kau finemui ʻoku nau malimali

10 ʻOkatopa

Te u Lava Fēfē ʻo Ului Kakato Ange ki he ʻEikí?

Tokāteline mo e Ngaahi Fuakava 111–114

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻo e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻo e Kau Finemuí. Hili iá, makehe mei he fealeaʻaki fakataha fekauʻaki mo e ngaahi fiemaʻu pau ʻa e kōlomú pe kalasí, ʻe lava ke mou aleaʻi ha ngaahi ongo fakalaumālie mo ha ngaahi kaveinga mei he konifelenisi lahí. ʻE lava ke tokoni atu e ngaahi fehuʻi ko ʻení:

• Ko e hā e ngaahi foʻi lea pe kupuʻi lea naʻe hā makehe kiate koe?

• Ko e hā ne tau ongoʻi ne ueʻi kitautolu ke tau fai koeʻuhí ko e meʻa ne tau ako pe ongoʻí?

• Ko e hā ʻoku fie maʻu ke tau fakahoko ko ha kōlomu pe kalasi ke tau ngāueʻi ai e faleʻi ne tau fanongoa ʻi he konifelenisi lahí?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

Ke tau ului kakato ange kia Sīsū Kalaisí, kuo pau ke tau falala kiate Ia mo talangofua ki Heʻene ngaahi fekaú—naʻa mo e taimi ʻoku siviʻi ai ʻe he ngaahi pole faingataʻá ʻetau uluí. ʻI he 1837, ne ʻi ai ha kau mēmipa ʻe niʻihi ʻo e Siasí, kau ai ha kau mēmipa ʻe niʻihi ʻo e Kōlomu ʻo e Kau ʻAposetolo ʻe Toko Hongofulu Ma Uá, ne mole ʻenau ngaahi fakamoʻoní pea nau fakafepakiʻi e Palōfita ko Siosefa Sāmitá. Naʻe hoko ʻa Tōmasi B. Maasi ko e Palesiteni ia ʻo e Kōlomu ʻo e Toko Hongofulu Mā Uá he taimi ko iá. ʻI hoʻo lau mo ho fāmilí e Tokāteline mo e Ngaahi Fuakava 112 he uike ní, mahalo te mou fakatokangaʻi ai e faleʻi naʻe fakahoko ʻe he ʻEikí kia Tōmasi B. Maasi ke fakamālohia ʻene uluí (vakai taha ki he veesi 10–26). Ko e hā ʻoku akoʻi atu ʻe he faleʻi ko ʻení fekauʻaki mo e ului lahi ange ki he Fakamoʻuí?

Te ke tokoni fēfē ki he kau mēmipa ʻo e kōlomú pe kalasí ke nau maʻu e talaʻofa ʻa e Fakamoʻuí ʻe “fakatafoki ʻa kinautolu, pea te u fakamoʻui ʻa kinautolu”? (Tokāteline mo e Ngaahi Fuakava 112:13). Ko e hā ha ngaahi aʻusia te ke lava ʻo vahevahe? ʻI hoʻo fakalaulauloto ki he ngaahi fehuʻi ko ʻení, fakakaukau ke toe vakaiʻi e pōpoaki ʻa Palesiteni Poni H. Kōtoni “Falala ki he ʻEikí pea ʻOua Naʻá ke Faʻaki ki ho Potó” (Liahona, Mē 2017, 6–9) mo e “Ului” ʻi he Tuʻu Maʻu ʻi he Tuí ([2004], 200-203).

talavou ʻoku lau folofola

ʻOku hoko e ngaahi folofolá ko ha poupou mālohi ʻi heʻetau faifeinga ke ului kakato angé.

Ako Fakataha

ʻOku ʻiloʻi nai ʻe he kau mēmipa ʻo e kōlomú pe kalasí e ʻuhinga ʻo e ului kia Sīsū Kalaisí? ʻOku nau ʻiloʻi e founga ke ului kakato ange aí? Fakaafeʻi kinautolu ke nau fakalaulauloto ki he ngaahi fehuʻi ko ʻení ʻi heʻenau vakai ki he Tokāteline mo e Ngaahi Fuakava 112:10–26. ʻE lava fēfē ke tau kei ului ai pē kia Sīsū Kalaisi ʻo aʻu ki he ngaahi tūkunga faingataʻá? ʻE lava ke ke fakaʻaongaʻi ha ʻekitivitī ʻe taha pe lahi ange ke tokoni ki hoʻo kōlomú pe kalasí ke fakamālohia ʻenau ului ki he Fakamoʻuí.

• ʻE lava ke tokoni ʻa e ʻAlamā 32:27–43 kiate kinautolu ʻokú ke akoʻí, ke mahino e founga ke fakamālohia ai ʻenau tuí pea hoko ʻo ului kakato ange ki he ongoongolelei ʻo Sīsū Kalaisí. ʻE lava ke ke vahevahe e kau mēmipa hoʻo kōlomú pe kalasí ki ha ngaahi kulupu ke nau lau e ngaahi veesi ko ʻení mo aleaʻi e meʻa ʻoku nau akoʻi fekauʻaki mo e tuí mo e uluí. Kole ki he kulupu takitaha ke vahevahe e meʻa ne nau akó. Te ke lava ʻo poupouʻi ha fealeaʻaki ʻaki hano ʻeke ange ha ngaahi fehuʻi pehé ni: Ko e hā ʻoku hoko ai ha tengaʻi ʻakau ʻoku tupu ʻo hoko ko ha fuʻu ʻakau lahi, ko ha fakamatala lelei ʻo e uluí? ʻOku ʻuhinga ki he hā ke “ʻahiʻahiʻi e ngaahi lea [ʻa e ʻOtuá]”? (veesi 27). ʻOku ʻuhinga ki he hā ke “tauhi ʻa e fuʻu ʻakaú”? (veesi 41). Te tau lava fēfē ʻo ʻiloʻi ko e tenga ʻo e uluí ʻoku “pupula … , ʻo huli hake, ʻo ne kamata ke tupu” ʻiate kitautolu? (veesi 30). ʻOange ki he kau mēmipa ʻo e kōlomú pe kalasí ha taimi ke nau fakalaulauloto ki he meʻa ʻoku nau fie maʻu ke fai ke fakatupulaki ʻenau ului kia Sīsū Kalaisí.

• ʻOku lahi ha ngaahi mālohi ʻi he māmaní ʻokú ne fakafepakiʻi ʻetau ului kia Sīsū Kalaisí. ʻE lava ʻe hono lau ʻo e Hilamani 5:12, ʻo akoʻi ki he kau mēmipa ʻo e kōlomú pe kalasí e founga ke kei mālohi ai pē neongo e fakafepakí. Ko e ʻuhinga ki he hā ʻa e “langa [ho] makatuʻungá” ʻi he maka ʻo Sīsū Kalaisí? Te ke lava ʻo vahe ki he tokotaha takitaha ha konga ʻo e pōpoaki ʻa ʻEletā Kuenitini L. Kuki ko e “Ngaahi Fakavaʻe ʻo e Tuí” (Liahona, Mē 2017, 127–31) pea kole ange ke nau kumi ha ngaahi sīpinga mo ha faleʻi ʻe tokoni ke langa ai honau fakavaʻé ʻi he Fakamoʻuí.

• Te ke lava ʻo fakakaukau ki ha founga lelei ke fakatātaaʻi ai e tefitoʻi moʻoni naʻe akoʻi ʻe Palesiteni Poni H. Kōtoni ʻi heʻene pōpoaki “Falala ki he ʻEikí pea ʻOua Naʻá ke Faʻaki ki Ho Potó”? Hangē ko ʻení, te ke lava ʻo vahevahe e kau mēmipa hoʻo kōlomú pe kalasí ki ha ngaahi kulupu iiki pea poleʻi e kulupu takitaha ke nau langa e fungavaka māʻolunga tahá ʻi ha feituʻu ʻoku fakahihifi ʻo ngāue ʻaki ha ngaahi konga papa pe ngaahi meʻa kehe. Aleaʻi leva e founga ʻoku felāveʻi ai ʻeni mo e pōpoaki ʻa Palesiteni Kōtoní. ʻE lava leva ke fekumi e kōlomú pe kalasí ʻi he pōpoakí ki ha ngaahi fokotuʻu fekauʻaki mo e founga ke fakatefito maʻu ai pē ʻetau moʻuí ʻia Sīsū Kalaisí. Ko e hā ha ngaahi aʻusia te tau lava ʻo vahevahe kau ki ha taimi ne tau falala ai pē ki heʻetau mahinó pe ko haʻatau falala ki he Fakamoʻuí?

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• ʻAlamā 5 (Ko e akonaki ʻa ʻAlamā fekauʻaki mo e uluí)

• David A. Bednar, “Ului ki he ʻEikí,” Liahona, Nōvema 2012, 106–9

• Richard J. Maynes, “Ko e Fiefia ʻo e Moʻui ʻOku Fakatefito ʻia Kalaisí,” Liahona, Nōvema 2015, 27–30

• Becky Craven, “Tokangá mo e Fakavaʻivaʻingá,” Liahona, Mē 2019, 9–11

Ko e Faiako ‘i he Founga ‘a e Fakamoʻuí

Naʻe folofola ʻa e Fakamoʻuí, “Ko ʻeku akonakí [tokāteliné] ʻoku ʻikai ʻaʻaku, ka ʻoku ʻaʻana naʻá ne fekau aú” (Sione 7:16). Naʻá ne akoʻi e tokāteline naʻá Ne ako mei Heʻene Tamaí. Te ke lava fēfē ʻo fakapapauʻi ʻokú ke akoʻi ʻa e tokāteline moʻoní? (Vakai, Faiako ʻi he Founga ʻa e Fakamoʻuí [2016], 20–21.)