Okitobwa 24

N na Kanga ni Karekea “Mwaakan Karawa” ni Maiu?

Reirei ao Berita aika Tabu 121–123

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te bootaki, manga atonga riki Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro iaon bwaai n aron aikai, ao bairei kawai aika kam na karaoi iaon bwaai aika kam maroroakin (kam kona ni bairei inanon ami bowi n beretientii bwaai aika a na maroroakinaki):

• Ara kooram ke ara kiraati. Antai aika a boou n ara uoote, ao ti na kanga ni kaotia nakoia bwa a butimwaeaki? Tera ae ti karaoia bwa e aonga ni manena ara tai n ara kooram ke ara kiraati?

• Ara beku ke mwiokoara. Baikara katabeara ao tibwangara ngkai ataeinimwane ao ataeinnaine ngaira? Ti na kanga ni kakoroi nanoia?

• Maiura. Tera ae ti karaoia bwa ti aonga ni katotonga riki Iesu Kristo ao ni karekea Mwakana inanon maiura? Tera ae ti karaoia ni buokiia ara utu bwa ana Nakoina?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon babaire ao kakao ake a karaoi n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Kariaia ao mwaaka n te nakoanibonga tiaki bwaai aika ti tebo. E kona te aomata ni karekea te kariaia n te nakoanibonga rinanon katokan baai—a kona mwaane ni katabuaki nakon te aobiti n te nakoanibonga, ao mwaane ao aine a kona ni kamatoaaki ibukin te wewete. Ma te mwaaka n te nakoanibonga—mwakan te Atua, ke “mwaakan karawa”—a kona ni kabonganaaki ti “iaon tuan te raoiroi” (Reirei ao Berita aika Tabu 121:36), ao a kona mwaane ao aine ni kabongana te mwaaka aei. Ngkana ti tangira ara ibuobuoki nakoia tabeman bwa e na mwaaka ao ni bita-te maiu, ti riai n tau ni wetea mwaakan karawa.

A ataa aron karekean te mwaaka n te nakoanibonga kaain am kooram ke am kiraati? Ana kanga maiuia ao aia ibuobuoki ni kaokoro ngkana iai irouia te atatai anne? Iangoi titiraki aikai ngkana ko kamatebwaia Reirei ao Berita aika Tabu 121. E na rangin n raoiroi naba kamatebwaiakan uoua rongorongo mairoun Beretitenti Russell M. Nelson. Teuana e kanakoaki nakoia ake iai irouia te nakoanibonga—“The Price of Priesthood Power” (Liahona, Meei 2016, 66–69). Are teuana e kanakoaki nakoia tititati—“Spiritual Treasures” (Liahona, Nobembwa 2019, 76–79).

E roko mwakan te nakoanibonga rinanon maiuakinan te raoiroi.

Te Uaia n Reirei

Ni moana te marooro iaon mwaakan te nakoanibonga, ko kona n titirakiniia kaain te kooram ke kaain te kiraati bwa ana tibwaua te bwai ae a reiakinna n taekan te mwaaka aei man aia wareware n Reirei ao Berita aika Tabu 121 n te wiiki aei. Ngkana e na ibuobuoki, ko kona n iangoia bwa ana wareki ni kawaekoai kiibu 34–46 ni kakaei taabo ni kabane ae kabonganaki iai te taeka ae mwaaka ao n tibwaua te bwai ae a reiakinna imwiina. Ko kona ni kabonganai waaki ni kakukurei aikai ni buokiia membwa n am kooram ke n am kiraati n ataa raoi aron karekean mwaakan te Atua ae te nakoanibonga ni maiuia.

• E kona n ibuobuoki ni kabotaua bwa e kanga te “mwaaka” ao te “kairoro” ni karaoaki n te aonaaba ma te bwai are e reirei te Uea n te mwakoro 121 bwa e kanga mwaakan te nakoanibonga ni kateimatoaaki. Ko kona ni karaoa te tiata ae uoua ana kaorum iaon te burakiboti ma atuia Mwakan te Aonaaba ao Mwaakan Karawa. A kona kaain te kooram ke te kiraati ni kanoaa te tiaata ma taeka ao kibuntaeka man Reirei ao Berita aika Tabu 121:34–46. Ana kanga ni kona kibuntaeka aikai n roota te kawai ae ti ukoukoria ni kairoroia tabeman ibukin te raoiroi, n raonaki ma raoraora, kaain ara utu, ao naake ti beku ibukiia ao n ibuobuoki nakoia? Ni kaineti ma kiibu aikai, e kanga te Tamnei ae Raoiroi ni buokiira ni kairoroia tabeman n ae raoiroi?

• Ni buokiia naake iai irouia te Nakoanibonga ae te Aaron n reirei aron uotakin te mwaaka nakon aia ibuobuoki n te nakoanibonga, ko kona ni kaoti bwaai aika kakaokoro ao titirakiniia membwa n te kooram bwa ana ketinna bwa mwaitira boon te bwai teuana. Bukin tera tabeua bwaai a materaoi riki nakon ake tabeua? Tera bwaai aika a rangin ni kakaawaki inanon maiura, ao iraua boona ae ti na “kabwaka” ibukiia? A kona ngkanne kaain te kooram n ukoukora ana rongorongo Beretitenti Russell M. Nelson “The Price of Priesthood Power,” n taratara nako ibukin boona e taku ti riai ni kabwaka bwa ti na karekea mwaakan te nakoanibonga. A kanga maiura ao maiuia tabeman n rotaki ngkana ti beku ma mwaakan riki te Tia Kamaiu?

• Ni buokiia ataeinnaine n oota n aron karekean mwaakan te nakoanibonga, ko kona n titirakiniia n iangoi taai ngke a tia n namakina mwakan te Atua ni maiuia. Kabwarabwara bwa mwaakan te nakoanibonga bon mwaakan te Atua. A kona n ukoukora ana rongorongo Beretitenti Russell M. Nelson “Spiritual Treasures” ibukin koaua irouia aine ao mwaakan te nakoanibonga. Tera te bwai ae titirakina ainen te Ekaretia te Beretitenti Nelson bwa e na karaoia bwa e aonga “ni wetea mwaakan te Tia Kamaiu ma te tituaraoi”? (iteraniba 77; tarai riki barakarabe ake aua ni moa ma “Aine n tatabemaniia nako ao mwaane n tatabemaniia nako”). N ningai ae ti a tia ni wetea te mwaka aei bwa e na kakabwaiai maiura ao maiuia tabeman? Tera ae reireiniira Reirei ao Berita aika Tabu 121:39–43 bwa ti na kanga ni mwakuri ma mwaakan te Uea inanon maiura?

Mwakuri inanon te Onimaki

Kaungaiia kaain te kooram ke te kiraati ni iangoia ao ni korea mwiin te bwai are a na karaoia ni karaoi nanon namakin ake a karekei n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• Russell M. Nelson, “Drawing the Power of Jesus Christ into Our Lives,” Riaona, Meei 2017, 39–42

• David A. Bednar, “The Powers of Heaven,” Liahona, Meei 2012, 48–51

Anga Reirei n Ana Kawai te Tia Kamaiu

Ngkana ko ukoukoria n ira Ana katooto Iesu Kristo ao ni mauiakina te maiu ae kororaoi ni karekea Mwaakana, ko na kona n reirei ma te mwaaka ao te kariaiakaki.