10 ni Okotova

Au na Saumaki Vakaoti Vakacava Sara kivua na Turaga?

Vunau kei na Veiyalayalati 111–114

Veivakasalataki Vata

Liutaki mai na dua na lewe ni mataveiliutaki ni kuoramu se kalasi; rauta ni 10–20 na miniti

Ena itekivu ni soqoni, cavuta vata na iToko ni Kuoramu ni Matabete i Eroni se na iToko ni Goneyalewa. Qai, ikuri ni veivakasalataki ena gagadre vakatabakidua ni kuoramu se kalasi, o na rairai via veivosakitaka na vosa kei na itoko eso mai na koniferedi raraba. Ena rawa ni veivuke na taro eso oqo.

• Na itoko se itukutuku cava soti e vakaibalebale vei keda?

• Na cava eda sa vakauqeti ni cakava baleta na ka eda a vulica se vakila?

• Na cava sa gadrevi meda cakava va kuoramu se kalasi me vakayacori kina na ivakasala eda sa rogoca ena koniferedi raraba?

Ena itini ni lesoni, ke veiganiti, cakava na ka oqo:

• Vakadinadinataka na ivakavuvuli eso sa vakatavulici.

• Vakananumi ira na lewe ni kuoramu se kalasi ena ituvatuva kei na veisureti a caka ena gauna ni bose.

Vakavulica na iVunau

Liutaki mai na dua na iliuliu itabaqase se itabagone; rauta ni 25-35 na miniti

Vakarautaki Iko Vakayalo

Me yaco na saumaki vakataucoko sara vei Jisu Karisito, sa dodonu meda vakararavi Vua ka muria na Nona ivunau—ke vakatovolea mada ga na noda saumaki na bolebole drakidrakita eso. Ena 1837, a vakayalia eso na lewe ni Lotu, oka kina eso na lewe ni Kuoramu ni iApositolo Le Tinikarua na nodra ivakadinadina ka vorata na Parofita o Josefa Simici. A Peresitedi tiko ni Kuoramu ni iApositolo Le Tinikarua o Thomas B. Marsh ena gauna oya. Ni o wilika kei na nomu matavuvale na Vunau kei na Veiyalayalati 112 ena macawa oqo, o na rairai siqema na ivakasala a solia na Turaga me vukei Thomas B. Marsh ni vaqaqacotaka na nona saumaki (raica vakabibi na tikina e 10–26). Na cava e vakavulica vei iko na ivakasala oqo me baleta na saumaki vakalevu tu kivua na iVakabula?

O na vukei ira vakacava na lewe ni kuoramu se kalasi ni ciqoma na yalayala ni iVakabula ni “ra na saumaki mai, ka‘u na vakabulai ira”? (Vunau kei na Veiyalayalati 112:13). Na cava so esa sotavi o rawa ni wasea? Ni ko vakasamataka vagumatua na veitaro oqo, navuca mo railesuva na itukutuku i Peresitedi Bonnie H. Cordon “Vakararavi vua na Turaga ka Kakua ni Vakararavi” (Liaona, Me 2017, 6–9) kei na “Saumaki Mai” ena Tudei ena Vakabauta ([2004], 40–43).

Sa vu ni kaukauwa levu na ivolanikalou ni da saga meda saumaki vakataucoko sara.

Vulica Vata

Era sa kila tiko li na lewe ni nomu kuoramu se kalasi na cava e vakaibalebaletaki ena saumaki tu kivei Jisu Karisito? Era sa kila tu li na sala mera na saumaki vakataucoko sara kina? Sureta mera vakasamataka vagumatua na veitaro oqo ni ra railesuva na Vunau kei na Veiyalayalati 112:10–26. Eda na saumaki tu ga vakacava vei Jisu Karisito ena ituvaki veibolei eso sara mada ga? O rawa ni vakayagataka e dua se sivia na itaviqaravi oqo me vukea na nomu kuoramu se kalasi ni vaqaqacotaka na nodra saumaki kivua na iVakabula.

• Alama 32:27–43 e rawa ni vukei ira o vakavulica ni kila vakamatata na sala me ra vaqaqacotaka kina na nodra vakabauta ka yaco me ra saumaki vakataucoko sara ki na kosipeli i Jisu Karisito. De dua o rawa ni wasei ira vakailawalawa na lewe ni kuoramu se kalasi ka kerea na ilawalawa yadua me wilika na veitikina oqo ka veivosakitaka na ka era vakavulica me baleta na vakabauta kei na saumaki. Kerea na ilawalawa yadua me wasea na ka era sa vulica. O na rairai vakauqeta na veivosaki ena tarogi ni taro eso vakaoqo: Cava na vuna e ivakamacala vinaka kina ni saumaki e dua na sorenikau ka tubu cake tu ki na vunikau? Na cava na kena ibalebale mo “vakatovotovotaka na vosa ni [Kalou]”? (tikina e 27). Na cava na kena ibalebale mo “vakabulabulataka na vunikau”? (tikina e 41). Eda na kila vakacava ni sa “buroro, ka kadre, ka tekivu me tubu” e vu ni lomada na sorenikau ni saumaki? (tikina e 30). Solia na gauna vei ira na lewe ni kuoramu se kalasi mera vakasamataka vakatitobu na ka e dodonu mera kitaka me vakabulabulataki kina na nodra saumaki mai kivei Jisu Karisito.

• Sa vuqa na ivalavala kaukauwa e vuravura e saqata tu na noda saumaki kivei Jisu Karisito. Na wiliki ni Ilamani 5:12 e rawa me vakavulica na lewe ni kuoramu se kalasi ena sala mera tudei tiko kina veitalia na veisaqasaqa. Na cava na ibalebale ni “tara na nomu yavu” ena uluvatu i Jisu Karisito? Sa rawa ni o lesia ki na tamata yadua e dua na wase ni tukutuku i Elder Quentin L. Cook “Yavu ni Vakabauta” (Liaona, Me 2017, 127–31) ka kerea me ra vakaraica na ivakaraitaki kei na ivakasala eso e vukea na kena tarai cake na nodra yavu ena iVakabula.

• O rawa li ni vakasamataka e dua na sala matau me vakatakilai kina na ivakavuvuli a vakatavulica o Peresitedi Bonnie H. Cordon ena nona itukutuku “Vakararavi vua na Turaga ka Kakua ni Vakararavi”? Me vakataka, rawa ni o wasea vakailawalawa na nomu kuoramu se kalasi ka bolea na lawalawa yadua me tara na vale balavu duadua ena dua na deladela vakatatiki ena vakayagataki ni buloko se na veika tale eso. Qai veitalanoataka na sala e sema kina oqo ki na itukutuku nei Peresitedi Cordon. Sa rawa ni ra qai vakaraica na kuoramu se kalasi na itukutuku me baleta na vakatutu eso ena sala me yavutaki tiko kina na noda bula vei Jisu Karisito. Na cava soti eda rawa ni wasea ni da vakararavi ki na noda kilaka vakaikeda se gauna eda vakararavi kina kivua na iVakabula?

Cakacaka ena Vakabauta

Vakauqeti ira na lewe ni kuoramu se kalasi mera vakasamataka vagumatua ka vola na ka era na cakava mera vakayacora kina na veivakauqeti era ciqoma nikua. E semati vakacava na lesoni nikua ki na veilalawa era sa cakava? Kevaka era vinakata, sa rawa ni wasea na lewe ni kuoramu se kalasi na nodra vakasama.

iVurevure Veitokoni

• Alama 5 (e vakavulica tiko o Alama na saumaki mai)

• David A. Bednar, “Saumaki vua na Turaga,” Liaona, Nove. 2012, 106–9.

• Richard J. Maynes, “Na Rekitaki ni Bula sa Vakarisito,” Liaona, Nove. 2015, 27–30

• Becky Craven, “Qarauna se Vakawalena,” Liaona, Me 2019, 9–11

Veivakavulici ena iVakarau ni iVakabula

E kaya na iVakabula, “Sa sega ni noqu na noqui vakavuvuli, sa nona ga ka talai au mai” (Joni 7:16). A vakatavulica o Koya na ivunau ka vulica mai vei Tamana. Ko na vakadeitaka vakacava ni ko sa vakavulica tiko na ivakavuvuli dina? (Raica na Veivakavulici ena iVakarau ni iVakabula [2016], 20–21.)