kau finemui ʻoku nau lue lalo ʻi ha vaoʻakau

22 ʻAokosi

Ko e Hā ʻOku Finangalo ai e ʻEikí Ke u Moʻui Leleí?

Tokāteline mo e Ngaahi Fuakava 89–92

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko hai ʻoku foʻou ki hotau uōtí, pea ko e hā ha founga te tau lava ai ʻo tokoniʻi kinautolu ke nau ongoʻi ʻoku talitali lelei kinautolú? Ko e hā ʻoku tau fai ke ʻuhingamālie ai hotau taimi ʻi he ngaahi fakataha fakakōlomú pe fakakalasí?

• Ko hotau ngaahi ngafá pe fatongiá. Ko e hā ha ngaahi ngafa mo ha ngaahi fatongia ʻe niʻihi ʻoku tau maʻu ko ha kau talavou mo ha kau finemui? ʻE founga fēfē haʻatau fakahoko lelei ange kinautolu?

• Ko ʻetau moʻuí. Ko e hā ʻoku tau fai ke tau hoko ʻo hangē ange ko Sīsū Kalaisí mo maʻu Hono mālohí ʻi heʻetau moʻuí? Ko e hā ʻoku tau fai ke tokoni ki hotau ngaahi fāmilí ke nau haʻu kiate Iá?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻOku faingofua ki ha kakai ʻe niʻihi ke nau fakakaukau ki he Lea ʻo e Potó, ʻa ia ʻoku maʻu ʻi he Tokāteline mo e Ngaahi Fuakava 89, ko ha lisi ʻo ha ngaahi meʻa ke fai mo ʻoua ʻe fakahoko. ʻOku maʻu ʻe he Lea ʻo e Potó ha niʻihi ʻo e ngaahi meʻa ko iá, ka ʻoku ʻi ai foki mo ha ngaahi tefitoʻi moʻoni ki hono tauhi hotau sinó ke moʻui leleí. ʻOkú ne akoʻi foki ʻoku takiekina ʻe he founga ʻetau tauhi hotau sinó ʻetau moʻui lelei fakaeʻatamai, fakaeloto, mo fakalaumālié. Ko e hā ha ngaahi tāpuaki kuó ke maʻu ʻi hoʻo faifeinga ke maʻu ha moʻui leleí?

Mahalo kuo ako ʻe he kau mēmipa ho kōlomú pe kalasí e Lea ʻo e Potó ʻi heʻenau lau e Tokāteline mo e Ngaahi Fuakava 89–92 he uike ní. Te ke lava fēfē ʻo tokoniʻi kinautolu ke mahino e ngaahi tāpuaki fakatuʻasino mo fakalaumālie ʻoku maʻu mei he talangofua ki he fakahā ko ʻení? Te ke lava ʻo maʻu ha ngaahi fakakaukau ʻaonga ʻaki hono toe vakaiʻi e fakamatala ʻi he Ngaahi Tefito ʻo e Ongoongoleleí ʻa ia ko e “Lea ʻo e Potó” (topics.ChurchofJesusChrist.org) pe “Moʻui Lelei Fakaesino mo Fakaelotó” ʻi he Ki Hono Fakamālohia ʻo e Toʻu Tupú ([2011], 25–27).

kau talavou ʻoku nau lue lalo ʻi he vaoʻakaú

ʻOku takiekina ʻe heʻetau tokangaʻi hotau ngaahi sino fakamatelié ʻa ʻetau moʻui lelei fakaeʻatamaí, fakaelotó mo e fakalaumālié.

Ako Fakataha

Ke kamataʻi ha fealeaʻaki fekauʻaki mo e Lea ʻo e Potó, hiki e ngaahi foʻi lea ko ʻení ʻi he palakipoé: Fakatuʻasino, Fakaʻatamai, Fakalaumālie mo e Fakasōsiale. Fakaafeʻi e kau mēmipa ʻo e kōlomú pe kalasí ke nau lau e Tokāteline mo e Ngaahi Fuakava 89:18–21 pea aleaʻi e founga ʻoku ʻaonga ai e ngaahi talaʻofa ʻi he ngaahi veesi ko ʻení ki he ngaahi tafaʻakí ni. Ko e hā ha ngaahi tāpuaki ʻe lava ke maʻu mei he talangofua ki he Lea ʻo e Potó? Ko e hā ha founga kuo tau aʻusia ai e ngaahi tāpuakí ni ʻi heʻetau moʻuí?

• ʻE lava ke feakoʻaki lahi e kau mēmipa ʻo hoʻo kōlomú pe kalasí ʻaki hano hiki ha lisi fakatahataha ʻo e ngaahi meʻa ʻoku nau fakahoko ke nau moʻui lelei aí. Vahevahe e kau mēmipa ʻo e kōlomú pe kalasí ki ha ngaahi kulupu, pea vahe ki he kulupu takitaha ke nau fekumi ʻi ha potufolofola ʻe taha pe lahi ange ʻi he ʻuluaki foʻi poini ʻi lalo ʻi he “Ngaahi Maʻuʻanga Tokoni Poupoú,” ʻo kumi ha ngaahi moʻoni fekauʻaki mo e moʻui lelei fakatuʻasinó. Kole ki he kulupu takitaha ke vahevahe e meʻa ne nau akó pea lisi ʻenau ngaahi fakakaukaú ʻi he palakipoé. Te tau tali fēfē e ngaahi fehuʻi hangē ko ʻení: Ko e hā ʻoku ʻomi ai ʻe he ʻOtuá ha ngaahi lao fekauʻaki mo e moʻui lelei fakatuʻasinó? Ko e hā ʻoku tau talangofua ai kiate kinautolú?

• ʻE lava ke ʻeke ha ngaahi fehuʻi ki he kau mēmipa hoʻo kōlomú pe kalasí fekauʻaki mo e ʻuhinga ʻoku ʻikai ke nau inu kava mālohi, ifi tapaka pe ngāue ʻaki ai e faitoʻo konatapú. ʻOku nau tali fēfē e ngaahi fehuʻi ko ʻení? ʻE lava ke nau fekumi ʻi he “Moʻui Lelei Fakaesino mo Fakaelotó” ʻi he Ki Hono Fakamālohia ʻo e Toʻu Tupú (peesi 25–27) ʻo kumi ha faleʻi pe ngaahi tāpuaki kuo talaʻofa mai te nau lava ʻo vahevahe mo e niʻihi kehé. ʻOku uesia fēfē ʻe he founga ʻo ʻetau tauhi hotau sinó ʻa hotau vā fetuʻutaki mo e ʻOtuá? Ko e hā ha founga kuo maʻu ai ʻe he kau mēmipa ʻo e kōlomú pe kalasí ha ngaahi fakamoʻoni ʻoku tāpuekina ʻe he talangofua ki he Lea ʻo e Potó ʻenau ngaahi moʻuí?

• ʻE lava ke ueʻi ʻe he ngaahi aʻusia ʻoku nau fakahaaʻi e ngaahi tāpuaki ʻo e talangofua ki he Lea ʻo e Potó, ʻa e kau mēmipa ʻo e kōlomú pe kalasí ke nau tukupā ki hono moʻui ʻaki e fono ko ʻení. Te ke lava ʻo vahevahe ha aʻusia mei hoʻo moʻuí pe aʻusia ne vahevahe ʻe Palesiteni Tōmasi S. Monisoni ʻi heʻene pōpoaki “Ngaahi Tefitoʻi Moʻoní mo e Ngaahi Talaʻofá” (Liahona, Nōvema 2016, 78–79).    Te ke lava ʻo poupouʻi e kau mēmipa ʻo e kōlomú pe kalasí ke vahevahe ʻenau ngaahi ʻausiá.

• Ke kamataʻi ha fealeaʻaki fekauʻaki mo e founga ke fakafepakiʻi ʻaki e ngaahi ʻahiʻahi ke maumauʻi e Lea ʻo e Potó, te ke lava ʻo fakaʻaliʻali ki hoʻo kōlomú pe kalasí ha mounu taumātaʻu (pe ha fakatātā pehē). ʻOku kākaaʻi fēfē ʻe he mounu taumātaʻú e iká? ʻE lava ke maʻu e ngaahi tali ki he fehuʻí ni ʻi he pōpoaki ʻa M. Lāsolo Pālati, “ ʻOiauē ʻa e Palani Olopoto ʻa e Tokotaha Angakoví,” Liahona, Nōvema 2010, 108–10). ʻOku tatau fēfē e mounu taumātaʻú mo e meʻa ʻoku fai ʻe Sētane ke kākaaʻi pe lohiakiʻi ʻaki kitautolú? Ko e hā e pōpoaki ʻoku ʻomi ʻe Palesiteni Pālati kiate kinautolu ʻoku maʻunimaá? Te tau lava fēfē ʻo tokoni ki ha taha ʻoku fefaʻuhi mo e ʻahiʻahí, ke ne tafoki ki he Fakamoʻuí? (vakai ki he ngaahi potufolofola ʻi he poini fika ua ʻi lalo ʻi he “Ngaahi Maʻuʻanga Tokoni Poupoú”).

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Taniela 1:3–20; 1 Kolinitō 6:19–20; Tokāteline mo e Ngaahi Fuakava 88:124; 89:5–21 (ʻOku mahuʻinga ki he ʻEikí e founga ʻoku tau tokangaʻi ai hotau sinó)

• Mōsaia 7:33; ʻAlamā 13:27–29; ʻEta 12:27 (ʻAmanaki lelei kiate kinautolu ʻoku fefaʻuhi mo e maʻunimaá)

• Makasini Liahona ʻo ʻAokosi 2019 (makasini makehe fekauʻaki mo e sinó)

Ko e Faiako ‘i he Founga ‘a e Fakamoʻuí

Naʻe hoko e Fakamoʻuí ko hotau faʻifaʻitakiʻanga mo e faiako, ʻi he tūkunga kotoa pē. ʻI hoʻo teuteu ke faiakó, fakakaukau ki he founga ʻoku fetuʻutaki ai e ʻEikí mo e niʻihi kehé pea mo e founga te ke lava ai ʻo fetuʻutaki ʻi ha founga ʻoku langaki moʻui mo poupou kiate kinautolu ʻokú ke akoʻí.