Turai 11

E Kanga Ataakin te Babaire ni Kamaiu ni Bita Maiu?

Reirei ao Berita aika Tabu 76

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Kooram n te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro ibukin bwaai n aron akana imwiina, ao bairei kawai ake kona mwakuri iaon ake ko maroroakin (ko kona ni baireia tera bwaai ake a na maroroakinaki inanon te boowi ni beretitentii):

• Ara kooram ke ara kiraati. Antai ae e kainnanoa ara ibuobuoki ao ara tataro? Tera ae ti kona ni karaoia ni buokiia? Antai ae ti na kaoa nakon te waaki ni kakukurei ae e na roko?

• Ara beku ke mwiokoara. Tera katabeara ae ti a tia ni kakoroa nanona? Tera katabeara ae ti riai ni karaoi? E kanga aron kaoakiia tabeman nakon Kristo, ao ti na kanga ni kaoiia ngkai?

• Maiura. Tera te bwai ae ti a tia n rinanona mai mwaina ae e a tia ni kakorakora ara koaua? Baikara bwaai aika a riki inanon maiura, ao ti na kanga ni kateimatoaira ibon imarenara?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Tamara are i Karawa e a tia ni katauraoa te babaire are ti na kona ni karekei kakabwaia aika akea tokina ao n riki n ai Arona. E tangiriia natina ni kabane bwa a na ataa te babaire anne, ngaia are E a tia ni kaotia nakoia burabeti rinanon ririki. Ngkai kaain te kooram ke te kiraati a kamatebwaia Reirei ao Berita aika Tabu 76 n te wiiki aei, a reiakina Ana babaire te Atua are E kaotia nakon Iotebwa Timiti ao Sidney Rigdon, n raonaki ma taben te Tia Kamaiu n te babaire anne ao te mimitong are ti kona ni karekea n te maiu are e na roko. Ngkana ti kakaonimaki, ti kona ni kakororaoaki rinanon ana Mwakuri ni Kamaiu Iesu Kristo, karekea te kimwareirei ae bwanin, ao ni maeka ma te Atua n aki toki.

E kanga ataakin ana babaire Tamara are i Karawa ni bita am taratara iaon te maiu? Ko na kanga ni buoka am kooram ke am kiraati ni kamatataaki riki ngkai bon te kakabwaia ataakin te babaire ni kamaiu? Ni katauraoiko ibukin am anga reirei, ko kona ni wareka “Babaire ni Kamaiu” inanon Koaua nakon te Onimaki ([2004], 115–17) ke ana rongorongo Unimwaane Dieter F. Uchtdorf “Am Mwananga ae Korakora” (Riaona, Nob. 2019, 86–90).

Reiakinan taekan te babaire ni kamaiu e anga te kaetieti ao oin bukin maiura.

Te Uaia n Reirei

Teuana te kawai ni waakina te kabwarabwara ma kaain te kooram ke te kiraati ibukin te babaire ni kamaiu bon kaoan temanna bwa e na korea iaon te burakibooti atuun taeka akana imwiina, n raonaki ma taian kibu man Reirei ao Berita aika Tabu 76: Te Maiu Imwaain te Maiu aei (kiibu 22–27), Te Maiu ae Mamate (kiibu 40–43), ao Te Maiu imwiin te Mate (kiibu 50–53, 59–62). Anganiia kaain te kooram ke te kiraati tabeua te miniti n rinanoi kiibu aikai ni kunei taben te Tia Kamaiu ni kakoroan bukin ana babaire Tamara are i Karawa. Kaoiia bwa a na koroi iaan atuun rongorongo ake a kunei. Waaki ni kakukurei aika inano a kona ni buokiia ni kamatataaki riki bwa e kanga ana babaire Tamara are i Karawa ni kakabwaiai maiuia.

• Manga rinanon tabeua aara n ana babaire Tamara are i Karawa ake a kona ni buokiia kaain te kooram ke te kiraati ni kamatataaki riki n te babaire. A kona n rinanoi koroboki aika tabu n are n te moan bullet iaan “Reitan Bwaai n Mwakuri” ao korei karinani tabeua aara ibukin ana babaire te Atua. Tera ae e reireiniira kiibu aikai ibukin te babaire? N aron te katooto, e kanga te babaire n anganiira te kukurei, ngkai ao n aki toki? A kanga koroboki aika tabu n reireiniira taekan taben te Tia Kamaiu n te babaire aei? Ko kona ni kaota te witeo “Our Eternal Life” or “Men’s Hearts Shall Fail Them” (ChurchofJesusChrist.org) ao kaoiia naake ko reireiniia bwa a na maroroakin taai ngke a namakina te kakaitau ibukin ana babaire Tamara are i Karawa.

• Iangoia kaoiia naake ko reireiniia bwa a na maroroakinna a na kanga ni kaeka raoraoia are e tabeki titiraki akana imwiina ibukin te babaire ni kamaiu: Ti roko mai iaa? Bukin tera ngkai ti mena ikai? Ti na nakea imwiin te maiu aei? Kaoiia bwa a na kabongana te rongorongo ane iaan “Babaire ni Kamaiu” n Koaua nakon te Onimaki (iteraniba 115–17) ao bwaai n ibuobuoki iaan “Reitan Bwaai n Mwakuri” ni katauraoa aia kaeka nakon teuana mai ibuakon titiraki akanne. Ti kanga n tia ni kakorakoraki man ataakin kaekaakin titiraki aikai?

• Kaain te kooram ke te kiraati a reiakin koaua n te euangkerio n ae nano riki ngkana a anganaki tibwangaia bwa a na anga reirei. Ni katauraoi imwaain te kiraati, tuangiia kaain te kooram ke te kiraati bwa ngkana a roko ao a na tauraoi n tibwaua aia taeka ae uarereke n aia atatai ibukin te babaire ni kamaiu. A kona ni kabonganai tiamwarii akana kuneaki iaan “Te Babaire ni Kamaiu” ni mwakoro 3 n Taetaekina Au Euangkerio ([2019], 48–53). Tera te kaokoro ae reke n ataakin te babaire ni kamaiu?

Mwakuri inanon te Onimaki

Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• 2 Nibwaai 11:5; Aramwa 12:30; 34:9; 41:2; 42:8, 13–15; Mote 6:59–62 (Aara ibukin ana babaire Tamara are i Karawa)

• Reirei ao Berita aika Tabu 38:1–3; 138:53–56; Mote 4:1–4; Aberaam 3:21–24 (Te maiu imwaain te maiu aei)

• 2 Nibwaai 2:19–21, 25; Aramwa 5:15–16; 34:32; Aberaam 3:25–26 (Te maiu ae mamate)

• Ioane 14:1–2; Aramwa 11:42–45; Reirei ao Berita aika Tabu 76:39–43, 89–93 (Te maiu imwiin te mate)

Reirei n ana Kawai te Tia Kamaiu

E anga te titiraki te Tia Kamaiu are e karikiia naake e reireiniia bwa a na iango ma nanoia raoi. E rangi ni bane nanona nakon aia kaeka. Ko na kanga ni kabonganai titiraki ni buokiia kairake bwa a na iango ma nanoia raoi ni koaua ibukin ana babaire te Atua? (Taraa Reirei n ana Kawai te Tia Kamaiu [2016], 33–34,)