Ritembwa 26

Bukin Tera a Kakaawaki Utu?

“Te Utu: Te Katanoata Nakon te Aonaaba”

Uaia ni Marooro

Kairaki iroun kaain te beretitentii n te kooram ke te kiraati; e na kabanea 10–20 te miniti

Ni moan waakin te boowi, manga atonga riki Ana Botoniango Te Nakoanibonga ae te Aaron ke Ana Botoniango te Bootaki n Ataeinnaine. Ngkanne kaira te marooro iaon bwaai n aron aikai, ao bairei kawai aika kam na karaoi iaon bwaai aika kam maroroakin (kam kona ni bairei inanon ami bowi n beretientii bwaai aika a na maroroakinaki):

• Ara kooram ke ara kiraati. Antai aika a boou n ara uoote, ao ti na kanga ni kaotia nakoia bwa a butimwaeaki? Tera ae ti karaoia bwa e aonga ni manena ara tai n ara kooram ke ara kiraati?

• Ara beku ke mwiokoara. Baikara katabeara ao tibwangara ngkai ataeinimwane ao ataeinnaine ngaira? Ti na kanga ni kakoroi nanoia?

• Maiura. Tera ae ti karaoia bwa ti aonga ni katotonga riki Iesu Kristo ao ni karekea Mwakana inanon maiura? Tera ae ti karaoia ni buokiia ara utu n roko Nakoina?

N tokin te reirei, ngkana e riai, karaoi waaki aikai:

• Kaota koauan te reirei are e reiakinaki.

• Kauringiia kain te kooram ke te kiraati iaon te baire ao te kakao are a karaoia n tain te bootaki.

Reirei te Reirei

Kairaki iroun te tia kairiiri ae ikawai ke te kairake; e na kabanea 25–35 te miniti

Katauraoiko n te Maiu n Tamnei

Utu n tatabemaniia a kaokoro, ao akea te utu ae kororaoi. Ma iai Ara Karo i Karawa aika kororaoi, aika a tangiria bwa ti na karekea te kakabwaia ni maiuakina te kukurei bwa utu aika akea tokiia. Ni buokiira ni kakoroa nanon aei, e a tia te Atua ni kairiia burabeti ao abotoro bwa a na katanoatai koaua aika akea tokiia inanon “Te Utu: Te Katanoata Nakon te Aonaaba” (ChurchofJesusChrist.org).

N am tai ni katauraoi n anga reirei iaon kakaawakiia utu, iangoia bwa bukin tera e kakaawaki iroum am utu. Tera te bwai ae a tia ni karaoia Iesu Kristo ni buoka am utu ni karekea te kukurei? Ngkana ko katauraoi n anga reirei, ko kona ni kamatebwaia “Te Utu: Te Katanoata Nakon te Aonaaba” (ChurchofJesusChrist.org), “Te Utut” inanon Ibukin Kakorakorakiia Kairake ([2011], 14–15), ao ana rongorongo Unimwaane D. Todd Christofferson “Why Marriage, Why Family” (Liahona, Meei 2015, 50–53). Tera reirei man bwaai n ibuobuoki aikai aika ko namakin bwa a na uaana nakoia ake ko reireiniia?

Te utu e bon kakaawaki nakon ana babaire te Tama are i Karawa.

Te Uaia n Reirei

Ni moana te marooro iaon kakaawakiia utu, ko kona n tuanga te kooram ke te kiraati te bwai ae a reiakinna n taekan te kukurei ni maiun te utu ngke a wareka “Te Utu: Te Katanoata Nakon te Aonaaba” n te mweenga. Tera ae a reiakinna are kona ni buokiia ni kakorakoraia aia utu? Ngkanne rinea teuana ke ae raka riki te waaki ni kakukurei aika i nano n buokiia kaain te kooram ke te kiraati ni karabaaba ootaia bwa bukin tera a rang kakaawaki utu nako n ana babaire Tamara are i Karawa.

• Kiibu inanon “Reitan Bwaai n Mwakuri” a boutokai koaua mai ieta inanon te katanoata nakon te utu. Tao ko kona ni mwiokoia kooram ke kaain te kiraati n tatabemaniia nako bwa ana wareka teuana mai ibuakon kiibu aikai ao imwiina kakaea man te katanoata n te utu te kibu n taeka are e irekereke ma a na kibu teuanne ke neienne. A kona kaain te kooram ke te kiraati n tibwaua te bwai ae kunea teuanne ke neienne.

• Maiuakinan ana reirei Iesu Kristo e na kairiko nakon te kukurei ni koaua ao n teimatoa inanon ara utu. Ni buokiia kaain te kooram ke te kiraati n ataa te bwai aei, ko kona ni kaoia aomata n tatabemaniia n rinea anuan maiun Kristo (taraa “How Do I Develop Christlike Attributes?” mwakoro 6 n Tataekina Au Euangkerio [2019], 121–29) ao ngkanne kakaea te kibu ke te rongorongo mairoun te burabeti ae reirei te anua anne. Ngkai kaain te kooram ke te kiraati a tibwaua te bwai ae a kunea, a kona ni kaeka teuana ke e mwaiti riki titiraki aikai: E na kanga maiuakinan anuan maiun Kristo ae bwanin aei n roota au utu? Tera ae I reiakinna man ana banna ni katooto te Tia Kamaaiu n aron kabonganakin te anua ni maiu aei inanon au utu?

• E reirei Beretitenti Russell M. Nelson: “Te tia kakaitara e kakorakora ana buaka iaon ara onimaki ao iaora ao ara utu n te tai ae rang waekoa” (“Opening Remarks,” Liahona, Nobembwa 2018, 7). Ni buokiia kaain te kooram ke te kiraati ni kaitarai buaka aikai, ko kona ni kaoia bwa ana koroi iaon te burakibooti tabeua anua ao katei are e karikirakei Tatan n te aro bwa e na kamamarai utu. Bukin tera a kakamaaku bwaai aikai nakoiia utu? Ngkanne kaain te kooram ke te kiraati ana ukeuke iaon te kaitiua ni mwakoro n te katanoata ibukin te utu ibukin anua ao katei are e kona ni n totokoa ana buaka Tatan. Ti na kanga n ukoukora ana ibuobuoki te Tia Kamaiu ni karikirakei anua ao katei aikai? Ngkai mwakoron te marooro aei, ko kona ni kaota te witeo “Proclamation” (ChurchofJesusChrist.org). Ti na kanga ni kamanoia ara utu man ana kairoro Tatan?

Mwakuri inanon te Onimaki

Kaungaiia kain te kooram ke te kiraati ni iangoia ao korea mwiin te bwai are a na karaoia ni karaoa nanon te namakin are a karekea n te bong aei. E kanga te reirei n te bong aei ni irekereke ma oin aia kouru are a tia ni karaoia? Ngkana a tangiria, a kona kaain te kooram ke te kiraati n tibwa aia iango.

Reitan Bwaai n Mwakuri

• I-Rom 8:16–17; Ebera 12:9 (Ngaira natin Tamara are i Karawa)

• Karikani Bwaai 2:18, 24; Reirei ao Berita aika Tabu 131:1–4 (E katabua te mare te Atua)

• Motiaea 4:14–15; Reirei ao Berita aika Tabu 68:25–29; 93:40–50 (A riai kaaro n reireiniia aia ataei te euangkerio)

• L. Tom Perry, “Why Marriage and Family Matter—Everywhere in the World,” Liahona, Meei 2015, 39–42

• “Families Can Be Together Forever,” “The Home Is a Divine Institution,” witeo, ChurchofJesusChrist.org

Anga Reirei n Ana Kawai te Tia Kamaiu

E kaoia Ana reirei te Tia Kamaiu ni kakoaua, ao ngke a karaoia, te Tamnei e ringa nanoia. N am tai n anga reirei, kaoiia kaain te kooram ke te kiraati n tibwauai aia koaua iaon kakaawakin te utu n ana babaire te Atua.