9 nō Mē

Nāhea e nehenehe ai i te Vārua Maita’i ’ia ha’amaita’i mai iā’u i te mau mahana ato’a ?

Te Parau Ha’api’ira’a ’e te mau Parau Fafau 46–48

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te parau tumu a te pupu Autahu’ara’a a Aarona ’aore rā, i Te parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te tahi mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau):

• Tā tātou pupu ’aore rā piha. ’O vai te hina’aro i tā tātou tauturu ’e te mau pure ? E aha tā tātou e nehenehe e rave nō te tauturu ia rātou ? ’O vai tā tātou e ani manihini ’ia haere mai i te hō’ē ’ohipara’a i muri nei ?

• Tā tātou mau ’ohipa ’aore rā mau hōpoi’a. E aha te mau tītaura’a tā tātou i fa’aoti ? E aha te mau tītaura’a e ti’a ia tātou ’ia rave ? Nāhea tātou i te ani manihini ia vētahi ’ē ’ia haere mai i te Mesia, ’e e nāhea tātou i te ani manihini ia vētahi ’ē i teienei ?

• Tō tātou orara’a. E aha te mau ’itera’a ’aita i maoro a’enei tei ha’apūai i tō tātou ’itera’a pāpū ? E aha te mea e tupu nei i roto i tō tātou orara’a ’e e nāhea tātou e nehenehe ai e pāturu te tahi ’e te tahi ?

I te hope’a o te ha’api’ira’a, mai te mea e tano, ’a rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

E rave rahi mau melo mātāmua o te ’Ēkālesia tei fa’aho’i-fa’ahou-hia mai tei tai’o nō ni’a i te mau fa’a’itera’a pae vārua o te Vārua Maita’i i roto i te mau pāpa’ira’a mo’a (hi’o Te ’Ohipa 2:1–4 ; 13:52 ; 1 Korinetia 12:4–11 ; 3 Nephi 19). ’A tuatāpapa ai te mau melo o te pupu ’aore rā, o te piha, i Te Parau Ha’api’ira’a ’e te mau Parau Fafau 46–48 i teie hepetoma, ’ua ha’api’i mai paha rātou ē, e hina’aro rahi tō te Fatu ’ia ha’api’i i teie feiā mo’a nō ni’a i te mau ha’amaita’ira’a tā te Vārua Maita’i e nehenehe e hōpoi mai i roto i tō rātou orara’a. E aha te mau ’itera’a tei ha’api’i ia ’outou, e nāhea te Vārua Maita’i i te ha’amaita’i ia ’outou ? Nāhea te Vārua Maita’i ’ia tauturu i te feiā tā ’outou e ha’api’i nei i roto i te mau tuha’a ato’a o tō rātou orara’a ?

Nō te tauturu ia ’outou ’ia fa’aineine nō te fa’auru i tā ’outou pupu ’aore rā, i tā ’outou piha ’ia ’imi i te fa’aurura’a a te Vārua Maita’i, e nehenehe ’outou e hi’o fa’ahou « Te mau ’ohipa a te Vārua Maita’i » i roto i te Mau Māite i te Fa’aro’o ([2004], 82) ’e te parau poro’i a Elder Gary E. Stevenson « Nāhea te Vārua Maita’i ’ia tauturu ia outou ? » (Liahona, Me 2017, 117–20).

E nehenehe te Vārua Maita’i e tauturu ia tātou ’ia hāro’aro’a ’e ’ia ha’api’i i te mau parau mau o te ’evanelia.

Ha’api’i-’āmui-ra’a mai

E hōro’a mai te mau pāpa’ira’a mo’a e rave rahi mau hi’ora’a nō te mau ō pae vārua. Nāhea ’outou ’ia tauturu i te patu i te fa’aro’o o te mau melo o te pupu ’aore rā, o te piha, ’ia nehenehe i teie mau ō ’ia fa’a’itehia mai i roto i tō tātou orara’a i teie mahana ? E nehenehe ’outou e ha’amata nā roto i te anira’a ia rātou ’ia pāpa’i i ni’a i te tāpura ’ere’ere i te hō’ē ō pae vārua tei tātarahia i roto i Te Parau Ha’api’ira’a ’e te mau Parau Fafau 46:7–33 ’e ’ia ’āparau e mea nāhea tō rātou ’itera’a i te reira i te fa’a’itera’ahia i roto i tō rātou orara’a ’aore rā, i te orara’a o te hō’ē ta’ata tā rātou i mātau.

Ta’a ’ē atu te mau ō o te vārua, e ha’amaita’i te Vārua Maita’i ia tātou i roto i te tahi atu mau rāve’a e rave rahi. E nehenehe ’outou e fa’a’ohipa hō’ē ’aore rā, hau atu mau ’ohipara’a i raro nei nō te tauturu i te mau melo o te pupu ’aore rā, o te piha, ’ia hāro’aro’a maita’i a’e i te reira.

• I te tahi taime tē mana’o nei tātou ē, e hina’aro tātou i te Vārua Maita’i nō te mau fa’aotira’a ’aore rā, nō te mau ’ohipa faufa’a noa i roto i tō tātou orara’a. Nāhea ’outou e nehenehe ai e tauturu i te feiā tā ’outou e ha’api’i ra ’ia ’ite ē, e rave rahi atu ā mau mea tā te Vārua Maita’i e nehenehe e rave nō rātou ? E nehenehe ’outou e vāhi i te pupu ’aore rā, te piha nā roto i te mau pupu na’ina’i, ’e e ani i te pupu tāta’itahi ’ia tai’o hō’ē ’īrava ’aore rā, hau atu o te mau pāpa’ira’a mo’a, i roto « Mau rāve’a tauturu pāturu ». E fa’a’ite mai hō’ē ta’ata i roto i te pupu tāta’itahi i te mea tā rātou i ’apo mai. I muri iho, e ani i te melo tāta’itahi o te pupu ’aore rā, o te piha, ’ia hāmani i te hō’ē tāpura nō te mau rāve’a e nehenehe ai i te Vārua Maita’i e ha’amaita’i i tō rātou orara’a i te mau mahana ato’a. ’A fa’a’ite mai ai rātou i tā rātou tāpura, e parau mai rātou e aha te mea tā rātou e nehenehe e rave ’ia vai mai te Vārua Maita’i i roto ia rātou i te roara’a o te mahana tāta’itahi.

• Te tahi atu rāve’a nō te tauturu i te feiā tā ’outou e ha’api’i nei ’ia hāro’aro’a e nāhea te Vārua Maita’i i te tauturu ia rātou, ’o te pāpa’ira’a ïa i teie mau uira’a i muri nei i ni’a i te tāpura ’ere’ere : E aha tā tātou i ’ite nō ni’a i te Vārua Maita’i ? Nāhea te Vārua Maita’i i te tauturu ia tātou ? I muri iho, e nehenehe te mau melo o te pupu ’aore rā, o te piha, e ’imi mai i te mau pāhonora’a i roto i te parau poro’i a Elder Gary E. Stevenson « Nāhea te Vārua Maita’i i te tauturu ia ’outou ? » (Liahona, Novema 2017, 117–20). E nehenehe ato’a rātou e ’ite mai te mau pāhonora’a nā roto i te hi’o-fa’ahou-ra’a « Te mau ’ohipa a te Vārua Maita’i » i roto Mau Māite i te Fa’aro’o (’api 82). Mai te mea e tano, ’a fa’a’ite i te mau mea tei tupu i ni’a ia ’outou ’e te Vārua Maita’i, ’e e ani i te feiā ’āpī ’ia fa’a’ite mai i tō rātou mau ’itera’a.

• E nehenehe te mau melo o te pupu ’aore rā, o te piha, e tai’o i Te heheura’a a te ta’ata iho » ’aore rā, « ’A ha’api’i mai ’ia ’ite i te mau muhumuhu a te Vārua » i roto i te pene 4 o te ’Ia Poro Haere i tā’u nei ’Evanelia ([2019], 95–96, 102–3). I muri iho, e nehenehe rātou e fa’ahua ē, e mau misiōnare rātou e ha’api’i ra i te hō’ē ta’ata tei ’ore ā i fa’aro’o a’enei ē, nāhea te Vārua Maita’i e nehenehe ai e ha’amaita’i i tō tātou orara’a. E aha tā rātou e parau ia rātou ?

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mau mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a nō teie mahana e tu’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Ioane 14:16–27 (E nehenehe te Fa’a’a’o e ha’api’i ia tātou ’e e fa’aha’amana’o fa’ahou ia tātou i te mau mea ato’a)

• Ioane 15:26 ; Te Parau Ha’api’ira’a ’e te mau Parau Fafau 42:17 ; Mose 1:24 (E fa’a’ite pāpū te Vārua Maita’i i te parau a te Metua ’e a te Tamaiti)

• Roma 8:16 (E fa’a’ite pāpū te Vārua ē, e mau tamari’i tātou nā te Atua)

• 2 Nephi 32:5 ; Te Parau Ha’api’ira’a ’e te mau Parau Fafau 18:18 (E fa’a’ite mai te Vārua Maita’i ia tātou i te mea tā tātou e rave)

• 3 Nephi 27:20 (E ha’amo’a te Vārua Maita’i ia tātou)

• Moroni 8:26 (E fa’a’ī te Vārua Maita’i ia tātou i te ti’aturira’a ’e te here)

• Moroni 10:5 (E ha’api’i te Vārua Maita’i ia tātou i te parau mau)

Ha’api’ira’a mai tā te Fa’aora

’Ua fa’a’ite mai te Fa’aora i te mau ’ā’amu ’ōhie, te mau parabole, ’e te hi’ora’a nō te orara’a mau, nō te ha’api’i ’ia māramarama tāna mau pipi. E aha tō ’outou iho mau ’itera’a tā ’outou e nehenehe e fa’a’ite i te feiā ’āpī nō te tauturu ia rātou ’ia hāro’aro’a i te mau ’ohipa a te Vārua Maita’i ’e ’ia fāri’i i te hina’aro e ’imi i te reira mau huru ’itera’a ? (Hi’o Ha’api’ira’a mai tā te Fa’aora [2016], 22.)