mga batan-ong babaye nga nagbaktas diha sa lasang

Agosto 22

Nganong Gusto sa Ginoo nga Ako Mahimong Himsog?

Doktrina ug mga Pakigsaad 89–92

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang bag-o sa atong ward, ug unsaon nato pagtabang kanila nga mobati og pag-abiabi? Unsa ang atong buhaton aron sa paghimo sa oras sa atong mga miting sa korum o klase nga makahuluganon?

• Ang atong mga katungdanan o mga responsibilidad. Unsa ang pipila sa atong mga katungdanan ug mga responsibilidad isip mga batan-ong lalaki ug mga batan-ong babaye? Sa unsa nga paagi kita mas makatuman niini?

• Ang atong mga kinabuhi. Unsa ang atong buhaton aron mahimong mas mahisama ni Jesukristo ug madawat ang Iyang gahum diha sa atong mga kinabuhi? Unsa ang atong buhaton aron sa pagtabang sa atong mga pamilya nga moduol ngadto Kaniya?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Sayon ra alang sa ubang mga tawo nga maghunahuna sa Pulong sa Kaalam, nga makita diha sa Doktrina ug mga Pakigsaad 89, isip usa lang ka lista sa mga angay buhaton ug mga dili angay buhaton. Ang Pulong sa Kaalam anaa sa pipila niana, apan naglangkob usab kini og mga baruganan aron sa pagpabilin sa atong mga lawas nga himsog. Nagtudlo usab kini nga ang paagi sa atong pagtratar sa atong mga lawas makaimpluwensya sa atong mental, emosyonal, ug espiritwal nga kahimsog. Unsa nga mga panalangin ang imong nadawat samtang naningkamot ka nga magpuyo og himsog nga kinabuhi?

Ang mga sakop sa imong korum o klase tingali nakatuon na sa Pulong sa Kaalam samtang nagbasa sila sa Doktrina ug mga Pakigsaad 89–92 niini nga semana. Unsaon nimo pagtabang nila nga makasabut sa pisikal ug espiritwal nga mga panalangin nga moabut tungod sa pagsunod niini nga pagpadayag? Makakita ka og makatabang nga mga ideya pinaagi sa pagribyu sa artikulo sa Mga Hilisgutan sa Ebanghelyo pinaagi sa pagribyu sa “Pisikal ug Emosyonal nga Kahimsog” diha sa Alang sa Kalig-on sa mga Kabatan-onan ([2011], 25–27).

mga batan-ong lalaki nga nagbaktas diha sa lasang

Ang pag-atiman sa atong pisikal nga mga lawas makaimpluwensya sa atong mental, emosyonal, ug espiritwal nga kahimsog.

Pagkat-on og Dungan

Sa pagsugod og panaghisgutan mahitungod sa Pulong sa Kaalam, isulat kining mga pulong diha sa pisara: Pisikal, Intelektwal, Espiritwal, ug Sosyal. Dapita ang mga sakop sa korum o klase sa pagbasa sa Doktrina ug mga Pakigsaad 89:18–21 ug hisguti kon sa unsang paagi nga ang mga saad diha sa mga bersikulo magamit niini nga mga aspeto. Unsa nga mga panalangin ang moabut tungod sa pagsunod sa Pulong sa Kaalam? Sa unsang paagi nga atong nasinati kining mga panalangin sa atong mga kinabuhi?

• Ang mga sakop sa imong korum o klase makakat-on og daghan sa usag usa pinaagi sa paghimo og gihiusa nga lista sa mga butang nga ilang gihimo aron mahimong himsog. Bahina ang mga sakop sa korum o klase ngadto sa mga grupo, ug sanguni ang matag grupo sa pagpangita og usa o dugang pa sa mga tudling sa kasulatan sa unang bullet ubos sa “Suporta nga mga Kapanguhaan,” nga mangita og mga kamatuoran mahitungod sa pisikal nga kahimsog. Ipaambit sa matag grupo kon unsa ang ilang nakat-unan ug ipalista ang ilang mga ideya diha sa pisara. Unsaon nato pagtubag sa mga pangutana sama sa mosunod: Ngano nga ang Ginoo mihatag kanato og mga balaod kalabut sa pisikal nga kahimsog? Nganong ato man kining sundon?

• Ang mga sakop sa imong korum o klase mahimong mapangutan-an kon nganong dili sila moinum og ilimnong makahubog, manigarilyo, o magdrugas. Unsaon nila pagtubag kini nga mga pangutana? Mahimo nilang pangitaon ang “Pisikal ug Emosyonal nga Kahimsog” diha sa Alang sa Kalig-on sa Kabatan-onan (mga pahina 25–27) ug mangita sa tambag ug gisaad nga mga panalangin nga ilang mapaambit sa uban. Sa unsang paagi nga ang atong pagtratar sa atong mga lawas makaapekto sa atong relasyon ngadto sa Dios? Giunsa sa mga sakop sa korum o klase pagbaton og mga pagpamatuod nga ang pagsunod sa Pulong sa Kaalam nakapanalangin sa ilang mga kinabuhi?

• Ang mga kasinatian nga nagpakita sa mga panalangin sa pagsunod sa Pulong sa Kaalam makapadasig sa mga sakop sa korum o klase aron mas mapasaligon sa pagsunod niining balaod. Mahimo nimong ipaambit ang usa ka kasinatian gikan sa imong kinabuhi o ang kasinatian nga gipaambit ni Presidente Thomas S. Monson diha sa iyang mensahe nga “Mga Baruganan ug Mga Saad” (Liahona, Nob. 2016, 78–79). Mahimo nimong awhagon ang mga sakop sa korum o klase nga ipaambit ang ilang mga kasinatian.

• Sa pagsugod og panaghisgutan kon unsaon pagbatok sa mga tintasyon sa pagsupak sa Pulong sa Kaalam, mahimo nimong pakit-on ang imong korum o klase og usa ka paon sa pangisda (o usa ka litrato niini). Sa unsang paagi nga ang mga paon sa pangisda makalingla sa mga isda? Ang mga tubag niining pangutana mahimong makita diha sa ( M. Russell Ballard, “O Kanang Maliputon Nga Laraw sa Usa ka Dautan,” Liahona, Nob. 2010, 108–10). Sa unsang paagi nga ang mga paon sa pangisda kaparehas sa buhat ni Satanas sa paglingla o pag-ilad kanato? Unsa ang mensahe ni Presidente Ballard alang niadtong nangaadik? Unsaon nato pagtabang ang usa ka tawo kinsa nanglimbasug sa tintasyon nga modangup ngadto sa Manluluwas? (tan-awa ang mga kasulatan diha sa ikaduhang bullet ubos sa “Suporta nga mga Kapanguhaan”).

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• Daniel 1:3–20; 1 Mga Taga-Corinto 6:19–20; Doktrina ug mga Pakigsaad 88:124; 89:5–21 (Giunsa nato pag-atiman ang atong mga lawas importante ngadto sa Ginoo)

• Mosiah 7:33; Alma 13:27–29; Ether 12:27 (Paglaum alang niadtong nanglimbasug sa pagkaadik)

• Agosto 2019 nga isyu sa Liahona (espesyal nga isyu mahitungod sa lawas)

Pagtudlo sumala sa Pamaagi sa Manluluwas

Sa tanang kahimtang, ang Manluluwas mao ang atong ehemplo ug tigtudlo. Samtang mangandam ka sa pagtudlo, hunahunaa kon giunsa sa Ginoo sa pagpakig-istorya sa uban ug unsaon nimo sa pagpakig-istorya sa paagi nga makapadasig ug makapaawhag niadtong imong gitudloan.