Mga Santos nga nanagan palayo sa manggugubot nga panon

C. C. A. Christensen (1831–1912), Ang mga Santos Giabug gikan sa Lalawigan sa Jackson Missouri, c. 1878, tempera diha sa muslin nga panapton, 77 ¼ × 113 ka pulgada. Brigham Young University Museum of Art, gasa sa mga apo ni C. C. A. Christensen, 1970

Septyembre 12

Unsaon Nato sa Pagsagubang sa Kalisdanan uban sa Hugot nga Pagtuo?

Doktrina ug mga Pakigsaad 98–101

icon sa pagtinambagay

Pagtinambagay

Pinangulohan sa usa ka sakop sa korum o kapangulohan sa klase; mga 10–20 ka minutos

Sa pagsugod sa miting, pagdungan sa pagsulti sa Tema sa Korum sa Aaronic nga Pagkapari o sa Tema sa Young Women. Dayon pangulohi ang usa ka panaghisgutan mahitungod sa mga aytem sama sa mosunod, ug pagplano og mga paagi sa paglihok sa unsay inyong gihisgutan (mahimo ninyong desisyunan sa miting sa kapangulohan kon unsa nga mga aytem ang hisgutan):

• Ang atong korum o klase. Kinsa ang nagkinahanglan sa atong tabang ug mga pag-ampo? Unsay atong mahimo sa pagtabang kanila? Kinsa ang atong dapiton ngadto sa umaabut nga kalihokan?

• Ang atong mga katungdanan o mga responsibilidad. Unsa nga mga buluhaton ang ato nang natuman? Unsa nga mga buluhaton ang kinahanglan natong buhaton? Giunsa nato pagdapit ang uban sa pagduol ngadto kang Kristo, ug unsaon nato pagdapit ang uban karon?

• Ang atong mga kinabuhi. Unsa nga bag-ong mga kasinatian ang nakapalig-on sa atong mga pagpamatuod? Unsa ang nanghitabo sa atong mga kinabuhi, ug unsaon nato sa pagsuporta ang usag usa?

Sa katapusan sa leksyon, ingon nga angay, buhata ang mosunod:

• Pagpamatuod sa mga baruganan nga gitudlo.

• Pahinumdumi ang mga sakop sa korum o klase mahitungod sa mga plano ug mga pagdapit nga gihimo atol sa miting.

icon sa itudlo ang doktrina

Itudlo ang Doktrina

Pinangulohan sa usa ka hamtong [adult] nga lider o batan-on; mga 25–35 ka minutos

Andama ang Imong Kaugalingon sa Espirituhanong Paagi

Ang mga pulong diha sa Doktrina ug mga Pakigsaad 98 ug 101 nagtanyag og kahupayan sa mga Santos nga nag-atubang og hilabihan nga mga pagsulay didto sa Missouri sa mga 1830. Samtang ang atong mga pagsulay tingali lahi kay sa niadtong nag-unang mga miyembro sa Simbahan, magsagubang kitang tanan og kalisdanan atol sa mortalidad, ug ang matinud-anong pagtubag sa kalisdanan makatabang kanato nga molambo sa espiritwal nga paagi ug mas mahisama ni Jesukristo.

Sa unsang paagi nga ang pagdangup ngadto sa Ginoo sa mga panahon sa kalisdanan nakapalig-on kanimo ug nakapalambo sa imong relasyon ngadto ni Jesukristo? Unsa nga mga hagit ug mga pagsulay ang nasinati sa mga sakop sa imong korum o klase, ug unsaon nimo pagtabang kanila nga makakita og kalig-on diha sa Manluluwas? Aron matabangan ka nga maandam sa pagtudlo mahitungod sa kalisdanan, mahimo nimong ribyuhon ang mensahe ni Elder Neil L. Andersen nga “Nasamdan” (Liahona, Nob. 2018, 83–86) ug “Kalisdanan [Adversity]” diha sa Matinud-anon sa Tinuhoan ([2004], 73–77).

batan-ong lalaki nga anaa sa gawas

Makakita kita og kalinaw sa panahon sa kalisdanan pinaagi sa pagdangup ngadto sa Manluluwas.

Pagkat-on og Dungan

Ang matag sakop sa imong korum o klase nanglimbasug sa iyang kaugalingong mga hagit. Unsa nga kahupayan ang imong gibati nga ilang makita diha sa Doktrina ug mga Pakigsaad 98:1–3? Mahimo nimong gamiton ang usa o dugang pa sa mga kalihokan nga anaa sa ubos aron matabangan sila nga masabtan kon unsaon paglahutay sa kalisdanan uban sa hugot nga pagtuo diha sa Ginoo.

• Ang mga kasulatan naglangkob og daghang ehemplo sa mga tawo nga matinud-anong milahutay sa mga pagsulay. Ang mga sakop sa korum o klase makakat-on kon sa unsang paagi nga matinud-anong makalahutay sa kalisdanan pinaagi sa pagtuon sa pipila niining mga ehemplo (tan-awa ang pipila diha sa “Suporta nga mga Kapanguhaan”). Matag usa kanila mahimong mopili og usa sa mga tudling sa kasulatan ug mo-summarize sa kasinatian niana nga tawo alang sa korum o klase. Unsa nga mga ideya ang atong makuha mahitungod sa hinungdan nganong kita adunay kalisdanan? Unsay atong makat-unan mahitungod sa unsang paagi kita matinud-anong makalahutay sa kalisdanan? Dapita ang mga sakop sa korum o klase nga magsulat ang matag usa og usa ka pagsulay nga gisagubang nila o sa ilang mga minahal sa kinabuhi ug sa pagpamalandong kon unsaon nila paggamit sa gahum sa Manluluwas aron matabangan sila sa panahon niining mga pagsulay.

• Aron makakat-on og pipila sa mga hinungdan sa kalisdanan ug unsay atong makat-unan gikan sa atong mga pagsulay, mahimong magdungan kamo sa pagbasa sa unang duha ka parapo [paragraph] ubos sa “Kalisdanan [Adversity]” diha sa Matinud-anon sa Tinuhoan (pahina 73). Hangyoa ang mga sakop sa korum o klase sa pagpaambit kon unsay ilang nakat-unan. Dayon ang matag tawo mahimong moribyu sa usa sa nahabiling tulo ka seksyon ubos sa “Kalisdanan” ug sa pag-andam aron itudlo ang nahabilin sa unsay ilang nakat-unan, lakip na kon sa unsang paagi nga ang Manluluwas makatabang kanato sa panahon sa pagsulay. Awhaga sila sa pagpaambit og personal nga kasinatian kalabut sa unsay ilang nabasa kon komportable sila sa pagbuhat niini.

• Usa ka paagi sa pag-awhag og panaghisgutan mahitungod sa kalisdanan mao ang pagdrowing og usa ka linya paingon sa tunga-tunga sa pisara ug isulat ang Nganong kita adunay kalisdanan? sa usa ka bahin ug Unsaon nato pagsagubang ang kalisdanan sa matinud-anong paagi? diha sa laing bahin. Ang matag sakop sa imong korum o klase mahimong mobasa sa usa sa mga seksyon gikan sa mensahe ni Elder Neil L. Andersen nga “Nasamdan,” nga mangita sa mga tubag sa mga pangutana diha sa pisara. Unsay atong nakat-unan mahitungod sa Manluluwas gikan sa mensahe ni Elder Andersen?

• Si Elder Stanley G. Ellis migamit og mga ehemplo sa mga piso ug mga alibangbang aron pagtudlo mahitungod sa kalisdanan diha sa iyang mensahe nga “Misalig ba Kita Kaniya? Ang Kalisud Makaayo” (Liahona, Nob. 2017, 112–14). Mahimo nimong ipakita ang litrato sa usa ka pagpamiso o usa ka alibangbang nga migawas gikan sa uloran [cocoon] ug hisguti ang unsay gitudlo ni Elder Ellis. Kadtong imong gitudloan mahimo dayon nga magtrabaho nga magpares sa pagribyu sa pakigpulong ni Elder Ellis. Ang matag pares mahimong molista sa tanan nga ilang makit-an nga iyang gitudlo kon nganong kita adunay kalisdanan ug unsaon nato pagtubag niini. Sa unsang paagi nga ang matinud-anong paglahutay sa mga panahon sa kalisdanan nakatabang kanato nga mas mahiduol sa Manluluwas?

Molihok inubanan sa Hugot nga Pagtuo

Awhaga ang mga sakop sa korum o klase sa pagpamalandong ug pagrekord kon unsay ilang buhaton aron sa paglihok sa mga pag-aghat nga ilang nadawat karong adlawa. Sa unsang paagi nga ang leksyon karong adlawa may kalabutan sa personal nga mga tumong nga ilang gihimo? Kon gusto nila, ang mga sakop sa korum o klase mahimong mopaambit sa ilang mga ideya.

Suporta nga mga Kapanguhaan

• 1 Samuel 1; 1 Mga Hari 17; Lucas 23:33–34; 1 Nephi 5:1–9; Mosiah 24:8–17; 3 Nephi 1:4–21; Moroni 1; Giya ngadto sa mga Kasulatan, “Ruth” ug “Ester,” scriptures.ChurchofJesusChrist.org (Mga ehemplo sa mga tawo nga misagubang og kalisdanan)

• Juan 14:18; Mga Taga-Roma 8:28, 35–39; Alma 36:3 (Ang Manluluwas makatabang kanato sa panahon sa kalisdanan)

Pagtudlo sumala sa Pamaagi sa Manluluwas

Ang Manluluwas personal nga nakaila niadtong Iyang gitudloan—ug nasayud Siya kon unsa sila sa umaabut. Sa dihang nanglimbasug sila, wala Siya mobiya kanila apan mipadayon sa paghigugma kanila. Unsa nga mga panglimbasug nga aduna ang mga batan-on? Sa unsang paagi nimo mapakita ang gugma ug suporta?