Brata Josef, i kam long David Lindsley

28 Novemba

?Olsem Wanem Josef Smit I Help blong Mekem Plan blong Papa long Heven I Hapen?

Doktrin mo Ol Kavenan 135–136

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Wanem nao yumi save mekem blong bildimap yuniti bitwin ol memba blong kworom o ol memba blong klas? “?Wanem nao ol gol we yumi laekem blong wok tugeta long hem?

• Ol diuti mo responsabiliti blong yumi. ?Wanem nao yumi stap mekem blong serem gospel? Wanem nao ol eksperiens we yumi bin gat taem yumi mekem wok blong tempol mo famli histri?

• Laef blong yumi. ?Long wanem wei nao yumi bin luk han blong God insaed long laef blong yumi? ?Wanem nao i givim insperesen long yumi long skripja stadi blong yumi long wik ia?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

“Josef Smit, Profet mo Sia blong Lod, i bin mekem moa, be i no moa bitim Jisas, from wok ia blong fasin blong sevem man long wol ia bitim eni narafala man we i bin laef long wol ia” (Doktrin mo Ol Kavenan 135:3). Hemia i wan klia toktok abaot rol blong Josef Smit. ?Yu yu eva tingting abaot wanem toktok ia i minim insaed long laef blong yu? ?Olsem wanem nao bae laef blong yu i defren sapos gospel blong Jisas Kraes i no bin kambak, o oli no bin putumbak? ?Wanem nao yu save mekem blong helpem ol memba blong kworom o blong klas blong yu blong oli mekem testemoni blong olgeta i kam strong moa abaot misin blong Josef Smit?

Taem yu stap rere blong tij, antap long stadi blong Doktrin mo Ol Kavenan 135, tingting blong luklukbak long mesej blong Presiden M. Russell Ballard “?Bae Yumi No Gohed long Wan Bigfala Wok Olsem?” (Liahona, Mei 2020, 8–11) mo mesej blong Elda Neil L. Andersen “Joseph Smith” (Liahona, Nov. 2014, 28–31).

Laef blong yumi i gat blesing tru long ol trutok we Profet Josef Smit i bin putumbak.

Stap Lan Tugeta.

Blong statem wan toktok storian abaot wei we Josef Smit i bin help blong mekem plan blong Papa long Heven i kamtru, yu save stat blong luklukbak long wanem ol memba blong kworom o blong klas oli bin lanem abaot Profet aot long riding blong olgeta long Doktrin mo Ol Kavenan 135 long wik ia. Eksampol: oli save mekem wan lis blong ol trutok we oli save abaot Sevya mo gospel blong Hem from i bin gat Josef Smit. ?From wanem ol trutok ia oli impoten long plan blong Papa long Heven? Olgeta aktiviti ia oli save helpem gud moa kworom o klas blong yu blong oli andastanem rol blong Josef Smit insaed long plan blong sevem man.

• Blong helpem ol memba blong kworom o blong klas blong rere blong helpem ol narawan blong oli andastanem hamas Profet Josef i bin impoten, oli save ridim “The Restoration of the Gospel of Jesus Christ through Joseph Smith” insaed long japta 3 blong Preach My Gospel ([2019], 36–38). Sapos oli wok tutu o long smol grup, oli save faenem ol poen we i luk se oli impoten, mo serem wetem ol narawan. Afta long hemia, oli save praktis blong stap serem eksperiens blong Josef Smit wetem wanwan long olgeta bakegen, mo oli yusum stret toktok blong olgeta nomo. Askem olgeta blong tingting long wanem bae oli save mekem blong serem mesej ia blong Restoresen. Maet oli save tingting long wan spesifik man o woman, we oli save serem mesej ia wetem olgeta. Bae oli mas wantem tu blong serem ol eksperiens taem oli helpem wan blong lan abaot Josef Smit.

• Askem ol memba blong kworom o blong klas blong traem tingting se wan long ol fren blong olgeta long Jos i talem se: “Mi mi no save stret se mi mi gat wan testemoni abaot Josef Smit o no. ?Olsem wanem nao yu yu save se hem i wan profet?” ?Olsem wanem nao bae yumi ansa long hem? ?Wanem nao yumi lanem aot long stret eksperiens blong Josef Smit long Josef Smit—Histri 1:8–19 abaot wei we yumi save kasem wan testemoni o mekem wan testemoni i kam strong moa? Askem ol memba blong kworom o blong klas blong oli mekem wan lis blong ol wei blong mekem testemoni blong yumi abaot Josef Smit i kam strong moa, mo tu, bae wanwan i jusum wan samting we bae oli wantem mekem long wik ia.

• Blong helpem ol memba blong kworom o blong klas blong oli andastanem moa wok we God i bin mekem tru long Josef Smit, yu save invaetem olgeta blong ridim ol pej 48–53 blong Teachings of Presidents of the Church: Gordon B. Hinckley (2016) o wajem wan, o moa long wan long ol vidio long Inglis we oli listim insaed long “Ol Sapot Risos.” Oli save jusum wan o tu doktrin mo praktis we oli presentem insaed long ol risos ia, we oli gat mining long olgeta. Oli save eksplenem from wanem oli talem tangkyu se Lod i bin putumbak olgeta samting ia tru long Josef Smit. Mo tu, oli save laekem blong raetem wan not we i talemaot tangkyu blong olgeta long wei we wok blong Josef Smit i bin helpem olgeta blong tekem olgeta oli kam kolosap moa long Sevya. Oli save tingting hevi tu long wanem oli save mekem blong tekpat fulwan long ol blesing we Lod i bin mekem i stap tru long Josef Smit.

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Doktrin mo Ol Kavenan 35:17–18 (Tru long Profet Josef Smit, Lod i bin putumbak gospel we i fulwan)

• Russell M. Nelson, “Buk blong Momon: ?Bae Laef blong Yu I Olsem Wanem Sapos I No Gat Buk Ia?” Jeneral Konfrens, Okt 2017, churchofjesuschrist.org/general-conference/2014/10?lang=bis

• Ol vidio: “Teachings of Joseph Smith: The Nature of God,” “Ministry of Joseph Smith: The Book of Mormon,” “Ministry of Joseph Smith: The Organization of the Church,” “Ministry of Joseph Smith: The Restoration of Priesthood Authority,” “Ministry of Joseph Smith: Temples,” ChurchofJesusChrist.org

Tij Folem Wei blong Sevya

Sevya i lukluk nomo blong helpem ol man we oli stap folem Hem blong laef folem gospel wetem ful hat blong olgeta. ?Olsem wanem nao yu save helpem ol yut blong luk olsem wanem testemoni blong olgeta abaot Josef Smit i sapos blong lidim evri dei laef blong olgeta?