ataeinimwaane imatan te tembora

Aokati 8

N na Kanga n Ira Ikotakin Iteraera?

Reirei ao Berita aika Tabu 85–87

te aikaon ibukin te uaia ni marooro

Te Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona karaoi iaon bwaai ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Tera taian waaki ni kakukurei aika ti a tibwa tia ni karaoi? A nakoraoi karaoaia? A ngaa iai aika a nakoraoi, ao ti na kanga ni katamaroai?

• Tibwangara ke mwiokoara. Antai ae e kainnanoa ara ibuobuoki? Ti na kanga ni buokiia?

• Maiura. Baikara kouru ae ti mwakuri iaoia i bon iroura n tatabemaniira? Tera baika ti rinanoi inanon maiura ae ti kona n tibwauaia? Tera kakabwaia ake ti a tia ni karekei?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon babaire ao kakao ake a karaoi n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Naake n am kooram ke n am kiraati a na iai aia atatai ni mwiokoaia ibukin karaoan te mwakuri ni mitinare ao te mwakuri n te tembora ao rongorongon te utu. Ma ngkana ko taetae nakoia ibukin ikotakin Iteraera, a bae n aki oota n te bwai ae ko taekinna. Ko na kanga ni buokiia ni kamatataia bwa tibwauakin te euangkerio, kakaean rongorongoia aia utu, ao karaoan otenanti n te tembora bon mwakoron te mwakuri ae moan te korakora n ikotakin Iteraera ni katauraoi ibukin Kauaokin te Tia Kamaiu?

Naake ko reireiniia a na bae n tia ni kamatebwaia te taetae ni kaikonaki ibukin te uita ao te titania inanon Reirei ao Berita aika Tabu 86, are e reirei taekan ikotakin Iteraera n te kabanea ni bong. Ngkai ko wareka te mwakoro aei, kataia iangoia aomata ake inanon am kooram ke n am kiraati bwa ngaiia taan mwakuri n ana tawaana te Uea. Ko na kanga ni buokiia n rinanon te kimwareirei are roko ngkana a ira te mwakuri ae tamaroa aei? N reiakina riki taekan atuun te rongorongo aei, kamatebwaia ana rongorongo Beretitenti Russell M. Nelson ao Titita Wendy W. Nelson “Hope of Israel” ([worldwide youth devotional, June 3, 2018], supplement to the New Era and Ensign, ChurchofJesusChrist.org).

te ataeinnaine ao te aine ae e a ikawai a taraa te kombiuta

Ataeinimwaane ao ataeinnaine a kona n ibuobuoki n ikota Iteraera man karaoan te mwakuri n te tembora ao rongorongon te utu.

Te Uaia n Reirei

Ko kona ni waaki n titirakiniia kaain te kiraati n aron aikai: Tera ae e teretere nakoim ngkai ko wareka Reirei ao Berita aika Tabu 86 ni mweengam? Tera ae ko reiakinaki ibukin te mwakuri n ikotakiia natin te Atua ni boong aika kaitira? Tera ae ti karaoia n ira buakon te mwakuri aei? I nano bon rakan iango n kaungai nanoia kaain am kooram ke am kiraati n ira ikotakin Iteraera.

• Titirakiniia kaain am kooram ke am kiirati tera ae roko n aia iango ngke a ongo te taeka ae “ikotakin Iteraera.” Ngkana a kainnanoa te ibuobuoki, baireia bwa a na wareka nanon te taeka ane imwiina mairoun Beretitenti Russell M. Nelson: “Ikotakin Iteraera n te kabane nanona n uota ana euangkerio Iesu Kristo nakoia natin te Atua n iteran te roki aika uoua ake a tuai ni karaoi aia berita aika tabu ma te Atua ke ni karekei aia otenanti aika kakaawaki. Natin Tamara are i Karawa ni kabane a riai n anganaki tibwangaia bwa a na rineia n iriira Iesu Kristo, ni butimwaea ao ni karekea Ana euangkerio ma ana kakabwaia ni kabane” (“Hope of Israel,” 11–12). E kanga nanon te taeka aei n roota aron ara iango ibukin te beku ae kakaawaki aei?

• Ni buokiia kaain te kooram ke te kiraati n taraia bwa e kanga te taetae ni kaikonaki ibukin te wiita ao te titania ni kaineti nakoia, ko kona ni korei kibuntaeka man Reirei ao Berita aika Tabu 86 iaon te burakibooti. A kona kibuntaeka aikai ni kabwarabwarai kanikina inanon te taetae ni kaikonaki—n aron “taan unika te koraa,” “te titania e tuka rikiraken taian wiita,” “taberana a bon bwebwerake,” ao “ikotakin wiita” (kiibu 2–4, 7). A kona naba kibuntaeka ni kamatatai kabwaraakin nanon kanikina aikai—n aron “taian Abotoro,” “Kitanan te Koaua,” “Kaokan Bwain,” ao “te mwakuri ni mitinare.” Ngkanne a kona kaain te kooram ke te kiraati ni kaai ni mwakuri ni manga rinanoa mwakoro 86 ao ni katoatoai taian kanikina ma nanoia. (A kona naba ni wareka Mataio 13:36–43.) Tera ae ti reiakinna man te taetae ni kaikonaki n te mwakuri ibukin ikotakin Iteraera? Tera ae ti kona ni karaoia n riki bwa “te oota” ao “te tia kamaiu” ibukiia natin te Atua? (Reirei ao Berita aika Tabu 86:11).

• A bae n uringnga kaain te kooram ke te kiraati bwa inanon ana rongorongo Beretitenti Russell M. Nelson “Kantaninga ibukin Iteraera”, e kaoiia ibukin karaoan bwaai aika a onoti ni katauraoi ibukin ikotakin Iteraera (taraa iteraniba 14–17). Titirakiniia tera taian kakao ake a uring, ao uaia n rinanoi taian kakao n aron ae kainnanoaki. E kanga karaoan bwaai aikai ni kanakoraoira riki n ikotakin Iteraera? Tera ae ti kona ni karaoia ni kauringiira ibukin taian kakao aikai ao n ibuobuoki i bon imarenara bwa ti na kakoroi bukiia? Kaungai nanoia kaain te kororam ke kaain te kiraati bwa a na kaiangomwaakaia ao n tibwauai aia iango.

• A kona kaain te kooram ke te kiraati ni wareka te kabwarabwara ao moan mwakoro akana uoua n ana rongorongo Unimwaane Quentin L. Cook“Te Tangira ae Korakora ibukiia Natin Tamara” (Riaona, Meei 2019, 76–79), n taraia bukin tera ngkai e rangi ni kakaawaki te tangira inanoia ara mitinare n aia konabwai ibukin te tembora ao rongorongon te utu. Tuangiia bwa a na tibwauai tera are a reiakinna bwa e kanga te tangira ni karaoa te bitaki ngkai ti kataia n tibwaua te euangkerio ma naake n iteran te roki aika uoua. Anganiia kaain te kooram ke te kiraati aia tai bwa a na korea te bwai are a tangiria ni kan karaoia ibukin te kabwarabwara n te bong aei. Ibukin buokaia n iangoi tabeua iango, ko kona ni bairei bwa tera aia iango ibukiia aomata ake a kinaia. E na kanga te Atua ni karoko irouia aomata aikai? Ti na kangaa n ibuobuoki?

Reitan Bwaai n Mwakuri

• Russell M. Nelson, “The Gathering of Scattered Israel,” Liahona, Nov. 2006, 79–82

• Atuun Reirei ibukin Rongorongon te Ekaretia, “The Gathering of Israel,” ChurchofJesusChrist.org/study/history/topics

Reirei n ana Kawai te Tia Kamaiu

Te Tia Kamaiu e onimakiniia naake a Iriiria. E katauraoiia ao n anganiia mwioko aika kakaawaki n reirei, ni kakabwaia ao n beku ibukiia tabeman (taraa Reirei n ana Kawai te Tia Kamaiu [2016], 28). Tera tibwanga aika ko kona ni katauraoi ibukiia kairake n reireniia i bon imarenaia?