22 agosto

K’a’ut naq li Qaawa’ naraj naq kawaq li woq wuq’?

Tzolʼlebʼ ut Sumwank 89–92

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Aniheb’ li ak’ sa’ qateep, ut chan ru taqak’eheb’ chireek’a naq k’ulb’ileb’ qab’aan? K’a’ru yooko chixb’aanunkil re naq chaab’ilaq li ch’utam choq’ qe?

• Li k’a’ru teneb’anb’il sa’ qab’een. K’a’ru li k’anjel teneb’anb’il sa’ qab’een jo’ saaj winq malaj ixq? Chan ru naru taqab’aanu li k’anjel a’an chi chaab’il?

• Sa’ li qayu’am. K’a’ru yooko chixb’aanunkil re wank jo’ li Jesukristo ut re xk’ulb’al lix wankil sa’ li qayu’am? K’a’ru yooko chixb’aanunkil re xtenq’ankil li qajunkab’al chi chalk rik’in li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Maare wankeb’ li neke’ril li Aatin re Chaab’il Na’leb’, li wan sa’ Tzol’leb’ ut Sumwank 89, yal jo’ jun siir chi taqlahom. Yaal naq wankeb’ li taqlahom sa’ li Aatin re Chaab’il Na’leb’, a’b’an wankeb’ ajwi’ xninqal ru na’leb’ choq’ re xkawob’resinkil li qatib’el. Naxk’ut ajwi’ naq li k’a’ru naqab’aanu rik’in li qatib’el wan xwankil sa’ xkawilal li qak’a’uxleb’aal, li qeek’ob’aal, ut li qamusiq’. K’a’ruheb’ li usilal ak xak’ul sa’ laa yu’am naq yookat chirilb’al laa tib’el chi us?

Eb’ li saaj maare xe’xtzol li Aatin re Chaab’il Na’leb’ naq xe’ril Tzol’leb’ ut Sumwank 89–92 chiru li xamaan a’in. Chan ru taatenq’aheb’ chixtawb’al ruheb’ li osob’tesink re tib’elej ut re musiq’ej li neke’chal rik’in xpaab’ankil li k’utb’esinb’il na’leb’ a’in? Naru taataw aana’leb’ naq taawil “Palabra de Sabiduría” sa’ Temas del Evangelio (topics.ChurchofJesusChrist.org) malaj “Li kawilal sa’ tib’elej ut sa’ musiq’ej” sa’ Choq’ re Xkawilaleb’ li Saaj, ([2011], 25–27).

Rilb’al chi us li qatib’el wan xwankil sa’ xkawilal li qak’a’uxleb’aal, li qeek’ob’aal, ut li qamusiq’.

Tzolok sa’ komonil

Re aatinak chirix li Aatin re Chaab’il Na’leb’, tz’iib’a a’in chiru li pizarron: sa’ tib’elej, sa’ k’a’uxleb’aal, sa’ musiq’ej, ut sa’ komonil. Patz’ reheb’ li saaj naq te’ril Tzol’leb’ ut Sumwank 89:18–21, ut naq te’aatinaq chirix li nayeechi’iman aran chirixeb’ li kaahib’ chi na’leb’ a’in. K’a’ruheb’ li osob’tesink naru taqak’ul naq taqapaab’ li Aatin re Chaab’il Na’leb’? Ma ak xqak’ul junjunq reheb’ sa’ li qayu’am?

• Eb’ li saaj naru te’xtaw xna’leb’ chirib’ileb’ rib’ naq te’xtz’iib’a chixjunil li yookeb’ chixb’aanunkil re naq kawaq lix tib’eleb’. K’eheb’ li saaj sa’ kok’ ch’uut, ut patz’ reheb’ naq te’ril wiib’ oxib’ li raqal re li loq’laj hu sa’ li xb’een raqal re “Xkomon chik li tenq’,” re naq te’xtaw li na’leb’ chirix lix kawilal li tib’elej. Patz’ reheb’ naq te’xwotz li xe’xtzol ut naq te’xtz’iib’a chiru li pizarron. Chan ru taqasumeheb’ li patz’om a’in: K’a’ut naq li Dios naxk’e qe li chaq’rab’ chirix lix kawilal li qatib’el? K’a’ut naq naqapaab’?

• Maare napatz’man reheb’ li saaj k’a’ut naq ink’a’ neke’ruk’ li ha’ nakaltesin, ink’a’ neke’mayib’k, ut ink’a’ neke’roksi li droga. K’a’ru neke’xye re xsumenkil li patz’om a’an? Naru te’ril “Li kawilal sa’ tib’elej ut sa’ musiq’ej” sa’ Choq’ re Xkawilaleb’ li Saaj (25–27) re te’xtaw li na’leb’ li naru te’xye re xsumenkil li patz’om a’an. Chan ru naqeek’a qib’ rik’in li Dios naq yooko chiroksinkil li qatib’el chi us malaj chi ink’a’ us? Chan ru ak xe’xk’ul li saaj lix nawom xch’ooleb’ naq xpaab’ankil li Aatin re Chaab’il Na’leb’ narosob’tesi lix yu’ameb’?

• Rab’inkileb’ resil li osob’tesink li neke’chal rik’in xpaab’ankil li Aatin re Chaab’il Na’leb’ naru tixtenq’aheb’ li saaj chixyu’aminkil. Naru taaye k’a’ru li osob’tesink xak’ul laa’at, malaj li xye resil li Awa’b’ej Thomas S. Monson sa’ li raatin “Li na’leb’ ch’olob’anb’il ut li osob’tesink yeechi’inb’il” (Jolomil ch’utub’aj-ib’ re octubre 2016). Naru ajwi’ taak’ut li video “¡Vete de la fiesta!” (ChurchofJesusChrist.org). Naru taapatz’ reheb’ li saaj naq te’xye k’a’ru ak xe’xk’ul sa’ xyu’am.

• Re aatinak chirix xkuyb’al li aaleek re xq’etb’al li Aaatin re Chaab’il Na’leb’, naru taak’ut chiruheb’ li saaj jun li chapleb’ kar (malaj xjalam-uuch). Chan ru naq li chapleb’ naxb’alaq’i li kar? Naru xtawb’al xsumenkil li patz’om a’an sa’ li video “Tat-ach’ab’aaq” (ChurchofJesusChrist.org; chi’ilmanq ajwi’ M. Russell Ballard, “¡Oh ese sutil plan del maligno!,” Liahona, noviembre 2010, 108–110). Chan ru naq li chapleb’ kar chanchan li naxb’aanu laj Satanas re qab’alaq’inkil? K’a’ru naxye li Awa’b’ej Ballard reheb’ li wankeb’ xcha’a’jkilal rik’in li adiccion? Chan ru taqatenq’a jun li kristiaan chixsik’b’al li Kolonel naq ch’a’ajkilanb’il xb’aan aaleek? (che’ilmanq li raqal re loq’laj hu sa’ li xkab’ raqal re “Xkomon chik li tenq’ ”).

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Daniel 1:3–20; 1 Korintios 6:19–20; Tzol’leb’ ut Sumwank 88:124; 89:5–21 (Rilb’al chi us li qatib’el aajel ru sa’ rilob’aal li Qaawa’)

• Mosiah 7:33; Alma 13:27–29; Eter 12:27 (Li yo’onink choq’ reheb’ li wankeb’ xch’a’ajkilal rik’in li addiccion)

Li k’utuk jo’ li Kolonel

Yalaq ta b’ar wan wi’, li Kolonel kixk’ut chiqu chan ru tento toowanq. Naq nakakawresi li tzolok, k’oxla chan ru naq ki’aatinak li Qaawa’ rik’ineb’ li ras riitz’in, ut chan ru naq laa’at naru tat-aatinaq re xwaklesinkil xch’ooleb’ li saaj.