1 Ug nahitabo nga si Amulon nauyonan sa hari sa mga Lamanita; busa, ang hari sa mga Lamanita mitugot kaniya ug sa iyang kaigsoonan nga himoon silang mga magtutudlo sa iyang katawhan, oo, bisan sa katawhan kinsa tua sa yuta sa Shemlon, ug sa yuta sa Shilom, ug sa yuta sa Amulon.

2 Kay ang mga Lamanita mipanag-iya na sa tanan niini nga yuta; busa, ang hari sa mga Lamanita mitudlo og mga hari sa tanan niini nga yuta.

3 Ug karon ang ngalan sa hari sa mga Lamanita mao si Laman, nga gitawag sunod sa ngalan sa iyang amahan; ug busa gitawag siya nga hari Laman. Ug siya mao ang hari sa daghan kaayo nga katawhan.

4 Ug nagtawag siya og mga magtutudlo gikan sa kaigsoonan ni Amulon sa matag yuta nga gipanag-iya sa iyang katawhan; ug sa ingon niana ang pinulongan ni Nephi gisugdan sa pagpanudlo taliwala sa tanan nga katawhan sa mga Lamanita.

5 Ug sila katawhan nga mahigalaon sa usag usa; bisan pa niana wala sila makaila sa Dios; ang mga kaigsoonan ni Amulon wala magtudlo kanila sa bisan unsa kabahin sa Ginoo nga ilang Dios, wala sila magtudlo sa balaod ni Moises; gani wala sila magtudlo kanila sa mga pulong ni Abinadi;

6 Apan nagtudlo sila kanila nga sila kinahanglang magtipig og ilang talaan, ug nga sila mahimong magsinulatay sa usag usa.

7 Ug tungod niana midaghan ang mga bahandi sa mga Lamanita, ug misugod sa pagpakignegosyo sa usag usa ug miuswag og maayo, ug misugod sa pagkamalinglahon ug maalamon nga katawhan, sa kaalam sa kalibotan, oo, usa ka malinglahon kaayo nga katawhan, nahimuot sa tanan nga matang sa pagkadaotan ug pagpanglungkab, gawas lang sa ilang kaugalingong kaigsoonan.

8 Ug karon nahitabo nga si Amulon misugod sa pagmando kang Alma ug sa iyang kaigsoonan, ug misugod sa paglutos kaniya, ug misugo nga ang iyang mga anak kinahanglan molutos sa ilang mga anak.

9 Kay si Amulon nakaila kang Alma, nga usa siya sa mga pari sa hari, ug nga siya kadtong mituo sa mga pulong ni Abinadi ug giabog gikan sa atubangan sa hari, ug busa nasuko siya kaniya; kay napaubos siya sa pagmando ni hari Laman, bisan pa niana nagpakita siya nga adunay awtoridad kanila, ug mihatag kanila og mga buluhaton, ug mibutang og mga kapatas nga magbantay kanila.

10 Ug nahitabo nga bug-at kaayo ang ilang mga kasakit nga sila misugod sa pagpangamuyo sa Dios.

11 Ug misugo si Amulon kanila nga kinahanglan silang mohunong sa ilang mga pagpangamuyo; ug mibutang siya og mga bantay alang kanila aron maniid kanila, nga si kinsa kadtong makit-an nga magtawag sa Dios kinahanglan patyon.

12 Ug si Alma ug ang iyang katawhan wala na mopadangat sa ilang mga tingog ngadto sa Ginoo nga ilang Dios, apan ilang gipadayag ang ilang mga kasingkasing ngadto kaniya; ug siya nasayod sa mga pagbati sa ilang mga kasingkasing.

13 Ug nahitabo nga ang tingog sa Ginoo miabot ngadto kanila diha sa ilang mga kasakit, nga nag-ingon: Ihangad ang inyong mga ulo ug pagmalaomon, kay ako nasayod sa pakigsaad nga inyong gihimo ngari kanako; ug ako makigsaad sa akong katawhan ug moluwas kanila gikan sa pagkaulipon.

14 Ug pagaanon usab nako ang mga alantoson nga gipatong sa inyong mga abaga, nga gani dili ninyo mabati ang kabug-aton niini diha sa inyong mga likod, gani samtang anaa kamo sa pagkaulipon; ug kini akong buhaton nga mobarog kamo ingon nga mga saksi alang kanako human niini, ug nga masayod kamo sa pagkatinuod nga ako, ang Ginoong Dios, moduaw sa akong mga katawhan panahon sa ilang mga kasakit.

15 Ug karon nahitabo nga ang mga palas-anon nga gipatong diha kang Alma ug sa iyang kaigsuonan gihimong gaan; oo, ang Ginoo mipalig-on kanila aron ilang madaog ang ilang mga palas-anon sa kasayon, ug misunod sila nga malipayon ug mapailobon sa tanan nga kabubut-on sa Ginoo.

16 Ug nahitabo nga dako kaayo ang ilang pagtuo ug ang ilang pailob nga ang tingog sa Ginoo miabot na usab ngadto kanila, nga nag-ingon: Pagmalaomon, kay pagkaugma luwason ko kamo gikan sa pagkaulipon.

17 Ug gisultihan niya si Alma: Ikaw ang mangulo niini nga katawhan, ug ako mag-uban kanimo ug moluwas niini nga katawhan gikan sa pagkaulipon.

18 Karon nahitabo nga si Alma ug ang iyang katawhan sa panahon sa kagabhion mipundok sa ilang gagmayng kahayopan, ug usab sa ilang mga lugas; oo, gani sa tibuok gabii nagpundok sila sa ilang gagmayng kahayopan.

19 Ug sa pagkabuntag gipahitabo sa Ginoo ang lawom nga pagkatulog sa mga Lamanita, oo, ug ang tanan nila nga mga kapatas nakatulog og maayo.

20 Ug si Alma ug ang iyang katawhan miadto sa kamingawan; ug human sila makapanaw sa tibuok adlaw gitukod nila ang ilang mga tolda sa usa ka walog, ug gitawag nila ang walog og Alma, tungod kay siya man ang nangulo sa ilang agianan sa kamingawan.

21 Oo, ug didto sa walog sa Alma ilang gibu-bo ang ilang mga pasalamat ngadto sa Dios tungod kay gikaluy-an niya sila, ug gipagaan ang ilang mga palas-anon, ug giluwas sila gikan sa pagkaulipon; kay naulipon sila, ug walay usa nga makaluwas kanila gawas sa Ginoo nga ilang Dios.

22 Ug nagpasalamat sila sa Dios, oo, ang tanan nila nga lalaki ug ang tanan nila nga babaye ug ang tanan nila nga anak nga makasulti mibayaw sa ilang mga tingog sa mga pagdayeg sa ilang Dios.

23 Ug karon ang Ginoo misulti kang Alma: Pagdali ug mobiya ka ug kini nga katawhan gikan niini nga yuta, kay ang mga Lamanita nagmata na ug mogukod kaninyo; busa biya na kamo gikan niini nga yuta, ug santaon nako ang mga Lamanita niini nga walog nga sila dili makapadayon sa paggukod niini nga katawhan.

24 Ug nahitabo nga mibiya sila gikan sa walog, ug mipadayon sa ilang pagpanaw ngadto sa kamingawan.

25 Ug human sa ilang pagpanaw sa kamingawan sulod sa napulog duha ka adlaw miabot sila sa yuta sa Zarahemla; ug si hari Mosiah usab nagmaya nga midawat kanila.