នា

ដឹកនាំដោយសមាជិកម្នាក់ក្នុងគណៈប្រធានកូរ៉ុម ឬថ្នាក់ រយៈពេលប្រហែល ១០–២០ នាទី

នៅដើមការប្រជុំ សូមសូត្ររួមគ្នានូវ បាវចនាកូរ៉ុមបព្វជិតភាពអើរ៉ុន ឬ បាវចនាក្រុមយុវនារី ។ រួចហើយ សូមដឹកនាំការពិភាក្សាអំពីចំណុចដូចខាងក្រោមនេះ ហើយដាក់ផែនការពីរបៀបដើម្បីអនុវត្តតាមអ្វីដែលបងប្អូនពិភាក្សា ( បងប្អូនអាចសម្រេចចិត្តនៅក្នុងការប្រជុំគណៈប្រធានថា ចំណុចមួយណាដែលត្រូវពិភាក្សា ) ៖

កូរ៉ុម ឬថ្នាក់របស់យើង ។ តើយើងអាចធ្វើអ្វីខ្លះដើម្បីបង្កើនសាមគ្គីភាពក្នុងចំណោមសមាជិកកូរ៉ុម ឬថ្នាក់ ? តើគោលដៅអ្វីដែលយើងចង់ធ្វើការរួមគ្នា ?
កាតព្វកិច្ច ឬទំនួលខុសត្រូវរបស់យើង ។ តើយើងកំពុងធ្វើអ្វីខ្លះ ដើម្បីចែកចាយដំណឹងល្អ ? តើយើងបានមានបទពិសោធន៍អ្វីខ្លះមកពីការធ្វើកិច្ចការព្រះវិហារបរិសុទ្ធ និងពង្សប្រវត្តិ ?
ជីវិតរបស់យើង ។ តើយើងបានឃើញព្រះហស្ដរបស់ព្រះអម្ចាស់នៅក្នុងជីវិតរបស់យើងតាមរបៀបណា ? តើអ្វីទៅដែលបានបំផុសគំនិតយើងនៅក្នុងការសិក្សាព្រះគម្ពីរនាសប្ដាហ៍នេះ ?

នៅចុងបញ្ចប់នៃមេរៀននេះ សូមធ្វើដូចខាងក្រោមនេះតាមការគួរ ៖

ថ្លែងទីបន្ទាល់អំពីគោលការណ៍ដែលបានបង្រៀន ។
រំឭកសមាជិកកូរ៉ុម ឬថ្នាក់អំពីផែនការ និងការអញ្ជើញទាំងឡាយដែលបានដាក់អំឡុងការប្រជុំ ។

បង្រៀនគោលលទ្ធិ

ដឹកនាំដោយអ្នកដឹកនាំយុវវ័យ ឬយុវវ័យម្នាក់ រយៈពេលប្រហែល ២៥–៣៥ នាទី

រៀបចំខ្លួនខាងវិញ្ញាណ

ក្រោយពីយើងត្រូវបានជ្រមុជទឹកហើយ អ្នកកាន់បព្វជិតភាពដាក់ដៃពួកលោកនៅលើក្បាលរបស់យើង ដើម្បីប្រគល់អំណោយទាននៃព្រះវិញ្ញាណបរិសុទ្ធ ។ សមាជិកកូរ៉ុម ឬថ្នាក់អាចនឹកចាំដល់ការណ៍នេះ ពេលពួកគេបានសិក្សា គោលលទ្ធិ និង សេចក្ដីសញ្ញា ៥១–៥៧ នៅសប្ដាហ៍នេះ ។ ប៉ុន្ដែ ការទទួលបានព្រះវិញ្ញាណបរិសុទ្ធតម្រូវឲ្យមានច្រើនជាងនោះ ។ ដើម្បីទទួលបានព្រះវិញ្ញាណបរិសុទ្ធធ្វើជាគូកនយើងជានិច្ច នោះយើងត្រូវតែមានបំណងចង់បានវត្តមានរបស់ទ្រង់ យាងទ្រង់មកក្នុងជីវិតរបស់យើង ហើយកាន់តាមបទបញ្ញត្តិដោយស្មោះត្រង់ ។ តើនឹងមានពរជ័យអ្វីខ្លះ កើតមាននៅក្នុងជីវិតរបស់អស់អ្នកដែលបងប្អូនបង្រៀន កាលពួកគេស្វែងរកព្រះចេស្ដារបស់ទ្រង់ ?

ដើម្បីជួយបងប្អូនឲ្យរៀបចំខ្លួនបង្រៀន បងប្អូនអាចរំឭក « អំណោយទាននៃព្រះវិញ្ញាណបរិសុទ្ធ » នៅក្នុងសៀវភៅ ពិតចំពោះសេចក្ដីជំនឿ ( [ ឆ្នាំ ២០០៤ ] ទំព័រ ១៤២–១៤៣ ) ឬសារលិខិតរបស់ប្រធាន ហិនរី ប៊ី អាវរិង « His Spirit to Be with You » ( Liahona ខែ វិច្ឆិកា ឆ្នាំ ២០១៨ ទំព័រ ៨៦–៨៩ ) ។

យុវនារី និងយុវជននៅក្នុងថ្នាក់រៀន — ដើម្បីទទួលបានការដឹកនាំពីព្រះវិញ្ញាណបរិសុទ្ធ នោះយើងគួរតែស្វែងរកព្រះចេស្ដារបស់ទ្រង់រៀងរាល់ថ្ងៃ ។

រៀនជាមួយគ្នា

ដើម្បីជួយសមាជិកកូរ៉ុម ឬថ្នាក់ឲ្យយល់ពីអំណោយទាននៃព្រះវិញ្ញាណបរិសុទ្ធកាន់តែច្បាស់ បងប្អូនអាចចាប់ផ្ដើមដោយការនិយាយអំពីរបៀបប្រគល់អំណោយទាននៃព្រះវិញ្ញាណបរិសុទ្ធ ។ ពួកគេអាចអាន គោលលទ្ធិ និង សេចក្ដីសញ្ញា ៥២:១០; ៥៣:៣; ៥៥:១–៣ ហើយពិភាក្សាអំពីអ្វីដែលពួកគេបានរៀន ។ សូមគូសបញ្ជាក់ថា អ្នកកាន់បព្វជិតភាពមិនប្រទានព្រះវិញ្ញាណបរិសុទ្ធទេ ប៉ុន្ដែអញ្ជើញសមាជិកឲ្យទទួលយកព្រះវិញ្ញាណបរិសុទ្ធ ។ តើមានភាពខុសគ្នាអ្វីខ្លះ ? សកម្មភាពខាងក្រោមនេះអាចជួយអស់អ្នកដែលបងប្អូនបង្រៀន ឲ្យយល់កាន់តែច្បាស់ពីរបៀបទទួលបានអំណោយទានដ៏អស្ចារ្យនេះ ។

អ្វីដែលលីហៃ និងគ្រួសាររបស់លោកបានធ្វើដើម្បីត្រូវបានដឹកនាំដោយលីអាហូណា គឺស្រដៀងនឹងអ្វីដែលយើងត្រូវតែធ្វើដើម្បីទទួលបានព្រះចេស្ដាដឹកនាំពីព្រះវិញ្ញាណបរិសុទ្ធដែរ ។ បងប្អូនក៏អាចបង្ហាញរូបភាពលីហៃ និងលីអាហូណាដែរ ( សូមមើល សៀវភៅរូបភាពដំណឹងល្អ [ ឆ្នាំ ២០០៩ ] ល.រ ៦៨ ) ហើយអញ្ជើញសមាជិកកូរ៉ុម ឬថ្នាក់ឲ្យចែកចាយអ្វីដែលពួកគេដឹងអំពីលីអាហូណា ។ រួចហើយបងប្អូនអាចអញ្ជើញពួកគេពាក់កណ្ដាលថ្នាក់ឲ្យអាន នីហ្វៃទី១ ១៦:១៤–២៩ និងពាក់កណ្ដាលទៀតអាន នីហ្វៃទី១ ១៨:៨–២២ ដោយរកមើលរបៀបដែលលីអាហូណាគឺដូចជាព្រះវិញ្ញាណបរិសុទ្ធ ។ តើយើងរៀនអ្វីខ្លះ មកពីគំរូរបស់គ្រួសារលីហៃដែលអាចជួយយើងឲ្យទទួលបានព្រះវិញ្ញាណបរិសុទ្ធកាន់តែពេញលេញ ?
វគ្គនីមួយៗនៅក្នុងសៀវភៅដើម្បីកម្លាំងនៃយុវជន រួមមាននូវការទូន្មានអំពីការរស់នៅតាមបទដ្ឋាន និងបទបញ្ញត្តិរបស់ព្រះអម្ចាស់ ។ ការរស់នៅតាមបទបញ្ញត្តិទាំងនេះអញ្ជើញឲ្យមានព្រះចេស្ដានៃព្រះវិញ្ញាណបរិសុទ្ធមកក្នុងជីវិតរបស់យើង ។ សូមពិចារណាអញ្ជើញសមាជិកកូរ៉ុម ឬថ្នាក់ម្នាក់ៗឲ្យជ្រើសរើសយកវគ្គមួយពីក្នុងសៀវភៅដើម្បីកម្លាំងនៃយុវជន អានវា ហើយគូសចំណាំរឿងដែលពួកគេគួរតែធ្វើ ឬមិនគួរធ្វើដើម្បីជួយពួកគេឲ្យទទួលបានព្រះវិញ្ញាណបរិសុទ្ធ ។ រួចហើយពួកគេអាចចែកចាយអ្វីដែលពួកគេបានរៀនជាមួយនឹងកូរ៉ុម ឬថ្នាក់ទាំងមូល ។ សូមអញ្ជើញពួកគេឲ្យដាក់គោលដៅមួយ ដែលនឹងជួយពួកគេឲ្យទទួលបានព្រះវិញ្ញាណបរិសុទ្ធកាន់តែពេញលេញ ។ ហេតុអ្វីយើងចង់មានព្រះវិញ្ញាណបរិសុទ្ធគង់នៅជាមួយនឹងយើង ? ( សូមមើល យ៉ូហាន ១៤:២៦–២៧; ១៥:២៦; ១៦:១៣; នីហ្វៃទី២ ៣២:៣ ) ។
នៅក្នុងសារលិខិតរបស់លោក « His Spirit to Be with You » ( Liahona ខែ ឧសភា ឆ្នាំ ២០១៨ ទំព័រ ៨៦–៨៩ ) ប្រធាន ហិនរី ប៊ី អាវរិង បានថ្លែងថា « សេចក្ដីសង្ឃឹមរបស់ខ្ញុំនៅថ្ងៃនេះគឺ ដើម្បីបង្កើនបំណងប្រាថ្នារបស់បងប្អូន និងសមត្ថភាពរបស់បងប្អូនដើម្បីទទួលបានព្រះវិញ្ញាណបរិសុទ្ធ » ( ទំព័រ ៨៦ ) ។ សូមឲ្យសមាជិកកូរ៉ូម ឬថ្នាក់អានកថាខណ្ឌចំនួនប្រាំបួននៅក្នុងសារលិខិតរបស់លោកដោយចាប់ផ្ដើមពី « បទពិសោធន៍របស់ព្យាការីយ៉ូសែប ស៊្មីធ » ( ទំព័រ ៨៨ ) ។ សូមអញ្ជើញពួកគេឲ្យរកមើលអ្វីដែល យ៉ូសែប ស៊្មីធបានធ្វើដើម្បីទទួលបានព្រះចេស្ដានៃព្រះវិញ្ញាណបរិសុទ្ធ ។ ពួកគេអាចសរសេរនៅលើក្ដារខៀននូវអ្វីដែលពួកគេរកឃើញ ។ បើសមរម្យ បងប្អូនអាចអញ្ជើញពួកគេឲ្យចែកចាយបទពិសោធន៍របស់ពួកគេក្នុងការទទួលបានការដឹកនាំមកពីព្រះវិញ្ញាណបរិសុទ្ធ ។ តើពួកគេបានធ្វើអ្វីខ្លះនៅពេលជួបបទពិសោធន៍ទាំងនេះ ដែលបាននាំឲ្យទទួលបានការណែនាំមកពីព្រះវិញ្ញាណបរិសុទ្ធ ? បងប្អូនក៏អាចចែកចាយបទពិសោធន៍មួយផងដែរ ។

ធ្វើសកម្មភាពដោយសេចក្ដីជំនឿ

សូមលើកទឹកចិត្តសមាជិកកូរ៉ុម ឬថ្នាក់ឲ្យសញ្ជឹងគិត ហើយកត់ត្រាអ្វីដែលពួកគេនឹងធ្វើដើម្បីប្រព្រឹត្តតាមការបំផុសគំនិត ដែលពួកគេបានទទួលនៅថ្ងៃនេះ ។ តើមេរៀនថ្ងៃនេះទាក់ទងនឹងគោលដៅផ្ទាល់ខ្លួន ដែលពួកគេបានដាក់យ៉ាងដូចម្ដេច ? ប្រសិនបើពួកគេចង់ សមាជិកកូរ៉ុម ឬថ្នាក់អាចចែកចាយគំនិតរបស់ពួកគេបាន ។

ធនធានគាំទ្រ

មរ៉ូណៃ ៨:២៥–២៦; គោលលទ្ធិ និង សេចក្ដីសញ្ញា ២០:៧៧, ៧៩; ១២១:៤៥–៤៦ ( របៀបទទួលបានព្រះវិញ្ញាណបរិសុទ្ធ )
ដេវីឌ អេ បែដណា « Receive the Holy Ghost » Liahona ខែ វិច្ឆិកា ឆ្នាំ ២០១០ ទំព័រ ៩៤–៩៧
ដូហ្គាល ឌី ហូលម៊ីស « The Gift of the Holy Ghost » ( ការប្រជុំធម្មនិដ្ឋានបុណ្យគ្រីស្ទម៉ាសគណៈប្រធានទីមួយ ថ្ងៃទី ៤ ខែ ធ្នូ ឆ្នាំ ២០១៦ ) នៅលើគេហទំព័រ broadcasts.ChurchofJesusChrist.org

ការបង្រៀនតាមរបៀបរបស់ព្រះអង្គសង្គ្រោះ

ក្នុងការរៀបចំសម្រាប់ការងារបម្រើនៅលើផែនដីរបស់ទ្រង់ ព្រះអង្គសង្គ្រោះត្រូវបាន « ដឹកនាំដោយព្រះវិញ្ញាណទៅក្នុងទីរហោស្ថាន » ដើម្បីតមអាហារ អធិស្ឋាន និង « គង់ជាមួយព្រះ » ។ ការបង្រៀនដំណឹងល្អប្រកបដោយអានុភាពមានន័យថា មិនគ្រាន់តែជាការរៀបចំមេរៀនមួយប៉ុណ្ណោះទេ ប៉ុន្តែវាជាការរៀបចំខ្លួនរបស់យើងទៅវិញទេ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ [ ឆ្នាំ ២០១៦ ] ទំព័រ ១២ ) ៕