alii talavou o loo tusitusi i luga o le laupapa paepae

12 Tesema

E Faʻapefea Ona Ou Maua Tali i Au Fesili?

Mataupu Faavae o le Faatuatua ma Folafolaga Aloaia 1 ma le 2

aikona o le fefautuaai faatasi

Fefautuaai Faatasi

E taitaiina e se sui o le korama po o le au peresitene o le vasega; pe a ma le 10–20 minute

I le amataga o le fonotaga, toe fai faatasi le Autu o le Korama a le Perisitua Arona po o le Autu a Tamaitai Talavou. Ona taitaia lea o se talanoaga e uiga i mea e pei o nei, ma fuafua ni auala e galulue ai i mea tou te talanoaina (e mafai ona e filifili i se fonotaga a le au peresitene mea e talanoaina):

• O la tatou korama po o le vasega. O a ni gaoioiga na tatou faia talu ai nei? Pe na faamanuiaina? O a gaoioiga na lelei, ma e faapefea ona tatou faaleleia atili?

• O o tatou tiute po o matafaioi. O ai e manaomia la tatou auaunaga? E faapefea ona tatou fesoasoani ia i latou?

• O ō tatou olaga. O a sini o loo tatou galulue i ai faaletagata lava ia? O a aafiaga e mafai ona tatou faasoaina atu? O a ni faamanuiaga ua tatou mauaina?

I le faaiuga o le lesona, pe a talafeagai ai, fai mea nei:

• Molimau atu i mataupu faavae sa aoaoina.

• Faamanatu i tagata o le korama po o le vasega e uiga i fuafuaga ma valaaulia na tuuina atu i le fonotaga.

aikona o le aoao atu o le aoaoga faavae

Aoao atu le Aoaoga Faavae

E taitaia e se taitai matua po se talavou; pe a ma le 25–35 minute

Saunia Oe Lava Faaleagaga

O se mea masani le i ai o fesili. Tatou te manatunatu e uiga i lo tatou lumanai ma le lalolagi o siomia ai i tatou. E i ai foi a tatou fesili e uiga i le Atua ma Lana fuafuaga mo i tatou. Ao e faitauina le Folafolaga Aloaia 1 ma le 2 i lenei vaiaso, ia maitau mea na faia e perofeta ma aposetolo e maua ai tali i a latou fesili (atonu e mafai ona fesoasoani le (otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ). O le a le matafaioi o le sailia o tali i fesili na faia i lou aoaoina o le talalelei? O le a se mea e mafai ona e faia e uunaia ai tagata o lau korama po o le vasega e saili tali i a latou fesili o le talalelei i se auala faamaoni? Ao e sauniuni e aoao atu, mafaufau e iloilo le Mataupu Faavae ma Feagaiga 6:14–15; 9:7–9 ma le “Mauaina o le Malamalama Faaleagaga” i le Pepa Autu i le Atamai Faaleaoaoga Faavae ([2018], 3–5).

tamaitai talavou o loo vaavaai i lana tama’i komepiuta feaveai.

E mafai ona faamalosia a tatou molimau pe a tatou sailia tali ia tatou fesili i auala faamaoni.

Aoao Faatasi

Ao suesueina e tagata o lau korama po o le vasega le Folafolaga Aloaia 1 ma le 2 i lenei vaiaso, atonu na latou mauaina mataupu faavae e faatatau i le mauaina o tali i fesili e uiga i le talalelei. Tuu atu ia i latou ni nai minute e iloilo ai ia folafolaga ma faasoa mai mea ua latou aoaoina e uiga i le mauaina o faaaliga. O gaoioiga nei e mafai ona fesoasoani ia i latou o loo e aoaoina ina ia malamalama lelei ai i le auala e sailia ai tali i a latou fesili o le talalelei.

• O mau nei o loo aoaoina atu ai mataupu faavae e uiga i le faia o fesili ma le mauaina o tali: Mataio 7:7; Mataupu Faavae ma Feagaiga 6:14–15; 9:7–9. E mafai e lau korama po o lau vasega ona faitau faatasi nei fuaitau ma fai se lisi i luga o le laupapa o mataupu faavae latou te mauaina. Aisea e le atoatoa ai pe le vave tali mai ai le Tama Faalelagi i a tatou fesili? E faʻapefea ona faʻaauau pea ona faʻaalia lo tatou faʻatuatua ao faʻatali mo tali? (tagai i le Mataupu Faavae ma Feagaiga 19:23; 78:18). Mafaufau e faasoa atu se aafiaga i se taimi na i ai sau fesili e uiga i le talalelei ma mauaina se tali. Fai atu i sui o le korama po o le vasega e faasoa mai ni aafiaga talitutusa.

• Pe mafai ea e tagata o la outou korama po o le vasega ona mafaufau i tagata o loo i totonu o tusitusiga paia o ē na faia ni fesili na taitai atu ai i faaaliga? (Afai e manaʻomia, e mafai ona e faasino i latou i tusitusiga paia i lalo o “Punaoa Lagolago.”) E mafai e tagata o le korama po o le vasega ona faitau e uiga i nei tagata i tusitusiga paia ma faailoa mai fesili na latou fesiligia, auala na latou sailia ai tali, ma tali na latou mauaina. O le a se mea ua tatou aoao mai i nei faataitaiga? E faʻapefea ona tatou faʻaaoga mea tatou te aʻoaʻoina ao tatou sailia tali i a tatou lava fesili? I le avea ai o se vaega o lenei gaoioiga, e mafai foi ona e faaali atu le “E Mafai Faapefea Ona Ou Ola Lelei i Tulaga Faatonuina o le Talalelei?” mai le “Face to Face with Elder and Sister Bednar” ([faasalalauga a le autalavou i le lalolagi atoa], 12 Me, 2015, FacetoFace.ChurchofJesusChrist.org).

• O le savali a Elder W. Mark Bassett “Mo Lo Tatou Alualu i Luma ma le Aoaoina Faaleagaga” (Liahona, Nov. 2016, 52–54) o loo maua ai fautuaga i auala e sailia tali i fesili faaleagaga. E mafai e lau korama po o lau vasega ona faitau faatasi parakalafa e fa o lana savali lea e amata i le “Ina ia malamalama i mealilo a le Atua.” Ona valaaulia lea o le korama po o le vasega e faitau le 1 Nifae 2:16, 19–20; 10:17–19; 11:1 ma faailoa mai mea na faia e Nifae e saili ai tali i ana fesili. Valaaulia sui o le korama po o le vasega e mafaufau e uiga i mea o le a latou faia e mulimuli ai i le faataitaiga a Nifae pe a i ai ni a latou fesili e uiga i le talalelei.

• O le tala i le Mareko 9:14–27 e mafai ona fesoasoani i tagata o le korama po o le vasega pe a latou tauivi ma fesili po o masalosaloga. Ao lei oo i le aso o le vasega, valaaulia se tasi o lau korama po o lau vasega ia sau saunia e faasoa atu le tala. Ona vaevae lea o lau korama po o le vasega i ni vaega se tolu, ma tofi vaega taitasi e suesue se tasi o mea e tolu na matauina e Elder Jeffrey R. Holland i le tala mai lana savali ““Le Alii e, Ua Ou Faatuatua”” (Liahona, Me 2013, 93–95). E faʻapefea ona tatou faʻaaogaina mea na matauina e Elder Holland pe afai e i ai ni a tatou fesili po o masalosaloga po o se tasi tatou te iloa e uiga i le talalelei?

Faatino i le Faatuatua

Ia uunaia uso o le korama po o tagata o le vasega e mafaufau loloto ma faamaumau mea o le a latou faia e faatino ai lagona na latou maua i le asō. E faapefea e le lesona o le asō ona fesootai i sini faaletagata lava ia ua latou faia? Afai latou te mananao ai, e mafai e uso o le korama po o tagata o le vasega ona faasoa atu o latou manatu.

Punaoa Lagolago

• Enosa 1:1–8; Alema 5:43–47; 40:3–5; Eteru 2:18–23; Mataupu Faavae ma Feagaiga 138:1–4, 11; Iosefa Samita—Talafaasolopito 1:10–18 (Faataitaiga o tagata o sailia tali ia latou fesili)

• James B. Martino, “Liliu Atu ia te Ia ma o le a E Mauaina Tali,” Liahona, Nov. 2015, 58–60

• Autu o le Talalelei, “Answering Gospel Questions,” topics.ChurchofJesusChrist.org

Aoao Atu i le Ala a le Faaola

Sa uunaia e le Faaola i latou na Ia aoaoina e faaaoga tusitusiga paia e sue ai tali i a latou lava fesili. E faapefea ona faamanuiaina i latou o loo e aoaoina ao latou aoao pe faapefea ona maua tali i a latou fesili?