faamatalaga o le faatagata o Peteru o loo uuina ni ki

26 Setema

Aisea e Taua ai Le I Ai o Ki o le Perisitua i Luga o le Lalolagi i Aso Nei?

Mataupu Faavae ma Feagaiga 106–108

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni mea e mafai ona tatou faia e fausia ai le lotogatasi i totonu o le korama po o tagata o le vasega? O a sini tatou te mananao e galulue faatasi i ai?

• O o tatou tiute po o matafaioi. O a mea ua tatou faia e faasoa atu ai le talalelei? O a aafiaga ua tatou oo i ai i le faia o galuega o le malumalu ma talafaasolopito o aiga?

• O o tatou olaga. O faapefea ona tatou vaaia le aao o le Alii i o tatou olaga? O a mea ua musuiaina i tatou i ā tatou suesuega o tusitusiga paia i lenei vaiaso?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

“O ki o le perisitua,” na aoao mai ai Elder Gary E. Stevenson, “e matala ai faamanuiaga, meaalofa, ma mana o le lagi mo i [tatou]” (“O Fea o I Ai Ki ma le Pule o le Perisitua?” Liahona, Me 2016, 32). Ua umia e Iesu Keriso ki uma o le perisitua, ma na Ia faatagaina avefeau faalelagi e faaee ki o le perisitua i luga o Iosefa Samita. O aso nei ua umia e sui o le Au Peresitene Sili ma le Korama a Aposetolo e Toasefululua nei lava ki (tagai Mataupu Faavae ma Feagaiga 90:3–4, 6; 107:35; 132:7). O nei ki o le pule ua tuuina mai e le Atua i taitai perisitua e taitaia ai le faaaogaina o Lana perisitua i luga o le fogaeleele.

Ao e faitauina le Mataupu Faavae ma Feagaiga 107 i lenei vaiaso, mafaufau pe mafai faapefea e le Atua ona faamanuiaina oe ma i latou o loo e aoaoina e ala i Lana perisitua. O a ni mea e te maua i lenei vaega e taua ona iloa e tagata o le korama po o le vasega? A o e sauniuni e aʻoaʻo atu, e mafai ona e iloiloina le savali a Elder Gary E. Stevenson o loo ta’ua i luga ma “Ki o le Perisitua” i le Faamaoni i le Faatuatua ([2004], 126–27).

o se alii talavou o loo tufaina le faamanatuga

O faamanuiaga faaleagaga maoae e avanoa mo i tatou e ala i ki o le perisitua.

Aoao Faatasi

E mafai e le Mataupu Faavae ma Feagaiga 107 ona tali le fesili “O a faamanuiaga tatou te maua e ala i le perisitua ma auaunaga a taitai perisitua?” Atonu e mafai e tagata o le korama po o le vasega ona sailia ni tali i totonu o fuaiupu 18–23, 85–89. Ina ia fesoasoani ia latou malamalama atili i le auala e faamanuiaina ai o tatou olaga e le perisitua ma taitai perisitua, ia faaaoga se gaoioiga se tasi pe sili atu foi o gaoioiga nei.

• E mafai ona e amataina se talanoaga e uiga i ki o le perisitua e ala i le valaauliaina o se tasi o le korama po o le vasega e o mai saunia e faasoa atu le tala i le asiasiga a Peresitene Spencer W. Kimball i se lotu i Tenimaka, lea na faamatalaina e Peresitene Boyd K. Packer i lana savali “O le Toasefululua” (Liahona, Me 2008, 83–87; tagai foi i le vitio “The Restoration of Priesthood Keys” [ChurchofJesusChrist.org]). E mafai foi ona e fai atu i lau korama po o le vasega e faitau faatasi le vaega “Ki o le Perisitua” i le Faamaoni i le Faatuatua (itulau 126–27). Tuu atu ia i latou le taimi ia taitoalua ma aoao e le tasi le isi po o a ki o le perisitua, e faavae i mea sa latou aoaoina. O a faamanuiaga ua oo mai ia i tatou ona o auaunaga a i latou o loo umia ki o le perisitua?

• Atonu e te manao e faasoa atu le tala a Elder Gary E. Stevenson e uiga i le leiloa ai o ana ki mai parakalafa muamua e ono o lana savali “O Fea o I Ai Ki ma le Pule o le Perisitua?” (pe faaali le vitio “Where Are the Keys?” [ChurchofJesusChrist.org]). E mafai ona e faaali atu nisi o ki ma valaaulia lau korama po o le vasega e faasoa mai auala e talitutusa ai na ki ma ki o le perisitua. O i latou o loo e aoaoina e mafai ona toe iloiloina ma talanoaina ia mau o loo faatatau i ai Elder Stevenson (Iosefa Samita—Talafaasolopito 1:68–72; Mataupu Faavae ma Feagaiga 110:11–16), lea e faamatalaina ai ki o le perisitua ua tuuina mai i le lalolagi. E mafai ona e valaaulia tagata o le korama po o le vasega e filifili se tasi o mau nei ma faasoa mai se otootoga e tasi le fuaiupu o mea latou te aoaoina e uiga i mana ma faamanuiaga tatou te maua e ala i ki o le perisitua: Mataio 16:18–19; Mataupu Faavae ma Feagaiga 27:12; 65:2; 84:19–20. Aisea e taua ai le i ai o ki o le perisitua i le lalolagi i aso nei?

• E mafai ona e tuuina atu i tagata taitoatasi o lau korama po o le vasega se ki pepa ma tofi tagata taitoatasi e faitau vaega II, III, IV, po o le V o le savali a Peresitene Dallin H. Oaks “O Ki ma le Pule o le Perisitua” (Liahona, Me 2014, 49–52). Valaaulia i latou e tusi i luga o le ki mea na latou aoaoina e uiga i le perisitua ona faasoa mai lea o mea na latou tusia. E faapefea e nei upumoni ona faatosina ai le ala tatou te manatu ai e uiga i o tatou taitai o le korama po o le vasega ma tofiga tatou te maua mai ia i latou?

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e tagata o le korama po o le vasega ona faasoa atu o latou manatu.

Punaoa Lagolago

• Russell M. Nelson, “O Oa Faaleagaga,” Liahona, Nov. 2019, 76–79

• “Ki o le Perisitua,” i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 3.4.1

• “Learn Your Duty,” “The Priesthood, an Opportunity to Serve,” vitio, ChurchofJesusChrist.org

Aoao Atu i le Ala a le Faaola

Na valaauina ma vaetofia e le Faaola taitai e taitaia ma pulea Lana Ekalesia (tagai Mataio 10:1–5). E mafai faapefea ona e fesoasoani ia i latou o loo e aoaoina ia lagonaina le agaga faafetai mo i latou ua valaauina e auauna atu ma fesoasoani ia i latou?

Tagai foi i le vitio “Asking Follow-up Questions” (ChurchofJesusChrist.org).