Turai 25

Bukin Tera N na Bwaina te Ongotaeka nakon Ana Tua te Atua?

Reirei ao Berita aika Tabu 81–83

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga bootaki n atonga Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro iaon bwaai n aron aikai, ao bairei kawai aika kam na karaoi iaon bwaai aika kam maroroakin (kam kona ni bairei inanon ami bowi n beretientii bwaai aika a na maroroakinaki):

• Ara kooram ke ara kiraati. Tera ae ti kona ni karaoia ni karika te bonano imarenaia kaain te kooram ke te kiraati? Baikara kouru ae ti tangiria ni bane n uaia ni mwakurii?

• Tibwangara ke mwiokoara. Tera ae ti karaoia n tibwaua te euangkerio? Baikara baika ti a tia n rinanoi ni karaoan te mwakuri n te tembora ao n rongorongon te utu?

• Maiura. Ti kanga n tia n nora bain te Uea inanon maiura? Tera te namakin n tamnei ae e a tia n reke iroura inanon tain kamatebwaian booki aika tabu n te wiiki aei?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Ti na kona n namakinna ae ana tua te Atua e totokoi inaomatara ao n tiana ara rinerine. Te koaua e kangai bwa a kanakoraoa inaomatara tuua. Inanon Reirei ao Berita aika Tabu 82:8–10 ti reiakinna bwa a buokiira tuua n atai ana kantaninga te Atua, ao ngkana ti karinei, ao ara mwakuri a na “rairaki nako [ira] ibukin [kamaiuara].” Ni koauana, ngkana ti karinea te Atua, E “kabaeaki” bwa e na anganiira kakabwaia ni kabane ake E a tia ni beritan (kiibu 9–10). E kanga Tamara are i Karawa ni kakabwaiako ngkana ko a tia ni kawakin Ana tua? Ni katauraoiko n anga reirei, ko kona ni wareka ana rongorongo Unimwaane Dale G. Renlund “Abound with Blessings” (Liahona, Meei 2019, 70–73) ke iangoi tabeua bwai n reirei inanon Atuun Reirei n te Euangkerio “Obedience” (topics.ChurchofJesusChrist.org).

Aia banna ni katooto ana toro te Atua aika kakaonimaki n taai aika nako a kona ni kaungaira ni maiuakina te raoiroi n te bong aei.

Te Uaia n Reirei

A kona kaain am kooram ke am kiraati ni karinei tabeua tuua. Ni buokiia n kamatataia bukin kakawakin te ongotaeka e kona ni kaungaia. Korea atuun te kamataata aei iaon te burakibooti, ao kaoia kaain te kooram ke te kiraati bwa ana tibwauai aia kaeka. Ko kona n tuangiia bwa ana kakaei atatai riki tabeua inanon Reirei ao Berita aika Tabu 82:8–10, are a kaman tia n reiakinna n te wiiki aei. Ngkanne rinea teuana ke e bati riki waaki ni kakukurei aika oti inano bwa e na buokiia n ataia bwa bukin tera e kakaawaki n tainako karinean te Atua, e ngae ngke karaoakina e matoatoa.

• E kona ni bebete riki karinean tuua ngkana ti ataia bwa tera ae e na riki imwiina. N reirei bwa bukin tera e anganiira tuua te Atua, a kona kaain te kooram ao te kiraati n rinanoi kiibu man booki aika tabu inanon “Reitan Bwaai n Ibuobuoki” (ke tabeua aika a roko n am iango). A na kanga koroboki aika tabu aikai ni buokiira ngkana ti kunea bwa e kaangaanga karinean te tua? Ngkai mwakoron te marooro aei, kam kona ni bane ni wareka te mwakoro ae atunaki “Fourth, forget not the ‘why’ of the gospel” n ana rongorongo Beretitenti Dieter F. Uchtdorf “Tai Mwanuokinai” (Riaona, Nobembwa. 2011, 122).

• Ngkana naake ko reireiniia a ataa ana banna ni katooto n te ongotaeka ae kororaoi te Tia Kamaiu, a kona n rangi ni kaungaaki bwa ana karinea te Atua. N ningai ae ongotaeka iai Iesu Kristo nakon Ana karo, riki n taai ni kaangaanga? (taraa Mataio 4:1–11; Ruka 22:39–44). Aia banna ni katooto mwaane ao aine ake a ongotaeka e kona ni kuneaki inanon Ebera 11. Tao a kona am kooram ke am kiraati n rinea teuana maibuakon katooto aikai—ke tabeman aika a ataia, n raonaki ma ake inanon aia utu—ao tibwaua te bwai ae kaungaia ibukiia aomata aikai. Bukin tera a rineia n ongotaeka nakon te Uea? E kanga te Tia Kamaiu ni buokiira ngkana ti rineia bwa ti na ongotaeka?

• Ni buokiia kaain te kooram ke te kiraati tarai tuua bwa bwaai n ibuobuoki ma tiaki bwaai ni karawawata, kam kona n tibwauai ana reirei Unimwaane D. Todd Christofferson aika kuneaki inanon “Reitan Bwaai n Mwakuri.” Ko kona ni kaotia ke ni korea tamnein te kaintamwarake ao n tuangiia naake ko reireiniia bwa a na mwaken taian mwaneka ma te tua ae na kona ni kaangaanga ibukin te aomata bwa e na ataia ke ni karinea. E kanga ana taeka Unimwaane Christofferson ni buoka temanna ae kekeiaki ni kawakin tuua?

• Tabeua witeo ake a kona n reirei taekan te ongotaeka a kona ni kuneaki inanon ChurchofJesusChrist.org ao n te Gospel Library app (taraa “Reitan Bwaai n Mwakuri”). Ko kona ni katabeia kaain te kiraati ke te kooram n tatabemaniia ni mataku n teuana mai ibuakon witeo aikai imwain te bootaki ao n roko n tibwaua te bwai ae a reiakinna ibukin te ongotaeka. E kona n ae te kooram ke te kiraati ae kona ni bairea oin aia tamnei iaon taekan te ongotaeka n ana tua te Atua. A kona ngkanne ni bairei waaki ni kakukurei ni karaoa te tamnei ao n tibwauaia ni bwaai n reitaki.

Mwakuri inanon te Onimaki

Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwauai aia iango.

Reitan Bwaai n Mwakuri

• 1 Nibwaai 17:3; Motiaea 2:41; Reirei ao Berita aika Tabu 130:20–21 (Ti kakabwaiaki man ara ongotaeka nakon tuua)

• Te Tua-Kaua 10:12–13; Ioane 14:15; 1 Ioane 5:1–3 (Ti karinei tuua bukina bwa ti tangira te Atua)

• Reirei ao Berita aika Tabu 93:20 (Te ongotaeka e kariaira bwa ti na karekea bwaninin te Atua)

• “Ongotaeka,” inanon mwakoro 3 n Tataekina Au Euangkerio (2019), 75

• E reirei Unimwaane D. Todd Christofferson: “Tabeman a ti noora te angakarea aotianaki te ongotaeka nakon tuan te berita ae tabu ae boou ao ae akea tokina, ma naake a taneiai ni karaoia ni maiuia—ake anga inaomataia ao n aki tianiia nakon maiuakinan te berita ae tabu— a karekea te inaomata ae korakora ao raun nanoia. Ngkana ti ataia raoi ma te koaua, tina ukoukori riki tuua aika a mwaiti, tiaki ti tabeua. Tuan te aba ke te tua ae boou ae ti reiakinna ao ni maiuakinna titebo ma te rangata riki teuana ke te mwaneka iaon te kaintamwarake are e anganiira te kona n tamwarakea ae rietaata ao ae rietaata riki. Ni koauana, te maiu n te euangkerio bon te maiu ae raoiroi” (“The Power of Covenants,” Riaona, Meei 2009, 23).

• “The Sting of the Scorpion,” “Stay within the Lines,” “A Secure Anchor,” “Shower of Heavenly Blessings,” “Blessed and Happy Are Those Who Keep the Commandments of God,” witeo, ChurchofJesusChrist.org

Anga Reirei n Ana Kawai te Tia Kamaiu

E kaoia Ana reirei te Tia Kamaiu ni kakoaua, ao ngke a karaoia, ao te Tamnei e ringa nanoia. Ngkana ko angareirei, kaoia kaain te kooram ke te kiraati bwa ana tibwaua aia koaua iaon kakawakin kawakinan tuua.