25 nō Tiurai

Nō te aha e mea ti’a iā’u ’ia ha’apa’o i te mau fa’auera’a a te Atua ?

Te Parau Ha’api’ira’a ʼe te mau Parau Fafau 81–83

Tāu’aparau ʼāmui

Arata’ihia e te hō’ē melo o te peresidenira’a pupu ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e ’ia fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau) :

• Tā tātou pupu ’aore rā piha. E aha tā tātou e nehenehe e rave nō te fa’atupu i te hō’ēra’a i roto i te mau melo o te pupu ’aore rā, o te piha ? E aha te mau fā tā tātou e hina’aro e rave ’āmui ?

• Tā tātou mau ’ohipa ’aore rā mau hōpoi’a. E aha tā tātou e rave ra nō te fa’a’ite i te ’evanelia ? E aha te mau ’itera’a tā tātou i fāri’i nō te ravera’a i te ’ohipa hiero ’e te ’ā’amu ’utuāfare ?

• Tō tātou orara’a. Nāhea tātou i te ’itera’a i te rima o te Fatu i roto i tō tātou orara’a ? E aha te mea tei fa’auru ia tātou i roto i tā tātou tuatāpapara’a i te pāpa’ira’a mo’a i teie hepetoma ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau ’ōpuara’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

I te tahi taime e feruri paha tātou ē, tē fa’aiti nei te mau fa’auera’a a te Atua i tō tātou ti’amāra’a ’e tē tā’ōti’a nei i tō tātou ti’ara’a ’ia mā’iti. Te parau mau, ’oia ho’i, e ha’amaita’i te mau fa’auera’a i tō tātou ti’amāra’a. I roto i Te Parau Ha’api’ira’a ’e te mau Parau Fafau 82:8–10 tē ha’api’i mai nei tātou ē, e tauturu te mau fa’auera’a ia tātou ’ia hāro’aro’a i te hina’aro o te Atua, ’e ’ia ha’apa’o ana’e tātou i te reira, tā tātou mau ’ohipa « e fa’afāriuhia te reira i ni’a ia [tātou] ’ei ora nō [tātou] ». ’Oia mau, ’ia auraro ana’e tātou i te Atua, « ’ua ru’uru’uhia » ’oia nō tē hōro’a mai ia tātou i te mau ha’amaita’ira’a tāna i fafau mai mau ’īrava 9–10). Nāhea te Metua i te Ao ra i te ha’amaita’i mai ia ’outou ’a ha’apa’o ai ’outou i tāna mau fa’auera’a ? Nō te fa’aineine nō te ha’api’i, e nehenehe ’outou e tai’o i te parau poro’i a Elder Dale G. Renlund « Te ’auhune i te mau ha’amaita’ira’a » (Liahona, Mē 2019, 70–73) ’aore rā, e feruri i te tahi mau rāve’a tauturu i roto i te parau pāpa’i o te mau tumu parau o te ’evanelia « Ha’apa’o » (topics.ChurchofJesusChrist.org).

E nehenehe te mau hi’ora’a maita’i o te mau tāvini ha’apa’o maita’i a te Atua i tahito ra, e fa’auru ia tātou ’ia ora ma te ha’apa’o maita’i i teie mahana.

Ha’api’i-’āmui-ra’a mai

E riro paha te mau melo o tā ’outou pupu ’aore rā, piha i te fifi ri’i nō te ha’apa’o i te tahi mau fa’auera’a. E nehenehe te tauturura’a ia rātou ’ia hāro’aro’a nō te aha e mea faufa’a ’ia ha’apa’o, i te fa’auru ia rātou. ’A pāpa’i i te i’oa o teie arata’ira’a i ni’a i te tāpura ’ere’ere, ’e e ani i te mau melo o te pupu ’aore rā, o te piha ’ia fa’a’ite mai i te mau pāhonora’a. E nehenehe ’outou e ani ia rātou ’ia ’imi i te tahi atu mau mana’o i roto i Te Parau Ha’api’ira’a ’e te mau Parau Fafau 82:8–10, o tā rātou paha i tuatāpapa i teie hepetoma. I muri iho, e mā’iti hō’ē ’aore rā, hau atu mau ’ohipara’a i raro nei nō te tauturu ia rātou ’ia hāro’aro’a maita’i a’e nō te aha e mea faufa’a i te mau taime ato’a ’ia auraro i te Atua, noa atu ē, e ’ere i te mea ’ōhie.

• E nehenehe te reira e riro ’ei mea ’ōhie ’ia ha’apa’o i te mau fa’auera’a ’ia hāro’aro’a ana’e tātou i te mau tumu i muri mai i te reira. Nō te ’apo mai nō te aha te Atua i hōro’a mai ai ia tātou i te mau fa’auera’a, e nehenehe te mau melo o te pupu ’aore rā, o te piha e hi’opo’a fa’ahou i te mau ’īrava i roto « Mau rāve’a tauturu pāturu » (’aore rā, te tahi atu o tā ’outou e mana’o ra). Nāhea teie mau pāpa’ira’a mo’a i te tauturu ia tātou ’ia ’ite ana’e tātou ē, e mea fifi roa ’ia ha’apa’o i te hō’ē fa’auera’a ? ’Ei tuha’a nō teie ’āparaura’a, e nehenehe ’outou e tai’o ’āmui i te tuha’a tei pi’ihia « Te maha, ’eiaha e ha’amo’e ē, ’nō te aha’ te ’evanelia » i roto i te parau poro’i a te peresideni Dieter F. Uchtdorf « ’Eiaha e ha’amo’e mai iā’u » (Liahona, Novema 2011, 122).

• ’Ia hāro’aro’a ana’e te feiā tā ’outou e ha’api’i ra i te hi’ora’a maita’i nō te ha’apa’o o te Fa’aora, e nehenehe rātou e fa’auruhia ’ia auraro hope atu ā i te Atua. I nafea tō Iesu Mesia aurarora’a i tōna Metua, noa atu te fifi o te mau tītaura’a ? (hi’o Mataio 4:1–11 ; Luka 22:39–44). E nehenehe e ’itehia te mau hi’ora’a o te mau tāne ’e te mau vahine tei auraro, i roto i te Hebera 11. E nehenehe paha tā ’outou pupu ’aore rā, piha e mā’iti hō’ē o teie mau hi’ora’a—’aore rā, te tahi atu o tā rātou i ’ite, i roto ato’a i tō rātou ’utuāfare—’e ’ia fa’a’ite mai e aha te mau mea tei fa’auru ia rātou nō ni’a i teie mau ta’ata. Nō te aha rātou i mā’iti ai e auraro i te Fatu ? Nāhea te Fa’aora i te tauturu ia tātou ’a fa’aoti ai tātou e ha’apa’o ?

• Nō te tauturu i te mau melo o te pupu ’aore rā, o te piha ’ia hi’o i te mau fa’auera’a ’ei mau ha’amaita’ira’a ’e ’eiaha ra ’ei hōpoi’a, e nehenehe ’outou e fa’a’ite i te mau ha’api’ira’a a Elder D. Todd Christofferson i roto « Mau rāve’a tauturu pāturu ». E nehenehe ’outou e pāpa’i i te hōho’a o te hō’ē e’a ta’uma ’e ’ia ani i te feiā tā ’outou e ha’api’i ra ’ia tāpa’o i te ta’ahira’a tāta’itahi i te hō’ē fa’auera’a ’o tē nehenehe e riro ’ei mea fifi nō te hō’ē ta’ata ’āpī ’ia hāro’aro’a ’aore rā, ’ia ha’apa’o. Nāhea te mau parau a Elder Christofferson e nehenehe ai e tauturu i te hō’ē ta’ata e fifi ra nō te ha’apa’o i te mau fa’auera’a ?

• E rave rahi mau video e ha’api’i nei nō ni’a i te ha’apa’ora’a e ’itehia i ni’a i te ChurchofJesusChrist.org ’e i roto i te fa’anahora’a ’āfa’ifa’i nō te vaira’a buka (hi’o « Mau rāve’a tauturu pāturu »). E nehenehe ’outou e tītau i te melo tāta’itahi o te piha ’aore rā, o te pupu ’ia māta’ita’i i te hō’ē o teie mau video, hou te putuputura’a ’e ’ia haere mai ma te ineine nō te fa’a’ite mai i te mau mea tā rātou i ’apo mai nō ni’a i te ha’apa’ora’a. E nehenehe paha te pupu ’aore rā, te piha e fa’anaho i tā rātou iho video nō ni’a i te ha’apa’ora’a i te mau fa’auera’a a te Atua. I muri iho, e nehenehe rātou e fa’anaho i te hō’ē ’ohipara’a nō te hāmani i te video ’e ’ia fa’a’ite i ni’a i te tūreiara’a tōtiare.

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tū’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e fa’a’ite mai i tō rātou mau mana’o.

Mau rāve’a tauturu pāturu

• 1 Nephi 17:3 ; Mosia 2:41 ; Te Parau Ha’api’ira’a ’e te mau Parau Fafau 130:20–21 (E ha’amaita’ihia tātou nā roto i te ha’apa’ora’a i te mau fa’auera’a)

• Deuteronomi 10:12–13 ; Ioane 14:15 ; 1 Ioane 5:1–3 (E ha’apa’o tātou i te mau fa’auera’a nō te mea tē here nei tātou i te Atua)

• Te Parau Ha’api’ira’a ’e te mau Parau Fafau 93:20 (Nā roto i te ha’apa’ora’a e fāri’i ai tātou i te ’īra’a o te Atua)

• « Ha’apa’o », i roto i te pene 3 o te ’Ia Poro Haere i tā’u nei ’Evanelia (2019), 75

• ’Ua ha’api’i o Elder D. Todd Christofferson : « E ’ite noa vetahi i te tusia ’e i te tā’ōti’ara’a i roto i te ha’apa’ora’a i te mau fa’auera’a o te fafaura’a ’āpī ’e te mure ’ore ho’i, te feiā rā o tē ora nei i te reira—’o tē hōro’a nei ia rātou iho ma te ti’amā ’e ma te fa’aherehere ’ore i te orara’a fafauhia—e ’itehia ia rātou te ti’amāra’a rahi a’e ’e te tupura’a. ’Ia hāro’aro’a mau ana’e tātou, ’e ’imi hau atu tātou i te mau fa’auera’a, ’eiaha rā ’ia iti mai. Te ture ’aore rā, te fa’auera’a ’āpī tāta’itahi tā tātou e ha’api’i mai ’e tā tātou e ora, e au ïa mai te hō’ē ta’ahira’a hau atu i ni’a i te hō’ē e’a ta’uma e ti’a ai ia tātou ’ia ta’uma teitei atu ’e teitei atu ā. ’Oia mau, te orara’a o te ’evanelia, o te orara’a maita’i ïa » (« Te mana o te mau fafaura’a », Liahona, Mē 2009, 23).

• Mau video « Te tara o te pata », « Fa’aea noa i roto i te mau rēni », « Hō’ē tūtau pāpū », « Ua nō te mau ha’amaita’ira’a o te ra’i », « ’Ia ha’amaita’ihia ’e ’ia ’oa’oa te feiā e ha’apa’o i te mau fa’auera’a a te Atua » ChurchofJesusChrist.org

Ha’api’ira’a mai tā te Fa’aora

’Ua ani te Fa’aora i tāna mau pipi ’ia fa’a’ite pāpū, ’e ’a nā reira ai rātou, ’ua ha’aputapū te Vārua i tō rātou ’ā’au. ’A ha’api’i ai ’outou, e ani i te mau melo o te pupu ’aore rā, o te piha ’ia fa’a’ite mai i tō rātou ’itera’a pāpū i te faufa’a nō te ha’apa’ora’a i te mau fa’auera’a.