13 nō Tiunu

Nāhea vau i te pāto’i i te mau hōho’a faufau ?

Te Parau Ha’api’ira’a ’e te mau Parau Fafau 63

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau mea e ’āparau) :

• Tā tātou pupu ’aore rā piha. E aha te mau ’ohipara’a tā tātou i fa’atupu a’enei ? ’Ua manuia ānei te reira ? E aha te mau mea i tere maita’i, ’e e aha te nehenehe e ha’amaita’i atu ?

• Tā tātou mau ’ohipa ’aore rā mau hōpoi’a. ’O vai tē hina’aro nei i tā tātou tāvinira’a ? Nāhea e nehenehe ai ia tātou ’ia tauturu ia rātou ?

• Tō tātou orara’a. E aha te mau fā tā tātou e ’ohipa tāta’itahi nei ? E aha te mau ’ohipa i tupu ’o tā tātou e nehenehe e fa’a’ite ? E aha te mau ha’amaita’ira’a tā tātou i fāri’i ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

’Ua tuatāpapa paha te mau melo o te pupu ’aore rā, o te piha i Te Parau Ha’api’ira’a ’e te mau Parau Fafau 63 i teie hepetoma ’e ’ua tai’o nō ni’a i te fa’a’arara’a a te Fatu i te feiā mo’a i tahito ra nō te mau fifi o te peu tai’ata—hō’ē fa’a’arara’a tāna i parau tāmau noa (hi’o Te Parau Ha’api’ira’a ’e te mau Parau Fafau 63:13–16 ; Mataio 5:27–28 ; 3 Nephi 12:27–30). Noa atu ē, e tano teie mau fa’a’arara’a nō te mau ta’ata nō te mau fāito matahiti ato’a, e tano rū hau atu rā te reira i tō tātou nei ’anotau, inaha ho’i tē parare rahi nei ’ei ma’i rahi te hōho’a faufau. E aha te mau fifi ’e te mau fa’ahepora’a e tū’ati i te mau hōho’a faufau e fārereihia nei e te mau melo o te pupu ’aore rā, o te piha ? ’E aha te mau parau tumu o te ’evanelia ’e te mau rāve’a pārurura’a e nehenehe e tauturu ia rātou ’ia tāpe’a mā noa i tō rātou mana’o ’e tā rātou mau ’ohipa ?

’A fa’aineine ai ’outou nō te ha’api’i, ’a feruri e hi’o fa’ahou i Te fa’a’oa’oara’a ’e te rāve’a ha’apararera’a » ’e « Tē vi’ivi’i ’ore i te pae ’āpeni » i roto Nō te Pūai o te Feiā ’Āpī ([2011], 11–13, 35–37) ’e ’Ia fa’a’una’una noa te vi’ivi’i ’ore i tō ’oe mau mana’o (buka iti, 2006).

E nehenehe te mau melo o te pupu ’e o te piha e ha’apūai i te tahi ’e te tahi nō te pāto’i i te mau hōho’a faufau.

Ha’api’i-’āmui-ra’a mai

Nō te ha’amata i te hō’ē ’āparaura’a nō ni’a i te hōho’a faufau, e nehenehe ’outou e ani i te mau melo o te pupu ’aore rā, o te piha ’ia tai’o i Te Parau Ha’api’ira’a ’e te mau Parau Fafau 63:13–16 ’e ’ia ’āparau i te mau mana’o nō roto mai i teie mau ’īrava, ’o tē tauturu ia rātou ’ia hāro’aro’a nō te aha e ’ohipa ’ino mau te hōho’a faufau. Nō te tauturu i te mau melo o tā ’outou pupu ’aore rā, tā ’outou piha, ’ia māramarama e nāhea ’ia pāto’i i te hōho’a faufau, ’a fa’a’ohipa i te hō’ē ’aore rā, hau atu, o teie mau ’ohipara’a i muri nei. I te hope’a o tā ’outou ’āparaura’a, e nehenehe ’outou e tura’ihia ’ia ’āparau e nāhea te ’episekōpo i te tauturu i te feiā i roto i te fifi o te hōho’a faufau (hi’o Nō te Pūai o te Feiā ’Āpī, 12, 37).

• E uira’a paha tā te mau melo o tā ’outou pupu ’aore rā, tā ’outou piha, nō ni’a i te pāto’ira’a i te hōho’a faufau. Nō te tauturu ia rātou ’ia ’ite mai i te mau pāhonora’a, ’a pāpa’i i teie mau uira’a i muri nei i ni’a i te tāpura ’ere’ere : E aha te mau hōho’a faufau ? Nō te aha e ’ohipa ’ino te reira ? Nāhea e nehenehe ai ia tātou ’ia huritua i te fa’ahemara’a o te hōho’a faufau ? Nō te tauturu i te mau melo o te pupu ’aore rā, o te piha, ’ia ’ite mai i te mau pāhonora’a nō nā uira’a mātāmua e piti, ’a ani ia rātou ’ia hi’o fa’ahou « Hōho’a faufau » i roto i te Mau Māite i te Fa’aro’o (mau ’api 117–18) ’e « Te fa’a’oa’oara’a ’e te rāve’a ha’aparare » ’e « Te vi’ivi’i ’ore i te pae ’āpeni » i roto i te Nō te Pūai o te Feiā ’Āpī (mau ’api 11–13, 35–37). Nō te tauturu ia rātou ’ia ’ite mai i te mau pāhonora’a nō te toru o te uira’a, ’a ani ia rātou ’ia hi’o fa’ahou i te Genese 39:1–12 ; Roma 12:21 ; 2 Timoteo 2:22 ; Alama 39:3–9 ; Moroni 10:30 ; Te Parau Ha’api’ira’a ’e te mau Parau Fafau 27:15–18 ; 121:45–46. E ani ia rātou ’ia fa’a’ite mai i te mau pāhonora’a tei ’itehia mai ia rātou.

• Nō te tauturu i tā ’outou pupu ’aore rā, te piha ’ia ’ite i te mau rāve’a nō te pāto’i i te hōho’a faufau, ’a vaiiho ia rātou ’ia hi’o fa’ahou i te parau poro’i a Elder Jeffrey R. Holland « ’Aita e pārahira’a fa’ahou nō te ’enemi o tō’u Vārua » (Liahona, Mē 2010, 44–46) ’e te parau poro’i a te tuahine Linda S. Reeves « Parurura’a i te hōho’a faufau—hō’ē fare fa’atumuhia i ni’a i te Mesia » (Liahona, Mē 2014, 15–17). E nehenehe rātou e feruri ē, tē a’o ra rātou i tā rātou tamaiti ’aore rā, tamāhine a muri a’e ē, nō te aha e ’ohipa ’ino mau te hōho’a faufau ’e e nāhea ’ia ’ape i te reira. E aha te ha’amāramaramara’a tā rātou e fa’a’ite atu nō roto mai i te parau poro’i o te ’āmuira’a tā rātou i hi’o fa’ahou mai ? E ani ia rātou ’ia ’āpipiti mai ia rātou, ’e ’ia fa’a’ite mai i te mau pāhonora’a tei ’itehia ia rātou. E ani ato’a ia rātou ia pāpa’i i te mea tā rātou e rave nō te ’ape i te mau hōho’a faufau.

• E ani i te feiā tā ’outou e ha’api’i ra ’ia tai’o 1 Korinetia 10:13 ’e Alama 13:28. E ani ia rātou, nāhea rātou i te mana’o ē, ’ua tū’ati teie mau pāpa’ira’a mo’a i tā tātou mau tītaura’a ’ia pāto’i i te hōho’a faufau i teie mahana. E ani ato’a ia rātou ’ia feruri ē, e hoa tō rātou tē ’aro nei i te hōho’a faufau ’e ’o tē hina’aro nei e tātarahapa. ’E aha tei ’itehia ia rātou ’o tē nehenehe e tauturu i tō rātou hoa i roto i te mau pāpa’ira’a mo’a i roto « Mau rāve’a tauturu pāturu » ’e i ni’a i te mau ’api 1–4 nō te buka iti ’Ia fa’a’una’una noa te vi’ivi’i ’ore i tō ’oe mau mana’o ? E aha te tauturu i tō rātou hoa ’ia hāro’aro’a ē, e nehenehe te ’episekōpo e tauturu iāna ? (Hi’o Nō te Pūai o te Feiā ’Āpī, 12, 37).

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Isaia 1:18 ; Mosia 4:2 ; Te Parau Ha’api’ira’a ’e te mau Parau Fafau 58:42–43 (E nehenehe tā tātou hapa e fa’a’orehia mai te mea ē, e tātarahapa tātou)

• 1 Nephi 17:3 ; Mosia 24:14–15 ; Alama 26:12 (E ha’apūai te Atua ia tātou i roto i tā tātou mau tūtavara’a ’ia ha’apa’o i te mau fa’auera’a)

• Te tuha’a nō « Te ta’ata hō’ē » o te AddressingPornography.ChurchofJesusChrist.org

• « Ha’apa’o i tō ’outou mau ta’ahira’a », « Nō te hi’o i ni’a iho », « Te vi’ivi’i ’ore : E aha te mau ’ōti’a » ? « Hia’ai māha ’ore o te hōho’a faufau : Tē vai ra ānei te tīa’ira’a ? » « Te fa’aorara’a i tei pohe, e fa’aora te reira iā’u » (mau video), ChurchofJesusChrist.org

Ha’api’ira’a mai tā te Fa’aora

’A ha’api’i ai outou mai tā te Fa’aora i ha’api’i, e hōro’a te mau melo o te pupu ’aore rā, o te piha i te pārahira’a i roto i tō rātou ’ā’au nō te huero o te ’evanelia ’ia tanuhia, ’ia ’oru, ’e ’ia tupu i te rahi. E aha tā ’outou e nehenehe e rave nō te tauturu ia rātou ’ia fa’a’ohipa i te mau pāpa’ira’a mo’a nō te hāro’aro’a i te mana ’e i te nehenehe o te orara’a i te hō’ē orara’a vi’ivi’i ’ore ?