fakaikiiki ʻo e tā tongitongi ʻo Pita ʻokú ne puke ha ngaahi kī

26 Sepitema

Ko e Hā ʻOku Mahuʻinga ai Ke ʻi he Māmaní e Ngaahi Kī ʻo e Lakanga Fakataulaʻeikí ʻi he ʻAho Ní?

Tokāteline mo e Ngaahi Fuakava 106–108

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko e hā te tau lava ʻo fai ke fakatupulaki ʻa e uouangatahá ʻi he kau mēmipa ʻo ʻetau kōlomú pe kalasí? Ko e hā ha ngaahi taumuʻa te tau fie ngāueʻi fakataha?

• Ko hotau ngaahi ngafá pe fatongiá. Ko e hā ha meʻa ʻoku tau fai ke vahevahe e ongoongoleleí? Ko e hā ha ngaahi meʻa kuo tau aʻusia ʻi hono fakahoko ʻo e ngāue fakatemipalé mo e hisitōlia fakafāmilí?

• Ko ʻetau moʻuí. Kuo tau mātā fēfē e toʻukupu ʻo e ʻEikí ʻi heʻetau moʻuí? Ko e hā ha meʻa kuó ne ueʻi fakalaumālie kitautolu ʻi heʻetau ako folofola he uike ní?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Naʻe akoʻi ʻe ʻEletā Keuli E. Sitīvenisoni, “ʻOku fakaava ʻe he ngaahi kī ʻo e lakanga fakataulaʻeikí e ngaahi tāpuaki, meʻafoaki mo e ngaahi mālohi ʻo e langí kiate [kitautolu]” (“ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí?” Liahona, Mē 2016, 32). ʻOku maʻu ʻe Sīsū Kalaisi e ngaahi kī kotoa pē ʻo e lakanga fakataulaʻeikí, pea naʻá Ne fakamafaiʻi ha kau talafekau fakalangi ke foaki e ngaahi kī ʻo e lakanga fakataulaʻeikí kia Siosefa Sāmita. ʻI he ʻaho ní, ʻoku maʻu ʻe he kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá e ngaahi kī tatau ko ʻení (vakai, Tokāteline mo e Ngaahi Fuakava 90:3–4, 6; 107:35; 132:7). Ko e ngaahi kī ko ʻení ko e mafai ia ʻo e ʻOtuá kuo foaki ki he kau taki lakanga fakataulaʻeikí ke tataki ʻa hono ngāue ʻaki ko ia Hono lakanga fakataulaʻeikí ʻi he māmaní.

ʻI hoʻo lau he uiké ni ʻa e Tokāteline mo e Ngaahi Fuakava 107, fakakaukau ki he founga ʻe lava ke tāpuekina ai koe ʻe he ʻOtuá mo kinautolu ʻokú ke akoʻí ʻo fakafou ʻi Hono lakanga fakataulaʻeikí. Ko e hā ʻokú ke maʻu ʻi he konga ko ʻení ʻoku mahuʻinga ki he kau mēmipa ʻo e kōlomú pe kalasí ke nau ʻiloʻi? ʻI hoʻo teuteu ke faiakó, te ke lava ʻo toe vakaiʻi e pōpoaki ʻa ʻEletā Keuli E. Sitīvenisoni ʻoku ʻasi ʻi ʻolungá mo e “Ngaahi Kī ʻo e Lakanga Fakataulaʻeikí” ʻi he Tuʻu Maʻu ʻi he Tuí ([2004], 97–98).

talavou ʻoku tufa sākalamēniti

ʻOku ʻatā ha ngaahi tāpuaki fakalaumālie lahi maʻatautolu ʻo fakafou ʻi he ngaahi kī ʻo e lakanga fakataulaʻeikí.

Ako Fakataha

ʻE lava ke tokoni e Tokāteline mo e Ngaahi Fuakava 107 ke tali e fehuʻi “Ko e hā e ngaahi tāpuaki ʻoku tau maʻu ʻo fakafou ʻi he lakanga fakataulaʻeikí mo e ngāue ʻa e kau taki lakanga fakataulaʻeikí?” Mahalo ʻe lava ke fakasio ʻe he kau mēmipa ʻo e kōlomú pe kalasí ha ngaahi tali ʻi he veesi 18–23, 85–89. Ke tokoni ke mahino lelei ange kiate kinautolu e founga ʻoku tāpuekina ai ʻe he lakanga fakataulaʻeikí mo e kau taki lakanga fakataulaʻeikí ʻetau moʻuí, fakaʻaongaʻi ha foʻi ʻekitivitī ʻe taha pe lahi ange mei heni.

• Te ke lava ʻo kamataʻi ha fealeaʻaki fekauʻaki mo e ngaahi kī ʻo e lakanga fakataulaʻeikí ʻaki hono fakaafeʻi ha mēmipa ʻo e kōlomú pe kalasí, ke teuteu ke vahevahe e talanoa ʻo e ʻaʻahi ʻa Palesiteni Sipenisā W. Kimipolo ki ha siasi ʻi Tenimaʻaké, ʻa ia ne fai ʻe Palesiteni Poiti K. Peeka ʻi heʻene pōpoaki “Ko e Toko Hongofulu Mā Uá” (Liahona, Mē 2008, 83–87; vakai foki ki he foʻi vitiō “Ngaahi Kī ʻo e Lakanga Fakataulaʻeikí: Ko Hono Toe Fakafoki Mai e Ngaahi Kī ʻo e Lakanga Fakataulaʻeikí” [ChurchofJesusChrist.org]). Te ke lava foki ʻo kole ki hoʻo kōlomú pe kalasí ke lau fakataha e konga “Ngaahi Kī ʻo e Lakanga Fakataulaʻeikí” ʻi he Tuʻu Maʻu ʻi he Tuí (peesi 97–98). ʻOange ha taimi ke nau tauhōhoa ʻo feakoʻiʻaki ai ko e hā ʻa e lakanga fakataulaʻeiki, ʻo fakatatau mo e meʻa ne nau akó. Ko e hā ha ngaahi tāpuaki kuo tau maʻu ʻo fakafou ʻi he ngāue tokoni ʻa kinautolu ʻoku nau maʻu e ngaahi kī ʻo e lakanga fakataulaʻeikí?

• ʻE lava ke ke vahevahe e talanoa ʻa ʻEletā Keuli E. Sitīvenisoni fekauʻaki mo e mole ʻene ngaahi kií mei he fuofua palakalafi ʻe ono ʻo ʻene pōpoaki “ ʻOku ʻi Fē ʻa e Ngaahi Kī mo e Mafai ʻo e Lakanga Fakataulaʻeikí ?” (pe hulu e foʻi vitiō “Where Are the Keys?” [ChurchofJesusChrist.org]). Te ke lava ʻo fakaʻaliʻali ange ha ngaahi foʻi kī peá ke fakaafeʻi hoʻo kōlomú pe kalasí ke vahevahe e founga ʻoku faitatau ai e ngaahi kī ko iá mo e ngaahi kī ʻo e lakanga fakataulaʻeikí. ʻE lava ke toe vakaiʻi mo aleaʻi ʻe kinautolu ʻokú ke akoʻí e ngaahi veesi folofola ne lave ki ai ʻa ʻEletā Sitīvenisoní (Siosefa Sāmita—Hisitōlia 1:68–72; Tokāteline mo e Ngaahi Fuakava 110:11–16), ʻa ia ʻoku nau fakamatalaʻi e ngaahi kī ʻo e lakanga fakataulaʻeikí ne foaki ki he māmaní. Te ke lava ʻo fakaafeʻi e kau mēmipa ʻo e kōlomú pe kalasí ke nau fili ha taha ʻo e ngaahi veesi folofolá ni pea vahevahe ha fakamatala nounou sētesi ʻe taha ʻo e meʻa ʻoku nau ako fekauʻaki mo e ngaahi mālohi mo e ngaahi tāpuaki ʻoku tau maʻu ʻo fakafou he ngaahi kī ʻo e lakanga fakataulaʻeikí: Mātiu 16:18–19; Tokāteline mo e Ngaahi Fuakava 27:12; 65:2; 84:19–20. Ko e hā ʻoku mahuʻinga ai ʻa e ʻi he māmaní e ngaahi kī ʻo e lakanga fakataulaʻeikí he ʻaho ní?

• Te ke lava ʻo ʻoange ki he mēmipa takitaha hoʻo kōlomú pe kalasí ha foʻi kī ngaohi mei he pepá pea vahe ki he tokotaha takitaha ke ne lau e vahe II, III, IV, pe V ʻo e pōpoaki ʻa Palesiteni Tāleni H. ʻOakesi “Ko e Ngaahi Kī mo e Mafai ʻo e Lakanga Fakataulaʻeikí” (Liahona, Mē 2014, 49–52). Fakaafeʻi kinautolu ke tohi ʻi he foʻi kií e meʻa ne nau ako fekauʻaki mo e lakanga fakataulaʻeikí pea vahevahe leva e meʻa ne nau hikí. ʻOku takiekina fēfē ʻe he ngaahi moʻoni ko ʻení e founga ʻetau ongoʻi ʻetau kau taki fakakōlomu pe fakakalasí mo e ngaahi ngāue ʻoku tau maʻu meiate kinautolú?

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Russell M. Nelson, “Ngaahi Koloa Fakalaumālie,” Liahona, Nōvema 2019, 76–79

• “Ngaahi Kī ʻo e Lakanga Fakataulaʻeikí,” ʻi he Tohi Tuʻutuʻuni Fakalūkufuá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 3.4.1

Ko e Faiako ‘i he Founga ‘a e Fakamoʻuí

Naʻe uiuiʻi mo vaheʻi ʻe he Fakamoʻuí ha kau taki ke nau tataki mo puleʻi Hono Siasí (vakai, Mātiu 10:1–5). Te ke lava fēfē ʻo tokoni kiate kinautolu ʻokú ke akoʻí ke nau ongoʻi houngaʻia he niʻihi ʻoku uiuiʻi ke ngāue mo tokoniʻi kinautolú?