tamaitai talavou o loo suesue i tusitusiga paia

11 Iulai

E Faapefea Ona Aafia Loʻu Olaga i le Iloa ai e uiga i le Ata o le Faaolataga?

Mataupu Faavae ma Feagaiga 76

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e manaomia la tatou fesoasoani ma tatalo? O le a se mea e mafai ona tatou faia e fesoasoani ai ia i latou? O ai e tatau ona tatou valaaulia i se gaoioiga o loo loma?

• O o tatou tiute po o matafaioi. O a ni tofiga ua tatou faataunuuina? O a ni tofiga e tatau ona tatou faia? Na faapefea ona tatou valaauliaina isi e o mai ia Keriso, ma e mafai faapefea ona tatou valaaulia isi i le taimi nei?

• O o tatou olaga. O a ni aafiaga lata mai ua faamalosia ai a tatou molimau? O a mea o loo tutupu i o tatou olaga, ma e faapefea ona tatou lagolago le tasi ma le isi?

I le faaiuga o le lesona, pe a talafeagai ai, faia mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

Ua saunia e lo tatou Tama Faalelagi se fuafuaga e mafai ai ona tatou maua faamanuiaga e faavavau ma avea ai faapei o Ia. E finagalo o Ia i Ana fanau uma ia iloa e uiga i lena fuafuaga, o lea na Ia faaalia ai i perofeta i augatupulaga uma. Ao suesue e tagata o le korama ma le vasega le Mataupu Faavae ma Feagaiga 76 i lenei vaiaso, na latou aoaoina mea na faaalia e le Atua e uiga i Lana fuafuaga ia Iosefa Samita ma Sini Rikitone, e aofia ai le matafaioi taua o le Faaola i le fuafuaga ma le mamalu e mafai ona tatou maua i le olaga a sau. Afai tatou te faamaoni, e mafai ona faaatoatoaina i tatou e ala i le Togiola a Iesu Keriso, maua le atoaga o le olioli, ma ola faatasi ma le Atua e faavavau.

E faapefea e le iloaina e uiga i le fuafuaga a le Tama Faalelagi ona aafia ai lau vaaiga i le olaga? E mafai faapefea ona e fesoasoani i lau korama po o le vasega ia malamalama o se faamanuiaga le iloa e uiga i le ata o le faaolataga? Ina ia sauni e aʻoaʻo, e mafai ona e faitau le “Ata o le Faaolataga” i le Faamaoni i le Faatuatua ([2004], 115–17) po o le savali a Elder Dieter F. Uchtdorf “O Lau Malaga Sili” (Liahona, Nov. 2019, 86–90).

alii talavou i totonu o le vasega

O le aoao e uiga i le ata o le faaolataga e maua ai le taitaiga ma le faamoemoega i o tatou olaga.

Aoao Faatasi

O se tasi o auala e amata ai se talanoaga ma lau korama po o le vasega e uiga i le ata o le faaolataga o le valaaulia lea o se tasi e tusi i luga o le laupapa ulutala nei, faatasi ai ma fuaiupu mai le Mataupu Faavae ma Feagaiga 76: Muai Olaga (fuaiupu 22–27), Olaga Faitino (fuaiupu 40–43), ma le Olaga pe a mavae le Oti (fuaiupu 50–53, 59–62). Tuu atu i tagata o le korama po o le vasega ni nai minute e iloilo ai nei fuaiupu e saili ai le matafaioi a le Faaola i le faataunuuina o le fuafuaga a le Tama Faalelagi. Fai atu ia i latou e tusi i lalo o ulutala taitasi ia mea latou te maua. O gaoioiga nei e mafai ona fesoasoani ia i latou e malamalama atili ai i le ala e faamanuiaina ai o latou olaga e le fuafuaga a le Tama Faalelagi.

• O le iloiloina o nisi o igoa o le fuafuaga a le Tama Faalelagi e mafai ona fesoasoani i tagata o le korama po o le vasega e malamalama atili ai i le fuafuaga. E mafai ona latou iloiloina tusitusiga paia i le pulu muamua i lalo o “Punaoa Lagolago” ma faia se lisi o nisi o igoa mo le fuafuaga a le Atua. O a ni mea o aoao mai e nei igoa e uiga i le fuafuaga? Mo se faʻataʻitaʻiga, e faʻapefea ona aumaia e lenei fuafuaga le fiafia, i le taimi nei ma le faʻavavau? O a mea o loo aoao mai e nei mau ia i tatou e uiga i le matafaioi a le Faaola i le fuafuaga? E mafai foi ona e faaali le vitio “Our Eternal Life” po o le “Men’s Hearts Shall Fail Them” (ChurchofJesusChrist.org) ma valaaulia i latou o loo e aoaoina e talanoa e uiga i taimi na latou lagona ai le agaga faafetai mo le fuafuaga a le Tama Faalelagi.

• Mafaufau e valaaulia i latou o loo e aoaoina e talanoa pe mafai faapefea ona latou tali atu i se uo na fesiligia fesili nei e uiga i le ata o le faaolataga: O fea na tatou o mai ai? Aisea ua tatou i ai iinei? O fea tatou te o i ai pe a mavae lenei olaga? Valaaulia i latou e faaaoga faamatalaga o loo i lalo o le “Ata o le Faaolataga” i le Faamaoni i le Faatuatua (itulau 115–17) ma punaoa i lalo o “Punaoa Lagolago” e saunia ai se tali i se tasi o fesili. Ua faapefea ona faamalosia i tatou i le iloaina o tali i nei fesili?

• E sili atu le loloto o le aoaoina e le korama po o le vasega o upumoni o le talalelei pe a tuuina atu ia i latou avanoa e aoao atu ai. I le taimi muamua, fai atu i nisi o le korama po o le vasega e o mai saunia e faasoa mai se aotelega puupuu o mea latou te iloa e uiga i se vaega o le ata o le faaolataga. E mafai ona latou faaaoga aotelega o loo maua i lalo “O Le Ata o le Faaolataga” i le mataupu e 3 o le Tala’i La’u Talalelei ([2019], 48–53). O le a le eseesega e faia i le iloa o le ata o le faaolataga?

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• 2 Nifae 11:5; Alema 12:30; 34:9; 41:2; 42:8, 13–15; Mose 6:59–62 (Igoa mo le fuafuaga a le Tama Faalelagi)

• Mataupu Faavae ma Feagaiga 38:1–3; 138:53–56; Mose 4:1–4; Aperaamo 3:21–24 (Muai olaga)

• 2 Nifae 2:19–21, 25; Alema 5:15–16; 34:32; Aperaamo 3:25–26 (Olaga faitino)

• Ioane 14:1–2; Alema 11:42–45; Mataupu Faavae ma Feagaiga 76:39–43, 89–93 (Olaga pe a mavae le oti)

Aoao Atu i le Ala a le Faaola

Na fai atu e le Faaola ni fesili na uunaia ai i latou sa Ia aoaoina ia mafaufau loloto. Sa fiafia ma le faamaoni o Ia i a latou tali. E faʻapefea ona e faʻaaoga fesili e fesoasoani ai i le autalavou e mafaufau loloto ai e uiga i le fuafuaga a le Atua? (Tagai i le Aoao Atu i le Ala a le Faaola [2016], 33–34.)