Te Fatu o Iesu Mesia, nā Del Parson

27 nō Tiunu

Nāhea vau ’ia fa’aineine i teienei nō te ha’amau i te hō’ē nohora’a fa’atumuhia i ni’a i te Mesia ?

Te Parau Ha’api’ira’a ʼe te mau Parau Fafau 67–70

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou e ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. ’O vai te ta’ata ’āpī i roto i tā tātou pāroita, ’e e nāhea tātou i te tauturu ia rātou ’ia ’ite rātou ē, tē fāri’i-pōpou-hia nei rātou ? E aha tā tātou e rave ra nō te ha’afaufa’a i tō tātou taime i roto i te mau rurura’a pupu autahu’ara’a ’aore rā te mau rurura’a piha tamāhine ?

• Tā tātou mau ’ohipa ’aore rā mau hōpoi’a. E aha te tahi o tā tātou mau ’ohipa ’e mau hōpoi’a ’ei feiā ’āpī tamāroa ’e ’ei feiā ’āpī tamāhine ? Nāhea tātou i te fa’aoti maita’i a’e i te reira ?

• Tō tātou orara’a. E aha tā tātou e rave ra nō te riro rahi atu ā mai ia Iesu Mesia te huru, ’e ’ia fāri’i i tōna mana i roto i tō tātou orara’a ? ’E aha tā tātou e rave ra nō te tauturu i tō tātou ’utuāfare ’ia haere mai iāna ra ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

I roto i Te Parau Ha’api’ira’a ’e te mau Parau Fafau 68 tē vai ra te a’ora’a i te mau metua o te ’ore paha e ti’aturi-’oi’oi-hia e te mau melo o te pupu ’aore rā, o te piha (hi’o i te mau ’īrava 25–28). Terā rā, nō te mea e nehenehe rātou e fāri’i i te hō’ē fa’aurura’a pūai nō ni’a tō rātou ’utuāfare i teienei ’e a muri a’e, nō reira, e tauturu teie parau a’o ia rātou i teienei. Te rāve’a maita’i a’e nō rātou nō te fa’aineine ’ia fāri’i i te hō’ē ’utuāfare tei fa’atumuhia i ni’a i te Mesia a muri a’e, maori rā « ’ia ’āfaro noa tō rātou haerera’a i mua i te Fatu » i teie mahana (’īrava 28).

E aha te mau ha’amaita’ira’a tei tae mai i tō ’outou ’utuāfare nō te mea ’ua pe’e ’outou i te mau ha’api’ira’a a te Fa’aora ? Nāhea te mau melo o te pupu ’aore rā, o te piha, i te tauturu i tō rātou ’utuāfare ’ia ha’amau i te hō’ē fare tei fa’atumuhia i ni’a i te Mesia ? Nō te fa’aineine nō te ha’api’i, e nehenehe ’outou e hi’o fa’ahou i te parau poro’i a te peresideni Henry B. Eyring « E fare i reira te Vārua o te Fatu e pārahi ai » (Liahona, Mē 2019, 22–25) ’e « Te ’Utuāfare : E Poro’i i tō te Ao nei » (ChurchofJesusChrist.org).

E nehenehe tātou e ’ite i te here rahi a’e i roto i tō tātou ’utuāfare ’a fa’atumu ai tātou i tō tātou nohora’a i ni’a i te Mesia.

Ha’api’i-’āmui-ra’a mai

Nō te tauturu i te mau melo o te pupu ’aore rā, o te piha, ’ia hi’o e nāhea Te Parau Ha’api’ira’a ’e te mau Parau Fafau 68:25–28 e tano ai i ni’a ia rātou, e ani ia rātou ’ia pāpa’i mai i te hō’ē fa’ata’ara’a poto e aha te huru orara’a ’utuāfare tā rātou e hina’aro nō a muri a’e. ’A ani ia rātou ’ia fa’a’ite mai e aha tā rātou i pāpa’i, mai te mea e hina’aro rātou. I muri iho e nehenehe rātou e tai’o i Te Parau Ha’api’ira’a ’e te mau Parau Fafau 68: 25–28 ’e ’ia ’imi mai i te mau ha’api’ira’a ’e te mau parau tumu o te ’evanelia ’o tē nehenehe e tauturu ia rātou ’ia patu i te mau ’utuāfare parauti’a i teienei ’e a muri a’e. E tauturu te mau ’ohipara’a i raro nei ia rātou ’ia hāro’aro’a nāhea ’ia fa’ariro i te Mesia ’ei pū nō tō rātou ’utuāfare.

• Tē vai ra i roto i te paratarāfa hitu o Te ’Utuāfare : E Poro’i i tō te Ao nei » te mau parau mau ’o tē nehenehe e tauturu i te mau melo o te pupu ’aore rā, o te piha, ’ia fa’atumu i tō rātou fare i ni’a i te Fa’aora. E ani ia rātou ’ia tai’o i teie paratarāfa ’e ’ia ’ite mai i te mau ha’api’ira’a ’e te mau parau tumu ’o tē tauturu i te hō’ē ’utuāfare ’ia ’oa’oa. E hina’aro paha ’outou e pāpa’i i te reira i ni’a i te tāpura ’ere’ere ’e e ani i te feiā tā ’outou e ha’api’i nei ’ia ’āparau i te tumu e tauturu ai te ta’ata tāta’itahi i te hō’ē ’utuāfare ’ia ’oa’oa. E hina’aro paha te mau melo o te pupu ’aore rā, o te piha, e fa’a’ite mai e mea nāhea tō rātou ’itera’a i te reira mau ha’api’ira’a ’e te reira mau parau tumu i te fa’a’ohipara’ahia i roto i tō rātou iho ’aore rā, i tō vetahi ’ē ’utuāfare. E fa’aitoito ia rātou ’ia feruri e nāhea rātou ’ia fa’a’ohipa i te hō’ē a’e o teie mau parau tumu i roto i tō rātou orara’a i teienei. ’A ha’apāpū atu ia rātou ē, e nehenehe rātou e fa’ariro ia Iesu Mesia ’ei pū nō tō rātou orara’a, noa atu te huru orara’a o tō rātou ’utuāfare.

• E nehenehe te mau melo o te pupu ’aore rā, o te piha, e ’āparau i te mau mea ’o tē tāpe’a nei i te Fa’aora ’ei pū nō tō tātou fare, ’e i te mau mea ’o tē pāto’i nei iāna ’ia riro ’ei pū nō tō tātou ’utuāfare. E nehenehe ’outou e ani i te ta’ata hō’ē ’aore rā, i te mau pupu na’ina’i ’ia hi’o fa’ahou i te hō’ē o te mau tuha’a o te parau poro’i a te peresideni Henry B. Eyring « E fare i reira te Vārua o te Fatu e pārahi ai » (Liahona, Mē 2019, 22–25) nō te ’imi mai i te mau parau tumu ’o te nehenehe e tauturu i tō tātou fare ’ia fa’atumu-rahi-hia atu i ni’a i te Mesia. ’A ani i te mau melo o te pupu ’aore rā, o te piha, ’ia fa’a’ite mai e aha tā rātou i ha’api’i mai, ’e ’ia mā’iti hō’ē mea tā rātou e rave i roto i te hepetoma i muri nei, nō te fa’ariro i tō rātou ’utuāfare ’ei ’utuāfare fa’atumu-rahi-hia atu i ni’a ’ia Iesu Mesia ’e i tāna mau ha’api’ira’a.

• E nehenehe paha ’outou e ani i te hō’ē, ’aore rā, hau atu mau melo o te pupu ’aore rā, o te piha, ’ia hīmene ’aore rā, ’ia tai’o i te hō’ē hīmene nō ni’a i te fare ’e te ’utuāfare, mai te « E riro te ’utuāfare nei mai te ao ra » (Te mau Hīmene, no. 181) ’aore rā, « Ces mots d’amour » (Chants pour les enfants, 190). E nehenehe te tahi pae e fa’aro’o e aha tā te hīmene e ha’api’i nei nō ni’a i te fa’arirora’a i te fare ’ei vāhi ’oa’oa. E ani ia rātou ’ia fa’a’ite mai i te hō’ē ’itera’a i te taime ’a ’ite ai rātou i te ’oa’oa nō te mea ’ua fa’a’ite rātou i te here, ’aore rā, i te mau taime ’a tauturu ai rātou ’ia fa’arahi i te here i roto i tō rātou fare.

’A rave ma te fa’aro’o

E fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i ni’a i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Mosia 4:14–16 ; Te Parau Ha’api’ira’a ’e te mau Parau Fafau 88:119 ; 121:41–46 (Nāhea ’ia ha’amau i te hō’ē ’utuāfare parauti’a)

• « E aha tā’u e nehenehe e rave nō te tauturu i te tāmarū i te pe’ape’a o te ’utuāfare ? » nō roto mai i te Mata ’e mata ’e ’o Elder Rasband, te tuahine Oscarson, ’e te taea’e Owen (ha’apūrorora’a ’ati ti’a te ao nei nā te feiā ’āpī, 20 nō Tēnuare 2016), « ’E piti taea’e fa’ata’ahia » « Nā roto i te mau mea iti », « Fa’aitoito ’e ha’apa’o maita’i atu ā i te fare » (mau video), ChurchofJesusChrist.org

Ha’api’ira’a mai tā te Fa’aora

’Ua fa’a’ite te Fa’aora i tōna here nō vetahi ’ē nā roto i te tāvinira’a. ’Ua fa’afāriuhia te ta’ata ’e ’ua taui te mau orara’a nā roto i tāna ’ohipa maita’i. Nāhea ’outou ’ia rave i teie maita’i ’ei ta’ata fa’atere ? Nāhea ’outou ’ia tauturu i te feiā ’āpī ’ia hina’aro i te pe’e i te hi’ora’a maita’i o te Fa’aora nō te tāvinira’a i roto i tō rātou iho ’utuāfare ?