ataeinnaine a takakaro n te buakonikai

Aokati 22

Bukin Tera e Tangirai te Uea bwa N na Marurung?

Reirei ao Berita aika Tabu 89–92

te aikaon ibukin te uaia ni marooro

Uaia ni Marooro

E kairaki irouia kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, bootaki ni manga taekin Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro iaon bwaai n aron aikai, ao bairei kawai aika kam na karaoi iaon bwaai aika kam maroroakin (kam kona ni bairei inanon ami bowi n beretientii bwaai aika a na maroroakinaki):

• Ara kooram ke ara kiraati. Antai aika a boou n ara uoote, ao ti na kanga ni kaotia nakoia bwa a butimwaeaki? Tera ae ti karaoia bwa e aonga ni manena ara tai n ara kooram ke ara kiraati?

• Ara beku ke mwiokoara. Baikara katabeara ao tibwangara ngkai ataeinimwane ao ataeinnaine ngaira? Ti na kanga ni kakoroi nanoia?

• Maiura. Tera ae ti karaoia bwa ti aonga ni katotonga riki Iesu Kristo ao ni karekea Mwakana inanon maiura? Tera ae ti karaoia ni buokiia ara utu bwa ti na bane n nako Ina?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

te aikaon n reirei te reirei

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

E bebete ibukiia tabeman aomata n iangoa Tuan te Mauri, ae kuneaki n Reirei ao Berita aika Tabu 89, bwaai aika a kona ao aki kona ni karaoi aomata. Iai n Tuan te Mauri tabeua bwaai aika e kona ao n aki kona ni karaoia te aomata, ma iai inanona naba reirei ibukin kawakinan rabwatara bwa ana marurung. E reirei naba bwa te kawai ae ti tararuai rabwatara e kakorakorai marurungin ara iango, nanora, ao tamneira. Tera kakabwaia aika ko a tia ni karekei ngke ko a tia ni kekeiaki ni maiuakina te maiu ae kamarurung?

Kaain am kooram ke te kiraati a bae n tia ni kamatebwaia Tuan te Mauri ngke a wareka Reirei ao Berita aika Tabu 89–92 n te wiiki aei. Ko na kanga ni buokiia ni kaotaia n aron karekean kakabwaia n rabwata ao n tamnei man karinean te kaotioti aei? Ko kona ni kakaei atatai n ibuobuoki aika nano man rinanoan Atuun Rongorongon te Euangkerio n “Tuan te Mauri” (topics.ChurchofJesusChrist.org) ke “Physical and Emotional Health” inanon Ibukin Kakorakorakiia Kairake ([2011], 25–27).

ataeinimwaane n ikaraaba ibuakonikai

Tararuaan marurungin rabwatara e kakorakora marurungin ara iango, ara namakin, ao tamneira.

Te Uaia n Reirei

Ni moana te marooro iaon Tuan te Mauri, koroi taeka aikai iaon te burakibooti: Rabwata, Wanawana, Tamnei, ao Bobo ma Aomata. Kaoia kaain te kooram ke te kiraati bwa ana wareka Reirei ao Berita aika Tabu 89:18–21 ao maroroakinna bwa a kanga berita inanon kiibu ni kaineti nakon taabo aikai. Tera kakabwaia aika kona n reke man te ongotaeka nakon Tuan te Mauri? Ti kanga n tia ni karekei kakabwaia aikai inanon maiura?

• A kona kaain am kooram ke te kiraati n reiakina ae mwaiti imarenaia man tauan mwiin bwaai aika a karaoi aika a na kamarurungiia. Tibwauaia kaain te kooram ke te kiraati nakon taian kurubu, ao katabeia kurubu n tatabeua nako bwa ana kakaea teuana ke e mwaiti riki kiibu man koroboki aika tabu n te moan mwaake iaan “Reitan Bwaai n Mwakuri,” ni kakaai koaua iaon taekan marurungin te rabwata. Ana tibwauai bwaai aika a reiakin kurubu n tatabeua nako ao koroi aia iango iaon te burakibooti. Ti na kanga ni kaeka nakon titiraki n aron aikai: Bukin tera te Atua e anganiira tuua ibukin marurungin rabwatara? Bukin tera ti ongotaeka nako iai?

• Ana kona n titirakinaki kaain am kooram ke am kiraati bwa bukin tera aki nima te kamanging, aki moko, ke n taui taian turaki. A kanga ni kaekai titiraki aikai? A kona ni karaoa aia kamatebwai iaon “Physical and Emotional Health” inanon Ibukin Kakorakorakiia Kairake (iteraniba 25–27) ao ni kakaai reirei ao kakabwaia aika a tia ni beritanaki ae a kona n tibwauaia ma tabeman. E kanga aron tararuakin rabwatara n rota ara reitaki ma te Atua? A kanga kaain te kooram ke te kiraati ni karekei aia koaua ae man te ongotaeka nakon Tuan te Mauri e na kakabwaiai maiuia?

• Taneiai ake a kaotii kakabwaia man te ongotaeka nakon Tuan te Mauri e kona ni kaungaia kaain te kooram ke te kiraati n rangin ni kabaeaki nakon maiuakinan te tua aei. Ko kona n tibwaua te bwai ae ko a tia n rinanona ni maium. Te witeo “Leave the Party” (ChurchofJesusChrist.org) iai inanona te katooto riki teuana. Ko kona ni kaungaia kaain te kooram ke te kiraati bwa ana tibwauai aia taneiai.

• Ni moana te marooro iaon aron totokoan kataaki n uruanakin Tuan te Mauri, ko na kaotia nakoia kaain am kooram ke am kiraati te abea n akawa (ke tamnein teuana). A kanga taian abea n akawa ni kekewea te ika? Kaeka nakon te titiraki aei a kona ni kuneaki n te witeo “You Will Be Freed” (ChurchofJesusChrist.org; taraa naba Russell Ballard, “O That Cunning Plan of the Evil One,” Liahona, Nobembwa, 108–10). A kanga taian abea n ti tebo ma ae karaoia Tatan ni keweniira ke ni kamwaneira? Tera te rongorongo ae iai iroun Beretitenti Ballard ibukiia naake a reke n anua aika kareke? Ti na kanga ni buoka temanna ae iai ana kaangaanga ma aron rairakina nakon te Tia Kamaiu? (tarai kiibu man te kauoua ni kanikina iaan “Reitan Bwaai n Mwakuri”).

Mwakuri inanon te Onimaki

Kaungaiia kain te kooram ke te kiraati n iangoia ao korea mwiin te bwai are a na karaoia ni mwakurii nanon namakin aika a karekei n te bong aei. E kanga te reirei n te bong aei n irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• Taniera 1:3–20; 1 1-Ikorinto 6:19–20; Reirei ao Berita aika Tabu 88:124; 89:5–21 (Arora n tararua rabwatara e bon kakaawaki iroun te Uea)

• Motiaea 7:33; Aramwa 13:27–29; Ita 12:27 (Te kantaninga ibukiia naake a kekeiaki ma anua aika kareke)

• Aokati 2019 n te New Era ao Ensign (te kaongora ae onoti ibukin te rabwata)

Anga Reirei n Ana Kawai te Tia Kamaiu

Ni bwaai nako, te Tia Kamaiu bon ara banna ni katooto ao ara tia reirei. Ngkana ko katauraoi n anga reirei, iangoia bwa e kanga te Uea n reitaki ma tabeman ao ko na kanga n reitaki n te kawai are e na karikirakeia ao ni kaungaia naake ko reireiniia.