ongo meʻa toki mali ʻi muʻa he temipalé

14 Nōvema

Ko e Hā ʻOku Mahuʻinga ai ʻa e Mali Taʻengatá?

Tokāteline mo e Ngaahi Fuakava 129–132

fakaʻilonga fealeaʻaki fakatahá

Fealeaʻaki Fakataha

Tataki ʻe ha mēmipa ʻo e kau palesitenisī fakakōlomú pe fakakalasí; fakafuofua ki ha miniti ʻe 10–20

ʻI he kamataʻanga ʻo e fakatahá, lau fakataha ʻa e Kaveinga ʻa e Kōlomu ʻo e Lakanga Taulaʻeiki Faka-ʻĒloné pe ko e Kaveinga ʻa e Kau Finemuí. Tataki leva ha fealeaʻaki fekauʻaki mo ha ngaahi meʻa hangē ko ʻení, pea palani ha ngaahi founga ke ngāueʻi ai e ngaahi meʻa ne mou aleaʻí (te mou lava ʻo fili ʻi ha fakataha fakapalesitenisī pe ko e hā ʻe aleaʻí):

• Ko ʻetau kōlomú pe kalasí. Ko hai ʻokú ne fie maʻu ʻetau tokoní mo e ngaahi lotú? Ko e hā te tau lava ʻo fai ke tokoniʻi ai kinautolú? Ko hai ʻoku totonu ke tau fakaafeʻi ki ha ʻekitivitī ʻoku ʻamanaki ke fai?

• Ko hotau ngaahi ngafá pe fatongiá. Ko e hā ha ngaahi ngāue kuo tau fakahoko? Ko e hā ha ngaahi ngāue ʻoku fie maʻu ke tau fai? Ko e hā ha founga kuo tau fakaafeʻi mai ai e niʻihi kehé ke nau haʻu kia Kalaisi, pea ʻe founga fēfē haʻatau fakaafeʻi mai e niʻihi kehé he taimí ni?

• Ko ʻetau moʻuí. Ko e hā ha ngaahi aʻusia kimuí ni kuó ne fakamālohia ʻetau fakamoʻoní? Ko e hā e meʻa ʻoku hoko ʻi heʻetau moʻuí, pea ʻe founga fēfē haʻatau fepoupouaki?

ʻI he fakaʻosinga ʻo e lēsoní, fakahoko e ngaahi meʻá ni, ʻo ka taau ke fai:

• Fakamoʻoni ki he ngaahi tefitoʻi moʻoni kuo akoʻí.

• Fakamanatu ki he kau mēmipa ʻo e kōlomú pe kalasí e ngaahi palani mo e fakaafe ne fai ʻi he lolotonga e fakatahá.

fakaʻilonga akoʻi e tokāteliné

Akoʻi e Tokāteliné

Tataki ʻe ha taki kakai lalahi pe toʻu tupu; fakafuofua ki ha miniti ʻe 25–35

Teuteuʻi Fakalaumālie Koe

ʻI hono maʻu ʻe he kau mēmipa ʻo e kōlomú pe kalasí ha fakamoʻoni ʻi heʻenau kei siʻí kau ki he mali temipalé, ʻoku meimei ke lahi ange ai haʻanau loto-holi mo teuteu ki he tāpuaki maʻongoʻonga ko ʻení. ʻI he palani ʻa ʻetau Tamai Hēvaní ki he fiefiá, ʻoku mahuʻinga fau ai e fuakava taʻengata ʻo e malí ki he hakeakiʻí Tokāteline mo e Ngaahi Fuakava 131:1–4). Ka ʻoku ʻikai fekauʻaki taha pē ʻa e mali temipalé mo e meʻa te tau maʻu ʻi he moʻui ka hokó—ʻokú ne ʻomi foki ha ngaahi tāpuaki maʻongoʻonga ʻi he moʻuí ni. Hangē ko ʻení, ʻe lava ke takiekina ʻe he ngaahi fuakava toputapu mo e ʻOtuá e anga ʻo e vakai ʻa ha husepāniti mo ha uaifi ki hona vā fetuʻutakí. ʻI he taimi ʻoku sila ai ha tangata mo ha fefine ʻi he temipalé ki taimi mo e kotoa ʻo ʻitānití, ʻokú na fakapapauʻi ai ʻe hokohoko atu hona vā fetuʻutakí ʻo taʻengata kapau ʻokú na tauhi moʻoni ʻena ngaahi fuakavá.

Te ke lava fēfē ʻo tokoni ki he kau mēmipa hoʻo kōlomú pe kalasí ke nau ongoʻi ha loto-holi lahi ange ke sila ʻi he temipalé? Ke teuteuʻi koe ke ke akoʻi kau ki he mali temipalé, ʻe lelei ke ke lau ʻa e “Malí” ʻi he Tuʻu Maʻu ʻi he Tuí ([2004], 113–18).

ongomātuʻa ʻokú na puke ʻena fānaú

ʻE lava ke silaʻi e ngaahi fāmilí ke taʻengata ʻo fakafou ʻi he ngaahi ouau ʻo e temipalé.

Ako Fakataha

Ke ʻoange ki he kau mēmipa ʻo e kōlomú pe kalasí ha faingamālie ke vahevahe e meʻa kuo nau ako ʻi he folofolá he uike ní, te ke lava ʻo hiki ʻi he palakipoé ha fehuʻi hangē ko e Ko e hā ʻoku mahuʻinga ai ʻa e mali taʻengata ʻi he temipale ʻo e ʻOtuá? ʻE lava leva ke kumi ʻe he kau mēmipa ʻo e kōlomú pe kalasí e potufolofola ki he veesi ne nau lau ʻi he Tokāteline mo e Ngaahi Fuakava 129–32 ʻa ia ʻe lava ʻo tokoni ke tali e fehuʻí pea hiki e potufolofola ko iá ʻi he tafaʻaki ʻo e fehuʻí. (Ka tokoni, te ke lava ʻo fakafehokotaki kinautolu ki he Tokāteline mo e Ngaahi Fuakava 131:1–4; 132:13–19.) Lau fakataha ha niʻihi ʻo e ngaahi potufolofolá, pea aleaʻi e meʻa ʻoku nau akoʻi maí. Te ke lava ʻo fakaʻaongaʻi ha taha pē ʻo e ngaahi ʻekitivitī ko ʻení ke tokoni ki he toʻu tupú ke mahino lelei ange kiate kinautolu e mahuʻinga ʻo e mali temipalé.

• Koeʻuhí ʻoku makehe ʻa e mali temipalé ki he ongoongolelei kuo fakafoki maí, mahalo ʻe maʻu ʻe kinautolu ʻokú ke akoʻí ha ngaahi faingamālie ke fakamatalaʻi ia ki he kakai ʻoku ʻikai ke nau maheni mo iá. Ke tokoni ki he kau mēmipa ʻo e kōlomú pe kalasí ke fakahoko ʻeni, te ke lava ʻo fakaafeʻi kinautolu ke nau fakakaukauloto ʻoku nau maʻu ha kaungāmeʻa ʻoku fifili pe ko e hā e ʻuhinga ʻoku tui ai e Kāingalotu ʻo e Siasí ʻoku fuʻu mahuʻinga ʻa e mali ʻi he temipalé. Kole ange ke nau lau e ngaahi veesi folofola ʻi he “Ngaahi Maʻuʻanga Tokoni Poupoú,” “Ko e Fāmilí: Ko ha Fanongonongo ki Māmani” (ChurchofJesusChrist.org), pe peesi 113–14 ʻi he Tuʻu Maʻu i he Tuí. Te nau lava ʻo fakasio ha ngaahi foʻi lea, kupuʻi lea, mo ha ngaahi fakakaukau ʻe lava ke nau fakakau ʻi ha tohi ki hanau kaungāmeʻa ʻo fakamatalaʻi e mahuʻinga ʻo e mali temipalé. Te nau lava ʻo mamataʻi foki mo e “Why Is Marriage Sacred to Heavenly Father?” mei he “Face to Face with Elder and Sister Renlund” ([fakamafola fakamāmanilahi maʻá e toʻu tupú, 5 ʻo ʻAokosi 2017], FacetoFace.ChurchofJesusChrist.org). Te ke lava ʻo tuku ange ha taimi ke nau fai ha tohi pea fakaafeʻi leva kinautolu ke vahevahe e meʻa ne nau tohí.

• ʻI he vakai ki he sīpinga ʻo ha nofo-mali angatonú, te ne lava ʻo ueʻi ʻa kinautolu ʻokú ke akoʻí ke nau fekumi ki he tāpuaki ko ʻení. Ko e founga ʻe taha ke fakahoko ai ʻeni ko hono toe vakaiʻi e ngaahi vahe ʻo e pōpoaki ʻa ʻEletā L. Uitenei Keleitoni “Nofomalí: Sio pea Ako” (Liahona, Mē 2013, 83–85). Ko e hā ʻoku ako ʻe he kau mēmipa ʻo e kōlomú pe kalasí mei he pōpoaki ko ʻení fekauʻaki mo e founga ke fakatupulaki ai ha nofomali taʻengata? ʻE lava foki ke toe vakaiʻi ʻe he kau mēmipa ʻo e kōlomú pe kalasí e ngaahi fakakaukau ʻi he “Aʻusia ʻo e Mali Fiefiá” ʻi he Tuʻu Maʻu i he Tuí (peesi 116-18). Te nau lava foki ʻo mamataʻi ʻa e “How Did Elder and Sister Bednar Meet?” mei he “Face to Face mo ʻEletā mo Sisitā Petinā” ([fakamafola fakamāmanilahi maʻá e toʻu tupú, 12 ʻo Mē 2015], FacetoFace.ChurchofJesusChrist.org).

• Kole ki he kau mēmipa ʻo e kōlomú pe kalasí ke nau fakakaukau ki ha ngaahi meʻa ʻe niʻihi te ne lava ʻo taʻofi ai kinautolu mei haʻanau sila ʻi he temipalé. Ko e hā te tau lava ʻo fakahoko he taimí ni ke ikunaʻi e ngaahi meʻa ko ʻení? Te nau lava leva ʻo toe vakaiʻi ʻa e “Eternal Marriage” ʻi he vahe 3 ʻo e Preach My Gospel ([2019], 89) ke maʻu e ngaahi tefitoʻi moʻoni mo e founga ngāue ʻoku takiekina ki he nofomali mo e ngaahi fāmili fiefiá. ʻE lava ke nau lisi ha niʻihi ʻo e ngaahi meʻa te nau lava ʻo fakahoko he taimí ni ke teuteu ki ha mali taʻengatá. Ko e hā e fatongia ʻo e Fakamoʻuí ʻi hono tokoniʻi kitautolu ke tau teuteu mo aʻusia ko ia ha mali taʻengatá?

Ngāue ʻi he Tui

Poupouʻi ʻa e kōlomú pe kau mēmipa ʻo e kalasí ke nau fakalaulauloto mo lekooti ʻa e meʻa te nau fai ke ngāueʻi ai e ngaahi ongo ne nau maʻu he ʻaho ní. ʻOku felāveʻi fēfē ʻa e lēsoni he ʻaho ní mo e ngaahi taumuʻa fakafoʻituitui kuo nau fokotuʻú? Kapau te nau fie maʻu, ʻe lava ke vahevahe ʻe he kau mēmipa ʻo e kōlomú pe kalasí ʻenau ngaahi fakakaukaú.

Ngaahi Maʻuʻanga Tokoni Poupoú

• Tokāteline mo e Ngaahi Fuakava 49:16–17; 131:1–4; 132:13–19 (ʻOku mahuʻinga e mali taʻengatá ki he palani ʻa e ʻOtuá)

• Ngaahi Tefito ʻo e Ongoongoleleí, “Malí,” topics.ChurchofJesusChrist.org

• “What Is a Temple Wedding Like?” (vitiō), temples.ChurchofJesusChrist.org

• Naʻe pehē ʻe ʻEletā D. Toti Kulisitofasoni, “ʻOku ʻikai ke fakasītuaʻi pe fakasiʻisiʻi ʻe hono fakahaaʻi e ngaahi tefitoʻi moʻoni ʻoku kau ki he malí mo e fāmilí ʻa e ngaahi feilaulau mo e lavameʻa ʻa kinautolu ʻoku ʻikai ke nau aʻusia e tuʻunga ko ʻení. … Ko e konga lahi ʻo e ngaahi meʻa ʻoku leleí, ko e konga lahi ʻo e ngaahi meʻa ʻoku mahuʻingá —pea taimi ʻe niʻihi ko e ngaahi meʻa kotoa ʻoku fie maʻu he taimi ní—ʻe lava ke aʻusia ia ʻi ha tuʻunga ʻoku ʻikai fuʻu ʻiloa. … ʻOku tau fakamoʻoni taʻe toe veiveiua ki he meʻa naʻe fakataumuʻa ki ai e Fakalelei ʻa Sīsū Kalaisí, pea ʻi he ikuʻangá te Ne totongi huhuʻi ʻa e meʻa kotoa pē naʻe mole meiate kinautolu ʻoku tafoki kiate Iá” (“ ʻUhinga ʻo e Malí, ʻUhinga ʻo e Fāmilí,” Liahona, Mē 2015, 52).

Ko e Faiako ‘i he Founga ‘a e Fakamoʻuí

ʻEke ha ngaahi fehuʻi te ne ueʻi ʻa kinautolu ʻokú ke akoʻí ke nau fakakaukau fakamaatoato fekauʻaki mo e mali taʻengatá mo ongoʻi ha loto-holi ke ngāueʻi e taumuʻa ko iá. Fakafanongo fakalelei ki heʻenau ngaahi talí pea tali ʻaki e angaʻofá ʻo fakatatau ki he ueʻi ʻa e Laumālié.