mga batan-ong babaye nga nanganta

Hulyo 25

Nganong Kinahanglan Ko nga Magmasulundon sa mga Sugo sa Dios?

Doktrina ug mga Pakigsaad 81–83

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang atong mahimo aron sa pag-ugmad og panaghiusa diha sa korum o mga sakop sa klase? Unsa nga mga tumong ang atong gustong buhaton og dungan?

• Ang atong mga katungdanan o mga responsibilidad. Unsa ang atong gibuhat sa pagpaambit sa ebanghelyo? Unsa ang atong mga kasinatian sa paghimo og mga buhat sa templo ug family history?

• Ang atong mga kinabuhi. Giunsa nato pagsinati ang kamot sa Ginoo diha sa atong mga kinabuhi? Unsa ang nakapadasig kanato sa atong pagtuon sa kasulatan niini nga semana?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Siguro mobati kita usahay nga ang mga sugo sa Dios mopugong sa atong kagawasan ug molimitar sa atong kabubut-on. Ang kamatuoran mao nga ang mga sugo mopalambo sa atong kagawasan. Diha sa Doktrina ug mga Pakigsaad 82:8–10 atong makat-unan nga ang mga sugo makatabang kanato nga makasabut sa kabubut-on sa Dios, ug kon motuman kita niini, ang atong mga lihok “mobalik [nganhi kanato] alang sa [atong] kaluwasan.” Gani, kon motuman kita sa Dios, Siya “mapugos” sa paghatag kanato sa tanang panalangin nga Iyang gisaad (mga bersikulo 9–10). Giunsa sa Langitnong Amahan sa pagpanalangin kanimo samtang gituman nimo ang Iyang mga sugo? Aron maandam sa pagtudlo, mahimo nimong basahon ang mensahe ni Elder Dale G. Renlund nga “Magamadagayaon [Buhong] sa mga Panalangin” (Liahona, Mayo 2019, 70–73).

batan-ong babaye nga nagtuon

Ang mga ehemplo sa matinud-anong mga sulugoon sa Dios sa miaging panahon makapadasig kanato nga magpuyo nga matinud-anon karon.

Pagkat-on og Dungan

Ang mga sakop sa imong korum o klase siguro nanglimbasug sa pagsunod sa pipila sa mga sugo. Ang pagtabang kanila nga makasabut kon nganong ang pagkamasulundon importante mahimong makapadasig kanila. Isulat ang ulohan niining outline diha sa pisara, ug dapita ang mga sakop sa korum o klase nga ipaambit ang mga tubag. Mahimo nimo silang hangyuon sa pagpangita og dugang nga mga ideya diha sa Doktrina ug mga Pakigsaad 82:8–10, nga siguro ilang natun-an niini nga semana. Dayon pagpili og usa o dugang pa sa mga kalihokan nga anaa sa ubos aron sa pagtabang kanila nga mas makasabut kon nganong kanunay nga importante ang pagsunod sa Dios, bisan kon ang pagbuhat sa ingon lisud kaayo.

• Mas sayon ang pagsunod sa mga sugo kon atong masabtan ang mga rason sa likod niini. Aron makakat-on kon nganong naghatag ang Dios kanato og mga sugo, ang mga sakop sa korum o klase mahimong moribyu sa mga pakisayran sa kasulatan diha sa “Suporta nga mga Kapanguhaan” (o uban pa nga imong nahunahunaan). Sa unsang paagi nga kining mga kasulatan makatabang kanato kon magkalisud kita sa pagsunod og usa ka sugo? Isip kabahin niining panaghisgutan, mahimo ninyong basahon og dungan ang seksyon nga giulohan og “Ikaupat, ayaw hikalimti ang ‘ngano’ sa ebanghelyo” sa mensahe ni Presidente Dieter F. Uchtdorf nga “Ayaw Ko Paghikalimti” (Liahona, Nob. 2011, 122).

• Samtang kadtong imong gitudloan makasabut sa hingpit nga ehemplo sa Manluluwas sa pagkamasulundon, siguro madasig sila nga mas hingpit nga mosunod sa Dios. Kanus-a gisunod ni Jesukristo ang Iyang Amahan, bisan sa lisud nga mga kahimtang? (tan-awa sa Mateo 4:1–11; Lucas 22:39–44). Ang mga ehemplo sa mga lalaki ug mga babaye nga masulundon makita diha sa Mga Hebreohanon 11. Siguro ang imong korum o klase mahimong mopili og usa niining mga ehemplo—o sa uban nga ilang nahibaloan, lakip na ang ilang mga pamilya—ug mopaambit kon unsay nakapadasig kanila mahitungod niining mga tawo. Nganong gipili man nila nga mosunod sa Ginoo? Sa unsang paagi nga matabangan kita sa Manluluwas kon mopili kita nga magmasulundon?

• Aron matabangan ang mga sakop sa korum o klase nga makita ang mga sugo isip mga panalangin ug dili isip mga palas-anon, mahimo nimong ipaambit ang mga pagtulun-an ni Elder D. Todd Christofferson nga makita diha sa “Suporta nga mga Kapanguhaan.” Mahimo kang magpakita o magdrowing og hulagway sa usa ka hagdanan ug hangyoa kadtong imong gitudloan sa pagbutang og ngalan sa matag ang-ang og usa ka sugo nga mahimong lisud sabton o sundon sa usa ka batan-on. Sa unsang paagi nga ang mga pulong ni Elder Christofferson makatabang sa usa ka tawo nga nanglimbasug sa pagsunod sa mga sugo?

• Siguro ang korum o klase mahimong magplano sa ilang kaugalingong video mahitungod sa pagsunod sa mga sugo sa Dios. Mahimo dayon silang mag-organisar og usa ka kalihokan sa paghimo sa video ug sa pagpaambit niini sa social media.

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• 1 Nephi 17:3; Mosiah 2:41; Doktrina ug mga Pakigsaad 130:20–21 (Mapanalanginan kita pinaagi sa pagsunod sa mga sugo)

• Deuteronomio 10:12–13; Juan 14:15; 1 Juan 5:1–3 (Mosunod kita sa mga sugo tungod kay gihigugma nato ang Dios)

• Doktrina ug mga Pakigsaad 93:20 (Ang pagkamasulundon motugot kanato nga madawat ang kahingpitan sa Dios)

• “Pagkamasulundon,” diha sa kapitulo 3 sa Isangyaw ang Akong Ebanghelyo (2019), 84–85

• Si Elder D. Todd Christofferson nagtudlo: “Ang uban nakakita lamang sa sakripisyo ug mga limitasyon diha sa pagsunod sa mga sugo sa bag-o ug walay katapusang pakigsaad, apan kadtong kinsa naghambin sa kasinatian— kinsa gawasnon ug walay pagduhaduha nga mihatag sa ilang kaugalingon ngadto sa kinabuhi sa pakigsaad—nakakita og mas dakong kagawasan ug katagbawan. Kon kita tinud-anay nga nakasabut, kita magtinguha og dugang pa nga mga sugo, dili pipila lamang. Ang matag bag-ong balaod o sugo nga atong makat-unan sama sa usa ka ang-ang sa hagdanan nga nagtugot kanato nga mosaka og mas taas pa. Sa pagkatinuod, ang kinabuhi sa ebanghelyo mao ang maayo nga kinabuhi” (“Ang Gahum sa mga Pakigsaad,” Liahona, Mayo 2009, 23).

Pagtudlo sumala sa Pamaagi sa Manluluwas

Ang Manluluwas midapit sa Iyang mga disipulo sa pagpamatuod, ug samtang sila mihimo, ang Espiritu mitandog sa ilang mga kasingkasing. Samtang magtudlo ka, dapita ang mga sakop sa korum o klase sa pagpaambit sa ilang mga pagpamatuod sa kaimportante sa pagtuman sa mga sugo.