O le Au Paia o loo tamomoe mai tagata leaga

C. C. A. Christensen (1831–1912), O le Au Paia ua Tutuliesea mai le Itumalo o Siakisone, Misuri, c. 1878, ata vave mago i luga o le ie musilini, 77 ¼ × 113 inisi. Falemataaga o Faatufugaga a le Iunivesite o Polika Iaga, meaalofa a le fanau a fanau a C. C. A. Christensen, 1970

12 Setema

E Mafai Faapefea Ona Tatou Faafetaiaia Puapuaga ma le Faatuatua?

Mataupu Faavae ma Feagaiga 98–101

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i tulaga e pei ona taua i lalo, ma fuafua ni auala e galulue ai i tulaga tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e manaomia la tatou fesoasoani ma tatalo? O le a se mea e mafai ona tatou faia e fesoasoani ai ia i latou? O ai e tatau ona tatou valaaulia i se gaoioiga o loo loma?

• O o tatou tiute po o matafaioi. O a ni tofiga ua tatou faataunuuina? O a ni tofiga e tatau ona tatou faia? Na faapefea ona tatou valaauliaina isi e o mai ia Keriso, ma e mafai faapefea ona tatou valaaulia isi i le taimi nei?

• O o tatou olaga. O a ni aafiaga lata mai ua faamalosia ai a tatou molimau? O a mea o loo tutupu i o tatou olaga, ma e faapefea ona tatou lagolago i le tasi ma le isi?

I le faaiuga o le lesona, pe a talafeagai ai, faia mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po o se talavou; pe a ma le 25–35 minute

Saunia Oe Lava Faaleagaga

O afioga a le Atua i le Mataupu Faavae ma Feagaiga 98 ma le 101 na ofoina atu ai le faamafanafanaga i le Au Paia o e na feagai ma tofotofoga ogaoga i Misuri i le vaitaimi o le 1830. E ui o o tatou tofotofoga atonu e ese mai i uluai tagata o le Ekalesia, tatou te feagai uma lava ma faigata i le taimi o le olaga faitino, ma o le tali atu ma le faamaoni i faigata e mafai ona fesoasoani tatou te tuputupu ae ai faaleagaga ma avea atili ai faapei o Iesu Keriso.

E faapefea e le liliu atu i le Alii i taimi o faigata ona faamalosia oe ma faaleleia lau sootaga ma Iesu Keriso? O a luitau ma tofotofoga o loo feagai ma tagata o la outou korama po o vasega, ma e faapefea ona e fesoasoani ia i latou ia maua le malosi i le Faaola? Ina ia fesoasoani ia te oe e sauniuni e aʻoaʻo atu e uiga i puapuaga, e mafai ona e iloiloina le savali a Elder Neil L. Andersen “Manu’a” (Liahona, Nov. 2018, 83–86) ma le “Puapuaga” i le Faamaoni i le Faatuatua ([2004], 8–11).

alii talavou o loo i fafo

E mafai ona tatou maua le filemu i taimi o faigata e ala i le liliu atu i le Faaola.

Aoao Faatasi

O tagata taitoatasi o la outou korama po o le vasega o loo tauivi ma ona lava luitau. O le a le mafanafana e te lagona e mafai ona latou mauaina i le Mataupu Faavae ma Feagaiga 98:1–3? E mafai ona e faaaogaina se gaoioiga se tasi pe sili atu foi e fesoasoani ia i latou ia malamalama pe faapefea ona onosaia faigata ma le faatuatua i le Alii.

• O loo i ai i tusitusiga paia le tele o faataitaiga o tagata na onosaia ma le faamaoni tofotofoga. E mafai e le korama po o tagata o le vasega ona aoao pe faapefea ona onosaia ma le faamaoni ia faigata e ala i le suesueina o nisi o nei faataitaiga (tagai i nisi o “Punaoa Lagolago”). E mafai ona latou filifilia se tasi o fuaitau o mau ma tauaofai le aafiaga o lena tagata mo le korama po o le vasega. O a ni malamalamaaga tatou te maua e uiga i le mafuaaga tatou te feagai ai ma faigata? O le a se mea ua tatou aoaoina e uiga i le auala e onosaia ai ma le faamaoni ia faigata? Valaaulia sui o le korama po o le vasega e tusi i lalo se tofotofoga o feagai ma i latou po o ē e pele ia i latou ma mafaufau loloto pe mafai faapefea ona latou tosina atu i le mana o le Faaola e fesoasoani ia i latou i taimi o nei tofotofoga.

• Ina ia aʻoaʻo e uiga i nisi o mafuaaga o faigata ma mea e mafai ona tatou aʻoaʻoina mai o tatou tofotofoga, e mafai ona tou faitauina faʻatasi ia parakalafa muamua e lua i lalo o le “Puapuaga” i le Faamaoni i le Faatuatua (itualu 8). Fai atu i le korama po o le vasega e faasoa mai mea na latou aoaoina. Ona mafai lea e tagata taitoatasi ona toe iloilo se tasi o vaega e tolu o loʻo totoe i lalo o le “Puapuaga” ma saunia e aoao atu mea uma na latou aoaoina, e aofia ai le auala e mafai ona fesoasoani ai le Faaola ia i tatou i taimi o tofotofoga. Fautuaina i latou e faasoa mai se aafiaga patino e faatatau i mea latou te faitauina pe afai latou te lagona le toʻa e faia ai.

• O se tasi o auala e uunaia ai se talanoaga e uiga i puapuaga o le tusia lea o se laina i lalo i le ogatotonu o le laupapa ma tusi le Aisea tatou te feagai ai ma puapuaga? i le isi itu ma le E faapefea ona tatou faafetaia’ia puapuaga ma le faatuatua? i le isi itu. E mafai e tagata taitasi o lau korama po o le vasega ona faitau se tasi o vaega mai le savali a Elder Neil L. Andersen “Manu’a,” ma vaavaai mo tali i fesili o loo i luga o le laupapa. O le a se mea ua tatou aoaoina e uiga i le Faaola mai le savali a Elder Andersen?

• Na faʻaaoga e Elder Stanley G. Ellis faʻataʻitaʻiga o tama’i moa ma lelefua e aʻoaʻo ai e uiga i puapuaga i lana savali “Pe Ua Tatou Faatuatuaina Ea o Ia? E Lelei le Faigata” (Liahona, Nov. 2017, 112–14). E mafai ona e faaali atu se ata o se tama’i moa o loo amata ona fofoa po o se lelefua o loo amata ona sau i fafo mai le atigi ma talanoaina mea na aoao mai e Elder Ellis. O i latou o loo e aoaoina e mafai ona galulue faatasi i ni paga e toe iloilo le lauga a Elder Ellis. E mafai e paga taʻitasi ona lisi mea uma latou te mafai ona maua na ia aʻoaʻoina e uiga i le mafuaʻaga tatou te feagai ai ma puapuaga ma pe faapefea ona tatou tali atu i ai. Na faapefea e le tumau ma le faamaoni i taimi o puapuaga ona fesoasoani ia i tatou e latalata atili atu ai i le Faaola?

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• 1 Samuelu 1; 1 Tupu 17; Luka 23:33–34; 1 Nifae 5:1–9; Mosaea 24:8–17; 3 Nifae 1:4–21; Moronae 1; Taiala i Tusitusiga Paia, “Ruta” ma le “Eseta,” scriptures.ChurchofJesusChrist.org (Faataitaiga o tagata na feagai ma puapuaga)

• Ioane 14:18; Roma 8:28, 35–39; Alema 36:3 (E mafai e le Faaola ona fesoasoani ia i tatou i taimi o puapuaga)

• Vitio o le “God Will Lift Us Up,” “The Will of God,” ChurchofJesusChrist.org

Aoao Atu i le Ala a le Faaola

Na silafia lelei e le Faaola i latou na Ia aoaoina—ma sa Ia silafia ituaiga tagata e mafai ona avea ai i latou. A latou tauivi, sa le’i fiu o Ia ia i latou ae na alofa pea ia i latou. O a ni tauiviga o loʻo feagai ma le autalavou? E mafai faapefea ona e faaali atu le alofa ma le lagolago?