Hulyo 11

Sa Unsang Paagi nga ang Pagkahibalo mahitungod sa Plano sa Kaluwasan Makaapekto sa Akong Kinabuhi?

Doktrina ug mga Pakigsaad 76

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang nagkinahanglan sa atong tabang ug mga pag-ampo? Unsay atong mahimo sa pagtabang kanila? Kinsa ang atong dapiton ngadto sa umaabut nga kalihokan?

• Ang atong mga katungdanan o mga responsibilidad. Unsa nga mga buluhaton ang ato nang natuman? Unsa nga mga buluhaton ang kinahanglan natong buhaton? Giunsa nato pagdapit ang uban sa pagduol ngadto kang Kristo, ug unsaon nato pagdapit ang uban karon?

• Ang atong mga kinabuhi. Unsa nga bag-ong mga kasinatian ang nakapalig-on sa atong mga pagpamatuod? Unsa ang nanghitabo sa atong mga kinabuhi, ug unsaon nato sa pagsuporta ang usag usa?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang atong Langitnong Amahan mihatag og plano aron mahimo kita nga makadawat og mahangturong mga panalangin ug mahisama Kaniya. Gusto Niya nga ang tanan Niyang mga anak masayud mahitungod niana nga plano, mao nga Iya kining gipadayag ngadto sa mga propeta sa tibuok kapanahonan. Samtang nagtuon ang mga sakop sa korum o klase sa Doktrina ug mga Pakigsaad 76 niini nga semana, ilang nakat-unan kon unsay gipadayag sa Dios mahitungod sa Iyang plano ngadto nila ni Joseph Smith ug Sidney Rigdon, lakip na ang mahinungdanong tahas sa Manluluwas niana nga plano ug ang himaya nga atong madawat sa kinabuhi nga moabut. Kon kita matinud-anon, mahingpit kita pinaagi sa Pag-ula ni Jesukristo, makadawat og hingpit nga kalipay, ug magpuyo uban sa Dios sa kahangturan.

Sa unsang paagi nga ang pagkasayud mahitungod sa plano sa Langitnong Amahan nakaimpluwensya sa imong panglantaw sa kinabuhi? Unsaon nimo pagtabang sa mga sakop sa imong korum o klase nga masabtan kon unsa ka dakong panalangin nga masayud mahitungod sa plano sa kaluwasan? Aron maandam sa pagtudlo, mahimo nimong basahon ang “Plano sa Kaluwasan” diha sa Matinud-anon sa Tinuhoan ([2004], 196–200) o ang mensahe ni Elder Dieter F. Uchtdorf nga “Ang Inyong Mahinungdanong Pagpanimpalad” (Liahona, Nob. 2019, 86–90).

Ang pagkat-on mahitungod sa plano sa kaluwasan maghatag og direksyon ug katuyoan sa atong mga kinabuhi.

Pagkat-on og Dungan

Usa ka paagi sa pagsugod og panaghisgutan uban sa imong korum o klase mahitungod sa plano sa kaluwasan mao ang pagdapit sa usa ka tawo sa pagsulat diha sa pisara sa mosunod nga mga ulohan, kauban sa mga bersikulo gikan sa Doktrina ug mga Pakigsaad 76: Kinabuhi sa Wala pa Dinhi sa Yuta (mga bersikulo 22–27), Mortal nga Kinabuhi (mga bersikulo 40–43), ug Kinabuhi human sa Kamatayon (mga bersikulo 50–53, 59–62). Hatagi ang mga sakop sa korum o klase og pipila ka minutos sa pagribyu niining mga bersikulo aron makita ang tahas sa Manluluwas sa pagtuman sa plano sa Langitnong Amahan. Hangyoa sila sa pagsulat diha sa ubos sa matag ulohan kon unsay ilang makit-an. Ang mga kalihokan nga anaa sa ubos makatabang kanila aron mas masabtan kon sa unsang paagi nga ang plano sa Langitnong Amahan makapanalangin sa ilang mga kinabuhi.

• Ang pagribyu sa pipila ka mga ngalan sa plano sa Langitnong Amahan makatabang sa mga sakop sa korum o klase nga mas makasabut sa plano. Mahimo silang moribyu sa mga kasulatan diha sa unang bullet ubos sa “Suporta nga mga Kapanguhaan” ug mohimo og lista sa pipila sa mga ngalan sa plano sa Dios. Unsay gitudlo niining mga ngalan mahitungod sa plano? Sama pananglit, sa unsang paagi nga kining plano makahatag kanato og kalipay, karon ug sa kahangturan? Unsa ang gitudlo niini nga mga kasulatan kanato mahitungod sa tahas sa Manluluwas diha sa plano?

• Ikonsiderar ang pagdapit niadtong imong gitudloan sa paghisgot kon unsaon kaha nila pagtubag ang usa ka higala nga nangutana sa mosunod nga mga pangutana mahitungod sa plano sa kaluwasan: Asa kita gikan? Nganong ania kita dinhi? Asa kita paingon human niini nga kinabuhi? Dapita sila sa paggamit sa impormasyon ubos sa “Plano sa Kaluwasan” diha sa Matinud-anon sa Tinuhoan (mga pahina 196–200) ug sa mga kapanguhaan ubos sa “Suporta nga mga Kapanguhaan” aron pag-andam og tubag sa usa sa mga pangutana. Sa unsang paagi kita nalig-on pinaagi sa pagkasayud sa mga tubag niining mga pangutana?

• Ang mga sakop sa korum o klase mas makakat-on sa mga kamatuoran sa ebanghelyo kon hatagan sila og mga oportunidad sa pagtudlo. Sa wala pa ang klase, hangyoa ang pipila ka sakop sa korum o klase nga motungha nga andam sa pagpaambit og mubo nga summary sa unsay ilang nahibaloan mahitungod sa usa ka aspeto sa plano sa kaluwasan. Mahimo nilang gamiton ang mga summary nga makita sa ubos sa “Ang Plano sa Kaluwasan” diha sa kapitulo 3 sa Isangyaw ang Akong Ebanghelyo ([2019], 55–63). Unsa ang kalainang mahimo kon mahibalo kita mahitungod sa plano sa kaluwasan?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• 2 Nephi 11:5; Alma 12:30; 34:9; 41:2; 42:8, 13–15; Moises 6:59–62 (Mga ngalan sa plano sa Langitnong Amahan)

• Doktrina ug mga Pakigsaad 38:1–3; 138:53–56; Moises 4:1–4; Abraham 3:21–24 (Kinabuhi sa wala pa dinhi sa yuta)

• 2 Nephi 2:19–21, 25; Alma 5:15–16; 34:32; Abraham 3:25–26 (Mortal nga kinabuhi)

• Juan 14:1–2; Alma 11:42–45; Doktrina ug mga Pakigsaad 76:39–43, 89–93 (Kinabuhi human sa kamatayon)

Pagtudlo sumala sa Pamaagi sa Manluluwas

Nangutana ang Manluluwas og mga pangutana nga nakapahunahuna og maayo niadtong Iyang gitudloan. Siya sinsero nga interesado sa ilang mga tubag. Unsaon nimo paggamit og mga pangutana aron sa pagtabang sa mga batan-on sa paghunahuna og maayo mahitungod sa plano sa Dios? (Tan-awa sa Pagtudlo sumala sa Pamaagi sa Manluluwas [2016], 33–34.)