Jesukristo

Si Ginoong Jesukristo, ni Del Parson

Hunyo 27

Unsaon Nako Pag-andam Karon aron Makaestablisar og usa ka Panimalay nga Nakasentro ni Kristo?

Doktrina ug mga Pakigsaad 67–70

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang bag-o sa atong ward, ug unsaon nato pagtabang kanila nga mobati og pag-abiabi? Unsa ang atong buhaton aron sa paghimo sa oras sa atong mga miting sa korum o klase nga makahuluganon?

• Ang atong mga katungdanan o mga responsibilidad. Unsa ang pipila sa atong mga katungdanan ug mga responsibilidad isip mga batan-ong lalaki o mga batan-ong babaye? Sa unsa nga paagi kita mas makatuman niini?

• Ang atong mga kinabuhi. Unsa ang atong buhaton aron mahimong mas mahisama ni Jesukristo ug madawat ang Iyang gahum diha sa atong mga kinabuhi? Unsa ang atong buhaton aron sa pagtabang sa atong mga pamilya nga moduol ngadto Kaniya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang Doktrina ug mga Pakigsaad 68 naglakip sa tambag ngadto sa mga ginikanan nga tingali morag dili ingon ka mahinungdanon ngadto sa mga sakop sa korum o klase (tan-awa sa mga bersikulo 25–28). Hinoon, tungod kay sila adunay gamhanang impluwensya sa ilang kasamtangan ug umaabut nga mga pamilya, kini nga tambag makatabang kanila karon. Ang labing maayong paagi aron maandam sila nga makabaton og usa ka panimalay sa umaabut nga nakasentro ni Kristo mao ang “paglakaw nga matarung sa atubangan sa Ginoo” karon (bersikulo 28).

Unsa nga mga panalangin ang miabut sa imong pamilya tungod kay misunod ka sa mga pagtulun-an sa Manluluwas? Unsaon man sa mga sakop sa korum o klase pagtabang sa ilang mga pamilya sa pag-establisar og usa ka panimalay nga nakasentro ni Kristo? Aron maandam sa pagtudlo, mahimo nimong ribyuhon ang mensahe ni Presidente Henry B. Eyring nga “Usa ka Panimalay Diin ang Espiritu sa Ginoo Mopuyo” (Liahona, Mayo 2019, 22–25) ug “Ang Pamilya: Usa ka Pamahayag ngadto sa Kalibutan”” (ChurchofJesusChrist.org).

batan-ong babaye nga nagtugtog og piano

Mahimo kitang mobati og mas dakong gugma sa atong mga pamilya samtang atong isentro ang atong mga panimalay diha ni Kristo.

Pagkat-on og Dungan

Aron matabangan ang mga sakop sa imong korum o klase nga makita kon sa unsang paagi nga ang Doktrina ug mga Pakigsaad 68:25–28 magamit ngadto kanila, mahimo nimo silang hangyuon sa pagsulat og mubo nga deskripsyon sa unsay ilang gusto nga mahitabo sa ilang umaabut nga kinabuhi sa pamilya. Mahimo nimo silang hangyuon nga ipaambit kon unsay ilang gisulat kon gusto nila. Dayon mahimo silang mobasa sa Doktrina ug mga Pakigsaad 68:25–28 ug mangita sa mga pagtulun-an ug mga baruganan sa ebanghelyo nga makatabang kanila sa pag-ugmad og matarung nga mga pamilya karon ug sa umaabut. Ang mga kalihokan nga anaa sa ubos makatabang aron ilang masabtan kon unsaon paghimo ni Kristo nga sentro sa ilang mga pamilya.

• Ang ikapitong parapo [paragraph] sa “Ang Pamilya: Usa ka Pamahayag ngadto sa Kalibutan” naglangkob og mga kamatuoran nga makatabang sa mga sakop sa korum o klase nga masentro ang ilang mga panimalay diha sa Manluluwas. Dapita sila sa pagbasa niini nga parapo [paragraph] ug tinuon ang mga pagtulun-an ug mga baruganan nga makatabang sa usa ka pamilya aron magmalipayon. Mahimo nimong isulat kini diha sa pisara ug hangyuon kadtong imong gitudloan sa paghisgot kon nganong ang kada usa makatabang sa usa ka pamilya aron magmalipayon. Ang mga sakop sa korum o klase siguro gustong mopaambit kon sa unsang paagi nila nakita kining mga pagtulun-an ug mga baruganan nga nagamit sa ilang kaugalingong pamilya o sa mga pamilya sa uban. Awhaga sila sa pagpamalandong kon sa unsang paagi nila magamit ang dili mominos sa usa niining mga baruganan diha sa ilang mga kinabuhi karon. Pasaligi sila nga mahimo nilang sentro sa ilang mga kinabuhi si Jesukristo, bisan unsa pa nga sitwasyon sa pamilya sila nagagikan.

• Ang mga sakop sa korum o klase mahimong maghisgot og mga butang nga magpabilin sa Manluluwas diha sa sentro sa atong mga panimalay ug mga butang nga makapugong Kaniya nga maanaa sa sentro sa atong mga panimalay. Mahimo nimong hangyuon ang mga indibidwal o ginagmay nga mga grupo sa pagribyu sa usa sa mga seksyon sa mensahe ni Presidente Henry B. Eyring nga “Usa ka Panimalay Diin ang Espiritu sa Ginoo Mopuyo” (Liahona, Mayo 2019, 22–25) aron makakita og mga baruganan nga makatabang sa atong mga panimalay nga mas nakasentro ni Kristo. Dapita ang mga sakop sa korum o klase sa pagpaambit sa unsay ilang nakat-unan ug sa pagpili og usa ka butang nga ilang buhaton sa umaabut nga semana aron sa paghimo sa ilang mga panimalay nga mas nakatutok diha ni Jesukristo ug sa Iyang mga pagtulun-an.

• Siguro mahimo nimong hangyuon ang usa o dugang pa nga mga sakop sa korum o klase sa pagkanta o pagbasa og usa ka awit mahitungod sa panimalay ug pamilya, sama sa “Panimalay Mahimo nga Langit sa Yuta” (Mga Himno, nu. 186) o “Ang Gugma Gipamulong Dinhi” (Songbook sa mga Bata, 102). Ang uban mahimong maminaw kon unsay gitudlo sa awit mahitungod sa paghimo sa panimalay nga usa ka malipayong dapit. Dapita sila sa pagpaambit og kasinatian sa dihang mibati sila nga malipayon tungod kay gipakitaan sila og gugma o sa dihang mitabang sila sa pagpalambo sa gugma diha sa ilang panimalay.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Mosiah 4:14–16; Doktrina ug mga Pakigsaad 88:119; 121:41–46 (Unsaon pag-establisar og matarung nga panimalay)

Pagtudlo sumala sa Pamaagi sa Manluluwas

Ang Ginoo mipakita sa Iyang gugma alang sa uban pinaagi sa paghatag og serbisyo. Ang mga indibidwal nakabig ug mga kinabuhi nausab pinaagi sa Iyang maayong mga buhat. Unsaon nimo sa pagsunod niini nga hiyas isip usa ka lider? Unsaon nimo pagtabang ang mga batan-on nga magtinguha sa pagsunod sa ehemplo sa Manluluwas bahin sa pagserbisyo diha sa ilang kaugalingong mga pamilya?