alii talavou i luma o le malumalu

8 Aokuso

E Mafai Faapefea Ona Ou Auai i le Faapotopotoina o Isaraelu?

Mataupu Faavae ma Feagaiga 85–87

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni gaoioiga na tatou faia talu ai nei? Pe na faamanuiaina? O a gaoioiga na lelei, ma e faapefea ona tatou faaleleia atili?

• O o tatou tiute po o matafaioi. O ai e manaomia la tatou auaunaga? E faapefea ona tatou fesoasoani ia i latou?

• O ō tatou olaga. O a sini o loo tatou galulue i ai faaletagata lava ia? O a aafiaga e mafai ona tatou faasoaina atu? O a ni faamanuiaga ua tatou mauaina?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O i latou o lau korama po o le vasega atonu latou te iloa se mea e uiga i o latou tiutetauave mo le faia o galuega faafaifeautalai ma galuega o malumalu ma talafaasolopito o aiga. Ae afai e te talanoa ia i latou e uiga i le faapotopotoina o Isaraelu, atonu latou te le iloa le mea o loo e talanoa atu ai. E mafai faapefea ona e fesoasoani ia i latou ia malamalama o le faasoaina atu o le talalelei, sailiili i o latou talafaasolopito o aiga, ma le faatinoina o sauniga i le malumalu o se vaega o se galuega tele atu o le faapotopotoina o Isaraelu e sauniuni ai mo le Afio Mai Faalua o le Faaola?

O i latou e te aoaoina atonu na latou suesueina le faataoto i le saito ma le titania i le Mataupu Faavae ma Feagaiga 86, lea o loo aoao mai e uiga i le faapotopotoina o Isaraelu i aso e gata ai. Ao e faitau i lenei vaega, taumafai e vaai faalemafaufau i tagata o lau korama po o lau vasega o ni tagata faigaluega i le faatoaga a le Alii. O le a faapefea ona e fesoasoani ia i latou ia mauaina le olioli e oo mai a o latou auai i lenei galuega tele? Ina ia aoao atili e uiga i lenei autu, suesue i le savali a Peresitene Russell M. Nelson ma Sister Wendy W. Nelson “Faamoemoe o Isaraelu” ([faigalotu mo le autalavou i le lalolagi atoa, June 3, 2018], faaopoopoga i le New Era ma le Ensign, ChurchofJesusChrist.org).

alii talavou ma se tamaitai talavou o loo tilotilo i se komepiuta

E mafai e alii ma tamaitai talavou ona fesoasoani e faapotopoto Isaraelu e ala i le faia o galuega i le malumalu ma talafaasolopito o aiga.

Aoao Faatasi

Atonu e te ono amata i le fesili atu i tagata o le vasega i fesili e pei o nei: O le a le mea na tulagaese ia te oe ao e faitau i le Mataupu Faavae ma Feagaiga 86 i le fale? O a mea na e aoaoina e uiga i le galuega o le faapotopotoina o fanau a le Atua i aso e gata ai? O a mea o tatou faia e auai ai i lenei galuega? O loo i lalo ni manatu faaopoopo e musuia ai lau korama po o lau vasega e auai i le faapotopotoina o Isaraelu.

• Fesili i tagata o lau korama po o le vasega po o le a so latou manatu pe a latou faalogo i le faaupuga “faapotopotoina o Isaraelu.” Afai latou te manaʻomia se fesoasoani, fautua atu latou te faitauina le faʻamatalaga lenei mai ia Peresitene Russell M. Nelson: “O le faapotopotoina o Isaraelu o lona uiga moni lava o le ofoina atu lea o le talalelei a Iesu Keriso i fanau a le Atua i itu uma o le veli, o e e lei osia feagaiga taua ma le Atua pe ua maua o latou sauniga e tatau ai. E tatau i fanau uma a lo tatou Tama Faalelagi ona maua le avanoa e filifili ai e mulimuli ia Iesu Keriso, ia talia ma maua Lana talalelei ma ona faamanuiaga uma” (“Faamoemoe o Isaraelu,” 11–12). E faapefea e lenei faauigaga ona aafia ai le auala tatou te mafaufau ai i lenei tiute taua?

• Ina ia fesoasoani i tagata o le korama po o le vasega ia iloa pe faapefea ona faatatau le faataoto i le saito ma titania ia i latou, e mafai ona e tusia fuaitau mai le Mataupu Faavae ma Feagaiga 86 i luga o le laupapa. O nei fasifuaitau e mafai ona faamatalaina faailoga i le faataoto—e pei “o e na luluina fatu,” “tineia ai e le titania le saito,” “ua totogo aʼe le lau,” ma le “aoina o le saito” (fuaiupu 2–4, 7). E mafai foi e fuaitau ona faamatalaina le uiga o nei faailoga—e pei o “Aposetolo,” “o le Liliuese,” “o le Toefuataiga,” ma le “galuega faafaifeautalai” Ona mafai lea e le korama poʻo le vasega ona galulue faʻatasi e iloilo le vaega 86 ma faafetaui faailoga ma o latou uiga. (E mafai foi ona latou faitauina le Mataio 13:36–43.) O le a le mea ua tatou aoao mai i lenei faataoto e faatatau i le galuega o le faapotopotoina o Isaraelu? O a mea e mafai ona tatou faia e mulimuli ai i le avea ma se “malamalama” ma se “faaola” i fanau a le Atua? (Mataupu Faavae ma Feagaiga 86:11).

• Atonu o le a manatua e le korama po o le vasega i lana savali “Faamoemoe o Isaraelu,” na valaaulia ai e Peresitene Russell M.Nelson i latou e faia ni mea patino e sauni ai e fesoasoani e faapotopoto Isaraelu (tagai i le itulau 14–17). Fesili atu ia i latou po o a valaaulia latou te manatua, ma iloilo faatasi ia valaaulia pe a manaʻomia. E faʻapefea e le faia o nei mea ona avea atili ai i tatou ma tagata sili ona lelei i le faapotopotoina o Isaraelu? O le a se mea e mafai ona tatou faia e faamanatu ai ia i tatou nei valaaulia ma fesoasoani le tasi i le isi e faataunuuina? Uunaia tagata o le korama po o le vasega e mafaufau ma le fatufatua’i ma faasoa atu o latou manatu.

• E mafai e le Korama po o le vasega ona faitau le folasaga ma uluai vaega e lua o le savali a Elder Quentin L. Cook “Alofa Sili mo Fanau a lo Tatou Tama” (Liahona, Me 2019, 76–79), vaavaai pe aisea e taua tele ai le alofa i a tatou taumafaiga faafaifeautalai ma le malumalu ma talafaasolopito o aiga. Fai atu ia i latou e faasoa mai mea na latou aoaoina e uiga i le auala e mafai ai e le alofa ona faia se eseesega ao tatou taumafai e faasoa atu le talalelei ia i latou i itu uma o le veli. Tuu atu i tagata o le korama po o le vasega se taimi e tusi ai i lalo se mea latou te mananao e fai ona o le talanoaga i le asō. Ina ia fesoasoani ia i latou e mafaufau i ni manatu, atonu e te fautua atu latou te mafaufau i tagata latou te iloa. E faapefea ona aapa atu le Atua i nei tagata? E mafai faapefea ona tatou fesoasoani atu?

Punaoa Lagolago

• Russell M. Nelson, “O Le Faapotopotoina o Isaraelu ua Faataapeapeina,” Liahona, Nov. 2006, 79–82

• Autu Talafaasolopito o le Ekalesia “O Le Faapotopotoina o Isaraelu,” ChurchofJesusChrist.org/study/history/topics

Aoao Atu i le Ala a le Faaola

Na faatuatuaina e le Faaola i latou na mulimuli ia te Ia. Sa Ia saunia i latou ma tuu atu ia i latou tiutetauave taua e aoao atu, faamanuia, ma auauna atu i isi (tagai i le Aoao Atu i le Ala a le Faaola [2016], 28). O a avanoa e mafai ona e saunia mo le autalavou ia aoao ai e le tasi le isi?