14 Novemba

?From Wanem Mared we I No Save Finis I Impoten?

Doktrin mo Ol Kavenan 129–132

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i nidim help mo ol prea blong yumi? ?Wanem nao yumi save mekem blong helpem olgeta? ?Huia nao yumi sapos blong invaetem blong kam long wan aktiviti we i stap kam?

• Ol diuti mo responsabiliti blong yumi. ?Wanem ol asaenmen we yumi bin mekem finis? ?Wanem ol asaenmen we yumi nid blong mekem? ?Olsem wanem nao yumi bin invaetem ol narawan blong kam long Kraes, mo olsem wanem nao yumi save invaetem ol narawan naoia?

• Laef blong yumi. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa? ?Wanem i stap hapen insaed long laef blong yumi, mo olsem wanem nao yumi save sapotem wanwan long yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Taem we ol memba blong kworom o blong klas blong yu oli stap kasem wan testemoni abaot tempol mared taem we oli yangfala yet, bae i luk se bae oli glad blong wantem mo rere from bigfala blesing ia. Insaed long plan blong stap glad blong Papa blong yumi long Heven, kavenan ia we i no save finis blong mared, i wan mas blong save kam olsem wan god (luk long Doktrin mo Ol Kavenan 131:1–4). Be tempol mared i no jes abaot wanem we bae yumi kasem long nekis laef—hem i tekem tu ol bigfala blesing i kam long laef ia. Eksampol: ol tabu kavenan wetem God oli save lidim wei we wan hasban mo waef i lukluk rilesensip we tufala i gat wetem wanwan long tufala bakegen. Mo wan man mo wan woman we tufala i sil long wanwan long tufala blong taem naoia mo blong evri taem we i no save finis, oli gat stret save ia, se, from Jisas Kraes, bae rilesensip blong tufala bae i gohed blong oltaem sapos oli stap tru long ol kavenan blong tufala.

?Olsem wanem nao yu save helpem ol memba blong kworom o blong klas oli filim wan bigfala filing blong wantem sil insaed long tempol Blong mekem yuwan i rere blong tij abaot tempol mared, maet yu save lukluk wanem i stap long atikol ia “About a Temple Sealing” long temples.ChurchofJesusChrist.org o ridim “Mared” insaed long Stap Tru long Fet, ([2004], 114–118).

Ol famli oli save sil blong taem we i no save finis tru long ol odinens blong tempol.

Stap Lan Tugeta.

Blong givim wan janis long ol memba blong kworom o blong klas blong oli serem wanem we oli bin stap stadi long ol skripja long wik ia, yu save raetem wan kwestin long bod, olsem: ?From wanem mared we i no save finis insaed long tempol blong God, hem i impoten? Afta, ol memba blong kworom o blong klas oli save faenem refrens i go long wan ves we oli bin ridim insaed long Doktrin mo Ol Kavenan 129–32 we i save help ansarem kwestin ia mo raetem refrens long saed blong kwestin ia. (Sapos i help, yu save poenem olgeta i go long Doktrin mo Ol Kavenan 131:1–4; 132:13–19.) Tugeta, ridim sam long ol refrens ia, mo toktok raon long wanem nao oli stap tijim. Yu save yusum eniwan long ol aktiviti ia blong helpem ol yut blong andastanem moa hamas tempol mared i impoten.

• From se mared we i no save finis i spesel nomo long gospel ia we i kambak, olgeta we yu stap tijim oli save gat ol janis blong eksplenem hemia long ol pipol we oli no save gud long hemia. Blong helpem ol memba blong kworom o blong klas blong mekem hemia, yu save invaetem olgeta blong traem tingting se oli gat wan fren we i stap askem hemwan se from wanem ol Lata-dei Sent oli biliv se mared insaed long tempol i impoten tumas. Askem olgeta blong ridim ol skripja insaed long “Ol Sapot Risos,” “Famli: Wan Ofisol Toktok I Go long Wol”” (Churchofjesuschrist.org/study?lang=bis), o ol pej 29–30 insaed long Stap Tru long Fet. Oli save lukaotem ol toktok, ol sentens, mo ol aedia we oli save putum insaed long wan leta we bae oli sendem i go long fren blong olgeta, mo eksplenem hamas tempol mared i impoten. Mo tu, oli save wajem “Why Is Marriage Sacred to Heavenly Father?” we i kamaot long “Face to Face with Elder and Sister Renlund” ([worldwide youth broadcast], Aug. 5, 2017, FacetoFace.ChurchofJesusChrist.org Yu save givim taem long olgeta blong oli raetem wan leta, mo afta, invaetem olgeta blong serem wanem we oli bin raetem.

• Blong stap luk wan eksampol blong wan fetful mared i save givim insperesen long olgeta we yu stap tijim blong oli stap lukaotem blesing ia blong olgetawan. Wan wei blong mekem hemia i blong luklukbak long ol seksen blong mesej blong Elda L. Whitney Clayton: “Marriage: Watch and Learn” (Liahona, May 2013, 83–85). ?Wanem nao ol memba blong kworom o blong klas oli lanem aot long mesej ia abaot wei blong bildimap wan hapi mared we i no save finis? Ol memba blong kworom o blong klas oli save luklukbak tu long ol aedia insaed long “Kasem Wan Hapi Mared” insaed long Stap Tru long Fet (ol pej 116–118). Mo tu, oli save wajem “How Did Elder and Sister Bednar Meet?” we i kamaot long “Face to Face with Elder and Sister Bednar” ([worldwide youth broadcast, May 12, 2015], FacetoFace.ChurchofJesusChrist.org).

• Yu save askem ol memba blong klas blong tingting long sam samting we i save blokem olgeta blong go sil long tempol. ?Wanem nao yumi save mekem naoia blong save winim ol samting ia? Afta, oli save luklukbak long “Eternal Marriage” long japta 3 blong Preach My Gospel ([2019], 89) blong faenem ol prinsipol mo ol praktis we i lidim wan i go long hapi mared mo famli. Oli save raetem lis blong sam long ol samting we oli save mekem naoia blong rere from wan mared we i no save finis. ?Wanem i rol blong Sevya blong stap helpem yumi rere from mo kasem wan mared we i no save finis?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Doktrin mo Ol Kavenan 49:16–17; 131:1–4; 132:13–19 (Mared we i no save finis, i wan mas insaed long plan ia blong God)

• Gospel Topics, “Marriage,” topics.ChurchofJesusChrist.org

• (Vidio) “What Is a Temple Wedding Like?”, temples.ChurchofJesusChrist.org

• Elda D. Todd Christofferson i bin talem: “Blong talemaot long wol ol stamba trutok long saed blong mared mo famli, hem i no minim se yumi no lukluk o yumi daonem ol sakrifaes mo ol sakses blong olgeta we, gud famli, i wan ril samting long taem naoia. … Plante long ol samting ia oli gud, plante long ol samting ia, i nid—iven, samtaem evri samting ia we yu nidim blong naoia—yufala i save kasem long ol situesen we i jes nogud nomo. Wetem tras, mifala i testifae se Atonmen ia blong Jisas Kraes, olsem we plan i stap, mo long en, bambae i kam fulumap spes blong eni hadtaem o lus we i stap blong olgeta we oli tanem olgeta i go long Hem (“Why Marriage, Why Family,” Liahona, May 2015, 52).

Tij Folem Wei blong Sevya

Askem ol kwestin we bae i givim insperesen long olgeta we yu stap tijim blong oli tingting dip abaot mared we i no save finis mo filim insaed long hat, wan filing blong wok from gol ia. Lisin gud long ol ansa blong olgeta mo givim ansa wetem wan fasin we i kaen olsem we Spirit i talem long yu.