tamaitai talavou o loo ataata

10 Oketopa

E Mafai Faapefea Ona Ou Liua Atoatoa i le Alii?

Mataupu Faavae ma Feagaiga 111–114

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona, faaopoopo atu lea i le fefautuaai faatasi e faatatau i pisinisi patino a le korama po o le vasega, atonu e te manao e talanoaina uunaiga ma autu mai le konafesi aoao. Atonu o le a fesoasoani fesili nei.

• O a autu po o savali na tulagaese ia te outou?

• O le a le mea na tatou lagonaina le musuia e fai ona o mea na tatou aoaoina pe lagonaina?

• O a mea e tatau ona tatou faia o se korama po o se vasega e faatino ai se fautuaga na tatou faalogo i ai i le konafesi aoao?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

Ina ia liua atili ia Iesu Keriso, e tatau ona tatou faatuatuaina o Ia ma usiusitai i Ana poloaiga—e tusa lava pe tofotofoina e luitau faigata lo tatou liua. I le 1837, o nisi tagata o le Ekalesia, e aofia ai ma sui o le Korama a Aposetolo e Toasefululua, na leiloloa a latou molimau ma tetee atu i le Perofeta o Iosefa Samita. O Thomas B. Marsh sa avea ma Peresitene o le Korama o le Toasefululua i lena taimi. Aʻo tou faitau ma lou aiga i le Mataupu Faavae ma Feagaiga 112 i lenei vaiaso, e mafai ona tou maitaua le fautuaga na tuuina mai e le Alii e fesoasoani ia Thomas B. Marsh e faamalosia lona liua (vaai faapitoa i fuaiupu 10–26). O le a se mea o aoao mai e lenei fautuaga ia te oe e uiga i le faateleina o le liua i le Faaola?

E mafai faapefea ona e fesoasoani i tagata o le korama po o le vasega ia maua le folafolaga a le Faaola e faapea, “o le a liuaina i latou, ou te faamaloloina i latou”? (Mataupu Faavae ma Feagaiga 112:13). O a ni aafiaga e mafai ona e faasoa atu? Ao e manatunatu i nei fesili, mafaufau e iloilo le savali a Peresitene Bonnie H. Cordon “Ia Faatuatua i le Alii a e Aua le Faalagolago” (Liahona, Me 2017, 6–9) ma le “Liua” i le Faamaoni i le Faatuatua ([2004], 40–43).

alii talavou o loo faitauina tusitusiga paia

O tusitusiga paia o se malosiaga maoae ao tatou saili ina ia liua atoatoa.

Aoao Faatasi

Pe o iloa e tagata o la outou korama po o le vasega le uiga o le liua ia Iesu Keriso? Pe o latou iloa pe faapefea ona liua atoatoa? Valaaulia i latou e manatunatu i nei fesili ao latou iloiloina le Mataupu Faavae ma Feagaiga 112:10–26. E faapefea ona tumau lo tatou liua ia Iesu Keriso tusa lava pe feagai ma tulaga faigata? E mafai ona e faaaogaina se tasi pe sili atu foi o nei gaoioiga e fesoasoani ai i lau korama po o le vasega ia faamalosia lo latou liua i le Faaola.

• O le Alema 32:27–43 e mafai ona fesoasoani ia i latou o loo e aoaoina ina ia malamalama i le auala e faamalolosia ai lo latou faatuatua ma liua atili ai i le talalelei a Iesu Keriso. Atonu e mafai ona e vaevaeina le korama po o le vasega i ni vaega ma fai atu i vaega taitasi e faitau nei fuaiupu ma talanoaina mea latou te aoao atu e uiga i le faatuatua ma le liua. Ona fai atu lea i vaega taitasi e faasoa mai mea na latou aoaoina. E mafai ona e uunaia talanoaga e ala i le faia o fesili e pei o nei: Aisea e avea ai le tupu o se fatu e avea ma se laau o se faamatalaga lelei o le liuaina? O le a le uiga o le “tofotofo i upu [a le Atua]”? (fuaiupu 27). O le a le uiga o le “tausi le laau”? (fuaiupu 41). E mafai faapefea ona tatou iloa o le fatu o le liuaina “e malena a’e, ma totogo mai, ma ua amata ona ola” i totonu o i tatou? (fuaiupu 30). Tuu atu i tagata o le korama po o le vasega se taimi e mafaufau loloto ai i mea e tatau ona latou faia e fafaga ai lo latou lava liua ia Iesu Keriso.

• E tele malosiaga i le lalolagi e tetee atu i lo tatou liua ia Iesu Keriso. O le faitauina o le Helamana 5:12 e mafai ona aoao ai tagata o le korama po o le vasega i le ala e tumau malosi ai e ui i faatuiesega. O le a le uiga o le “atinae lou faavae” i luga o le papa o Iesu Keriso? E mafai ona e tofitofi i tagata taitasi se vaega o le savali a Elder Quentin L. Cook “Faavae o le Faatuatua” (Liahona, Me 2017, 127–31) ma fai atu ia i latou e saili mo faataitaiga ma fautuaga e fesoasoani ia i latou e fausia ai o latou faavae i le Faaola.

• E mafai ona e mafaufau i se auala fatufatuaʻi e faʻaalia ai le mataupu na aʻoaʻoina e Peresitene Bonnie H. Cordon i lana savali “Ia Faatuatua i le Alii a e Aua le Faalagolago”? Mo se faʻataʻitaʻiga, e mafai ona e vaevaeina lau korama poʻo le vasega i ni vaega ma luʻi vaega taʻitasi e fausia se fale maualuga i luga o se fola malifa e faʻaaoga ai poloka poʻo isi mea. Ona talanoaina lea pe faapefea ona fesootai lenei mea i le savali a Peresitene Cordon. Ona mafai loa lea e le korama po o le vasega ona sailia le savali mo fautuaga i auala e tausia ai o tatou olaga ia totonugalemu ia Iesu Keriso. O a ni aafiaga e mafai ona tatou faasoa atu pe a tatou faalagolago i lo tatou lava malamalama po o le taimi foi tatou te faalagolago ai i le Faaola?

Faatino i le Faatuatua

Ia uunaia tagata o le korama po o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e tagata o le korama po o le vasega ona faasoa atu o latou manatu.

Punaoa Lagolago

• Alema 5 (Ua aoao mai Alema e uiga i le liua)

• David A. Bednar, “Faaliliuina i le Alii,” Liahona, Nov. 2012, 106–9

• Richard J. Maynes, “O Le Olioli o le Ola Ai i se Olaga e Faatotonugalemu ia Keriso,” Liahona, Nov. 2015, 27–30

• Becky Craven, “Faaeteete faasaga i le Faasamasamanoa,” Liahona, Me 2019, 9–11

Aoao Atu i le Ala a le Faaola

Sa fetalai mai le Faaola, “O la’u mataupu, e le o sa’u lava, a o lana na auina mai a’u” (Ioane 7:16). Sa Ia aoao atu le aoaoga faavae na Ia aoaoina mai i Lona Tama. E faʻapefea ona e faʻamautinoa o loʻo e aʻoaʻoina aʻoaʻoga moni? (Tagai i le Aoao Atu i le Ala a le Faaola [2016], 20–21.)