11 nō Tiurai

Nāhea te ’itera’a i te ’ōpuara’a nō te fa’aorara’a i te ’āehuehu i tō’u orara’a ?

Te Parau Ha’api’ira’a ʼe te mau Parau Fafau 76

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. ’O vai te hina’aro i tā tātou tauturu ’e mau pure ? E aha tā tātou e nehenehe e rave nō te tauturu ia rātou ? ’O vai tā tātou e ani manihini ’ia haere mai i te hō’ē ’ohipara’a i muri nei ?

• Tā tātou mau ’ohipa ’aore rā mau hōpoi’a. E aha te mau tītaura’a tā tātou i fa’aoti ? E aha te mau tītaura’a e ti’a ia tātou ’ia rave ? Nāhea tātou i te ani manihini ia vētahi ’ē ’ia haere mai i te Mesia ra, ’e e nāhea tātou i te ani manihini ia vētahi ’ē i teienei ?

• Tō tātou orara’a. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ? E aha te mea e tupu nei i roto i tō tātou orara’a ’e e nāhea tātou i te pāturu te tahi i te tahi ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

’Ua hōro’a mai tō tātou Metua i te Ao ra i te hō’ē ’ōpuara’a e ti’a ai ia tātou ’ia fāri’i i te mau ha’amaita’ira’a mure ’ore ’e ’ia riro mai iāna te huru. Tē hina’aro nei ’oia i te tā’āto’ara’a o tāna mau tamari’i ’ia ’ite i te reira ’ōpuara’a, nō reira ’ua heheu mai ’oia i te reira i te mau peropheta i te roara’a o te mau tau. ’A tuatāpapa ai te mau melo o te pupu ’e aore rā o te piha i Te Parau Ha’api’ira’a ’e te mau Parau Fafau 76 i teie hepetoma, ’ua ha’api’i mai rātou i te mea tā te Atua i heheu mai nō ni’a i tāna ’ōpuara’a ia Iosepha Semita ’e ia Sidney Rigdon, ’oia ato’a i te ti’ara’a tumu o te Fa’aora i roto i te ’ōpuara’a ’e te hanahana ’o tā tātou e nehenehe e fāri’i i roto i te orara’a a muri a’e. Mai te mea e ha’apa’o maita’i tātou, e nehenehe tātou e maita’i roa nā roto i te tāra’ehara a Iesu Mesia, e fāri’i i te ’īra’a o te ’oa’oa, ’e e ora i pīha’i iho i te Atua e a muri noa atu.

Nāhea te ’itera’a i te ’ōpuara’a a te Metua i te Ao ra i te fa’auru i tō ’outou hi’ora’a ātea i ni’a i te orara’a ? Nāhea ’outou ’ia tauturu i tā ’outou pupu ’aore rā, piha ’ia hāro’aro’a e aha te ha’amaita’ira’a nō te ’itera’a i te ’ōpuara’a nō te fa’aorara’a ? Nō te fa’aineine nō te ha’api’i, e nehenehe ’outou e tai’o « Te ’ōpuara’a nō te fa’aorara’a » i roto i te Mau Māite i te Fa’aro’o ([2004], 115–17) ’aore rā, te parau poro’i a Elder Dieter F. Uchtdorf « Tō ’outou tere fa’ahiahia » (Liahona, Novema 2019, 86–90).

E hōro’a mai te ha’api’ira’a mai i te ’ōpuara’a nō te fa’aorara’a i te avei’a ’e i te fā nō tō tātou orara’a.

Ha’api’i-’āmui-ra’a mai

Hō’ē rāve’a nō te ha’amata i te hō’ē ’āparaura’a ’e tā ’outou pupu ’aore rā, piha, nō ni’a i te ’ōpuara’a nō te fa’aorara’a ’oia ho’i, ’o te anira’a i te hō’ē ta’ata ’ia pāpa’i mai i ni’a i te tāpura ’ere’ere i te mau upo’o parau i muri nei, ’e te mau ’īrava nō roto mai i Te Parau Ha’api’ira’a ’e te mau Parau Fafau 76 : Te orara’a hou te tāhuti nei (mau ’īrava 22–27), Te orara’a tāhuti nei (mau ’īrava 40–43), ’e Te orara’a i muri a’e i te pohe (mau ’īrava 50–53, 59–62). ’A hōro’a i te mau melo o te pupu ’aore rā, o te piha i te tahi tau minuti nō te hi’ohi’o mai i teie mau ’īrava nō te ’ite mai i te ti’ara’a o te Fa’aora i roto i te fa’atupura’a i te ’ōpuara’a a te Metua i te Ao ra. E ani ia rātou ’ia pāpa’i i raro a’e i te upo’o parau tāta’itahi i te mea tā rātou i ’ite mai. E tauturu te mau ’ohipara’a i raro nei ia rātou ’ia hāro’aro’a maita’i a’e e mea nāhea te ’ōpuara’a a te Metua i te Ao ra i te ha’amaita’i i tō rātou orara’a.

• Nā roto i te hi’o-fa’ahou-ra’a i te tahi o te mau i’oa o te ’ōpuara’a nō te fa’aorara’a a te Metua i te Ao ra, e nehenehe te reira e tauturu i te mau melo o te pupu ’aore rā, o te piha ’ia māramarama maita’i a’e i te ’ōpuara’a. E nehenehe rātou e hi’o fa’ahou i te mau pāpa’ira’a mo’a i roto i te tuha’a mātāmua i raro a’e « Mau rāve’a tauturu pāturu » ’e e hāmani i te hō’ē tāpura o te tahi o te mau i’oa nō te ’ōpuara’a a te Atua. ’E aha tā teie mau i’oa e ha’api’i mai nei nō ni’a i te fa’anahora’a ? ’Ei hi’ora’a, nāhea teie ’ōpuara’a i te hōpoi mai i te ’oa’oa ia tātou, i teienei ’e a muri noa atu ? E aha tā teie mau pāpa’ira’a mo’a e ha’api’i nei ia tātou nō ni’a i te ti’ara’a o te Fa’aora i roto i te ’ōpuara’a ? E nehenehe ’outou e fa’a’ite i tevideo « Tō tātou orara’a mure ’ore » ’aore rā, « E ’ō’ore te ’ā’au o te mau ta’ata i te reira » (ChurchofJesusChrist.org) ’e e ani i te feiā tā ’outou e ha’api’i ra ’ia paraparau mai nō ni’a i te mau taime ’a ’ite ai rātou i te ’ā’au māuruuru rahi nō te ’ōpuara’a a te Metua i te Ao ra.

• E feruri i te ani i te feiā tā ’outou e ha’api’i ra ’ia ’āparau nāhea e ti’a ai ia rātou ’ia pāhono i te hō’ē hoa ’o tē ui mai i teie mau uira’a i muri nei nō ni’a i te ’ōpuara’a nō te fa’aorara’a : Nō hea mai tātou ? Nō te aha tei ’ō nei tātou ? E haere tātou i hea i muri a’e i teie orara’a ? ’A ani ia rātou ’ia fa’a’ohipa i te mau ha’amāramaramara’a i raro a’e « Te ’ōpuara’a nō te fa’aorara’a » i roto i te Mau Māite i te Fa’aro’o (mau ’api 115-17) ’e te mau rāve’a tauturu i raro a’e i « Mau rāve’a tauturu pāturu » nō te fa’aineine i te hō’ē pāhonora’a i te hō’ē o te mau uira’a. Nāhea te ’itera’a tātou i te mau pāhonora’a i teie mau uira’a i te ha’apūaira’a ia tātou ?

• E ha’api’i hōhonu a’e mai te mau melo o te pupu ’aore rā, o te piha i te mau parau mau o te ’evanelia, ’ia hōro’ahia ia rātou te rāve’a nō te ha’api’i. Nā mua a’e, e ani i te mau mau melo e rave rahi o te pupu ’aore rā, o te piha ’ia haere mai ma te ineine nō te fa’a’ite mai i te hō’ē ha’apotora’a ’o tā rātou i ’ite nō ni’a i te hō’ē tuha’a o te ’ōpuara’a nō te fa’aorara’a. E nehenehe rātou e fa’a’ohipa i te mau ha’apotora’a e ’itehia i roto « Te ’ōpuara’a nō te fa’aorara’a » i roto i te pene 3 o te ’Ia Poro Haere i tā’u nei ’Evanelia ([2019], 48–53). E aha te ta’a-’ē-ra’a nō te ’itera’a i te ’ōpuara’a nō te fa’aorara’a ?

’A rave ma te fa’aro’o

E fa’aitoito i te mau melo o te pupu ’aore rā o te piha ’ia feruri ’e ’ia pāpa’i e aha te mea tā rātou e rave nō te ’ohipa i ni’a i te mau fa’a’itera’a tā rātou i fāri’i i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• 2 Nephi 11:5 ; Alama 12:30 ; 34:9 ; 41:2 ; 42:8, 13–15 ; Mose 6:59–62 (Te mau i’oa nō te ’ōpuara’a a te Metua i te Ao ra)

• Te Parau Ha’api’ira’a ’e te mau Parau Fafau 38:1–3 ; 138:53–56 ; Mose 4:1–4 ; Aberahama 3:21–24 (Te orara’a hou te tāhuti nei)

• 2 Nephi 2:19–21, 25 ; Alama 5:15–16 ; 34:32 ; Aberahama 3:25–26 (Te orara’a tāhuti nei)

• Ioane 14:1–2 ; Alama 11:42–45 ; Te Parau Ha’api’ira’a ’e te mau Parau Fafau 76:39–43, 89–93.(Te orara’a i muri a’e i te pohe)

Ha’api’ira’a mai tā te Fa’aora

’Ua ui te Fa’aora i te mau uira’a tei fa’aferuri hōhonu i te mau ta’ata tāna i ha’api’i. ’Ua ’ana’anatae mau ’oia i tā rātou mau pāhonora’a. Nāhea e nehenehe ai ia ’outou ’ia fa’a’ohipa i te mau uira’a nō te tauturu i te feiā ’āpī ’ia feruri hōhonu i ni’a i te ’ōpuara’a a te Atua ? (Hi’o Ha’api’ira’a mai tā te Fa’aora [2016], 33–34.)