“Tebetembwa 12. Ti na Kanga ni Kaitaraa te Kangaanga ma te Onimaki? Reirei ao Berita aika Tabu 98–101,” Nakoma, Iriirai— Ibukin te Kooram n te Nakoanibonga ae te Aaron ao aia Kiraati Ataeinnaine: Atuun Reirei 2021 (2020)
“Tebetembwa 12. Ti na Kanga ni Kaitaraa te Kangaanga ma te Onimaki?” Nakomai, Iriirai—Ibukin te Kooram n te Nakoanibonga ae te Aaron ao aia Kiraati Ataeinnaine: Atuun Reirei 2021
C. C. A. Christensen (1831–1912), Aika Itiaki a Kakionakoaki mai Jackson County Missouri, c. 1878, te been ae te tempera ae beeniaki iai te kunnikai, 77 ¼ × 113 inches. Brigham Young University Museum of Art, bwaintangira mairouia tibun C. C. A. Christensen aika ataei, 1970
Tebetembwa 12
Ti na Kanga ni Kaitaraa te Kangaanga ma te Onimaki?
Uaia ni Marooro
Kairaki iroun kaain te beretitentii n te kooram ke te kiraati; e na kabanea 10–20 te miniti
Ni moan waakin te bootaki, manga atonga riki Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro iaon bwaai n aron aikai, ao bairei kawai aika kam na karaoi iaon bwaai aika kam maroroakin (kam kona ni bairei inanon ami bowi n beretientii bwaai aika a na maroroakinaki):
-
Ara kooram ke ara kiraati. Antai ae e kainnanoa ara ibuobuoki ao ara tataro? Tera ae ti kona ni karaoia ni buokiia? Antai ae ti na kaoa nakon te waaki ni kakukurei ae e na roko?
-
Ara beku ke mwiokoara. Tera katabeara aika ti a tia ni kakoroi nanoia? Tera katabeara aika ti riai ni karaoi? E kanga aron kaoakiia tabeman nakon Kristo mai mwaina, ao ti na kanga ni kaoiia ngkai?
-
Maiura. Tera te bwai ae ti a tia n rinanona mai mwaina ae e a tia ni kakorakora ara koaua? Baikara bwaai aika a riki inanon maiura, ao ti na kanga ni kateimatoaira ibon imarenara?
N tokin te reirei, ngkana e riai, karaoi waaki aikai:
-
Kaota koauan te reirei are e reiakinaki.
-
Kauringiia kain te kooram ke te kiraati iaon te baire ao te kakao are a karaoia n tain te bootaki.
Reirei te Reirei
Kairaki iroun te tia kairiiri ae ikawai ke te kairake; e na kabanea 25–35 te miniti
Katauraoiko n te Maiu n Tamnei
Ana taeka te Atua n Reirei ao Berita aika Tabu 98 ao 101 e anga te raunnano nakoia Aika Itiaki ake a tabe ma te kataaki ae korakora i Missouri n te 1830. Ngkai katakira a kona ni kaokoro mairouia kaain te Ekaretia ake rimoa, ti bane ni kaitara ma te kaangaanga n te maiu ae mamate, ao te kaeka nakon te kaangaanga ma te onimaki e kona ni buokiira n rikirake n tamneira ao n riki n aron Iesu Kristo.
E kanga te rairaki nakon te Uea n taai ni kaangaanga ni kakorakorako ao ni kanakoraoa am reitaki ma Iesu Kristo? Tera taian kakaewenako ao kataaki ae a tia n rinanona kaain am kooram ke am kiraati, ao ko na kanga ni buokiia ni kakaea te korakora iroun te Tia Kamaiu? Ni buokiko ni katauraoi n reirei taekan te kaangaanga, ko na rinanoa ana reirei Unimwaane Neil L. Andersen “Wounded” (Liahona, Nobembwa. 2018, 83–86) ao “Adversity” inanon True to the Faith ([2004], 8–11).
Ti kona ni kunea te rau n taai ni kaangaanga man karekean korakorana mairoun te Tia Kamaiu.
Te Uaia n Reirei
Kaain am kooram ke am kiraati n tatabemaniia e kekeiaki ma ana kakaewenako teuanne ke neienne. Tera te karaunano ae ko namakinna ae a kona ni kunea inanon Reirei ao Berita aika Tabu 98:1–3? Ko kona ni kabongana teuana ke e mwaiti riki waaki ni kakukurei aika inano ni buokiia ni kaotaia n aron kaitarakin te kaangaanga ma te onimaki iroun te Uea.
-
Iai inanon koroboki aika tabu katooto aika mwaiti irouia aomata aika kaitarai katakiia ma te onimaki ae korakora. A kona kaain te kooram ke te kiraati n reiakina aron kaitarakin te kaangaanga ma te onimaki ae korakora man kamatebwaiakan tabeua katooto aikai (tarai tabeua inanon “Reitan Bwaai n Mwakuri”). A kona n rinea teuana te kibu n taeka ao ni kakimototoa ana taneiai te aomata anne ibukin te kooram ke te kiraati. Tera atatai aika nano aika ti karekei bwa bukin tera ngkai ti karekea te kaangaanga? Tera ae ti reiakinna n aron kaitarakin te kaangaanga ma te onimaki ae korakora? Kaoia kaain te kooram ke te kiraati bwa ana korea te kataaki ae a kaitarai ke aia tangira ao n iangoia bwa a na kanga ni kona ni kaoa mwakan te Tia Kamaiu ni buokiia n taai ni kataaki aikai.
-
N reirei taekan tabeua rikin te kaangaanga ao tera ae ti kona n reiakinna man kataakira, kam kona ni bootaki ni wareki moan barakarabe ake uoua iaan “Adversity” in True to the Faith (iteraniba 8). Tuangiia kaain te kooram ke te kiraati bwa ana tibwaua te bwai ae a reiakinna. Ngkanne a kona aomata n tatabemaniia n rinanon teuana man nikiran mwakoro ake teniua iaan“Adversity” ao katauraoi n reireiniia ake nikiraia te bwai ae a reiakinna, n raonaki ma aron te Tia Kamaiu ni buokiira n taai ni kataaki. Kaungaia bwa ana tibwaua aia taneiai ae kaineti ma te bwai ae a warekia ngkana a namakina te mweengaraoi ni karaoana.
-
Teuana te kawai ni moana te marooro iaon te kaangaanga bon man korean te rain rikaaki i nukan te burakibooti ao korea Bukin tera iai ara kaangaanga? n terana are teuana ao Ti na kanga ni kaitaraa te kaangaanga ma te onimaki ae korakora?. Kaain am kooram ke am kiraati n tatabemaniia a na wareka teuana te mwakuri man ana rongorongo Unimwaane Neil L. Andersen “Wounded,” ni kakaai kaekaan titiraki iaon te burakibooti. Tera ae ti reiakinna ibukin te Tia Kamaiu man ana rongorongo Unimwaane Andersen?
-
Unimwaane Stanley G. Ellis e kabonganai katooto iaon kiokio ao te man ni bwebwe n reirei taekan te kaangaanga n ana rongorongo “Do We Trust Him? Hard Is Good” (Liahona, Nobembwa. 2017, 112–14). Ko kona ni kaota tamnein te moa ae bung ke te man ni bwebwe n otinako man te cocoon ao maroroakina te bwai ae reirei Unimwaane Ellis. A kona naake ko reireiniia ni bootaki ni mwakuri ni kakauoman n rinanon ana taetae Unimwaane Ellis. A kona toaia ni kakauoman ni koroi bwaai ni kabane ake a kona ni kunei iaon bukina ngkai iai karawawatakira ao ti na kanga ni kaeka nako iai. E kanga te teimatoa ma te kakaonimaki ae korakora n taai ni kaangaanga ni buokiira ni kaan riki nakon te Tia Kamaiu?
Mwakuri inanon te Onimaki
Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.
Reitan Bwaai n Mwakuri
-
1 Tamuera 1; 1 Uea 17; Ruka 23:33–34; 1 Nibwaai 5:1–9; Motiaea 24:8–17; 3 Nibwaai 1:4–21; Moronaai 1; Kairi nakon Koroboki aika Tabu, “Ruta” ao “Etita,” scriptures.ChurchofJesusChrist.org (Katooto irouia aomata aika kaitara ma te kaangaanga)
-
Ioane 14:18; I-Rom 8:28, 35–39; Aramwa 36:3 (E kona te Tia Kamaiu ni buokiira n ara tai ni kaangaanga)
-
“God Will Lift Us Up,” “The Will of God,” witeo, ChurchofJesusChrist.org
Anga Reirei n Ana Kawai te Tia Kamaiu
Te Tia Kamaiu e ataia naake E reireiniia—ao E ataia bwa antai ae ana riki nako iai. Ngkana a rinanon te kaangaanga, E aki katikuia n tii ngaiia ma e reitinako n tangiriia. Tera kaangaanga aika iai irouia kairake? Kona kanga ni kaota te tangira ao te boutoka?