eb’ li saaj winq chiru li santil ochoch

8 agosto

Chan ru tintz’aqonq sa’ lix ch’utub’ankil Israel?

Tzolʼlebʼ ut Sumwank 85–87

reetalil li k’uub’ank na’leb’ sa’ komonil

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ruheb’ li k’anjel ak xqab’aanu sa’ komonil? Ma chaab’il x’el? K’a’ru li chaab’il x’el, ut k’a’ru li naru xchaab’ilob’resinkil?

• Li k’a’ru teneb’anb’il sa’ qab’een. Ani naraj ru li qatenq’? Chan ru taqatenq’aheb’?

• Sa’ li qayu’am. K’a’ruheb’ li meta xqak’ojob’ qajunes qib’? Ma wan k’a’ru xqak’ul li naru xyeeb’al resil? K’a’ru li osob’tesink ak xqak’ul?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

reetalil xk’utb’al li tzol’leb’

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Eb’ li saaj maare ak neke’xnaw naq teneb’anb’ileb’ chixjultikankil li evangelio ut chixb’aanunkil li k’anjel re li santil ochoch ut li resilal li junkab’al. A’b’an wi taapatz’ reheb’ k’a’ru lix ch’utub’ankil Israel, maare ink’a’ te’xnaw. Chan ru taatenq’aheb’ chixtawb’al ru naq xwotzb’al li evangelio, xtawb’al resilal li junkab’al, ut xb’aanunkil li k’ojob’anb’il k’anjel sa’ li santil ochoch, a’aneb’ ajwi’ li k’anjel re xch’utub’ankil Israel, ut naq li k’anjel a’an nokoxkawresi choq’ re li xkab’ xk’ulunik li Qaawa’?

Eb’ li saaj maare ak xe’ril li jaljookil ru aatin chirix li trigo ut li yib’ aj pim sa’ Tzol’leb’ ut Sumwank 86, li naxk’e qana’leb’ chirix xch’utub’ankil Israel sa’ roso’jikeb’ li kutan. Naq nakawil li tasal a’in, yal aaq’e chixk’oxlankileb’ li saaj jo’ aj k’anjel sa’ li rawimq li Qaawa’. Chan ru taatenq’aheb’ chireek’ankil li sahil ch’oolejil li nachal naq neke’tz’aqon sa’ li xnimal ru k’anjel a’in? Re xtzolb’al xkomon chik chirix li na’leb’ a’in, il li raatin li Awa’b’ej Russell M. Nelson ut li Hermana Wendy W. Nelson, “Juventud de Israel” ([ch’utam choq’ reheb’ li saaj sa’ chixjunil li ruchich’och’, 3 junio, 2018], ChurchofJesusChrist.org).

jun saaj ixq ut jun ixq neke’ril li ulul ch’iich’

Eb’ li saaj neke’ru chixch’utub’ankil Israel naq neke’xb’aanu li k’anjel re li santil ochoch ut li resilal li junkab’al.

Tzolok sa’ komonil

Naru taapatz’ a’in reheb’ li saaj: K’a’ru xwulak chawu naq xawil Tzol’leb’ ut Sumwank 86 sa’ laa wochoch? K’a’ru xatzol chirix li k’anjel re xch’utub’ankileb’ li ralal xk’ajol li Dios sa’ roso’jikeb’ li kutan? K’a’ru yooko chixb’aanunkil re tz’aqonk sa’ li k’anjel a’in? Naru xb’aanunkil a’in re xwaklesinkil xch’ooleb’ li saaj chi tz’aqonk sa’ xch’utub’ankil Israel.

• Patz’ reheb’ li saaj naq te’xye k’a’ru neke’xk’oxla naq neke’rab’i li aatin “lix ch’utub’ankil Israel.” Wi te’raj xtenq’, ye reheb’ naq te’ril li kixye li Awa’b’ej Russell M. Nelson chirix a’an: “Lix ch’utub’ankil Israel, a’an naraj naxye xjultikankil lix evangelio li Jesukristo chiruheb’ li ralal xk’ajol, li yo’yookeb’ jo’eb’ ajwi’ li kamenaqeb’, li maji’ neke’ok sa’ sumwank rik’in li Dios ut li maji’ neke’xk’ul li aajel ruhil k’ojob’anb’il k’anjel. Wankeb’ xk’ulub’ chixjunileb’ li ralal xk’ajol li Dios re naq te’xye xjuneseb’ rib’ ma te’xtaaqe li Jesukristo; ma te’xk’ul lix evangelio ut chixjunileb’ li osob’tesink li naxk’e” (“Juventud de Israel,” 11–12). Rik’in li naxch’olob’ li Awa’b’ej Nelson, k’a’ru nakak’oxla chirix lix ch’utub’ankil Israel?

• Re xtenq’ankileb’ li saaj chixjuntaq’eetankil li jaljookil ru aatin chirix li trigo ut li yib’ aj pim rik’in xyu’ameb’, naru taatz’iib’a wiib’ oxib’ xraqalil li aatin re Tzol’leb’ ut Sumwank 86 chiru li pizarron. Maare li raqal aatin te’reetali li na’leb’ sa’ li jaljookil ru aatin—“laj awinel re li iyaj,” “li yib’ aj pim naxlaatz’ob’resi li trigo,” “lix xaq yoo chi moqk,” ut “xch’utub’ankil li trigo” (eb’ li raqal 2–4, 7). Maare te’xch’olob’ ajwi’ k’a’ru naraj naxye eb’ li eetalil a’an—“eb’ li apostol,” “li nimla q’etok paab’ank,” “lix k’ojlajik wi’chik li evangelio,” ut “li k’anjel re xjultikankil li evangelio.” Toja’ naq eb’ li saaj te’ril li tasal 86 sa’ komonil ut te’xye k’a’ru naraj naxye li junjunq chi eetalil. (Naru ajwi’ te’ril Mateo 13:36–43.) K’a’ru naxk’utb’esi li jaljookil ru aatin a’in chirix xch’utub’ankil Israel? K’a’ru naru taqab’aanu re wank jo’ “jun saqen” ut “jun aj kolonel” chiruheb’ li ralal xk’ajol li Dios? (Tzolʼlebʼ ut Sumwank 86:11).

• Maare taajultiko’q reheb’ li saaj naq sa’ li raatin, “Juventud de Israel,” li Awa’b’ej Russell M. Nelson kixb’oqeb’ chixb’aanunkil li k’anjel re xch’utub’ankil Israel (che’ilmanq li raqal 14–17). Patz’ reheb’ ma jultikeb’ re k’a’ruheb’ li k’anjel a’an, ut ilomaq li raatin li Awa’b’ej Nelson wi na’ajman. Chan ru naq xb’aanunkil li k’anjel a’an tooxtenq’a chixch’utub’ankil Israel? Chan ru taqak’e li k’anjel a’an chi jultiko’k qe, ut chan ru taqatenq’a qib’ chiqib’il qib’ chixb’aanunkil? Patz’ reheb’ li saaj naq te’xwotz xna’lebeb’ chirib’ileb’ rib’.

• Eb’ li saaj naru te’ril li wiib’ raqal sa’ xtiklajik li raatin li Elder Quentin L. Cook “Nimla rahok choq’ reheb’ li ralal xk’ajol li qaChoxahil Yuwa’” (Jolomil ch’utub’aj-ib’ re abril 2019), ut te’xk’e reetal k’a’ut naq aajel ru li rahok sa’ xjultikankil li evangelio ut sa’ xk’anjel li santil ochoch ut li resilal li junkab’al. Patz’ reheb’ naq te’xye k’a’ru xe’xtzol chirix li rahok sa’ xyalb’al qaq’e chixwotzb’al li evangelio rik’ineb’ li yo’yookeb’ ut li kamenaqeb’. K’e xhoonaleb’ chixtz’iib’ankil li k’a’ru te’raj xb’aanunkil b’antiox re li na’leb’ xe’xtz’ol anajwan. Re xtenq’ankileb’, naru taaye reheb’ naq te’xk’oxlaheb’ li ani neke’xnaw ru. Chan ru naraj li Dios xtenq’ankileb’ a’an? Chan ru taqatenq’aheb’ laa’o?

Xkomon chik li tenq’

• Russell M. Nelson, “El recogimiento del Israel disperso,” Liahona, noviembre 2006, 79–82

• Temas de historia de la Iglesia, “Recogimiento de Israel,” ChurchofJesusChrist.org/study/history/topics

Li k’utuk jo’ li Kolonel

Li Kolonel ink’a’ kiwiib’an xch’ool chirixeb’ li ani ke’taaqenk re. Kixkawresiheb’ ut kixteneb’ sa’ xb’eeneb’ xnimal ru k’anjel re xtzolb’aleb’, rosob’tesinkileb’, ut xtenq’ankileb’ li ras riitz’in (chi’ilmanq Li k’utuk jo’ li Kolonel [2016], 28). Chan ru taatenq’aheb’ li saaj chixtzolb’aleb’ rib’ chirib’ileb’ rib’?