12 Disemba

?Olsem Wanem Mi Save Faenem Ol Ansa long Ol Kwestin blong Mi?

Ol Toktok blong Bilif mo Ol Ofisol Toktok 1 mo 2

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao ol aktiviti we yumi jes gat i no longtaem? ?Oli bin sakses? ?Wanem i bin go gud, mo olsem wanem yumi save mekem gud moa?

• Ol diuti mo responsabiliti blong yumi. ?Huia i nidim seves blong yumi? ?Olsem wanem nao yumi save helpem olgeta?

• Laef blong yumi. ?Wanem nao ol gol we yumiwan i stap wok long olgeta? ?Wanem eksperiens nao yumi save serem? ?Wanem blesing nao yumi bin kasem?

Long en blong lesen, olsem we i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Hem i nomol blong gat ol kwestin. Yumi stap askem yumiwan abaot fiuja blong yumi mo abaot wol ia we i stap raon long yumi. Yumi gat ol kwestin tu abaot God mo plan we Hem i gat blong yumi. Taem yu stap ridim Doktrin mo Ol Kavenan 1 mo 2 long wik ia, luk wanem we ol profet mo ol aposol oli mekem blong faenem ol ansa long ol kwestin blong olgeta (aotlaen blong wik ia insaed long Kam Folem Mi—Blong Wanwan Man, Woman mo Famli bae i save help). ?Wanem rol nao, fasin blong stap lukaotem ol ansa long ol kwestin, i bin gat long taem we yu stap lanem gospel? ?Wanem nao yu save mekem blong leftemap tingting blong ol memba blong kworom o blong klas blong yu blong oli lukaotem ol ansa long ol gospel kwestin blong olgeta long wan fetful wei? Taem yu stap rere blong tij, tingting blong luklukbak long Doktrin mo Ol Kavenan 6:14–15; 9:7–9 mo “Acquiring Spiritual Knowledge” insaed long Doctrinal Mastery Core Document ([2018], 3–5).

Testemoni blong yumi i save kam strong moa taem yumi stap lukaotem ol ansa long ol kwestin blong yumi, long wan fetful wei.

Stap Lan Tugeta.

Taem ol memba blong kworom o blong klas blong yu oli bin stap long Ol Ofisol Toktok 1 mo 2 long wik ia, maet oli bin faenem ol prinsipol we i go wetem fasin blong ansarem ol kwestin abaot gospel. Givim olgeta samfala minit blong luklukbak long ol ofisol toktok ia mo serem wanem we oli bin lanem abaot fasin blong kasem revelesen. Olgeta aktiviti ia oli save helpem olgeta we yu stap tijim blong oli andastanem moa gud wei blong lukaotem ol ansa long ol gospel kwestin blong olgeta.

• Olgeta skripja ia oli stap tijim ol prinsipol abaot fasin blong askem ol kwestin, mo fasin blong kasem ol ansa: Matiu 7:7; Doktrin mo Ol Kavenan 6:14–15; 9:7–9. Kworom o klas blong yu i save ridim ol skripja ia tugeta, mo mekem wan lis long bod blong olgeta prinsipol we oli faenem i stap. ?From wanem Papa long Heven, oltaem i no wanem ansarem ol kwestin blong yumi fulwan, o kwiktaem? ?Olsem wanem yumi stap gohed blong soem fet blong yumi taem yumi stap wet from ol ansa? (luk long Doktrin mo Ol Kavenan 19:23; 78:18). Tingting blong serem wan eksperiens blong wan taem we yu bin gat wan kwestin abaot gospel ia, mo yu bin kasem wan ansa. Askem ol memba blong kworom o blong klas blong oli serem ol semmak eksperiens.

• ?Bae ol memba blong kworom o blong klas blong yu oli save ting long sam pipol insaed long ol skripja we oli bin askem ol kwestin mo hemia i bin lidim olgeta i go long revelesen.” (Sapos i nid, yu save talem olgeta blong lukluk long ol skripja anda long “Ol Sapot Risos.”) Ol memba blong kworom o klas oli save ridim abaot ol pipol ia insaed long ol skripja mo faenemaot wanem kwestin oli bin askem, olsem wanem oli bin lukaotem ol ansa, mo wanem nao ol ansa we oli bin kasem. ?Wanem nao yumi lanem aot long ol eksampol ia? ?Olsem wanem nao yumi praktisim wanem yumi lavem taem yumi stap lukaotem ol ansa long ol stret kwestin blong yumiwan bakegen? Olsem pat blong aktiviti ia, yu save soem: “How Can I Live the Gospel Standards Better?” we i kamaot long “Face to Face with Elder and Sister Bednar” ([worldwide youth broadcast], May 12, 2015, FacetoFace.ChurchofJesusChrist.org).

• Mesej blong Elda W. Mark Bassett “Blong Yumi Lan mo Bildimap Yumi long Saed blong Spirit” (Jeneral Konfrens, Okt 2016, Churchofjesuschrist.org/general-conference/conferences?lang=bis) i givim ol tingting abaot wei blong lukaotem ol ansa long ol kwestin long saed blong spirit. Kworom o blong klas blong oli save ridim tugeta ol fofala paragraf blong mesej blong hem stat long “Blong andastanem ol sikret blong God.” Afta, invaetem ol memba blong kworom o blong klas blong oli ridim 1 Nifae 2:16, 19–20; 10:17–19; 11:1 mo faenemaot wanem we Nifae i bin mekem blong lukaotem ol ansa long ol kwestin blong hem. Invaetem ol memba blong kworom o blong klas blong oli tingting abaot wanem bae oli mekem blong folem eksampol blong Nifae taem oli gat ol kwestin abaot gospel.

• Stori insaed long Mak 9:14–27 i save helpem ol memba blong kworom o blong klas taem oli stap gat hadtaem wetem ol kwestin o fasin blong gat tu tingting. Bifo klas, invaetem wan memba blong kworom o klas blong yu blong hem i kam we hem i rere blong serem stori ia. Afta long hemia, serem kworom o klas blong yu long trifala grup, mo givim wok long wanwan grup blong stadi long wan long ol trifala tingting we Elda Jeffrey R. Holland i bin talem abaot stori ia insaed long mesej blong hem: “Lod, Mi Mi Biliv” (Jeneral Konfrens, Epril 2013, Churchofjesuschrist.org/general-conference/conferences?lang=bis). ?Olsem wanem yumi save praktisim ol tingting blong Elda Holland taem we yumi, o wan narawan we yumi save hem, i gat ol kwestin o i gat tu tingting abaot gospel?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Inos 1:1–8; Alma 5:43–47; 40:3–5; Ita 2:18–23; Doktrin mo Ol Kavenan 138:1–4, 11; Josef Smit—Histri 1:10–18 (Ol eksampol blong ol pipol we oli stap lukaotem ol ansa long ol kwestin blong olgeta)

• James B. Martino, “Luk long Hem mo Ansa bae I Kam,” Jeneral Konfrens, Okt 2015, churchofjesuschrist.org/general-conference/2015/10?lang=bis

• Gospel Topics, “Answering Gospel Questions,” topics.ChurchofJesusChrist.org

Tij Folem Wei blong Sevya

Sevya i leftemap tingting blong olgeta we Hem i bin tijim blong oli yusum ol skripja blong faenem ol ansa blong ol kwestin blong olgeta bakegen. ?Olsem wanem nao olgeta we yu stap tijim oli save kasem blesing taem oli stap lanem olsem wanem blong faenem ansa long ol kwestin blong olgeta?