Hermano Jose, xbʼaan laj David Lindsley

28 noviembre

Chan ru kitenq’an laj Jose Smith sa’ xk’eeb’al chi uxmank lix k’uub’anb’il na’leb’ li qaChoxahil Yuwa’?

Tzolʼlebʼ ut Sumwank 135–136

K’uub’ank na’leb’ sa’ komonil

B’eresinb’il xb’aan jun komon re li awa’b’ejil re li molam malaj tzoleb’aal; 10-20 k’asal

Sa’ xtiklajik li ch’utam, yehomaq sa’ komonil li ch’ol aatin choq’ reheb’ li molam re li Tijonelil re Aaron malaj li ch’ol aatin choq’ reheb’ li Saaj Ixq. Toja’ naq tex’aatinaq chirixeb’ li na’leb’ chanchaneb’ li tz’iib’anb’ileb’ arin, ut teek’uub’ eena’leb’ re naq toj teeb’aanu li k’a’ru nekeye (naru teesik’ ru k’a’ru tex’aatinaq wi’ sa’ li ch’utam re li awa’b’ejil):

• Sa’ qamolam malaj qatzoleb’aal. K’a’ru naru taqab’aanu re xjunajinkileb’ li saaj? K’a’ruheb’ li meta taqaj xk’ojob’ankil sa’ komonil?

• Li k’a’ru teneb’anb’il sa’ qab’een. K’a’ru yooko chixb’aanunkil re xwotzb’al li evangelio? Ma wan ani sa’ qayanq li naru tixseraq’i junaq na’leb’ li xk’ul chaq sa’ xb’aanunkil li k’anjel re li santil ochoch ut re li qaxe’ qatoon?

• Sa’ li qayu’am. B’ar ak xqil li ruq’ li Qaawa’ sa’ li qayu’am? K’a’ru xwaklesi qach’ool naq xqatzoleb’ li loq’laj hu chiru li xamaan a’in?

A’ yaal jo’ na’ajman, b’aanu a’in sa’ xraqik li tzolok:

• Ch’olob’ xyaalaleb’ li na’leb’ li xe’k’utman.

• Ye wi’chik k’a’ru li xeye sa’ li ch’utam a’in naq teeb’aanu.

Xkʼutb’al li tzolʼlebʼ

B’eresinb’il xb’aan jun aj jolominel malaj jun li saaj; 25–35 k’asal

Xkawresinkil aawib’ sa’ musiq’ej

“Laj Jose Smith, li Profeet, ut aj Ilol naʼlebʼ re li Qaawaʼ, qʼaxal wiʼchik kixbʼaanu choqʼ re lix kolbʼalebʼ li winq saʼ li ruchichʼochʼ aʼin, chiru yalaq ani chik chi winq li wanjenaq jun sutaq chi saʼ, kaʼajwiʼ li Jesus naqʼaxok re” (Tzol’leb’ ut Sumwank 135:3). K’a’jo’ xnimal li aatin a’in chirix laj Jose Smith. Ma ak aak’oxlahom k’a’ru li naraj naxye choq’ aawe laa’at? Chan raj ru laa yu’am wi ta ink’a’ kik’ojob’aman wi’chik lix evangelio li Jesukristo? K’a’ru naru taab’aanu re xtenq’ankileb’ li saaj chixnawb’al sa’ xch’ool naq tz’aqal yaal lix k’anjel laj Jose Smith?

Naq nakakawresi li tzolok, chirix naq xawil Tzol’leb’ ut Sumwank 135, naru taawil ajwi’ li raatin li Awa’b’ej M. Russell Ballard’s message “Ma inkʼaʼ tooxik chi uubʼej saʼ xnimal ru li kʼanjel aʼin?” (Jolomil ch’utub’aj-ib’ re abril 2020) ut li raatin li Elder Neil L. Andersen, Laj Jose Smith,” (Jolomil Ch’utub’aj-ib’ re octubre 2014).

Osob’tesinb’il li qayu’am xb’aan li yaal li kik’ojob’aman wi’chik rik’in li profeet aj Jose Smith.

Tzolok sa’ komonil

Re aatinak chirix li kixb’aanu laj Jose Smith re xtenq’ankil lix k’uub’anb’il na’leb’ li qaChoxahil Yuwa’, naru tex’aatinaq chirix k’a’ru li xe’xtzol li saaj chirix li Profeet naq xe’ril Tzol’leb’ ut Sumwank 135 chiru li xamaan a’in. Naru te’xtz’iib’a chixjunileb’ li na’leb’ li neke’xnaw chirix li Kolonel ut lix evangelio b’antiox re laj Jose Smith. K’a’ut naq aajeleb’ ru li na’leb’ a’in sa’ lix k’uub’anb’il na’leb’ li qaChoxahil Yuwa’? Naru xb’aanunkil a’in re xtenq’ankileb’ li saaj chixtawb’al ru lix k’anjel laj Jose Smith sa’ li k’uub’anb’il na’leb’ re li kolab’-ib’.

• Re naq eb’ li saaj te’xkawresi rib’ re te’xtenq’aheb’ li ras riitz’in chixtawb’al ru naq aajel ru li profeet aj Jose Smith, naru te’ril “La restauración del Evangelio de Jesucristo por conducto de José Smith” sa’ li ch’ol 3 re Predicad Mi Evangelio ([2019], 36–38). Sa’ ka’kab’il malaj sa’ kok’ ch’uut, naru te’xtaw li na’leb’ li aajel ru xwotzb’al rik’ineb’ li ras riitz’in. Toja’ naq naru te’xyal xseraq’inkil resil laj Jose Smith chirib’ileb’ rib’. Patz’ reheb’ k’a’ru naru te’xb’aanu re xwotzb’al resil lix k’ojlajik wi’chik li evangelio. Naru te’xk’oxla ani aj-ik’in te’xwotz li esil a’an. Maare te’raj xyeeb’al chan ru ak xe’ru chixtenq’ankil jun li ras riitz’in chixnawb’al chirix laj Jose Smith.

• Patz’ reheb’ li saaj naq te’xk’oxla naq jun li ramiiweb’ sa’ li iglees tixye, “Ink’a’ ninnaw ma wan xnawom inch’ool chirix laj Jose Smith. K’a’ru nakanaw wi’ naq a’an jun li profeet? K’a’ raj ru taqaye re? K’a’ru naxk’ut chiqu lix yu’am laj Jose Smith sa’ Jose Smith—Resilal 1:8–19 chirix xk’ulb’al malaj xkawob’resinkil lix nawom qach’ool? Patz’ reheb’ li saaj naq te’xtz’iib’a wiib’ oxib’ li na’leb’ li naru te’xb’aanu re xkawob’resinkil xnawomeb’ xch’ool chirix laj Jose Smith, ut naq te’xb’aanu yal jun reheb’ sa’ li xamaan a’in.

• Re xtenq’ankileb’ li saaj chixtawb’al ru li k’anjel kixb’aanu li Dios rik’in laj Jose Smith, naru taapatz’ reheb’ naq te’rileb’ li perel 52–57 sa’ Enseñanzas de los Presidentes de la Iglesia: Gordon B. Hinckley (2016) malaj naq te’ril wiib’ oxib’ reheb’ li video sa’ “Xkomon chik li tenq’.” Naru te’xsik’ ru wiib’ oxib’ li na’leb’ li neke’xtaw sa’ li hu a’an li neke’xtoch’ xch’ooleb’. Naru te’xye k’a’ut naq neke’xb’antioxi naq li Qaawa’ kixk’ojob’eb’ wi’chik li na’leb’ a’in rik’in laj Jose Smith. Maare te’raj ajwi’ xtz’iib’ankil jun li ch’ina hu re xb’antioxinkil lix b’aanuhom laj Jose Smith li naxtenq’aheb’ chi nach’ok rik’in li Kolonel. Naru ajwi’ te’xk’oxla chan ru te’tz’aqonq chi jwal tz’aqal wi’chik sa’ li usilal k’eeb’il xb’aan li Dios rik’in laj Jose Smith.

K’anjelak rik’in paab’aal.

Waklesi xch’ooleb’ li saaj chixk’oxlankil ut chixtz’iib’ankil chan ru te’xb’aanu li k’a’ru x’ok sa’ xk’a’uxleb’. Chan ru naq li tzolok xe’xb’aanu anajwan tixtenq’aheb’ sa’ li neke’raj xjayalinkil sa’ xyu’ameb’? Wi te’raj, eb’ li saaj naru te’xwotz li neke’xk’oxla.

Xkomon chik li tenq’

• Tzol’leb’ ut Sumwank 35:17–18 (Li Qaawa’ kixk’ojob’ wi’chik lix tz’aqalil li evangelio rik’in li profeet aj Jose Smith)

• Russell M. Nelson, “Lix Hu laj Mormon: K’a’ru raj xjalanil laa yu’am chi maak’a’ li hu a’an?” Jolomil ch’utub’aj-ib’ re octubre 2017

• “Las enseñanzas de José Smith: La naturaleza de Dios,” “El ministerio de José Smith: El Libro de Mormón,” “El ministerio de José Smith: La organización de la Iglesia,” “El ministerio de José Smith: La restauración de la autoridad del sacerdocio,” “El ministerio de José Smith: Los templos,” (eb’ li video), ChurchofJesusChrist.org

Li k’utuk jo’ li Kolonel

Li Kolonel kixtenq’aheb’ lix tzolom chixyu’aminkil li evangelio chi anchaleb’ xch’ool. Chan ru taatenq’aheb’ li saaj chixk’eeb’al reetal chan raj ru xyu’am wulaj wulaj xb’aan lix nawom chirix laj Jose Smith?