23 nō Mē

Nāhea vau ’ia fāri’i i te hōro’a o te Vārua Maita’i ?

Te Parau Ha’api’ira’a ’e te mau Parau Fafau 51–57

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau mea e ’āparau) :

• Tā tātou pupu ’aore rā piha. E aha tā tātou e nehenehe e rave nō te fa’atupu i te hō’ēra’a i roto i te mau melo o te pupu ’aore rā, o te piha ? E aha te mau ’ōpuara’a tā tātou e hina’aro e rave ’āmui ?

• Tā tātou mau ’ohipa ’aore rā mau hōpoi’a. E aha tā tātou e rave ra nō te fa’a’ite i te ’evanelia ? E aha te mau ’itera’a tā tātou i fāri’i nō te ravera’a i te ’ohipa hiero ’e te ’ā’amu ’utuāfare ?

• Tō tātou orara’a. Nāhea tātou i te ’itera’a i te rima o te Fatu i roto i tō tātou orara’a ? E aha te mea tei fa’auru ia tātou i roto i tā tātou tuatāpapara’a pāpa’ira’a mo’a i teie hepetoma ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

I muri a’e i tō tātou bāpetizora’ahia, ’ua tu’u te mau taea’e o te autahu’ara’a i tō rātou rima i ni’a iho i tō tātou upo’o nō te hōro’a mai i te hōro’a o te Vārua Maita’i. ’Ua ha’amana’o fa’ahou paha te mau melo o te pupu ’aore rā, o te piha, i te reira ’a tuatāpapa ai rātou i Te Parau Ha’api’ira’a ’e te mau Parau Fafau 51–57 i teie hepetoma. Terā rā, te fāri’ira’a i te Vārua Maita’i, e tītau hau atu ā te reira. Nō te fāri’i i te Vārua Maita’i ’ei hoa tāmau nō tātou, e ti’a ia tātou ’ia hina’aro mau iāna, ’ia ani iāna i roto i tō tātou orara’a, ’e ’ia ha’apa’o māite i te mau fa’auera’a. E aha te mau ha’amaita’ira’a e tae mai i roto i te orara’a o te feiā tā ’outou e ha’api’i ra, ’a ’imi ai rātou i tāna fa’aurura’a ?

Nō te tauturu ia ’outou ’ia fa’aineine nō te ha’api’i, e hi’o fa’ahou « Te hōro’a o te Vārua Maita’i » i roto i te Mau Māite i te Fa’aro’o ([2004], 83–84) ’aore rā, te parau poro’i a te peresideni Henry B. Eyring « Ia vai tōna Vārua i roto ia ’outou » (Liahona, Mē 2018, 86–89).

Nō te fāri’i i te arata’ira’a a te Vārua Maita’i, tītauhia ia tātou ’ia ’imi i tāna fa’aurura’a i te mau mahana ato’a.

Ha’api’i-’āmui-ra’a mai

Nō te tauturu i te mau melo o te pupu ’aore rā, o te piha, ’ia hāro’aro’a maita’i a’e i te hōro’a o te Vārua Maita’i, e nehenehe ’outou e ha’amata nā roto i te paraparaura’a nō ni’a i te huru e hōro’ahia ai te hōro’a o te Vārua Maita’i. E nehenehe rātou e tai’o i Te Parau Ha’api’ira’a ’e te mau Parau Fafau 52:10 ; 53:3 ; 55:1–3 ’e e ’āparau i te mea tā rātou i ha’api’i mai. ’A ha’apāpū ē, ’aita te mau taea’e o te ’autahu’ara’a e hōro’a i te Vārua Maita’i, e ani rā rātou i te melo ’ia fāri’i mai i te Vārua Maita’i. E aha te ta’a-’ē-ra’a ? E nehenehe te mau ’ohipara’a i raro nei e tauturu i te feiā tā ’outou e ha’api’i nei ’ia hāro’aro’a maita’i a’e nāhea ’ia fāri’i i teie hōro’a fa’ahiahia.

• Te ’ohipa tā Lehi ’e tōna ’utuāfare i rave ’ia arata’ihia rātou e te Liahona, e tuea noa ïa i te ’ohipa e tītauhia ia tātou ’ia rave nō te fāri’i i te arata’ira’a fa’auru a te Vārua Maita’i. E nehenehe ’outou e fa’a’ite i te hō’ē hōho’a nō Lehi ’e te Liahona (hi’o Buka hōho’a o te ’evanelia [2009], no. 68) ’e e ani i te mau melo o te pupu ’aore rā, o te piha, ’ia fa’a’ite mai e aha tā rātou i ’ite nō ni’a i te Liahona. I muri iho, e nehenehe ’outou e ani i te āfara’a o rātou ’ia tai’o i 1 Nephi 16:14–29 ’e te tahi pae ’ia tai’o i te 1 Nephi 18:8–22, ma te ’imi i te mau huru e au ai te Liahona mai te Vārua Maita’i. E aha tā tātou i ha’api’i mai nā roto mai i te hi’ora’a o te ’utuāfare o Lehi, ’o tē nehenehe e tauturu hope atu ia tātou ’ia fāri’i i te Vārua Maita’i ?

• I roto i te tuha’a tāta’itahi o te Nō te Puai o te Feiā ’Āpī tē vai ra te a’ora’a nō ni’a i te orara’a i te mau ture ’e te mau fa’auera’a a te Fatu. E ani manihini te orara’a i teie mau fa’auera’a i te mana o te Vārua Maita’i i roto i tō tātou orara’a. E feriro e ani i te mau melo o te pupu ’aore rā, o te piha, ’ia mā’iti tāta’itahi hō’ē o te mau tuha’a i roto i te Nō te Puai o te Feiā ’Āpī, ’ia tai’o i te reira, ’e ’ia pāpa’i i te mau mea e ti’a ia rātou ’ia rave ’aore rā, ’eiaha e rave, nō te tauturu ia rātou ’ia fāri’i i te Vārua Maita’i. I muri iho, e nehenehe rātou e fa’a’ite mai i te mau mea tā rātou i ’apo mai i te toe’a o te pupu ’aore rā, o te piha. E ani ia rātou ’ia ha’amau i te hō’ē fā ’o tē tauturu ia rātou ’ia fāri’i hope atu i te Vārua Maita’i. Nō te aha tātou e hina’aro ai i te Vārua Maita’i ia tātou ra ? (Hi’o Ioane 14:26–27 ; 15:26 ; 16:13 ; 2 Nephi 32:3).

• I roto i tāna parau poro’i « Tōna Vārua i roto ia ’outou » (Liahona, Mē 2018, 86–89), ’ua parau te peresideni Henry B. Eyring, « Tā’u ti’aturira’a i teie mahana ’o te fa’arahira’a ïa i tō ’outou hina’aro ’e tō ’outou ’aravihi nō te fāri’i i te Vārua Maita’i » ’api 86). ’A ani i te mau melo o te pupu ’aore rā, o te piha, ’ia tai’o i nā paratarāfa e iva i roto i tāna parau poro’i ’o tē ha’amata mai teie « Te mau ’itera’a o te peropheta Iosepha Semita » (’api 88). E ani ia rātou ’ia ’imi mai e aha tā Iosepha Semita i rave nō te fāri’i i te fa’aurura’a a te Vārua Maita’i. ’Ia tāpura mai rātou i ni’a i te tāpura ’ere’ere i te mau mea tā rātou i ’ite mai. Mai te mea e tano, e ani ia rātou ’ia fa’a’ite mai i tō rātou mau ’itera’a nō te fāri’ira’a i te arata’ira’a nō ō mai i te Vārua Maita’i ra. E aha tā rātou e rave ra i te taime ’a tupu ai teie mau ’itera’a ’o tei arata’i i te fāri’ira’a i te a’o a te Vārua Maita’i ? E nehenehe ato’a ’outou e fa’a’ite i te hō’ē ’itera’a.

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Moroni 8:25–26 ; Te Parau Ha’api’ira’a ’e te mau Parau Fafau 20:77, 79 ; 121:45–46 (Nāhea ’ia fāri’i i te Vārua Maita’i)

• David A. Bednar, « ’A fāri’i mai i te Vārua Maita’i », Liahona,Novema 2010, 94–97

• Douglas D. Holmes, « Te hōro’a o te Vārua Maita’i » (Purera’a noera nā te Peresidenira’a Mātāmua, 4 nō Tītema 2016), broadcasts.ChurchofJesusChrist.org

Ha’api’ira’a mai tā te Fa’aora

I roto i fa’aineinera’a nō tāna tāvinira’a i te fenua nei, ’ua « arata’ihia te Fa’aora e te Vārua i roto i te medebara » nō te ha’apae i te mā’a, nō te pure ’e « ’ia vai i pīha’i iho i te Atua » (’īritira’a a Iosepha Semita, Mataio 4:1 [i roto Mataio 4:1, nota i raro i te ’api b]). Te ha’api’ira’a i te evanelia ma te mana rahi, e ’ere noa ïa i te fa’aineinera’a i te hō’ē ha’api’ira’a, ’o te fa’aineine-ato’a-ra’a rā ia tātou iho. (Hi’o Ha’api’ira’a mai tā te Fa’aora [2016], 12.)