tamaitai talavou o loo savavali sopo i se vaomatua

22 Aokuso

Aisea e Finagalo ai le Alii ia Ou Soifua Maloloina?

Mataupu Faavae ma Feagaiga 89–92

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e fou mai i la tatou uarota, ma e faapefea ona tatou fesoasoani ia latou lagona ua taliaina i latou? O le a se mea o loo tatou faia e faaaoga tatau ai o tatou taimi i totonu o le korama po o fono faalevasega?

• O o tatou tiute po o matafaioi. O a ni o tatou tiute ma matafaioi i le avea ai ma alii talavou ma tamaitai talavou? E mafai faapefea ona tatou faataunuuina ma le atoatoa ia tiute ma matafaioi?

• O o tatou olaga. O a mea o loo tatou faia ia avea atili ai e pei o Iesu Keriso ma maua ai Lona mana i o tatou olaga? O a mea ua tatou faia e fesoasoani ai i o tatou aiga ia o mai ia te Ia?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

E faigofie mo nisi tagata ona mafaufau i le Upu o le Poto, o loo maua i le Mataupu Faavae ma Feagaiga 89, e avea o se lisi o mea e fai ma mea e aua le faia. O nisi o na mea o loo i ai i le Upu o le Poto, ae o loo i ai foi mataupu faavae mo le tausia o o tatou tino ia maloloina. O loo aʻoaʻo mai ai foi e faapea o le auala tatou te tausia ai o tatou tino e aafia ai o tatou mafaufau, lagona, ma le ola maloloina faaleagaga. O a faʻamanuiaga ua e mauaina aʻo e taumafai e ola i se olaga soifua maloloina?

Atonu na suesueina e sui o lau korama po o le vasega le Upu o le Poto ao latou faitau i le Mataupu Faavae ma Feagaiga 89-92 i lenei vaiaso. E mafai faapefea ona e fesoasoani ia i latou ia malamalama i faamanuiaga faaletino ma le faaleagaga e maua mai i le usiusitai i lenei faaaliga? E mafai ona e maua ni malamalamaaga fesoasoani e ala i le toe iloiloina o le tusiga o Autu o le Talalelei “Upu o le Poto” (topics.ChurchofJesusChrist.org) po o le “Soifua Maloloina Faaletino ma Faalelagona” i le Mo le Malosi o le Autalavou ([2011], 25–27).

alii talavou o loo savavali sopo i le vaomatua

O le tausiga o o tatou tino faaletino e aafia ai o tatou mafaufau, lagona, ma le ola maloloina faaleagaga.

Aoao Faatasi

Ina ia amataina se talanoaga e uiga i le Upu o le Poto, tusi upu nei i luga o le laupapa: Faaletino, Faalemafaufau, Faaleagaga, ma le Faaleagafesootai. Valaaulia sui o le korama po o le vasega e faitau le Mataupu Faavae ma Feagaiga 89:18–21 ma talanoaina pe mafai faapefea e folafolaga i fuaiupu ona faatatau i nei vaega. O a faamanuiaga e mafai ona maua mai le usiusitai i le Upu o le Poto? Na faapefea ona tatou mauaina nei faamanuiaga i o tatou olaga?

• O sui auai o lau korama po o le vasega e mafai ona aʻoaʻoina ni mea e tele mai le tasi ma le isi e ala i le faia o se lisi tuʻufaʻatasi o mea o loʻo latou faia ina ia ola maloloina. Vaevae tagata o le korama po o le vasega i ni vaega, ma tofi vaega taitasi e saili se tasi po o le sili atu foi o mau i le uluai pulu i lalo o “Punaoa Lagolago,” ma saili mo upumoni e uiga i le soifua maloloina faaletino. Tuu atu i vaega taitasi e faasoa mai mea ua latou aoaoina ma lisi o latou manatu i luga o le laupapa. E faapefea ona tatou tali atu i fesili e pei o nei: Aisea ua tuuina mai ai e le Atua ia i tatou tulafono e faatatau i le soifua maloloina faaletino? Aisea e tatau ai ona tatou usiusitai i ai?

• E mafai ona fesiligia tagata o lau korama po o le vasega i ni fesili e uiga i le mafuaaga latou te le inuina ai le ava, ulaula, po o le faaaogaina o fualaau faasāina. E faapefea ona latou taliina nei fesili? E mafai ona latou suʻe i le “Soifua Maloloina Faaletino ma Faalelagona” i le Mo le Malosi o le Autalavou (itulau 25-27) ma saili fautuaga ma faamanuiaga folafolaina e mafai ona latou faasoa atu i isi. E faʻapefea ona aafia a tatou sootaga ma le Atua i le auala tatou te tausia ai o tatou tino? Na faapefea ona maua e tagata o le korama po o le vasega ia molimau e faapea, o le usiusitai i le Upu o le Poto e faamanuiaina ai o latou olaga?

• O aafiaga e faaalia ai faamanuiaga o le usiusitai i le Upu o le Poto e mafai ona musuia ai tagata o le korama po o le vasega ia atili tuuto e ola ai i lenei tulafono. E mafai ona e faasoaina se aafiaga mai lou olaga po o le aafiaga na faasoa mai e Peresitene Thomas S. Monson i lana savali “Mataupu Faavae ma Folafolaga” (Liahona, Nov. 2016, 78–79). O le vitio “Leave the Party” (ChurchofJesusChrist.org) o loo i ai se isi faataitaiga. E mafai ona e uunaia tagata o le korama po o tagata o le vasega e fetufaai atu o latou aafiaga.

• Ina ia amataina se talanoaga e uiga i auala e tetee atu ai i faaosoosoga e soli le Upu o le Poto, e mafai ona e faaali atu i lau korama po o lau vasega se māunu fagota (po o se ata o se māunu fagota). E faapefea ona faasese e māunu fagota ia iʻa? O tali i lenei fesili e mafai ona maua i le vitio “You Will Be Freed” (ChurchofJesusChrist.org; tagai foi M. Russell Ballard, “E O Le Togafiti Poto a Le ua Leaga,” Liahona, Nov. 2010, 108–10). E faapefea ona pei māunu fagota o mea o loo faia e Satani e taufaasese ai i tatou? O le a le savali a Peresitene Ballard mo i latou ua maua i mea ua fai ma vaisū? E faapefea ona tatou fesoasoani i se tasi o loo tauivi ma faaosoosoga ia liliu atu i le Faaola? (tagai i tusitusiga paia i le pulu lona lua i lalo o le “Punaoa Lagolago”).

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Tanielu 1:3–20; 1 Korinito 6:19–20; Mataupu Faavae ma Feagaiga 88:124; 89:5–21(O le auala tatou te tausia ai o tatou tino e taua i le Alii)

• Mosaea 7:33; Alema 13:27–29; Eteru 12:27 (Faamoemoe mo i latou o e tauivi ma vaisū)

• Lomiga o Aokuso 2019 o le New Era ma le Ensign (lomiga faapitoa e faatatau i le tino)

Aoao Atu i le Ala a le Faaola

I soo se tulaga lava, o le Faaola o loo avea ma o tatou faataitaiga ma se faiaoga. Ao e sauniuni e aoao atu, mafaufau i le auala na fesootai ai le Alii ma isi ma pe mafai faapefea ona e fesootai atu i se auala e siitia ai ma uunaia i latou o loo e aoaoina.