12 diciembre

Chan ru tintaw xsumenkileb’ lin patz’om?

Eb’ lix Raqalil li Paab’aal ut li Awa’b’ejil Yehom 1 ut 2

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ruheb’ li k’anjel ak xqab’aanu sa’ komonil? Ma chaab’il x’el? K’a’ru li chaab’il x’el, ut k’a’ru li naru xchaab’ilob’resinkil?

• Li k’a’ru teneb’anb’il sa’ qab’een. Ani naraj ru li qatenq’? Chan ru taqatenq’aheb’?

• Sa’ li qayu’am. K’a’ruheb’ li meta xqak’ojob’ qajunes qib’? Ma wan k’a’ru xqak’ul li naru xyeeb’al resil? K’a’ru li osob’tesink ak xqak’ul?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

Ak qe naq wankeb’ qapatz’om. Naqapatz’ k’a’ru taak’ulmanq sa’ qayu’am ut sa’ li ruchich’och’. Wan ajwi’ qapatz’om chirix li Dios ut li k’a’ru naraj choq’ qe. Naq nakawil Awa’b’ejil Yehom 1 ut 2 chiru li xamaan a’in, k’e reetal k’a’ru ke’xb’aanu li profeet ut li apostol re xtawb’al xsumenkileb’ lix patz’om (li tusleb’ aatin re li xamaan a’in sa’ Kim Taaqehin—Choq’ reheb’ li komon ut li junkab’al maare tatxtenq’a). Chan ru naq eb’ laa patz’om xatxtenq’a chixtzolb’al li evangelio? K’a’ru naru taab’aanu re xtenq’ankileb’ li saaj chixsik’b’al lix sumenkileb’ lix patz’om chirix li evangelio rik’in paab’aal? Naq nakakawresi li tzolok, naru taawil Tzol’leb’ ut Sumwank 6:14–15; 9:7–9 ut “Adquirir conocimiento espiritual” sa’ Documento de base sobre el Dominio de la doctrina ([2016], 2–3).

Naru taakawuq lix nawom qach’ool naq naqasik’ xsumenkileb’ li qapatz’om rik’in paab’aal.

Tzolok sa’ komonil

Naq eb’ li saaj xe’ril Awa’b’ejil Yehom 1 ut 2 chiru li xamaan a’in, maare xe’xtaw xna’leb’ chirix xk’ulb’al xsumenkileb’ lix patz’om chirix li evangelio. Ke’ xhoonaleb’ re naq te’rileb’ li awa’b’ejil yehom, ut re te’xwotz li xe’xtzol chirix xk’ulb’al li na’leb’ chi k’utb’esinb’il. Naru xb’aanunkil a’in re xtenq’ankileb’ li saaj chixtawb’al ru chan ru te’xsik’ xsumenkileb’ lix patz’om chirix li evangelio.

• Wan sa’eb’ li raqal a’in li na’leb’ chirix li patz’ok ut xk’ulb’al xsumenkil: Mateo 7:7; Tzol’leb’ ut Sumwank 6:14–15; 9:7–9. Eb’ li saaj naru te’rileb’ li raqal a’in sa’ komonil ut te’xtz’iib’a chiru li pizarron li na’leb’ xe’xtaw. K’a’ut naq li qaChoxahil Yuwa’ ink’a’ junelik naxsume li qapatz’om chi tz’aqal malaj sa’ junpaat? Chan ru toj taqak’ut li qapaab’aal naq yooko chiroyb’eninkil li sumeek? (chi’ilmanq Tzol’leb’ ut Sumwank 19:23; 78:18). Naru taawotz resil naq xwan laa patz’om chirix li evangelio ut xak’ul xsumenkil. Patz’ reheb’ li saaj naq te’xye chan ru ak xe’xnumsi ajwi’ a’an sa’ xyu’am

• Ani neke’ru li saaj chixk’oxlankileb’ sa’ loq’laj hu li ke’xk’ul li k’utb’esinb’il na’leb’ chirix naq ke’wan xpatz’om? (Wi na’ajman ru, naru taaye reheb’ naq te’roksiheb’ li raqal sa’ “Xkomon chik li tenq’.”) Eb’ li saaj naru te’ril resileb’ li kristiaan a’an ut te’xk’e reetal k’a’ru ke’xpatz’, chan ru ke’xsik’ xsumenkil, ut k’a’ru li sumeek ke’xk’ul. K’a’ru na’leb’ neke’xk’ut chiqu li kristiaan a’in? Chan ru taqoksi li k’a’ru xqatzol sa’ xsik’b’al xsumenkileb’ li qapatz’om? Rochb’een a’in, naru taak’ut “¿Cómo puedo vivir mejor las normas del Evangelio?” sa’ li video “Cara a Cara con el élder y la hermana Bednar” ([video choq’ reheb’ li saaj], 12 mayo, 2015, FacetoFace.ChurchofJesusChrist.org).

• Sa’ li raatin li Elder W. Mark Bassett “Choq’ re qayiib’ankil ut qatzolb’al sa’ musiq’ej” (Jolomil ch’utb’aj-ib’ re octubre 2016) wan li na’leb’ chirix xsik’b’al xsumenkileb’ li qapatz’om sa’ musiq’ej. Sa’ komonil naru teeril li kaahib’ chi raqal li natikla rik’in “Re xtawb’al ru lix muqmuukil na’leb’ li Dios.” Chirix a’an, patz’ reheb’ li saaj naq te’ril 1 Nefi 2:16, 19–20; 10:17–19; 11:1 ut naq te’xk’e reetal k’a’ru kixb’aanu laj Nefi re xsik’b’al xsumenkileb’ lix patz’om. Patz’ reheb’ naq te’xk’oxla k’a’ru te’xb’aanu re xtaaqenkil laj Nefi naq wankeb’ xpatz’om chirix li evangelio.

• Li seraq’ sa’ Markos 9:14–27 naru tixtenq’aheb’ li saaj naq wankeb’ xpatz’om malaj xk’a’uxl. Chiru li xamaan, patz’ re jun li saaj naq tixkawresi rib’ chixwotzb’al li seraq’ sa’ li tzoleb’aal. K’eheb’ li saaj sa’ oxib’ ch’uut, ut patz’ reheb’ naq te’ril jun reheb’ li oxib’ na’leb’ kixye li Elder Jeffrey R. Holland chirix li seraq’ a’an sa’ “Creo” (Liahona, mayo 2013, 93–95). Chan ru taqoksi li raatin li Elder Holland choq’ re li qak’a’uxl laa’o malaj choq’ re xk’a’uxl li ani naqanaw ru?

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’eb’ lix meta choq’ re xyu’am? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Enos 1:1–8; Alma 5:43–47; 40:3–5; Eter 2:18–23; Tzol’leb’ ut Sumwank 138:1–4, 11; Jose Smith—Resilal 1:10–18 (Eb’ li ani ke’xsik’ xsumenkileb’ lix patz’om)

• James B. Martino, “Chexsutq’iiq rik’in A’an ut eb’ li sumehom te’chalq,” Jolomil ch’utub’aj-ib’ re octubre 2015

• Temas del Evangelio, “Cómo responder preguntas sobre el Evangelio,” topics.ChurchofJesusChrist.org

Li k’utuk jo’ li Kolonel

Li Kolonel kixye reheb’ lix tzolom naq te’roksiheb’ li loq’laj hu re xtawb’al xsumenkileb’ lix patz’om. Chan ru te’osob’tesiiq li saaj naq te’xtzol xtawb’al xsumenkileb’ lix patz’om?