tamaitai talavou o loo savavali faatasi

24 Oketopa

E Faapefea Ona Ou Maua “Mana o le Lagi” i Loʻu Olaga?

Mataupu Faavae ma Feagaiga 121–123

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e fou mai i la tatou uarota, ma e faapefea ona tatou faia ia latou lagona ua taliaina i latou? O le a se mea o loo tatou faia e faaaoga tatau ai o tatou taimi i totonu o fono a le korama po o vasega?

• O o tatou tiute po o matafaioi. O a ni o tatou tiute ma matafaioi i le avea ai ma alii talavou ma tamaitai talavou? E mafai faapefea ona tatou faataunuuina ma le atoatoa ia tiute ma matafaioi?

• O o tatou olaga. O a mea o loo tatou faia ia avea atili ai e pei o Iesu Keriso ma maua ai Lona mana i o tatou olaga? O a tatou mea o loo fai e fesoasoani ai i o tatou aiga ia o mai ia te Ia?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

O le pule ma le mana o le perisitua e le o se mea e tasi. E mafai e se tagata ona maua le pule o le perisitua e ala i le faaee atu o lima—e mafai ona faauuina tane i se tofi o le perisitua, ma e mafai ona vaetofia alii ma tamaitai mo se valaauga. Ae o le mana o le perisitua—mana o le Atua, po o “mana o le lagi”—e na o “luga o mataupu faavae o le amiotonu e mafai ona faaaogaina ai” (Mataupu Faavae ma Feagaiga 121:36), ma o alii ma tamaitai e mafai ona faʻaaogaina lenei mana. Afai tatou te mananao i a tatou auaunaga i isi ia malolosi ma suia ai olaga, e manaomia lo tatou agavaa e valaau atu ai i mana o le lagi.

O iloa e tagata o la outou korama po o le vasega le auala e maua ai le mana o le perisitua? E faʻapefea ona ese o latou olaga ma a latou tautua pe afai latou te maua lena malamalamaaga? Mafaufau loloto i nei fesili ao e suesue i le Mataupu Faavae ma Feagaiga 121. Atonu e manaia foi le suesue o savali e lua mai ia Peresitene Russell M. Nelson. O le tasi e faatatau i e umia le perisitua—“O le Tau o le Mana o le Perisitua” (Liahona, Me 2016, 66–69). O le isi e faatatau i tamaitai—“O Oa Faaleagaga” (Liahona, Nov. 2019, 76–79).

alii talavou o loo tatalo

O le mana o le perisitua e oo mai e ala i le ola amiotonu.

Aoao Faatasi

Ina ia amataina se talanoaga e uiga i le mana o le perisitua, e mafai ona e fai atu i tagata o le korama po o le vasega e faasoa mai se mea na latou aoaoina e uiga i lenei mana mai a latou faitauga o le Mataupu Faavae ma Feagaiga 121 i lenei vaiaso. Afai e fesoasoani, e mafai ona e fautua atu ia latou suʻesuʻeina fuaiupu 34–46 e suʻe ai nofoaga uma e faaaoga ai le upu mana ona faasoa mai lea o mea na latou aoaoina. E mafai ona e faaaogaina gaoioiga nei e fesoasoani ai i tagata o lau korama po o le vasega ia sili atu ona malamalama pe mafai faapefea ona latou mauaina le mana o le perisitua a le Atua i o latou olaga.

• E mafai ona aogā le faatusatusaina o le “mana” ma le “aafiaga” o loo faatumauina i le lalolagi ma mea na aoao mai e le Alii i le vaega 121 pe faapefea ona faatumauina le mana o le perisitua. E mafai ona e faia se siata e lua-laina i luga o le laupapa ma faaulutalaina Mana o le Lalolagi ma Mana o le Lagi. E mafai e tagata o le vasega ona faatumu avanoa i upu ma fuaiupu mai le Mataupu Faavae ma Feagaiga 121:34–46. E faapefea e le malamalama i nei fuaiupu ona aafia ai le auala tatou te saili ai e faatosina isi mo le lelei, e aofia ai a tatou uo, tagata o le aiga, ma i latou tatou te tautuaina ma auauna atu i ai? E tusa ai ma nei fuaiupu, e mafai faapefea e le Agaga Paia ona fesoasoani ia i tatou e faatosina isi i le amiotonu?

• Ina ia fesoasoani i e umia le Perisitua Arona ia iloa auala e aumai ai le mana i a latou auaunaga faaleperisitua, e mafai ona e faaali atu ni mea faitino ma fai atu i tagata o le korama e mate pe fia le tau o mea taitasi. Aisea e sili atu ai le tau o isi mea faitino nai lo isi? O a mea e sili ona taua i o tatou olaga, ma o le a se tau e tatau ona tatou “totogiina” mo i latou? Ona su’e lea e tagata o le korama le savali a Peresitene Russell M. Nelson “O Le Tau o le Mana o le Perisitua,” ma vaavaai mo le tau na ia fai mai e tatau ona tatou totogi e maua ai le mana o le perisitua. E faapefea ona aafia o tatou olaga ma olaga o isi ao tatou auauna atu ma le tele o le mana o le Faaola?

• Ina ia fesoasoani i tamaitai talavou ia malamalama pe faapefea ona latou mauaina le mana o le perisitua, e mafai ona e fai atu ia i latou e mafaufau i taimi na latou lagonaina ai le mana o le Atua i o latou olaga. Faamatala atu o le mana o le perisitua o le mana lea o le Atua. E mafai ona latou sailia le savali a Peresitene Russell M. Nelson “O Oa Faaleagaga” mo upumoni e uiga i tamaitai ma le mana o le perisitua. O le a le mea na talosaga Peresitene Nelson i tamaitai o le Ekalesia e fai ina ia mafai ai ona “faalatalata atu i le mana o le Faaola”? (itulau 77; tagai atili i parakalafa e fa o loʻo amata i le “O tamaitai uma ma alii uma”). O anafea na tatou tosina atu ai i lenei mana e faamanuia ai o tatou olaga ma olaga o isi? O le a se mea ua aoao mai e le Mataupu Faavae ma Feagaiga 121:39–43 ia i tatou e uiga i auala e galulue ai ma le mana o le Alii i o tatou olaga?

Faatino i le Faatuatua

Ia uunaia sui o le korama po o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e sui o le korama po o le vasega ona faasoa atu o latou manatu.

Punaoa Lagolago

• Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 39–42

• David A. Bednar, “O Mana o le Lagi,” Liahona, Me 2012, 48–51

Aoao Atu i le Ala a le Faaola

Ao e saili e mulimuli i le faataitaiga a Iesu Keriso ma ola agavaa e maua Lona mana, o le a mafai ona e aoao atu ma le mana ma le pule.