alii talavou o loo mauaina se opo

26 Tesema

Aisea e Taua ai Aiga?

“O Le Aiga: O Se Folafolaga i le Lalolagi”

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O ai e fou mai i la tatou uarota, ma e faapefea ona tatou fesoasoani ia latou lagona ua taliaina i latou? O le a se mea o loo tatou faia e faaaoga tatau ai o tatou taimi i totonu o fono a le korama po o le vasega?

• O o tatou tiute po o matafaioi. O a ni o tatou tiute ma matafaioi i le avea ai ma alii talavou ma tamaitai talavou? E mafai faapefea ona tatou faataunuuina ma le atoatoa ia tiute ma matafaioi?

• O o tatou olaga. O a mea o loo tatou faia ia avea atili ai e pei o Iesu Keriso ma maua ai Lona mana i o tatou olaga? O a tatou mea o loo fai e fesoasoani ai i o tatou aiga ia o mai ia te Ia?

I le faaiuga o le lesona, pe a talafeagai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

E eseese aiga uma, ma e leai se aiga e atoatoa. Ae o i tatou uma lava e i ai ni Matua Faalelagi atoatoa, o e mananao tatou te maua le faamanuiaga o le ola fiafia e pei o aiga e faavavau. Ina ia fesoasoani tatou te ausia lenei mea, ua musuia e le Atua ia perofeta ma aposetolo e folafola mai upumoni e faavavau i le “O Le Aiga: O se Folafolaga i le Lalolagi” (ChurchofJesusChrist.org).

Ao e sauni e aʻoaʻo atu e uiga i le taua o aiga, mafaufau pe aisea e taua ai lou aiga ia te oe. O le a le matafaioi na faia e Iesu Keriso i le fesoasoani i lou aiga ia maua le fiafia? Ao e sauni e aoao atu, e mafai ona e suesue i le “O Le Aiga: O se Folafolaga i le Lalolagi” (ChurchofJesusChrist.org), “Aiga” i le Mo le Malosi o le Autalavou ([2011], 14–15), ma le savali a Elder D. Todd Christofferson “Aisea e Faaipoipo Ai, Aisea e Fai ai se Aiga” (Liahona, Me 2015, 50–53). O a mataupu faavae mai nei punaoa e te lagona o le a sili ona aogā ia i latou e te aoaoina?

savaliga sopo faaleaiga

O le aiga e totonugalemu i le fuafuaga a le Tama Faalelagi.

Aoao Faatasi

Ina ia amataina se talanoaga e uiga i le taua o aiga, e mafai ona e fesili atu i le korama po o le vasega mo ni mea na latou aoaoina e uiga i le fiafia i le olaga faaleaiga ao latou faitau i le “O Le Aiga: O se Folafolaga i le Lalolagi” i le fale. O a ni mea na latou aoaoina e ono fesoasoani ia i latou e faamalosia ai o latou aiga? Ona filifili lea o se tasi pe sili atu o gaoioiga o loo i lalo e fesoasoani i sui o le korama po o le vasega e faalolotoina o latou malamalamaaga i le mafuaaga e taua ai aiga i le fuafuaga a Tama Faalelagi.

• O mau o loo i le “Punaoa Lagolago” e lagolagoina upumoni musuia i le folafolaga i le aiga. Masalo e mafai ona e tofia ia tagata taitasi o le korama po o le vasega e faitau se tasi o nei mau ona sue lea o le folafolaga i le aiga e sue ai se fuaitau e faatatau i lana mau. E mafai e sui taitasi o le korama po o le vasega ona faasoa mai mea na ia mauaina.

• O le ola ai i aoaoga a Iesu Keriso e taitai atu ai i le fiafia moni ma tumau i totonu o o tatou aiga. Ina ia fesoasoani i tagata o le korama po o le vasega ia malamalama i lenei mea, e mafai ona e valaaulia tagata taitoatasi e filifili se uiga faaKeriso (tagai i le “E Faapefea Ona Ou Atiina Ae Uiga FaaKeriso?” i le mataupu e 6 i le Tala’i La’u Talalelei [2019], 121–29) ona sue lea o se mau po o se faamatalaga faaperofeta o loo aoao mai e faatatau i lena uiga. A o faasoa mai e le korama po o le vasega mea na latou maua, e mafai ona latou taliina se tasi po o le sili atu foi o fesili nei: E mafai faapefea e loʻu ola atoatoa i lenei uiga faaKeriso ona aafia ai loʻu aiga? O le a se mea ua ou aoaoina mai le faataitaiga a le Faaola e faatatau i le auala e faaaoga ai lenei uiga i loʻu aiga?

• Na aoao mai Peresitene Russell M. Nelson: “Ua faateteleina e le fili ana osofaiga i le faatuatua ma o tatou luga ma o tatou aiga i se saoasaoa matua uigaese” (“Malelega Amata,” Liahona, Nov. 2018, 7). Ina ia fesoasoani i tagata o le korama po o le vasega ia puipuia mai nei osofaiga, e mafai ona e valaaulia i latou e lisi i luga o le laupapa nisi o uiga ma amioga e uunaia e Satani ina ia faavaivaia ai aiga. Aisea e leaga ai nei mea i aiga? Ona sue lea e tagata o le korama po o le vasega le parakalafa lona fitu o le folafolaga i le aiga mo uiga ma amioga e mafai ona tetee atu ai i osofaiga a Satani. E mafai faapefea ona tatou sailia le fesoasoani a le Faaola i le atiina ae o nei uiga ma amio? I le avea ai o se vaega o lenei talanoaga, e mafai ona e faaali atu le vitio “Proclamation” (ChurchofJesusChrist.org). O le a se mea tatou te aʻoaʻoina e uiga i le auala e mafai ona tatou puipuia ai o tatou aiga mai faatosinaga a Satani?

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Roma 8:16–17; Eperu 12:9 (O i tatou o fanau a le Tama Faalelagi)

• Kenese 2:18, 24; Mataupu Faavae ma Feagaiga 131:1–4 (Na faauuina e le Atua le faaipoipoga)

• Mosaea 4:14–15; Mataupu Faavae ma Feagaiga 68:25–29; 93:40–50 (E tatau i matua ona aoao le talalelei i a latou fanau)

• L. Tom Perry, “Aisea e Taua ai le Faaipoipoga ma le Aiga—I Soo Se Mea i le Lalolagi,” Liahona, Me 2015, 39–42

• “Families Can Be Together Forever,” “The Home Is a Divine Institution,” vitio, ChurchofJesusChrist.org

Aoao Atu i le Ala a le Faaola

Sa valaaulia e le Faaola Ona soo e molimau atu, ma a o latou faia, sa pa’i atu le Agaga i o latou loto. A o e aoao atu, valaaulia sui o le korama po o le vasega e faasoa mai a latou molimau i le taua o le aiga i le fuafuaga a le Atua.