tamaitai talavou o loo pepese

25 Iulai

Aiseā e Tatau ai Ona Ou Usiusitai i Poloaiga a le Atua?

Mataupu Faavae ma Feagaiga 81–83

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni mea e mafai ona tatou faia e fausia ai le lotogatasi i totonu o le korama po o tagata o le vasega? O a sini tatou te mananao e galulue faatasi i ai?

• O o tatou tiute po o matafaioi. O a mea ua tatou faia e faasoa atu ai le talalelei? O a aafiaga ua tatou oo i ai i le faia o galuega o le malumalu ma talafaasolopito o aiga?

• O o tatou olaga. O faapefea ona tatou vaaia le aao o le Alii i o tatou olaga? O a mea ua musuiaina i tatou i ā tatou suesuega o tusitusiga paia i lenei vaiaso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

Atonu e i ai taimi tatou te lagona ai o poloaiga a le Atua e faatapulaaina ai lo tatou saolotoga ma taofiofia ai lo tatou faitalia. O le mea moni o poloaiga e faʻaleleia ai lo tatou saʻolotoga. I le Mataupu Faavae ma Feagaiga 82:8–10 ua tatou aoao ai o poloaiga e fesoasoani tatou te malamalama ai i le finagalo o le Atua, ma a tatou usiusitai i ai, o a tatou amioga o le a “liliu atu [i tatou] mo lo [tatou] faaolataga.” O le mea moni, pe a tatou usitai i le Atua, e “noatia” o Ia e tuuina mai ia i tatou faamanuiaga uma na Ia folafolaina mai (fuaiupu 9–10). Na faapefea ona faamanuiaina oe e le Tama Faalelagi ao e usitai i Ana poloaiga? Ina ia sauniuni e aoao atu, e mafai ona e faitauina le savali a Elder Dale-G. Renlund “E Tele Mea e Manuia ai” (Liahona, Me 2019, 70–73) pe mafaufau loloto foi i nisi o punaoa i le tusiga o le Autu o le Talalelei “Usiusitai” (topics.ChurchofJesusChrist.org).

tamaitai talavou o loo suesue

O faataitaiga a auauna faamaoni a le Atua i aso ua mavae e mafai ona musuia i tatou e ola faamaoni i aso nei.

Aoao Faatasi

Atonu o loo tauivi tagata o la outou korama po o le vasega e usitai i nisi o poloaiga. O le fesoasoani ia i latou e malamalama pe aisea e taua ai le usiusitai e mafai ona musuia ai i latou. Tusi le ulutala o lenei otootoga i luga o le laupapa, ma valaaulia sui o le korama po o le vasega e faasoa mai tali. E mafai ona e fai atu ia i latou e vaavaai mo malamalamaaga faaopoopo i totonu o le Mataupu Faavae ma Feagaiga 82:8–10, atonu na latou suʻesuʻeina i lenei vaiaso. Ona filifili lea o se gaoioiga se tasi pe sili atu foi e fesoasoani ai ia i latou ia malamalama lelei ai pe aisea e taua ai i taimi uma le usitai i le Atua, e tusa lava pe faigata tele.

• E mafai ona sili atu le faigofie ona usitai i poloaiga pe a tatou malamalama i mafuaaga mo poloaiga. Ina ia iloa pe aisea e tuuina mai ai e le Atua ia i tatou poloaiga, e mafai e sui o le korama po o le vasega ona toe iloilo ia mau faasino i le “Punaoa Lagolago” (po o isi foi e te mafaufau i ai). E faapefea ona fesoasoani nei mau ia i tatou pe a faigata ona tatou usitaia se poloaiga? I le avea ai o se vaega o lenei talanoaga, e mafai ona e faitauina faatasi le vaega ua faaulutalaina “Lona fa, aua nei galo le ‘aisea’ o le talalelei” i le savali a Peresitene Dieter F. Uchtdorf “Aua Ne’i Galo A’u” (Liahona, Nov. 2011, 122).

• A o malamalama i latou o loo e aoaoina i le faataitaiga atoatoa o le usiusitai a le Faaola, atonu o le a musuia ai i latou e usiusitai atili i le Atua. O anafea na usitai ai Iesu Keriso i Lona Tama, e oo lava i tulaga faigata? (tagai Mataio 4:1–11; Luka 22:39–44). O faataʻitaʻiga o alii ma tamaitai o e na usiusitaʻi e mafai ona maua i totonu o le Eperu 11. Masalo e mafai e lau korama po o lau vasega ona filifili se tasi o nei faataitaiga—po o isi latou te iloa, e aofia ai i o latou aiga—ma faasoa mai mea na musuia ai i latou e uiga i nei tagata. Aisea na latou filifili ai e usitai i le Alii? E faapefea ona fesoasoani le Faaola ia i tatou pe a tatou filifili e usiusitai?

• Ina ia fesoasoani i tagata o le korama po o le vasega ia vaai i poloaiga o ni faamanuiaga ae le o ni avega, e mafai ona e faasoa atu aoaoga a Elder D.Todd Christofferson o loo maua i le “Punaoa Lagolago.” E mafai ona e faaali atu pe tusi se ata o se apefai ma fesili atu ia i latou o e aoaoina ina ia tusia igoa o vae taʻitasi o le apefai ma se poloaiga atonu e faigata mo se tagata talavou ona malamalama pe usitaia. E faapefea ona fesoasoani upu a Elder Christofferson i se tasi o loo tauivi e tausi poloaiga?

• E tele vitio o loʻo aʻoaʻo mai e faatatau i le usiusitaʻi e mafai ona maua i le ChurchofJesusChrist.org ma i le polokalama feaveai o le Gospel Library (tagai “Punaoa Lagolago”). E mafai ona e tofia tagata taitoatasi o le vasega po o le korama e matamata i se tasi o nei vitio ao lei oo i le fonotaga ma sau saunia e faasoa mai mea sa latou aoaoina e uiga i le usiusitai. Atonu e mafai e le korama po o le vasega ona fuafua a latou lava vitio e uiga i le usiusitai i poloaiga a le Atua. Ona mafai lea ona latou faatulagaina se gaoioiga e fai ai le vitio ma faasoa atu i luga o alafaasalalau lautele.

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• 1 Nifae 17:3; Mosaea 2:41; Mataupu Faavae ma Feagaiga 130:20–21 (Ua faamanuiaina i tatou i le usiusitai i poloaiga)

• Teuteronome 10:12–13; Ioane 14:15; 1 Ioane 5:1–3 (Tatou te usiusitai i poloaiga aua tatou te alolofa i le Atua)

• Mataupu Faavae ma Feagaiga 93:20 (O le usiusitai e mafai ai ona tatou maua le atoaga o le Atua)

• “Usiusitai,” i le mataupu e 3 o le Tala’i La’u Talalelei (2019), 75

• Na aoao mai Elder D. Todd Christofferson e faapea: “O isi e na o le ositaulaga ma tapulaa i le usiusitai i poloaiga o le feagaiga fou ma le faavavau, ae mo i latou na i ai ni aafiaga—o e tuuina atu i latou lava ma le saoloto ma le le taofiofia i le olaga o feagaiga—e maua ai le saolotoga tele ma le faamalieina. A tatou malamalama moni, tatou te sailia nisi poloaiga, e le itiiti ifo. O tulafono fou po o poloaiga tatou te aʻoaʻoina ma ola ai e pei o se tasi vae poʻo se laasaga i luga o se apefai e mafai ai ona tatou feʻaʻei maualuga ma sili atu. E moni lava, o le olaga o le talalelei o le olaga lelei” (“O Le Mana o Feagaiga,” Liahona, Me 2009, 23).

• “The Sting of the Scorpion,” “Stay within the Lines,” “A Secure Anchor,” “Shower of Heavenly Blessings,” “Blessed and Happy Are Those Who Keep the Commandments of God,” vitio, ChurchofJesusChrist.org

Aoao Atu i le Ala a le Faaola

Sa valaaulia e le Faaola Ona soo e molimau atu, ma a o latou faia, sa pa’i atu le Agaga i o latou loto. Ao e aoao atu, valaaulia sui o le korama po o le vasega e faasoa atu a latou molimau i le taua o le tausia o poloaiga.