Agosto 8

Unsaon Nako aron Makaapil sa Pagpundok sa Israel?

Doktrina ug mga Pakigsaad 85–87

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Unsa ang bag-ohay lang nato nga mga kalihokan? Malampuson ba kini? Unsa ang maayong nabuhat, ug sa unsa nga paagi kita makapanindot niini?

• Ang atong mga katungdanan o mga responsibilidad. Kinsa ang nagkinahanglan sa atong tabang? Unsaon nato pagtabang kanila?

• Ang atong mga kinabuhi. Unsa nga mga tumong ang atong gibuhat sa indibidwal nga paagi? Unsa nga mga kasinatian ang atong mapaambit? Unsa nga mga panalangin ang atong nadawat?

Sa katapusan sa leksyon, kon angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

Itudlo ang Doktrina

Pinangulohan sa usa ka hamtong nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Kadtong anaa sa imong korum o klase tingali nahibalo og butang mahitungod sa ilang mga responsibilidad sa paghimo sa misyonaryo nga buhat ug sa buhat sa templo ug sa family history. Apan kon maghisgot ka kanila mahitungod sa pagpundok sa Israel, mahimong wala sila mahibalo kon unsay imong gihisgutan. Unsaon nimo pagtabang kanila nga makasabut nga ang pagpaambit sa ebanghelyo, pagsiksik sa ilang family history, ug pagpahigayon sa mga ordinansa diha sa templo mga kabahin sa mas mahinungdanong buhat sa pagpundok sa Israel agi og pagpangandam alang sa Ikaduhang Pag-anhi sa Manluluwas?

Kadtong imong gitudloan mahimong nakatuon na sa sambingay sa trigo ug mga sagbut diha sa Doktrina ug mga Pakigsaad 86, nga nagtudlo mahitungod sa pagpundok sa Israel sa katapusang mga adlaw. Samtang magbasa ka niining seksyon, sulayi paghanduraw ang mga tawo diha sa imong korum o klase isip mga mamumuo sa mga umahan sa Ginoo. Unsaon nimo sa pagtabang kanila nga makasinati sa hingpit nga kalipay nga magagikan sa pag-apil niining mahinungdanon nga buhat? Aron makakat-on og dugang mahitungod niining hilisgutan, tun-i ang mensahe nila ni Presidente Russell M. Nelson ug Sister Wendy W. Nelson nga “Paglaum sa Israel” ([tibuok kalibutan nga debosyonal sa kabatan-onan, Hunyo 3, 2018], dugang ngadto sa New Era ug Ensign, ChurchofJesusChrist.org).

Ang mga batan-ong lalaki ug ang mga batan-ong babaye makatabang sa pagpundok sa Israel pinaagi sa paghimo sa buhat sa templo ug sa family history.

Pagkat-on og Dungan

Mahimo nimong sugdan pinaagi sa pagpangutana sa mga sakop sa klase og mga pangutana sama niini: Unsay mahinungdanon alang nimo samtang nagbasa ka sa Doktrina ug mga Pakigsaad 86 diha sa panimalay? Unsay imong nakat-unan mahitungod sa buhat sa pagpundok sa mga anak sa Dios sa katapusang mga adlaw? Unsay atong himoon sa pag-apil niini nga buhat? Sa ubos mao ang dugang nga mga ideya aron madasig ang imong korum o klase sa pag-apil sa pagpundok sa Israel.

• Pangutan-a ang mga sakop sa imong korum o klase kon unsay ilang mahunahunaan kon makadungog sila sa termino nga “pagpundok sa Israel.” Kon magkinahanglan sila og tabang, isugyot nga basahon nila ang mosunod nga kahulugan pinaagi ni Presidente Russell M. Nelson: “Ang pagpundok sa Israel nagpasabut sa pagtanyag sa ebanghelyo ni Jesukristo ngadto sa mga anak sa Dios sa matag habig sa tabil kinsa wala makahimo og importanting mga pakigsaad sa Dios ug wala makadawat sa ilang importanting mga ordinansa. Ang matag anak sa atong Langitnong Amahan takus sa oportunidad sa pagpili nga mosunod ni Jesukristo, modawat sa Iyang ebanghelyo uban sa tanang panalangin niini” (“Paglaum sa Israel,” 11–12). Sa unsang paagi nga kining kahulugan makaapekto sa paagi sa atong paghunahuna mahitungod niining importante nga katungdanan?

• Aron matabangan ang mga sakop sa korum o klase nga makakita kon sa unsang paagi nga ang sambingay sa trigo ug mga sagbut magamit ngadto nila, mahimo kang magsulat og mga hugpong sa mga pulong gikan sa Doktrina ug mga Pakigsaad 86 diha sa pisara. Kining mga hugpong sa mga pulong mahimong mohulagway og mga simbolo diha sa sambingay—sama sa “mga tigsabwag sa mga binhi,” “mga sagbut miturok sa trigo,” “udlot migitib,” ug “pagpundok sa trigo” (mga bersikulo 2–4, 7). Ang mga hugpong sa mga pulong mahimo usab nga mohulagway sa mga interpretasyon niining mga simbolo—sama sa “ang mga Apostoles,” “ang Apostasiya,” “ang Pagpahiuli,” ug “misyonaryo nga buhat.” Dayon ang mga sakop sa korum o klase mahimong magtinabangay sa pagribyu sa seksyon 86 ug mopares sa mga simbolo ngadto sa mga kahulugan niini. (Mahimo usab nilang basahon ang Mateo 13:36–43.) Unsa ang atong makat-unan gikan niini nga sambingay mahitungod sa buhat sa pagpundok sa Israel? Unsa man ang atong mabuhat aron mahimong “usa ka kahayag ” ug “usa ka manluluwas” ngadto sa mga anak sa Dios? (Doktrina ug mga Pakigsaad 86:11).

• Ang mga sakop sa korum o klase mahimong mahinumdom nga diha sa iyang mensahe nga “Paglaum sa Israel,” si Presidente Russell M. Nelson midapit kanila sa pagbuhat og piho nga mga butang aron maandam sa pagtabang sa pagpundok sa Israel (tan-awa sa mga pahina 14–17). Pangutan-a sila kon unsa nga mga pagdapit ang ilang nahinumduman, ug ribyuha og dungan ang mga pagdapit kon gikinahanglan. Sa unsa kaha nga paagi nga ang pagbuhat niining mga butanga makapahimo kanato nga mas epektibo sa pagpundok sa Israel? Unsa ang atong mahimo aron mapahinumduman ang atong mga kaugalingon niining mga pagdapit ug magtinabangay sa usag usa sa pagtuman niini? Awhaga ang mga sakop sa korum o klase sa paghunahuna sa mamugnaong paagi ug ipaambit ang ilang mga ideya.

• Ang mga sakop sa korum o klase mahimong mobasa sa pasiuna ug unang duha ka seksyon sa mensahe ni Elder Quentin L. Cook nga “Dakong Gugma alang sa mga Anak sa Atong Amahan” (Liahona, Mayo 2019, 76–79), nga mangita kon nganong ang gugma importante kaayo sa atong misyonaryo ug templo ug family history nga mga paningkamot. Hangyoa sila sa pagpaambit sa unsay ilang nakat-unan kon sa unsang paagi nga ang gugma makahimo og kalainan samtang maningkamot kita sa pagpaambit sa ebanghelyo niadtong anaa sa duha ka habig sa tabil. Hatagi og panahon ang mga sakop sa korum o klase sa pagsulat og butang nga gusto nilang buhaton tungod sa panaghisgutan karon. Aron matabangan sila sa paghunahuna og mga ideya, mahimo nimong isugyot nga maghunahuna sila mahitungod sa mga tawo nga ilang nailhan. Sa unsa kaha nga paagi nga ang Dios nagatabang niini nga mga tawo? Sa unsang paagi kita makatabang?

Suporta nga mga Kapanguhaan

• Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 79–82

• Mga Hisgutanan sa Kasaysayan sa Simbahan, “Ang Pagpundok sa Israel,” ChurchofJesusChrist.org/study/history/topics

Pagtudlo sumala sa Pamaagi sa Manluluwas

Ang Ginoo misalig niadtong kinsa misunod Kaniya. Siya miandam kanila ug mihatag kanila og importanting mga responsibilidad sa pagtudlo, pagpanalangin, ug sa pagserbisyo sa uban (tan-awa sa Pagtudlo sumala sa Pamaagi sa Manluluwas [2016], 28). Unsa nga mga oportunidad ang imong ikahatag sa mga batan-on aron sa pagtudlo sa usag usa?