ol yangfala gel i stap smael

10 Oktoba

?Olsem Wanem Mi Save Jenisim Laef blong Mi Moa Fulwan I Kam long Lod?

Doktrin mo Ol Kavenan 111–114

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; kolosap 10–20 minit

Long stat blong miting, ripitim tugeta Stamba Toktok blong Ol Kworom blong Aronik Prishud o Stamba Toktok blong Ol Yang Woman. Afta, antap long kaonsel tugeta abaot ol stret bisnis blong kworom o klas, ating yu wantem blong toktok raon long ol filing mo ol stamba toktok we oli kamaot long jeneral konfrens. Ating ol kwestin ia oli save help:

• ?Wanem stamba tingting o mesej we i kamaot klia long yumi?

• ?Wanem nao yu filim se Spirit i talem long yu blong go mekem from olgeta samting ia we yu bin lanem, o bin filim?

• ?Wanem nao yumi nidim blong mekem olsem wan kworom o klas blong tekem aksen folem kaonsel we yumi bin harem long jeneral konfrens?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong kworom o blong klas abaot ol plan mo invitesen we oli bin kasem long taem blong miting.

tijim doktrin pikja bokis

Tijim Doktrin

Wan adalt lida o yut i lidim; kolosap 25–35 minit

Rere long Yuwan long Saed blong Spirit

Blong jenisim laef blong yumi moa fulwan long Jisas Kraes, yumi mas trastem Hem mo stap obei long ol komanmen blong Hem—iven taem we ol had tes oli jalenjem yumi blong jenisim laef. Long 1837, sam memba blong Jos, wetem sam memba blong Kworom blong Olgeta Twelef Aposol, oli bin lusum testemoni blong olgeta mo oli bin tanem olgeta agensem Profet Josef Smit. Tomas B. Mars i bin Presiden blong Kworom blong Olgeta Twelef Aposol long tetaem ia. Taem we yu mo famli blong yu i stap rid long Doktrin mo Ol Kavenan 112 long wik ia, maet yufala i bin luk long kaonsel we Lod i bin givim blong helpem Tomas B. Mars blong jenisim laef blong hem stron moa (luk speseli long ol ves 10–26). ?Wanem nao kaonsel ia i stap tijim yu abaot fasin blong jenisim laef moa i go long Sevya?

?Olsem wanem yu save helpem ol memba blong kworom o blong klas blong kasem promes ia blong Sevya se “bae oli jenisim laef blong olgeta, mo bae mi mekem olgeta oli kamgud bakegen”? (Doktrin mo Ol Kavenan 112:13). ?Wanem eksperiens nao yu save serem? Taem yu stap rere blong tij, tingting blong luklukbak long mesej blong Sista Bonnie H. Cordon: “Trastem Lod mo No Dipen” (Jeneral Konfrens, Epril 2017, Churchofjesuschrist.org/general-conference/conferences?lang=bis) mo “Fasin blong Jenisim Laef” insaed long Stap Tru long Fet ([2004], 41–45).

yang man i stap ridim ol skripja

Ol skripja oli wan bigfala paoa taem yumi stap lukaotem blong jenisim laef blong yumi moa.

Stap Lan Tugeta.

?Olsem wanem? ?Ol memba blong kworom o blong klas blong yu oli save wanem nao i minim blong jenisim laef i go long Jisas Kraes? ?Oli save olsem wanem blong kam blong jenisim laef moa fulwan? Invaetem olgeta blong tingting hevi long ol kwestin ia taem oli stap luklukbak long Doktrin mo Ol Kavenan 112:10–26. ?Olsem wanem nao yumi save gohed blong stap jenisim laef blong yumi i go long Jisas Kraes iven long ol situesen we oli olsem ol jalenj? Maet yu save yusum wan o moa long wan long olgeta aktiviti ia blong helpem kworom o klas blong yu blong mekem se oli strong moa blong jenisim laef blong olgeta i go long Sevya.

• Alma 32:27–43 i save helpem olgeta we yu stap tijim blong andastanem olsem wanem fet blong olgeta i save kam strong moa mo oli save jenis moa fulwan i go long gospel blong Jisas Kraes. Mebi yu save serem ol memba blong kworom o blong klas long ol grup, mo askem wanwan grup blong ridim ol ves ia mo toktok raon long wanem oli stap tijim abaot fet mo fasin blong jenisim laef. Afta, askem wanwan grup blong serem wanem oli bin lanem. Maet yu save pusum olgeta blong toktok raon long hemia taem yu askem ol kwestin olsem: ?From wanem wan sid we i stap gro i kam wan tri i wan gudfala wei blong tokbaot fasin blong jenisim laef? Hem i minim wanem blong “go traem ol toktok blong mi”? (ves 27). ?Hem i minim wanem blong “givim gudfala kaekae long tri “? (ves 41). ?Olsem wanem nao bae yumi save talem se sid blong fasin blong jenisim laef i “stap solap, mo i givim kru, mo i stat blong gro” insaed long yumi? (ves 30). Givim taem long ol memba blong klas blong oli tingting hevi long wanem oli nidim blong mekem blong givim kaekae long jenis blong laef blong olgetawan i go long Jisas Kraes.

• I gat plante kaen paoa insaed long wol we oli agensem yumi blong jenisim laef i go long Jisas Kraes. Sapos yufala i ridim Hileman 5:12 i save tijim ol memba blong kworom o blong klas olsem wanem blong stap strong nomata bae i gat samting i kam agens. ?Hem i minim wanem blong “bildimap fandesen blong yu” antap long strong ston ia we i Jisas Kraes? Yu save givim wok long wanwan blong ridim wan pat blong mesej blong Elda Quentin L. Cook: “Ol Fandesen blong Fet” (Jeneral Konfrens, Epril 2017, Churchofjesuschrist.org/general-conference/conferences?lang=bis) mo askem olgeta blong lukaotem ol eksampol mo ol kaonsel we bae i helpem olgeta blong bildimap fandesen blong olgeta antap long strong ston we i Sevya.

• ?Yu yu save tingting long wan niu wei blong soemaot prinsipol ia we Sista Bonnie H. Cordon i bin tokbaot long mesej ia blong hem: “Trastem Lod mo No Dipen”? Eksampol, yu save serem kworom o klas blong yu i go long ol smol grup mo givim jalenj long wanwan grup blong bildimap wan samting we i tolwan long wan samting we i no flat, mo oli yusum ol blok o ol nara samting. Afta, toktok raon long hao nao hemia i go wetem mesej blong Sista Cordon. Afta long hemia, kworom o klas i save luklukgud insaed long mesej ia blong faenem ol tingting we hem i bin givim blong wei blong kipim laef blong yumi i gat Jisas Kraes i stap long senta blong hem. ?Wanem eksperiens nao yumi save serem taem yumi stap dipen nomo long save blong yumiwan, o taem yumi trastem Sevya?

Mekem Samting Wetem Fet

Leftemap tingting blong ol memba blong kworom o blong klas blong tingting hevi mo raetemdaon wanem bae oli mekem blong mekem folem ol strong tingting mo filing we oli kasem tedei. ?Olsem wanem lesen blong tedei i go wetem ol gol blong olgetawan, we oli bin mekem? Sapos oli wantem, ol memba blong kworom o blong klas oli save serem ol aedia blong olgeta.

Ol Sapot Risos

• Alma 5 (Alma i stap tij abaot fasin blong jenisim laef)

• David A. Bednar, “Converted unto the Lord,” Liahona, Nov. 2012, 106–9

• Richard J. Maynes, “The Joy of Living a Christ-Centered Life,” Liahona, Nov. 2015, 27–30

• Becky Craven, “Lukaotgud agens Lukaot Wanwan Taem,” Liahona, Mei 2019, 9–10

Tij Folem Wei blong Sevya

Sevya i tijim: “Ol tok ia we mi stap tijim ol man long hem, oli no blong mi nomo, oli kamaot long God we i [sendem] mi mi kam” (Jon 7:16). Hem i bin tijim doktrin we Hem i bin lanem aot long Papa blong Hem. ?Olsem wanem nao yu save sua se yu stap tijim tru doktrin? (Luk long Teaching in the Savior’s Way [2016], 20–21.)