26 diciembre

K’a’ut naq aajel ru li junkab’al?

“Li Junkab’al: Jun Jek’inb’il Aatin choq’ re li Ruchich’och’ ”

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. Aniheb’ li ak’ sa’ qateep, ut chan ru taqak’eheb’ chireek’a naq k’ulb’ileb’ qab’aan? K’a’ru yooko chixb’aanunkil re naq chaab’ilaq li ch’utam choq’ qe?

• Li k’a’ru teneb’anb’il sa’ qab’een. K’a’ru li k’anjel teneb’anb’il sa’ qab’een jo’ saaj winq malaj ixq? Chan ru naru taqab’aanu li k’anjel a’an chi chaab’il?

• Sa’ li qayu’am. K’a’ru yooko chixb’aanunkil re wank jo’ li Jesukristo ut re xk’ulb’al lix wankil sa’ li qayu’am? K’a’ru yooko chixb’aanunkil re xtenq’ankil li qajunkab’al chi chalk rik’in li Jesukristo?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Jalan jalanqeb’ li junkab’al, ut maajun nakana chi maak’a’ xmajelal. A’b’an maak’a’ xmajelal li qachoxahil na’ qayuwa’, ut neke’raj naq too’osob’tesiiq re naq taasaho’q qach’ool sa’ li qajunkab’al chi junelik. Re tooruuq chi osob’tesiik chi jo’kan, li Dios kixmusiq’aheb’ lix profeet ut apostol chixch’olob’ankil li junelikil na’leb’ sa’ “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org).

Naq nakakawresi li tzolok chirix li junkab’al, k’oxla k’a’ut naq aajel ru laa junkab’al choq’ aawe. K’a’ru ak xb’aanu li Jesukristo re xtenq’ankil laa junkab’al chixtawb’al xsahil xch’ool? Naq nakakawresi li tzolok, naru taawil “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org), “Li junkab’al” sa’ Choq’ re Xkawilaleb’ li Saaj ([2011], 14–15), ut li raatin li Elder D. Todd Christofferson “K’a’ru aj-e li sumlaak, k’a’ru aj-e li junkab’al” (Jolomil ch’utub’aj-ib’ re abril 2015). Ma wan li na’leb’ sa’eb’ li esil a’in li tixtenq’aheb’ li saaj?

Li junkab’al wan choq’ xch’oolil lix k’anjel li qaChoxahil Yuwa’.

Tzolok sa’ komonil

Re xch’olob’ankil naq aajel ru li junkab’al, naru taapatz’ reheb’ li saaj k’a’ru xe’xtzol chirix li sahil ch’oolejil sa’ li junkab’al naq xe’ril “Li Junkab’al: Jun Jek’inb’il Aatin choq’ re li Ruchich’och’ ” sa’ rochocheb’. K’a’ru xe’ril li tixtenq’aheb’ chixkawob’resinkileb’ lix junkab’al? Chirix a’an, naru xb’aanunkil a’in re xtenq’ankileb’ li saaj chixtawb’al ru k’a’ut naq aajel ru li junkab’al sa’ xk’anjel li qaChoxahil Yuwa’.

• Eb’ li raqal re loq’laj hu sa’ “Xkomon chik li tenq’ ” neke’xxaqab’ xwankil li musiq’anb’il na’leb’ li wan sa’ li jek’inb’il aatin chirix li junkab’al. Naru taapatz’ reheb’ li saaj naq te’rileb’ li raqal a’in, toja’ naq te’ril li jek’inb’il aatin chirix li junkab’al re te’xtaw li na’leb’ li naxk’am rib’ rik’in li raqal sa’ loq’laj hu. Naru te’xwotz li na’leb’ xe’xtaw.

• Xyu’aminkil li raatin li Jesukristo naxk’am xb’e li junkab’al toj sa’ li tz’aqal rahok li junelik nakana. Re xtenq’ankileb’ li saaj chixtawb’al ru a’in, naru taapatz’ reheb’ naq te’xsik’ ru jun reheb’ lix chaab’il na’leb’ li Kristo (chi’ilmanq “¿Cómo desarrollo atributos semejantes a los de Cristo?” ch’ol 6 re Predicad Mi Evangelio [2019], 115–124), toja’ naq te’xtaw jun raqal re loq’laj hu malaj jun profeetil aatin li naxk’ut li chaab’il na’leb’ a’an. Naq yookeb’ chixwotzb’al li na’leb’ xe’xtaw, naru te’xsumeheb’ li patz’om a’in: Chan raj ru taawanq injunkab’al wi ta tinyu’ami chi tz’aqal li chaab’il na’leb’ a’in re li Kristo? Chan ru naq lix b’aanuhom li Kolonel naxk’ut chiwu xyu’aminkil li chaab’il na’leb’ a’in sa’ lin junkab’al?

• Li Awa’b’ej Russell M. Nelson kixye: “Laj tza yoo chixk’ihankil lix pleetihom chirix li paab’aal, chiqix laa’o, ut chirix li qajunkab’al” (“Aatin sa’ xtiklajik,” Jolomil ch’utub’aj-ib’ re octubre 2018). Re xtenq’ankileb’ li saaj chixkolb’al rib’ chiru laj tza, naru taapatz’ reheb’ naq te’xtz’iib’a chiru li pizarron li na’leb’ naxpuktesi laj Satanas re xq’unob’resinkil xmetz’ew li junkab’al. K’a’ut naq moko us ta li na’leb’ a’in choq’ re li junkab’al? Chirix a’an, eb’ li saaj naru te’ril xwuq li raqal re li jek’inb’il aatin chirix li junkab’al, re te’xtaw k’a’ru tixram ru xpleetleb’ laj Satanas. Chan ru taqasik’ lix tenq’ li Kolonel re roksinkileb’ li na’leb’ a’in sa’ qach’ool ut sa’ qab’aanuhom?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Romanos 8:16–17; Hebreos 12:9 (Laa’o ralal xk’ajol li qaChoxahil Yuwa’)

• Genesis 2:18, 24; Tzol’leb’ ut Sumwank 131:1–4 (Li Dios kixk’ojob’ li sumlaak)

• Mosiah 4:14–15; Tzol’leb’ ut Sumwank 68:25–29; 93:40–50 (Eb’ li na’b’ej yuwa’b’ej tento te’xk’ut li evangelio chiruheb’ li ralal xk’ajol)

• L. Tom Perry, “K’a’ut naq aajel ru li sumlaak ut li junkab’al—yalaq b’ar sa’ li ruchich’och’,” Jolomil ch’utub’aj-ib’ re abril 2015

• “Las familias pueden ser eternas,” “El hogar es una institución divina,” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixb’oqeb’ lix tzolom chixch’olob’ankil li yaal, ut naq ke’xb’aanu, li Musiq’ej kixtoch’ xch’ooleb’. Naq yookat chi k’utuk, patz’ reheb’ li saaj naq tex’wotz lix nawom naq aajel ru li junkab’al sa’ xk’anjel li Dios.