22 nō ’Ātete

Nō te aha te Fatu e hina’aro ai ’ia maita’i tō’u ea ?

Te Parau Ha’api’ira’a ʼe te mau Parau Fafau 89–92

Tāu’aparau ʼāmui

Arata’ihia e te hō’ē melo o te peresidenira’a pupu autahu’ara’a ’aore rā piha ; fātata e 10–20 minuti

I te ’ōmuara’a o te rurura’a, e tai’o ’āmui i Te Parau tumu a te pupu Autahu’ara’a a Aarona ’aore rā, Te Parau tumu a te Feiā ’Āpī Tamāhine. I muri iho, e fa’atere i te hō’ē ’āparaura’a nō ni’a i te mau mea mai teie i muri nei, ’e e fa’anaho i te mau rāve’a nō te ’ohipa i te mau mea tā ’outou i ’āparau (e nehenehe ’outou e fa’aoti i roto i te hō’ē ’āpo’ora’a peresidenira’a e aha te mau tumu parau e ’āparau):

• Tā tātou pupu ’aore rā piha. ’O vai te ta’ata ’āpī i roto i tā tātou pāroita, ’e nāhea tātou i te tauturu ia rātou ’ia ’ite rātou ē, tē fāri’i-pōpou-hia nei rātou ? E aha tā tātou e rave ra nō te ha’afaufa’a i tō tātou taime i roto i te mau rurura’a pupu autahu’ara’a ’aore rā mau rurura’a piha tamāhine ?

• Tā tātou mau ’ohipa ’aore rā mau hōpoi’a. E aha te tahi o tā tātou mau ’ohipa ’e te mau hōpoi’a tā tātou e vai ra ’ei feiā ’āpī tamāroa ’e ’ei feiā ’āpī tamāhine ? Nāhea tātou e nehenehe ai e fa’aoti maita’i a’e i te reira ?

• Tō tātou orara’a. E aha tā tātou e rave ra nō te riro rahi atu ā mai ia Iesu Mesia te huru, ’e ’ia fāri’i i tōna mana i roto i tō tātou orara’a ? E aha tā tātou e rave nō te tauturu i tō tātou ’utuāfare ’ia haere mai iāna ra ?

I te hope’a o te ha’api’ira’a, mai te mea e tano, e rave i te mau mea i muri nei :

• ’A fa’a’ite pāpū nō ni’a i te mau parau tumu i ha’api’ihia.

• ’A fa’aha’amana’o i te mau melo o te pupu ’aore rā o te piha nō ni’a i te mau fa’anahora’a ’e te mau ani-manihini-ra’a i ravehia i roto i te rurura’a.

Ha’api’i i te ha’api’ira’a tumu

Arata’ihia e te hō’ē feiā fa’atere pa’āri ’aore rā feiā ’āpī ; fātata e 25–35 minuti

Fa’aineine ia ’outou iho i te pae vārua

E mea ’ōhie nō te tahi mau ta’ata ’ia feruri i te Parau Pa’ari, e ’itehia i roto i Te Parau Ha’api’ira’a ’e te mau Parau Fafau 89, mai te hō’ē tāpura nō te mau ’ohipa e rave ’e te mau ’ohipa ’eiaha e rave. Tē vai ra i roto i te Parau Pa’ari te tahi o te reira, tē vai ato’a ra rā i roto te mau parau tumu nō te tāpe’a i tō tātou tino ’ia vai maita’i noa. Tē ha’api’i ato’a nei te reira ē, i te huru i tā tātou ravera’a i tō tātou tino e fa’auru i tō tātou ferurira’a, te mana’o o te ’ā’au, ’e te ea pae vārua. E aha te mau ha’amaita’ira’a tā ’outou i fāri’i ’a rohi ai ’outou ’ia ora i te hō’ē orara’a ea maita’i ?

’Ua tuatāpapa paha te mau melo o te pupu ’aore rā, o te piha i te Parau Pa’ari ’a tai’o ai rātou i Te Parau Ha’api’ira’a ’e te mau Parau Fafau 89-92. i teie hepetoma. Nāhea ’outou i te tauturu ia rātou ’ia hāro’aro’a i te mau ha’amaita’ira’a pae tino ’e pae vārua ’o tē tae mai nā roto i te ha’apa’ora’a i teie heheura’a ? E nehenehe ’outou e ’ite mai i te mau mana’o maita’i nā roto i te hi’o-fa’ahou-ra’a i te parau pāpa’i o te mau parau tumu o te ’evanelia « Te Parau Pa’ari » (topics. ChurchofJesusChrist.org) ’aore rā, « Te ea i te pae tino ’e i te pae o te ferurira’a » i roto i te Nō te Pūai o te Feiā ’Āpī ([2011], 25–27).

Nā te ’atu’atura’a i tō tātou tino e fa’auru i tō tātou ferurira’a, te mana’o o te ’ā’au ’e te ea pae vārua.

Ha’api’i-’āmui-ra’a mai

Nō te ha’amata i te hō’ē ’āparaura’a nō ni’a i te Parau Pa’ari, e pāpa’i i teie mau ta’o i ni’a i te tāpura ’ere’ere: pae tino, pae ferurira’a, pae vārua, ’e te pae sōtiare. ’A ani i te mau melo o te pupu ’aore rā, o te piha ’ia tai’o i Te Parau Ha’api’ira’a ’e te mau Parau Fafau 89:18–21 ’e e ’āparau e nāhea te mau fafaura’a i roto i te mau ’īrava e tano ai i ni’a i teie mau tuha’a. E aha te mau ha’amaita’ira’a e nehenehe e tae mai nā roto i te ha’apa’ora’a i te Parau Pa’ari ? Nāhea tātou i te ’itera’a i teie mau ha’amaita’ira’a i roto i tō tātou orara’a ?

• E rave rahi te mau mea tā te mau melo o tā ’outou pupu ’aore rā, o te piha, e ha’api’i rahi mai nā roto mai i te tahi ’e te tahi, nā roto i te hāmanira’a i te hō’ē tāpura ’āmui o te mau mea tā rātou e rave nei nō te fāri’i i te ea maita’i. E vāhi i te mau melo o te pupu ’aore rā, o te piha, i roto e rave rahi pupu, ’e e ani i te pupu tāta’itahi ’ia ’imi mai i te hō’ē, ’aore rā, hau atu mau tuha’a pāpa’ira’a mo’a i roto i te vāhi mātāmua o te « Mau rāve’a tauturu pāturu » ma te ’imi mai i te mau parau mau nō ni’a i te ea o te tino. E ani i te pupu tāta’itahi ’ia fa’a’ite mai i te mau mea tā rātou i ’apo mai ’e ’ia tāpura mai i tō rātou mau mana’o i ni’a i te tāpura ’ere’ere. Nāhea tātou ’ia pāhono i te mau uira’a mai teie i muri nei : Nō te aha te Atua i hōro’a mai ai ia tātou i te mau ture nō te ea maita’i i te pae tino ? Nō te aha tātou e ha’apa’o ai i te reira ?

• E nehenehe te mau melo o tā ’outou pupu ’aore rā, o te piha, e uihia i te mau uira’a nō ni’a i te tumu ’aita rātou e inu i te ’ava, e puhipuhi i te ’ava’ava, ’aore rā, e rave i te rā’au ta’ero. Nāhea rātou i te pāhono i teie mau uira’a ? E nehenehe rātou e ’imi « Te ea pae tino ’e pae vārua » i roto i te Nō te Pūai o te Feiā ’Āpī (mau ’api 25–27) ’e e ’ite mai i te a’o ’e i te mau ha’amaita’ira’a i fafauhia ’o tā rātou e nehenehe e fa’a’ite mai ia vetahi ’ē. Nāhea tā tātou huru ravera’a i tō tātou tino i te fa’atupu i roto i tō tātou aura’a ’e te Atua ? Nāhea te mau melo o te pupu ’aore rā, o te piha, te noa’ara’a tō rātou ’itera’a pāpū ē e ha’amaita’i te ha’apa’ora’a i te Parau Pa’ari i tō rātou orara’a ?

• E nehenehe te mau ’itera’a e fa’a’ite nei i te mau ha’amaita’ira’a nō te ha’apa’ora’a i te Parau Pa’ari, e fa’aitoito i te mau melo o te pupu ’aore rā, o te piha, ’ia fafau atu ā e ora i teie ture. E nehenehe ’outou e fa’a’ite mai i te hō’ē ’itera’a nō roto mai i tō ’outou orara’a ’aore rā, i te ’itera’a tā te peresideni Thomas S. Monson i fa’a’ite mai i roto i tāna parau poro’i « Te parau tumu ’e te mau fafaura’a » (Liahona, Novema 2016, 78–79). Tē vai ra i roto i te video « Fa’aru’e i te ’areareara’a » (ChurchofJesusChrist.org) te tahi atu hi’ora’a. E nehenehe ’outou e fa’aitoito i te mau melo o te pupu ’aore rā, o te piha, ’ia fa’a’ite mai i tō rātou mau ’itera’a.

• Nō te ha’amata i te hō’ē ’āparaura’a nō ni’a e nāhea e pāto’i i te mau fa’ahemara’a nō te ’ōfati i te Parau Pa’ari, e nehenehe ’outou e fa’a’ite i tā ’outou pupu ’aore rā, piha, i te hō’ē ’āinu tāi’a (’aore rā, hō’ē hōho’a o te reira). Nāhea te mau ’āinu tāi’a i te ha’avare i te i’a ? E ’itehia te mau pāhonora’a i teie uira’a i roto i te video « ’E fa’aorahia ’outou » ChurchofJesusChrist.org ; hi’o ato’a M. Russell Ballard, « ’Auē te rāve’a ha’avare a te diabolo », Liahona, Novema 2010, 108–10). Nāhea te mau ’āinu tāi’a e tū’ati ai i te mea tā Sātane e rave nei nō te ha’avare ’aore rā, nō te fa’ahema ia tātou ? E aha te poro’i a te peresideni Ballard nō rātou tei topa i roto i te hia’ai māha ’ore ? Nāhea tātou i te tauturu i te hō’ē ta’ata e ’aro nei i te fa’ahemara’a ’ia fāriu atu i ni’a i te Fa’aora ? (hi’o te mau pāpa’ira’a mo’a i roto i te piti o te vāhi i raro a’e i te « Mau rāve’a tauturu pāturu »).

’A rave ma te fa’aro’o

’A fa’aitoito i te mau melo o te pupu ’aore rā, o te piha, ’ia feruri ’e ’ia pāpa’i i te mea tā rātou e rave nō te ’ohipa i te mau mana’o tei fāri’ihia e rātou i teie mahana. Nāhea te ha’api’ira’a i teie mahana e tu’ati ai i tā rātou iho mau fā tā rātou i ha’amau ? Mai te mea e hina’aro rātou, e nehenehe te mau melo o te pupu ’aore rā o te piha e hōro’a mai i tō rātou mau mana’o.

Mau rāve’a tauturu pāturu

• Daniela 1:3–20 ; 1 Korinetia 6:19–20 ; Te Parau Ha’api’ira’a ’e te mau Parau Fafau 88:124 ; 89:5–21(E mea faufa’a nā te Fatu te huru nō tā tātou ’atu’atura’a i tō tātou tino)

• Mosia 7:33 ; Alama 13:27–29 ; Etera 12:27, (Te ti’aturira’a nō te feiā e ’aro nei i te hia’ai fa’atītī)

• Te mau parau pāpa’i nō te ’āva’e ’Ātete 2019 o te New Era ’e te Ensign (ve’a ta’a ’ē nō ni’a i te tino)

Ha’api’ira’a mai tā te Fa’aora

I te mau vāhi ato’a, ’ua riro te Fa’aora ’ei hi’ora’a ʼe ’ei arataʼi nō tātou. ’A fa’aineine ai ’outou nō te ha’api’i, ’a feruri e mea nāhea tō te Fatu paraparaura’a ia vetahi ’ē, ’e e nāhea e nehenehe ai ia ’outou ’ia paraparau nō te fa’ateitei ’e nō te fa’aitoito i te feiā tā ’outou e ha’api’i ra.