24 Oktoba

?Olsem Wanem Nao Mi Save “Yusum Ol Paoa blong Heven” Insaed long Laef blong Mi?

Doktrin mo Ol Kavenan 121–123

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, lidim wan toktok storian abaot ol samting we oli stap ia, mo mekem plan blong ol wei blong mekem wanem we yufala i stap toktok raon long hem (yufala i save disaed long wan presidensi miting wanem poen nao blong toktok raon long olgeta):

• Kworom o klas blong yumi. ?Huia i niu long wod blong yumi, mo olsem wanem nao yumi save helpem olgeta blong filim welkam? ?Wanem nao yumi stap mekem blong mekem se taem blong yumi long kworom o miting long klas i gat mining?

• Ol diuti o responsabiliti blong yumi. ?Wanem nao sam diuti mo responsabiliti we yumi gat olsem ol yang man mo ol yang woman? ?Olsem wanem nao yumi save mekem i kam moa gud?

• Laef blong yumi. Wanem nao yumi stap mekem blong kam moa olsem Jisas Kraes mo kasem paoa blong Hem long laef blong yumi? ?Wanem nao yumi stap mekem blong helpem ol famli blong yumi blong kam long Hem?

Long en blong lesen, sapos i stret, mekem olgeta samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Prishud atoriti mo paoa oli no sem samting. Wan i save kasem prishud atoriti tru long fasin blong putum han antap long hed—oli save odenem ol man i go long wan ofis blong prishud, mo oli save setem apat tugeta, ol man mo ol woman blong kasem wan koling. Be paoa blong prishud—paoa blong God, o “ol paoa blong heven”—oli save yusum nomo “folem ol prinsipol blong stret mo gud fasin” (Doktrin mo Ol Kavenan 121:36), mo tugeta, ol man mo ol woman, oli save yusum paoa ia. Sapos yumi wanem seves blong yumi long ol nara man oli gat paoa mo oli jenisim laef, yumi nid blong stap klin inaf blong singaotem ol paoa blong heven.

?Olsem wanem long ol memba blong kworom o blong klas? ?Oli save olsem wanem blong yusum paoa blong prishud? ?Olsem wanem laef mo seves blong olgeta bae i defren sapos oli save haremsave hemia? Tingting hevi long ol kwestin ia taem yu stap stadi long Doktrin mo Ol Kavenan 121. Bae i gud tu blong stadi long tufala mesej blong Presiden Russel M. Nelson. Wan i go long olgeta we oli kasem prishud—“The Price of Priesthood Power” (Liahona, May 2016, 66–69). Narawan i go long olgeta sista—“Ol Rij Samting long Saed blong Spirit” (Liahona, Nov 2019, 76–79).

Prishud paoa i kam tru long fasin blong laef long wan stret mo gud laef.

Stap Lan Tugeta.

Blong statem wan toktok storian abaot prishud paoa, yu save askem ol memba blong kworom o klas blong serem wan samting we oli bin lanem abaot paoa ia aot long riding blong olgeta aot long Doktrin mo Ol Kavenan 121 long wik ia. Sapos i helpem yu, yu save givim tingting se oli save lukluk tru long ol ves 34–46 blong faenem evri ples we oli yusum toktok ia, paoa mo afta, oli serem wanem we oli lanem. Yu save yusum olgeta aktiviti ia blong helpem ol memba blong kworom o blong klas blong oli andastanem gud moa olsem wanem oli save yusum prishud paoa blong God insaed long laef blong olgeta.

• Bae i save help blong komperem olsem wanem “paoa” mo “fos” oli stap long wol ia wetem wanem we Lod i bin tijim long seksen 121 abaot wei we oli stap holemtaet prishud paoa i stap. Yu save mekem tu kolom long bod wetem ol heding ia: Paoa blong Wol mo Ol Paoa blong Heven. Ol memba blong kworom o blong klas oli save fulumap jat blong olgeta wetem ol toktok mo sentens we oli kamaot long Doktrin mo Ol Kavenan 121:34–46. ?Olsem wanem we, taem yumi stap andastanem ol ves ia i jenisim wei we yumi stap lukaot blong lidim ol narawan blong mekem gud, hemia ol fren mo ol memba blong famli, mo olgeta we yumi stap wok blong olgeta mo givhan long olgeta? Folem wanem i stap long ol ves ia, ?olsem wanem Tabu Spirit i save helpem yumi blong lidim tingting blong ol narawan long wan stret mo gud fasin?

• Blong helpem olgeta we oli holem Aronik Prishud blong lanem wei blong tekem paoa i kam long prishud seves blong olgeta, yu save soem ol defren kaen samting mo askem ol memba blong kworom blong oli traem talem praes blong wanwan long ol samting ia. ?From wanem sam long ol samting ia i moa sas i bitim sam moa? ?Wanem samting nao oli moa impoten long laef blong yumi, mo wanem praes nao yumi mas “pem” from ol samting ia? Ol memba blong kworom oli save luklukgud long mesej blong Presiden Russell M. Nelson: “Praes blong Prishud Paoa,” mo oli lukaotem praes we hem i talem se yumi mas pem blong kasem prishud paoa. ?Olsem wanem nao laef blong yumi mo laef blong ol narawan i jenis taem yumi stap givim seves wetem moa paoa blong Sevya?

• Blong helpem ol yang woman blong oli andastanem olsem wanem oli stap yusum prishud paoa, yu save askem olgeta blong tingting long sam taem we oli bin filim paoa blong God insaed long laef blong olgeta. Eksplenem se prishud paoa i paoa ia blong God. Oli save luklukgud insaed long mesej blong Presiden Russel M. Nelson: “Ol Rij Samting long Saed blong Spirit” blong faenem ol trutok abaot ol woman mo prishud paoa. ?Wanem nao Presiden Nelson i bin askem ol woman blong Jos blong mekem blong save “yusum fri paoa ia blong Sevya”? (pej 76; luk speseli ol fo paragraf we i stat wetem “Evri woman mo evri man”). ?Wetaem nao yumi bin yusum paoa ia blong blesem laef blong yumi mo laef blong ol narawan? ?Wanem nao Doktrin mo Ol Kavenan 121:39–43 i stap tijim yumi abaot wei blong mekem samting wetem paoa blong Lod insaed long laef blong yumi?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Russell M. Nelson, “Pulum Paoa blong Jisas Kraes Insaed long Laef blong Yumi,” Jeneral Konfrens, Epril 2017, churchofjesuschrist.org/general-conference/conferences?lang=bis

• David A. Bednar, “The Powers of Heaven,” Liahona, May 2012, 48–51

Tij Folem Wei blong Sevya

Taem yu stap lukaotem blong folem eksampol blong Jisas Kraes mo stap laef klin inaf blong yusum paoa blong Hem, bambae yu save tij wetem paoa mo atoriti.