26 Disemba

?From Wanem Ol Famli Oli Impoten?”

“Famli: Wan Ofisol Toktok I Go long Wol”

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i niu long wod blong yumi, mo olsem wanem nao yumi save helpem olgeta blong filim welkam? ?Wanem nao yumi stap mekem blong mekem se taem blong yumi long kworom o miting long klas i gat mining?

• Ol diuti o responsabiliti blong yumi. ?Wanem nao sam diuti mo responsabiliti we yumi gat olsem ol yang man mo ol yang woman? ?Olsem wanem nao yumi save mekem i kam moa gud?

• Laef blong yumi. Wanem nao yumi stap mekem blong kam moa olsem Jisas Kraes mo kasem paoa blong Hem long laef blong yumi? ?Wanem nao yumi stap mekem blong helpem ol famli blong yumi blong kam long Hem?

Long en blong lesen, sapos i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Evri famli oli defren, mo i no gat wan famli we i stret evriwan. Be, yumi evriwan i gat wan Papa mo Mama long Heven we tufala i stret evriwan, we Tufala i wantem yumi blong kasem blesing ia blong stap laef hapi olsem ol famli we i no save finis. Blong helpem yumi kasem hemia, God i bin givim insperesen long ol profet mo ol aposol blong talemaot ol trutok we oli no save finis insaed long “Famli: Wan Ofisol Toktok I Go long Wol”” (Churchofjesuschrist.org/study?lang=bis).

Taem yu stap rere blong tij abaot hamas ol famli oli impoten, tingting abaot from wanem famli blong yu i impoten long yuwan. ?Wanem rol nao Jisas Kraes i bin gat blong stap helpem famli blong yu i faenem hapines? Taem yu stap rere blong tij, yu save stadi long “Famli: Wan Ofisol Toktok I Go long Wol” (ChurchofJesusChrist.org/study?lang=bis) “Famli” insaed long Blong Ol Yut Oli Kam Strong ([2011], 14–15), mo mesej blong Elda D. Todd Christofferson “Why Marriage, Why Family” (Liahona, May 2015, 50–53). ?Wanem prinsipol, aot long ol risos ia, yu yu filim se bae i gat moa mining long olgeta we yu stap tijim?

Famli i stap long medel long plan blong Papa long Heven.

Stap Lan Tugeta.

Blong statem wan toktok storian abaot hamas ol famli oli impoten, yu save askem kworom o klas long wanem oli bin lanem abaot hapines insaed long famli laef taem oli stap ridim “Famli: Wan Ofisol Toktok I Go long Wol” long hom. ?Wanem nao oli lanem we maet i save mekem famli blong olgeta i kam moa strong? Afta jusum wan o moa long ol aktiviti we i stap daon ia blong helpem kworom o ol klas memba blong mekem andastaning blong olgeta i kam moa dip long saed blong from wanem ol famli oli impoten long plan blong Papa long Heven.

• Ol skripja we oli stap long “Ol Sapot Risos” oli sapotem ol trutok we oli kam tru long insperesen we oli stap insaed long famli ofisol toktok. Yu save givim wok long wanwan memba blong kworom o klas blong oli ridim wan long ol skripja ia, mo afta, oli lukluk insaed long famli ofisol toktok blong faenem wan ples we i go wetem skripja blong hem. Wanwan memba blong kworom o blong klas i save serem wanem hem i bin faenem.

• Blong stap laef folem ol tijing blong Jisas Kraes, i lidim yumi blong gat wan tru hapines we i stap oltaem insaed long ol famli blong yumi. Blong helpem ol memba blong kworom o blong klas blong oli andastanem hemia, yu save invaetem wanwan long olgeta blong jusum wan fasin olsem hemia blong Kraes (luk long“How Do I Develop Christlike Attributes?” japta 6 insaed long Preach My Gospel [2019], 121–29) mo faenem wan skripja o toktok blong profet we i stap tij abaot fasin ia. Taem we ol memba blong kworom o blong klas oli serem wanem we oli faenem, oli save ansarem wan o moa long wan long olgeta kwestin ia: ?Olsem wanem nao, taem mi laef moa fulwan folem fasin ia we i olsem hemia blong Kraes, bae i tajem famli blong mi? ?Wanem nao mi lanem aot long eksampol blong Sevya abaot wei blong yusum fasin ia insaed long famli blong mi?

• Presiden Russell M. Nelson i bin tijim : “Enemi i stap gat moa faet agensem fet, mo agensem yumi, mo agensem ol famli blong yumi long wan spid we i go antap moa.” (“Fas Toktok,” Liahona, Nov 2018, 6). Blong helpem ol memba blong kworom o blong klas oli lukaotgud agensem ol atak ia, yu save invaetem olgeta blong raetem wan lis long bod blong ol defren kaen fasin mo aksen we Setan i stap yusum fulap blong save mekem ol famli oli nomo strong. ?From wanem ol samting ia oli save spolem ol famli? Afta, ol memba blong kworom o blong klas oli save luklukgud insaed long nambaseven paragraf blong famli ofisol toktok blong faenem ol fasin mo ol aksen we oli save faet agensem ol atak blong Setan. ?Olsem wanem nao yumi save lukaotem help blong Sevya blong stap developem ol fasin mo ol kaen aksen ia? Olsem pat blong toktok storian ia, yu save soem vidio ia: “Proclamation” (ChurchofJesusChrist.org). ?Wanem nao yumi lanem abaot wei we yumi save protektem ol famli blong yumi long paoa blong Setan?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Rom 8:16–17; Hibrus 12:9 (Yumi ol pikinini blong Papa long Heven)

• Jenesis 2:18, 24; Doktrin mo Ol Kavenan 131:1–4 (God i odenem mared)

• Mosaea 4:14–15; Doktrin mo Ol Kavenan 68:25–29; 93:40–50 (Papa mo mama oli mas tijim ol pikinini blong tufala long saed blong gospel)

• L. Tom Perry, “Why Marriage and Family Matter—Everywhere in the World,” Liahona, May 2015, 39–42

• Ol vidio: “Families Can Be Together Forever,” “The Home Is a Divine Institution,” ChurchofJesusChrist.org

Tij Folem Wei blong Sevya

Sevya i bin invaetem ol disaepol blong Hem blong oli testifae, mo taem oli bin mekem, Spirit i bin tajem hat blong olgeta. Taem yu stap tij, invaetem ol memba blong kworom o blong klas blong serem ol testemoni blong olgeta abaot olsem wanem famli i impoten long plan blong God.