tā valivali ʻo Siosefa Sāmita

Tokoua ko Siosefá, tā fakatātaaʻi ʻe David Lindsley

28 Nōvema

Naʻe Tokoni Fēfē ʻa Siosefa Sāmita ke Fakahoko e Palani ʻa e Tamai Hēvaní?

Tokāteline mo e Ngaahi Fuakava 135–136

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻa e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻa e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko e hā te tau lava ʻo fai ke fakatupulaki ʻa e uouongatahá ʻi he kau mēmipa ʻo ʻetau kōlomú pe kalasí? Ko e hā ha ngaahi taumuʻa te tau fie ngāueʻi fakataha?

• Ko hotau ngaahi ngafá pe fatongiá. Ko e hā ha meʻa ʻoku tau fai ke vahevahe e ongoongoleleí? Ko e hā ha ngaahi meʻa kuo tau aʻusia ʻi hono fakahoko ʻo e ngāue fakatemipalé mo e hisitōlia fakafāmilí?

• Ko ʻetau moʻuí. Kuo tau mātā fēfē e toʻukupu ʻo e ʻEikí ʻi heʻetau moʻuí? Ko e hā ha meʻa kuó ne ueʻi fakalaumālie kitautolu ʻi heʻetau ako folofola he uike ní?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka fie maʻu:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

“Kuo fai ʻe Siosefa Sāmita, ko e Palōfita mo e Tangata Kikite ʻa e ʻEikí, ha meʻa lahi ange ki hono fakamoʻui ʻo e faʻahinga ʻo e tangatá ʻi he māmaní, tuku kehe ʻa Sīsū pē, ʻi ha toe tangata ʻe toko taha ʻa ia naʻe moʻui ʻi ai ʻi ha kuonga” (Tokāteline mo e Ngaahi Fuakava 135:3). Ko ha fakamatala mahino ʻeni fekauʻaki mo e fatongia ʻo Siosefa Sāmitá. Kuó ke fakakaukau nai fekauʻaki mo e ʻuhinga ʻo e fakamatalá ni ʻi hoʻo moʻuí? Ne mei kehe fēfē nai hoʻo moʻuí kapau ne teʻeki fakafoki mai e ongoongolelei ʻo Sīsū Kalaisí? Ko e hā te ke lava ʻo fai ke tokoni ki he kau mēmipa ʻo hoʻo kōlomú pe kalasí ke fakamālohia ʻenau ngaahi fakamoʻoni ki he misiona ʻo Siosefa Sāmitá?

ʻI hoʻo teuteu ke faiakó, makehe mei hoʻo ako ʻa e Tokāteline mo e Ngaahi Fuakava 135, fakakaukau ke toe vakaiʻi ʻa e pōpoaki ʻa Palesiteni M. Lāsolo Pālatí, “He ʻIkai Koā Ke Tau Fai Atu ʻi Ha Ngāue Mahuʻinga Pehē?” (Liahona, Mē 2020, 8–11) mo e pōpoaki ʻa ʻEletā Niila L. ʻEnitasoni, “Siosefa Sāmita” (Liahona, Nōvema 2014, 28–31).

finemui mo ha talavou ʻokú na lau e tohi ʻa Molomoná

ʻOku tāpuekina ʻetau moʻuí ʻe he ngaahi moʻoni ne fakafoki mai ʻo fakafou ʻi he Palōfita ko Siosefa Sāmitá.

Ako Fakataha

Ke kamataʻi ha fealeaʻaki fekauʻaki mo e founga ne tokoni ai ʻa Siosefa Sāmita ke fakahoko e palani ʻa e Tamai Hēvaní, te ke lava ʻo kamata ʻaki haʻo toe vakaiʻi e meʻa ne ako ʻe he kau mēmipa ʻo e kōlomú pe kalasí fekauʻaki mo e Palōfitá mei heʻenau laukonga ʻi he Tokāteline mo e Ngaahi Fuakava 135 he uike ní. Hangē ko ʻení, te nau lava ʻo hiki ha lisi ʻo e ngaahi moʻoni ʻoku nau ʻilo fekauʻaki mo e Fakamoʻuí mo ʻEne ongoongoleleí koeʻuhí ko Siosefa Sāmita. Ko e hā ʻoku mahuʻinga ai e ngaahi moʻoni takitaha ko ʻení ʻi he palani ʻa e Tamai Hēvaní? ʻE lava e ngaahi ʻekitivitī ko ʻení ʻo tokoni ki hoʻo kōlomú pe kalasí ke mahino ange kiate kinautolu e fatongia ʻo Siosefa Sāmita ʻi he palani ʻo e fakamoʻuí.

• Ke tokoni ki he kau mēmipa ʻo e kōlomú pe kalasí ke nau teuteu ke tokoni ke fakamahinoʻi ki he niʻihi kehé e mahuʻinga ʻo e Palōfita ko Siosefa Sāmitá, ʻe lava ke nau lau e “The Restoration of the Gospel of Jesus Christ through Joseph Smith” ʻi he vahe 3 ʻo e Malangaʻaki ʻEku Ongoongoleleí ([2019], 36–38). ʻI heʻenau ngāue tauhoa pe ʻi ha fanga kiʻi kulupu īkí, te nau lava ai ʻo ʻiloʻi e ngaahi meʻa ʻoku ngali mahuʻinga ke vahevahe mo e niʻihi kehé. Te nau lava leva ʻo akoako fevahevaheʻaki e aʻusia ʻa Siosefa Sāmitá ʻi he ngaahi lea pē ʻanautolu. Kole ange ke nau fakakaukau pe ko e hā ʻe lava ke nau fai ke vahevahe ai e pōpoaki ʻo hono Fakafoki Mai ʻo e Ongoongoleleí. ʻE lava ke nau fakakaukau ki ha tokotaha pau te nau lava ʻo vahevahe ki ai e pōpoaki ko ʻení. Mahalo foki te nau fie vahevahe ha ngaahi aʻusia ʻi haʻanau tokoniʻi ha tokotaha ke ako fekauʻaki mo Siosefa Sāmita.

• Kole ki he kau mēmipa ʻo e kōlomú pe kalasí ke nau fakakaukauloto ʻoku pehēange ʻe ha taha ʻo honau ngaahi kaungāmeʻa ʻi he lotú, “ʻOku ʻikai ke u fakapapauʻi ʻoku ou maʻu ha fakamoʻoni kia Siosefa Sāmita. ʻOku anga fēfē hoʻo ʻilo ko ha palōfita iá?” Te tau tali fēfē ia? Ko e hā ʻoku tau ako mei he aʻusia ʻa Siosefa Sāmitá ʻi he Siosefa Sāmita—Hisitōlia 1:8–19 fekauʻaki mo e founga te tau lava ai ʻo maʻu pe fakamālohia ʻetau ngaahi fakamoʻoní? Kole ki he kau mēmipa ʻo e kōlomú pe kalasí ke nau hiki ha lisi ʻo ha ngaahi founga ke fakamālohia ai ʻenau ngaahi fakamoʻoni ki he Palōfita ko Siosefa Sāmitá pea takitaha fili ha meʻa ʻe taha te nau fie fakahoko he uiké ni.

• Ke tokoni ke mahino lelei ange ki he kau mēmipa ʻo e kōlomú pe kalasí e ngāue naʻe fakahoko ʻe he ʻOtuá ʻo fakafou ʻia Siosefa Sāmitá, te ke lava ʻo fakaafeʻi kinautolu ke nau lau e peesi 53–58 ʻo e Ngaahi Akonaki ʻa e Kau Palesiteni ʻo e Siasí: Kōtoni B. Hingikelī (2016) pe huluʻi ha foʻi vitiō ʻe taha pe lahi ange mei he “Ngaahi Maʻuʻanga Tokoni Poupoú.” ʻE lava ke nau fili ha tokāteline pe founga ngāue ʻe taha pe ua mei he ngaahi maʻuʻanga tokoni ko ʻení, ʻa ia ʻoku mahuʻinga mālie taha kiate kinautolú. ʻE lava ke nau fakamatalaʻi e ʻuhinga ʻoku nau houngaʻia ai ʻi hono fakafoki mai ʻe he ʻEikí e ngaahi meʻá ni ʻo fakafou ʻia Siosefa Sāmitá. Mahalo te nau fiefia foki hano hiki ha fakamatala ʻo fakahaaʻi ai ʻenau houngaʻia he founga kuo faitokonia ai kinautolu ʻe he ngāue ʻa Siosefa Sāmitá ke nau ofi ange ki he Fakamoʻuí. Te nau lava foki ʻo fakalaulauloto ki he meʻa te nau lava ʻo fai ke nau ngāue ʻaonga ange ʻaki ai e ngaahi tāpuaki kuo fakaʻatā mai ʻe he ʻEikí ʻo fakafou ʻia Siosefa Sāmitá.

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Tokāteline mo e Ngaahi Fuakava 35:17–18 (Naʻe fakafoki mai ʻe he ʻEikí ʻa hono kakato ʻo e ongoongoleleí ʻo fakafou ʻia Siosefa Sāmita)

• Russell M. Nelson, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia? Liahona, Nōvema 2017, 60–63

• “Teachings of Joseph Smith: The Nature of God,” “Ministry of Joseph Smith: The Book of Mormon,” “Ministry of Joseph Smith: The Organization of the Church,” “Ministry of Joseph Smith: The Restoration of Priesthood Authority,” “Ministry of Joseph Smith: Temples” (ngaahi vitiō), ChurchofJesusChrist.org

Ko e Faiako ‘i he Founga ‘a e Fakamoʻuí

Naʻe tāfataha e Fakamoʻuí ki hono tokoniʻi ʻEne kau ākongá ke nau moʻui ʻaki e ongoongoleleí ʻaki e kotoa honau lotó. Te ke lava fēfē ʻo tokoniʻi ʻa kinautolu ʻokú ke akoʻí ke nau vakai ki he founga ʻoku totonu ke liliu ai ʻe heʻenau ngaahi fakamoʻoni kau kia Siosefa Sāmitá, ʻa ʻenau moʻui fakaʻahó?